| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. ச²ன்னஸுத்தங்
8. Channasuttaṃ
90. ஏகங் ஸமயங் ஸம்ப³ஹுலா தே²ரா பி⁴க்கூ² பா³ராணஸியங் விஹரந்தி இஸிபதனே மிக³தா³யே. அத² கோ² ஆயஸ்மா ச²ன்னோ ஸாயன்ஹஸமயங் படிஸல்லானா வுட்டி²தோ அவாபுரணங் 1 ஆதா³ய விஹாரேன விஹாரங் உபஸங்கமித்வா தே²ரே பி⁴க்கூ² ஏதத³வோச – ‘‘ஓவத³ந்து மங் ஆயஸ்மந்தோ தே²ரா, அனுஸாஸந்து மங் ஆயஸ்மந்தோ தே²ரா, கரொந்து மே ஆயஸ்மந்தோ தே²ரா த⁴ம்மிங் கத²ங், யதா²ஹங் த⁴ம்மங் பஸ்ஸெய்ய’’ந்தி.
90. Ekaṃ samayaṃ sambahulā therā bhikkhū bārāṇasiyaṃ viharanti isipatane migadāye. Atha kho āyasmā channo sāyanhasamayaṃ paṭisallānā vuṭṭhito avāpuraṇaṃ 2 ādāya vihārena vihāraṃ upasaṅkamitvā there bhikkhū etadavoca – ‘‘ovadantu maṃ āyasmanto therā, anusāsantu maṃ āyasmanto therā, karontu me āyasmanto therā dhammiṃ kathaṃ, yathāhaṃ dhammaṃ passeyya’’nti.
ஏவங் வுத்தே, தே²ரா பி⁴க்கூ² ஆயஸ்மந்தங் ச²ன்னங் ஏதத³வோசுங் – ‘‘ரூபங் கோ², ஆவுஸோ ச²ன்ன, அனிச்சங்; வேத³னா அனிச்சா; ஸஞ்ஞா அனிச்சா; ஸங்கா²ரா அனிச்சா; விஞ்ஞாணங் அனிச்சங். ரூபங் அனத்தா; வேத³னா… ஸஞ்ஞா… ஸங்கா²ரா… விஞ்ஞாணங் அனத்தா. ஸப்³பே³ ஸங்கா²ரா அனிச்சா; ஸப்³பே³ த⁴ம்மா அனத்தா’’தி.
Evaṃ vutte, therā bhikkhū āyasmantaṃ channaṃ etadavocuṃ – ‘‘rūpaṃ kho, āvuso channa, aniccaṃ; vedanā aniccā; saññā aniccā; saṅkhārā aniccā; viññāṇaṃ aniccaṃ. Rūpaṃ anattā; vedanā… saññā… saṅkhārā… viññāṇaṃ anattā. Sabbe saṅkhārā aniccā; sabbe dhammā anattā’’ti.
அத² கோ² ஆயஸ்மதோ ச²ன்னஸ்ஸ ஏதத³ஹோஸி – ‘‘மய்ஹம்பி கோ² ஏதங் ஏவங் 3 ஹோதி – ‘ரூபங் அனிச்சங், வேத³னா… ஸஞ்ஞா… ஸங்கா²ரா… விஞ்ஞாணங் அனிச்சங்; ரூபங் அனத்தா, வேத³னா … ஸஞ்ஞா… ஸங்கா²ரா… விஞ்ஞாணங் அனத்தா. ஸப்³பே³ ஸங்கா²ரா அனிச்சா, ஸப்³பே³ த⁴ம்மா அனத்தா’தி. அத² ச பன மே ஸப்³ப³ஸங்கா²ரஸமதே² ஸப்³பூ³பதி⁴படினிஸ்ஸக்³கே³ தண்ஹாக்க²யே விராகே³ நிரோதே⁴ நிப்³பா³னே சித்தங் ந பக்க²ந்த³தி நப்பஸீத³தி ந ஸந்திட்ட²தி நாதி⁴முச்சதி. பரிதஸ்ஸனா உபாதா³னங் உப்பஜ்ஜதி; பச்சுதா³வத்ததி மானஸங் – ‘அத² கோ சரஹி மே அத்தா’தி ? ந கோ² பனேவங் த⁴ம்மங் பஸ்ஸதோ ஹோதி. கோ நு கோ² மே ததா² த⁴ம்மங் தே³ஸெய்ய யதா²ஹங் த⁴ம்மங் பஸ்ஸெய்ய’’ந்தி.
