| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. ச²ந்த³ஸமாதி⁴ஸுத்தவண்ணனா
3. Chandasamādhisuttavaṇṇanā
825. ததியே ச²ந்த³ந்தி கத்துகம்யதாச²ந்த³ங். நிஸ்ஸாயாதி நிஸ்ஸயங் கத்வா, அதி⁴பதிங் கத்வாதி அத்தோ². பதா⁴னஸங்கா²ராதி பதா⁴னபூ⁴தா ஸங்கா²ரா, சதுகிச்சஸாத⁴கஸம்மப்பதா⁴னவீரியஸ்ஸேதங் அதி⁴வசனங். இதி அயஞ்ச ச²ந்தோ³திஆதீ³ஸு ச²ந்தோ³ ச²ந்த³ஸமாதி⁴னா சேவ பதா⁴னஸங்கா²ரேஹி ச, ச²ந்த³ஸமாதி⁴ ச²ந்தே³ன சேவ பதா⁴னஸங்கா²ரேஹி ச, பதா⁴னஸங்கா²ராபி ச²ந்தே³ன சேவ ச²ந்த³ஸமாதி⁴னா ச ஸமன்னாக³தா . தஸ்மா ஸப்³பே³ தே த⁴ம்மே ஏகதோ கத்வா அயங் வுச்சதி, பி⁴க்க²வே, ச²ந்த³ஸமாதி⁴ப்பதா⁴னஸங்கா²ரஸமன்னாக³தோ இத்³தி⁴பாதோ³தி வுத்தங். இத்³தி⁴பாத³விப⁴ங்கே³ (விப⁴॰ 437) பன ‘‘யோ ததா²பூ⁴தஸ்ஸ வேத³னாக்க²ந்தோ⁴ திஆதி³னா நயேன இமேஹி த⁴ம்மேஹி ஸமன்னாக³தா ஸேஸஅரூபினோ த⁴ம்மா இத்³தி⁴பாதா³தி வுத்தா.
825. Tatiye chandanti kattukamyatāchandaṃ. Nissāyāti nissayaṃ katvā, adhipatiṃ katvāti attho. Padhānasaṅkhārāti padhānabhūtā saṅkhārā, catukiccasādhakasammappadhānavīriyassetaṃ adhivacanaṃ. Iti ayañca chandotiādīsu chando chandasamādhinā ceva padhānasaṅkhārehi ca, chandasamādhi chandena ceva padhānasaṅkhārehi ca, padhānasaṅkhārāpi chandena ceva chandasamādhinā ca samannāgatā . Tasmā sabbe te dhamme ekato katvā ayaṃ vuccati, bhikkhave, chandasamādhippadhānasaṅkhārasamannāgato iddhipādoti vuttaṃ. Iddhipādavibhaṅge (vibha. 437) pana ‘‘yo tathābhūtassa vedanākkhandho tiādinā nayena imehi dhammehi samannāgatā sesaarūpino dhammā iddhipādāti vuttā.
அபிச இமேபி தயோ த⁴ம்மா இத்³தீ⁴பி ஹொந்தி இத்³தி⁴பாதா³பி. கத²ங்? ச²ந்த³ஞ்ஹி பா⁴வயதோ ச²ந்தோ³ இத்³தி⁴ நாம ஹோதி, ஸமாதி⁴ப்பதா⁴னஸங்கா²ரா ச²ந்தி³த்³தி⁴பாதோ³ நாம. ஸமாதி⁴ங் பா⁴வெந்தஸ்ஸ ஸமாதி⁴ இத்³தி⁴ நாம ஹோதி, ச²ந்த³ப்பதா⁴னஸங்கா²ரா ஸமாதி⁴த்³தி⁴யா பாதோ³ நாம. பதா⁴னஸங்கா²ரே பா⁴வெந்தஸ்ஸ பதா⁴னஸங்கா²ரா இத்³தி⁴ நாம ஹோதி, ச²ந்த³ஸமாதி⁴ பதா⁴னஸங்கா²ரித்³தி⁴யா பாதோ³ நாம, ஸம்பயுத்தத⁴ம்மேஸு ஹி ஏகஸ்மிங் இஜ்ஜ²மானே ஸேஸாபி இஜ்ஜ²ந்தியேவ.
Apica imepi tayo dhammā iddhīpi honti iddhipādāpi. Kathaṃ? Chandañhi bhāvayato chando iddhi nāma hoti, samādhippadhānasaṅkhārā chandiddhipādo nāma. Samādhiṃ bhāventassa samādhi iddhi nāma hoti, chandappadhānasaṅkhārā samādhiddhiyā pādo nāma. Padhānasaṅkhāre bhāventassa padhānasaṅkhārā iddhi nāma hoti, chandasamādhi padhānasaṅkhāriddhiyā pādo nāma, sampayuttadhammesu hi ekasmiṃ ijjhamāne sesāpi ijjhantiyeva.