Atha kho āyasmato channassa etadahosi – ‘‘mayhampi kho etaṃ evaṃ 4 hoti – ‘rūpaṃ aniccaṃ, vedanā… saññā… saṅkhārā… viññāṇaṃ aniccaṃ; rūpaṃ anattā, vedanā … saññā… saṅkhārā… viññāṇaṃ anattā. Sabbe saṅkhārā aniccā, sabbe dhammā anattā’ti. Atha ca pana me sabbasaṅkhārasamathe sabbūpadhipaṭinissagge taṇhākkhaye virāge nirodhe nibbāne cittaṃ na pakkhandati nappasīdati na santiṭṭhati nādhimuccati. Paritassanā upādānaṃ uppajjati; paccudāvattati mānasaṃ – ‘atha ko carahi me attā’ti ? Na kho panevaṃ dhammaṃ passato hoti. Ko nu kho me tathā dhammaṃ deseyya yathāhaṃ dhammaṃ passeyya’’nti.
அத² கோ² ஆயஸ்மதோ ச²ன்னஸ்ஸ ஏதத³ஹோஸி – ‘‘அயங் கோ² ஆயஸ்மா ஆனந்தோ³ கோஸம்பி³யங் விஹரதி கோ⁴ஸிதாராமே ஸத்து² சேவ ஸங்வண்ணிதோ ஸம்பா⁴விதோ ச விஞ்ஞூனங் ஸப்³ரஹ்மசாரீனங், பஹோதி ச மே ஆயஸ்மா ஆனந்தோ³ ததா² த⁴ம்மங் தே³ஸேதுங் யதா²ஹங் த⁴ம்மங் பஸ்ஸெய்யங்; அத்தி² ச மே ஆயஸ்மந்தே ஆனந்தே³ தாவதிகா விஸ்ஸட்டி² 5. யங்னூனாஹங் யேனாயஸ்மா ஆனந்தோ³ தேனுபஸங்கமெய்ய’’ந்தி. அத² கோ² ஆயஸ்மா ச²ன்னோ ஸேனாஸனங் ஸங்ஸாமெத்வா பத்தசீவரமாதா³ய யேன கோஸம்பீ³ கோ⁴ஸிதாராமோ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மதா ஆனந்தே³ன ஸத்³தி⁴ங் ஸம்மோதி³…பே॰… ஏகமந்தங் நிஸின்னோ கோ² ஆயஸ்மா ச²ன்னோ ஆயஸ்மந்தங் ஆனந்த³ங் ஏதத³வோச –
Atha kho āyasmato channassa etadahosi – ‘‘ayaṃ kho āyasmā ānando kosambiyaṃ viharati ghositārāme satthu ceva saṃvaṇṇito sambhāvito ca viññūnaṃ sabrahmacārīnaṃ, pahoti ca me āyasmā ānando tathā dhammaṃ desetuṃ yathāhaṃ dhammaṃ passeyyaṃ; atthi ca me āyasmante ānande tāvatikā vissaṭṭhi 6. Yaṃnūnāhaṃ yenāyasmā ānando tenupasaṅkameyya’’nti. Atha kho āyasmā channo senāsanaṃ saṃsāmetvā pattacīvaramādāya yena kosambī ghositārāmo yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi…pe… ekamantaṃ nisinno kho āyasmā channo āyasmantaṃ ānandaṃ etadavoca –
‘‘ஏகமிதா³ஹங் , ஆவுஸோ ஆனந்த³, ஸமயங் பா³ராணஸியங் விஹராமி இஸிபதனே மிக³தா³யே. அத² க்²வாஹங், ஆவுஸோ, ஸாயன்ஹஸமயங் படிஸல்லானா வுட்டி²தோ அவாபுரணங் ஆதா³ய விஹாரேன விஹாரங் உபஸங்கமிங்; உபஸங்கமித்வா தே²ரே பி⁴க்கூ² ஏதத³வோசங் – ‘ஓவத³ந்து மங் ஆயஸ்மந்தோ தே²ரா, அனுஸாஸந்து மங் ஆயஸ்மந்தோ தே²ரா, கரொந்து மே ஆயஸ்மந்தோ தே²ரா த⁴ம்மிங் கத²ங் யதா²ஹங் த⁴ம்மங் பஸ்ஸெய்ய’ந்தி. ஏவங் வுத்தே மங், ஆவுஸோ, தே²ரா பி⁴க்கூ² ஏதத³வோசுங் – ‘ரூபங் கோ², ஆவுஸோ ச²ன்ன, அனிச்சங்; வேத³னா… ஸஞ்ஞா… ஸங்கா²ரா… விஞ்ஞாணங் அனிச்சங்; ரூபங் அனத்தா…பே॰… விஞ்ஞாணங் அனத்தா. ஸப்³பே³ ஸங்கா²ரா அனிச்சா, ஸப்³பே³ த⁴ம்மா அனத்தா’’’தி.
‘‘Ekamidāhaṃ , āvuso ānanda, samayaṃ bārāṇasiyaṃ viharāmi isipatane migadāye. Atha khvāhaṃ, āvuso, sāyanhasamayaṃ paṭisallānā vuṭṭhito avāpuraṇaṃ ādāya vihārena vihāraṃ upasaṅkamiṃ; upasaṅkamitvā there bhikkhū etadavocaṃ – ‘ovadantu maṃ āyasmanto therā, anusāsantu maṃ āyasmanto therā, karontu me āyasmanto therā dhammiṃ kathaṃ yathāhaṃ dhammaṃ passeyya’nti. Evaṃ vutte maṃ, āvuso, therā bhikkhū etadavocuṃ – ‘rūpaṃ kho, āvuso channa, aniccaṃ; vedanā… saññā… saṅkhārā… viññāṇaṃ aniccaṃ; rūpaṃ anattā…pe… viññāṇaṃ anattā. Sabbe saṅkhārā aniccā, sabbe dhammā anattā’’’ti.
‘‘தஸ்ஸ மய்ஹங், ஆவுஸோ, ஏதத³ஹோஸி – ‘மய்ஹம்பி கோ² ஏதங் ஏவங் ஹோதி – ரூபங் அனிச்சங்…பே॰… விஞ்ஞாணங் அனிச்சங், ரூபங் அனத்தா, வேத³னா… ஸஞ்ஞா… ஸங்கா²ரா… விஞ்ஞாணங் அனத்தா. ஸப்³பே³ ஸங்கா²ரா அனிச்சா, ஸப்³பே³ த⁴ம்மா அனத்தா’தி. அத² ச பன மே ஸப்³ப³ஸங்கா²ரஸமதே² ஸப்³பூ³பதி⁴படினிஸ்ஸக்³கே³ தண்ஹாக்க²யே விராகே³ நிரோதே⁴ நிப்³பா³னே சித்தங் ந பக்க²ந்த³தி நப்பஸீத³தி ந ஸந்திட்ட²தி நாதி⁴முச்சதி. பரிதஸ்ஸனா உபாதா³னங் உப்பஜ்ஜதி; பச்சுதா³வத்ததி மானஸங் – ‘அத² கோ சரஹி மே அத்தா’தி? ந கோ² பனேவங் த⁴ம்மங் பஸ்ஸதோ ஹோதி. கோ நு கோ² மே ததா² த⁴ம்மங் தே³ஸெய்ய யதா²ஹங் த⁴ம்மங் பஸ்ஸெய்யந்தி!