அபிச தேஸங் தேஸங் த⁴ம்மானங் புப்³ப³பா⁴க³வஸேனாபி ஏதேஸங் இத்³தி⁴பாத³தா வேதி³தப்³பா³. பட²மஜ்ஜா²னஞ்ஹி இத்³தி⁴ நாம, பட²மஜ்ஜா²னஸ்ஸ புப்³ப³பா⁴க³பரிகம்மஸம்பயுத்தா ச²ந்தா³த³யோ இத்³தி⁴பாதோ³ நாம. ஏதேனுபாயேன யாவ நேவஸஞ்ஞானாஸஞ்ஞாயதனா, இத்³தி⁴வித⁴ங் ஆதி³ங் கத்வா யாவ தி³ப்³ப³சக்கு²அபி⁴ஞ்ஞா, ஸோதாபத்திமக்³க³ங் ஆதி³ங் கத்வா யாவ அரஹத்தமக்³கா³ நயோ நேதப்³போ³. ஸேஸித்³தி⁴பாதே³ஸுபி ஏஸேவ நயோ.
Apica tesaṃ tesaṃ dhammānaṃ pubbabhāgavasenāpi etesaṃ iddhipādatā veditabbā. Paṭhamajjhānañhi iddhi nāma, paṭhamajjhānassa pubbabhāgaparikammasampayuttā chandādayo iddhipādo nāma. Etenupāyena yāva nevasaññānāsaññāyatanā, iddhividhaṃ ādiṃ katvā yāva dibbacakkhuabhiññā, sotāpattimaggaṃ ādiṃ katvā yāva arahattamaggā nayo netabbo. Sesiddhipādesupi eseva nayo.
கேசி பன ‘‘அனிப்³ப³த்தோ ச²ந்தோ³ இத்³தி⁴பாதோ³’’தி வத³ந்தி. இத⁴ தேஸங் வாத³மத்³த³னத்தா²ய அபி⁴த⁴ம்மே உத்தரசூளவாரோ நாம ஆக³தோ –
Keci pana ‘‘anibbatto chando iddhipādo’’ti vadanti. Idha tesaṃ vādamaddanatthāya abhidhamme uttaracūḷavāro nāma āgato –
‘‘சத்தாரோ இத்³தி⁴பாதா³ – ச²ந்தி³த்³தி⁴பாதோ³, வீரியித்³தி⁴பாதோ³, சித்தித்³தி⁴பாதோ³, வீமங்ஸித்³தி⁴பாதோ³. தத்த² கதமோ ச²ந்தி³த்³தி⁴பாதோ³? இத⁴, பி⁴க்கு², யஸ்மிங் ஸமயே லோகுத்தரங் ஜா²னங் பா⁴வேதி நிய்யானிகங் அபசயகா³மிங் தி³ட்டி²க³தானங் பஹானாய பட²மாய பூ⁴மியா பத்தியா விவிச்சேவ காமேஹி…பே॰… பட²மங் ஜா²னங் உபஸம்பஜ்ஜ விஹரதி து³க்கா²படிபத³ங் த³ந்தா⁴பி⁴ஞ்ஞங், யோ தஸ்மிங் ஸமயே ச²ந்தோ³ ச²ந்தி³கதா கத்துகம்யதா குஸலோ த⁴ம்மச்ச²ந்தோ³, அயங் வுச்சதி ச²ந்தி³த்³தி⁴பாதோ³. அவஸேஸா த⁴ம்மா ச²ந்தி³த்³தி⁴பாத³ஸம்பயுத்தா’’தி (விப⁴॰ 457-458).
‘‘Cattāro iddhipādā – chandiddhipādo, vīriyiddhipādo, cittiddhipādo, vīmaṃsiddhipādo. Tattha katamo chandiddhipādo? Idha, bhikkhu, yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ diṭṭhigatānaṃ pahānāya paṭhamāya bhūmiyā pattiyā vivicceva kāmehi…pe… paṭhamaṃ jhānaṃ upasampajja viharati dukkhāpaṭipadaṃ dandhābhiññaṃ, yo tasmiṃ samaye chando chandikatā kattukamyatā kusalo dhammacchando, ayaṃ vuccati chandiddhipādo. Avasesā dhammā chandiddhipādasampayuttā’’ti (vibha. 457-458).
இமே பன லோகுத்தரவஸேனேவ ஆக³தா.
Ime pana lokuttaravaseneva āgatā.
தத்த² ரட்ட²பாலத்தே²ரோ ச²ந்த³ங் து⁴ரங் கத்வா லோகுத்தரத⁴ம்மங் நிப்³ப³த்தேஸி. ஸோணத்தே²ரோ வீரியங் து⁴ரங் கத்வா; ஸம்பு⁴தத்தே²ரோ சித்தங் து⁴ரங் கத்வா, ஆயஸ்மா மோக⁴ராஜா வீமங்ஸங் து⁴ரங் கத்வாதி. தத்த² யதா² சதூஸு அமச்சபுத்தேஸு டா²னந்தரங் பத்தெ²த்வா ராஜானங் உபனிஸ்ஸாய விஹரந்தேஸு ஏகோ உபட்டா²னே ச²ந்த³ஜாதோ ரஞ்ஞோ அஜ்ஜா²ஸயஞ்ச ருசிஞ்ச ஞத்வா தி³வா ச ரத்தோ ச உபட்ட²ஹந்தோ ராஜானங் ஆராதெ⁴த்வா டா²னந்தரங் பாபுணி. ஏவங் ச²ந்த³து⁴ரேன லோகுத்தரத⁴ம்மனிப்³ப³த்தகோ வேதி³தப்³போ³.