‘‘Tassa mayhaṃ, āvuso, etadahosi – ‘mayhampi kho etaṃ evaṃ hoti – rūpaṃ aniccaṃ…pe… viññāṇaṃ aniccaṃ, rūpaṃ anattā, vedanā… saññā… saṅkhārā… viññāṇaṃ anattā. Sabbe saṅkhārā aniccā, sabbe dhammā anattā’ti. Atha ca pana me sabbasaṅkhārasamathe sabbūpadhipaṭinissagge taṇhākkhaye virāge nirodhe nibbāne cittaṃ na pakkhandati nappasīdati na santiṭṭhati nādhimuccati. Paritassanā upādānaṃ uppajjati; paccudāvattati mānasaṃ – ‘atha ko carahi me attā’ti? Na kho panevaṃ dhammaṃ passato hoti. Ko nu kho me tathā dhammaṃ deseyya yathāhaṃ dhammaṃ passeyyanti!
‘‘தஸ்ஸ மய்ஹங், ஆவுஸோ, ஏதத³ஹோஸி – ‘அயங் கோ² ஆயஸ்மா ஆனந்தோ³ கோஸம்பி³யங் விஹரதி கோ⁴ஸிதராமே ஸத்து² சேவ ஸங்வண்ணிதோ ஸம்பா⁴விதோ ச விஞ்ஞூனங் ஸப்³ரஹ்மசாரீனங், பஹோதி ச மே ஆயஸ்மா ஆனந்தோ³ ததா² த⁴ம்மங் தே³ஸேதுங் யதா²ஹங் த⁴ம்மங் பஸ்ஸெய்யங். அத்தி² ச மே ஆயஸ்மந்தே ஆனந்தே³ தாவதிகா விஸ்ஸட்டி². யங்னூனாஹங் யேனாயஸ்மா ஆனந்தோ³ தேனுபஸங்கமெய்ய’ந்தி. ஓவத³து மங், ஆயஸ்மா ஆனந்தோ³; அனுஸாஸது மங், ஆயஸ்மா ஆனந்தோ³; கரோது மே, ஆயஸ்மா ஆனந்தோ³ த⁴ம்மிங் கத²ங் யதா²ஹங் த⁴ம்மங் பஸ்ஸெய்ய’’ந்தி.
‘‘Tassa mayhaṃ, āvuso, etadahosi – ‘ayaṃ kho āyasmā ānando kosambiyaṃ viharati ghositarāme satthu ceva saṃvaṇṇito sambhāvito ca viññūnaṃ sabrahmacārīnaṃ, pahoti ca me āyasmā ānando tathā dhammaṃ desetuṃ yathāhaṃ dhammaṃ passeyyaṃ. Atthi ca me āyasmante ānande tāvatikā vissaṭṭhi. Yaṃnūnāhaṃ yenāyasmā ānando tenupasaṅkameyya’nti. Ovadatu maṃ, āyasmā ānando; anusāsatu maṃ, āyasmā ānando; karotu me, āyasmā ānando dhammiṃ kathaṃ yathāhaṃ dhammaṃ passeyya’’nti.
‘‘ஸம்முகா² மேதங், ஆவுஸோ ச²ன்ன, ப⁴க³வதோ ஸுதங், ஸம்முகா² ச படிக்³க³ஹிதங் கச்சானகொ³த்தங் பி⁴க்கு²ங் ஓவத³ந்தஸ்ஸ – த்³வயனிஸ்ஸிதோ க்²வாயங், கச்சான, லோகோ யேபு⁴ய்யேன அத்தி²தஞ்சேவ நத்தி²தஞ்ச. லோகஸமுத³யங் கோ², கச்சான, யதா²பூ⁴தங் ஸம்மப்பஞ்ஞாய பஸ்ஸதோ யா லோகே நத்தி²தா, ஸா ந ஹோதி. லோகனிரோத⁴ங் கோ², கச்சான, யதா²பூ⁴தங் ஸம்மப்பஞ்ஞாய பஸ்ஸதோ யா லோகே அத்தி²தா, ஸா ந ஹோதி. உபயுபாதா³னாபி⁴னிவேஸவினிப³ந்தோ⁴ க்²வாயங், கச்சான, லோகோ யேபு⁴ய்யேன தங் சாயங் உபயுபாதா³னங் சேதஸோ அதி⁴ட்டா²னாபி⁴னிவேஸானுஸயங் ந உபேதி ந உபாதி³யதி நாதி⁴ட்டா²தி ‘அத்தா மே’தி. து³க்க²மேவ உப்பஜ்ஜமானங் உப்பஜ்ஜதி, து³க்க²ங் நிருஜ்ஜ²மானங் நிருஜ்ஜ²தீதி ந கங்க²தி ந விசிகிச்ச²தி. அபரப்பச்சயா ஞாணமேவஸ்ஸ எத்த² ஹோதி. எத்தாவதா கோ², கச்சான, ஸம்மாதி³ட்டி² ஹோதி. ஸப்³ப³மத்தீ²தி கோ², கச்சான, அயமேகோ அந்தோ. ஸப்³ப³ங் நத்தீ²தி அயங் து³தியோ அந்தோ. ஏதே தே, கச்சான, உபோ⁴ அந்தே அனுபக³ம்ம மஜ்ஜே²ன ததா²க³தோ த⁴ம்மங் தே³ஸேதி – அவிஜ்ஜாபச்சயா ஸங்கா²ரா; ஸங்கா²ரபச்சயா விஞ்ஞாணங்…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. அவிஜ்ஜாய த்வேவ அஸேஸவிராக³னிரோதா⁴ ஸங்கா²ரனிரோதோ⁴…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி.
‘‘Sammukhā metaṃ, āvuso channa, bhagavato sutaṃ, sammukhā ca paṭiggahitaṃ kaccānagottaṃ bhikkhuṃ ovadantassa – dvayanissito khvāyaṃ, kaccāna, loko yebhuyyena atthitañceva natthitañca. Lokasamudayaṃ kho, kaccāna, yathābhūtaṃ sammappaññāya passato yā loke natthitā, sā na hoti. Lokanirodhaṃ kho, kaccāna, yathābhūtaṃ sammappaññāya passato yā loke atthitā, sā na hoti. Upayupādānābhinivesavinibandho khvāyaṃ, kaccāna, loko yebhuyyena taṃ cāyaṃ upayupādānaṃ cetaso adhiṭṭhānābhinivesānusayaṃ na upeti na upādiyati nādhiṭṭhāti ‘attā me’ti. Dukkhameva uppajjamānaṃ uppajjati, dukkhaṃ nirujjhamānaṃ nirujjhatīti na kaṅkhati na vicikicchati. Aparappaccayā ñāṇamevassa ettha hoti. Ettāvatā kho, kaccāna, sammādiṭṭhi hoti. Sabbamatthīti kho, kaccāna, ayameko anto. Sabbaṃ natthīti ayaṃ dutiyo anto. Ete te, kaccāna, ubho ante anupagamma majjhena tathāgato dhammaṃ deseti – avijjāpaccayā saṅkhārā; saṅkhārapaccayā viññāṇaṃ…pe… evametassa kevalassa dukkhakkhandhassa samudayo hoti. Avijjāya tveva asesavirāganirodhā saṅkhāranirodho…pe… evametassa kevalassa dukkhakkhandhassa nirodho hotī’’ti.
‘‘ஏவமேதங், ஆவுஸோ ஆனந்த³, ஹோதி யேஸங் ஆயஸ்மந்தானங் தாதி³ஸா ஸப்³ரஹ்மசாரயோ அனுகம்பகா அத்த²காமா ஓவாத³கா அனுஸாஸகா. இத³ஞ்ச பன மே ஆயஸ்மதோ ஆனந்த³ஸ்ஸ த⁴ம்மதே³ஸனங் ஸுத்வா த⁴ம்மோ அபி⁴ஸமிதோ’’தி. அட்ட²மங்.
‘‘Evametaṃ, āvuso ānanda, hoti yesaṃ āyasmantānaṃ tādisā sabrahmacārayo anukampakā atthakāmā ovādakā anusāsakā. Idañca pana me āyasmato ānandassa dhammadesanaṃ sutvā dhammo abhisamito’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. ச²ன்னஸுத்தவண்ணனா • 8. Channasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. ச²ன்னஸுத்தவண்ணனா • 8. Channasuttavaṇṇanā