Tattha raṭṭhapālatthero chandaṃ dhuraṃ katvā lokuttaradhammaṃ nibbattesi. Soṇatthero vīriyaṃ dhuraṃ katvā; sambhutatthero cittaṃ dhuraṃ katvā, āyasmā mogharājā vīmaṃsaṃ dhuraṃ katvāti. Tattha yathā catūsu amaccaputtesu ṭhānantaraṃ patthetvā rājānaṃ upanissāya viharantesu eko upaṭṭhāne chandajāto rañño ajjhāsayañca ruciñca ñatvā divā ca ratto ca upaṭṭhahanto rājānaṃ ārādhetvā ṭhānantaraṃ pāpuṇi. Evaṃ chandadhurena lokuttaradhammanibbattako veditabbo.
ஏகோ பன – ‘‘தி³வஸே தி³வஸே உபட்டா²துங் ந ஸக்கோமி, உப்பன்னே கிச்சே பரக்கமேன ஆராதெ⁴ஸ்ஸாமீ’’தி குபிதே பச்சந்தே ரஞ்ஞா பஹிதோ பரக்கமேன ஸத்துமத்³த³னங் கத்வா பாபுணி. யதா² ஸோ, ஏவங் வீரியது⁴ரேன லோகுத்தரத⁴ம்மனிப்³ப³த்தகோ வேதி³தப்³போ³. ஏகோ ‘‘தி³வஸே தி³வஸே உபட்டா²னம்பி உரேன ஸத்திஸரஸம்படிச்ச²னம்பி பா⁴ரோயேவ, மந்தப³லேன ஆராதெ⁴ஸ்ஸாமீ’’தி க²த்தவிஜ்ஜாய கதபரிசயத்தா மந்தஸங்விதா⁴னேன ராஜானங் ஆராதெ⁴த்வா பாபுணி. யதா² ஸோ, ஏவங் சித்தது⁴ரேன லோகுத்தரத⁴ம்மனிப்³ப³த்தகோ வேதி³தப்³போ³.
Eko pana – ‘‘divase divase upaṭṭhātuṃ na sakkomi, uppanne kicce parakkamena ārādhessāmī’’ti kupite paccante raññā pahito parakkamena sattumaddanaṃ katvā pāpuṇi. Yathā so, evaṃ vīriyadhurena lokuttaradhammanibbattako veditabbo. Eko ‘‘divase divase upaṭṭhānampi urena sattisarasampaṭicchanampi bhāroyeva, mantabalena ārādhessāmī’’ti khattavijjāya kataparicayattā mantasaṃvidhānena rājānaṃ ārādhetvā pāpuṇi. Yathā so, evaṃ cittadhurena lokuttaradhammanibbattako veditabbo.
அபரோ – ‘‘கிங் இமேஹி உபட்டா²னாதீ³ஹி, ராஜானோ நாம ஜாதிஸம்பன்னஸ்ஸ டா²னந்தரங் தெ³ந்தி, தாதி³ஸஸ்ஸ தெ³ந்தோ மய்ஹங் த³ஸ்ஸதீ’’தி ஜாதிஸம்பத்திமேவ நிஸ்ஸாய டா²னந்தரங் பாபுணி. யதா² ஸோ, ஏவங் ஸுபரிஸுத்³த⁴ங் வீமங்ஸங் நிஸ்ஸாய வீமங்ஸது⁴ரேன லோகுத்தரத⁴ம்மனிப்³ப³த்தகோ வேதி³தப்³போ³தி. இமஸ்மிங் ஸுத்தே விவட்டபாத³கஇத்³தி⁴ கதி²தா.
Aparo – ‘‘kiṃ imehi upaṭṭhānādīhi, rājāno nāma jātisampannassa ṭhānantaraṃ denti, tādisassa dento mayhaṃ dassatī’’ti jātisampattimeva nissāya ṭhānantaraṃ pāpuṇi. Yathā so, evaṃ suparisuddhaṃ vīmaṃsaṃ nissāya vīmaṃsadhurena lokuttaradhammanibbattako veditabboti. Imasmiṃ sutte vivaṭṭapādakaiddhi kathitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. ச²ந்த³ஸமாதி⁴ஸுத்தங் • 3. Chandasamādhisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. ச²ந்த³ஸமாதி⁴ஸுத்தவண்ணனா • 3. Chandasamādhisuttavaṇṇanā
