| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. ছন্নসুত্তং
8. Channasuttaṃ
৯০. একং সমযং সম্বহুলা থেরা ভিক্খূ বারাণসিযং ৰিহরন্তি ইসিপতনে মিগদাযে। অথ খো আযস্মা ছন্নো সাযন্হসমযং পটিসল্লানা ৰুট্ঠিতো অৰাপুরণং 1 আদায ৰিহারেন ৰিহারং উপসঙ্কমিত্ৰা থেরে ভিক্খূ এতদৰোচ – ‘‘ওৰদন্তু মং আযস্মন্তো থেরা, অনুসাসন্তু মং আযস্মন্তো থেরা, করোন্তু মে আযস্মন্তো থেরা ধম্মিং কথং, যথাহং ধম্মং পস্সেয্য’’ন্তি।
90. Ekaṃ samayaṃ sambahulā therā bhikkhū bārāṇasiyaṃ viharanti isipatane migadāye. Atha kho āyasmā channo sāyanhasamayaṃ paṭisallānā vuṭṭhito avāpuraṇaṃ 2 ādāya vihārena vihāraṃ upasaṅkamitvā there bhikkhū etadavoca – ‘‘ovadantu maṃ āyasmanto therā, anusāsantu maṃ āyasmanto therā, karontu me āyasmanto therā dhammiṃ kathaṃ, yathāhaṃ dhammaṃ passeyya’’nti.
এৰং ৰুত্তে, থেরা ভিক্খূ আযস্মন্তং ছন্নং এতদৰোচুং – ‘‘রূপং খো, আৰুসো ছন্ন, অনিচ্চং; ৰেদনা অনিচ্চা; সঞ্ঞা অনিচ্চা; সঙ্খারা অনিচ্চা; ৰিঞ্ঞাণং অনিচ্চং। রূপং অনত্তা; ৰেদনা… সঞ্ঞা… সঙ্খারা… ৰিঞ্ঞাণং অনত্তা। সব্বে সঙ্খারা অনিচ্চা; সব্বে ধম্মা অনত্তা’’তি।
Evaṃ vutte, therā bhikkhū āyasmantaṃ channaṃ etadavocuṃ – ‘‘rūpaṃ kho, āvuso channa, aniccaṃ; vedanā aniccā; saññā aniccā; saṅkhārā aniccā; viññāṇaṃ aniccaṃ. Rūpaṃ anattā; vedanā… saññā… saṅkhārā… viññāṇaṃ anattā. Sabbe saṅkhārā aniccā; sabbe dhammā anattā’’ti.
অথ খো আযস্মতো ছন্নস্স এতদহোসি – ‘‘ময্হম্পি খো এতং এৰং 3 হোতি – ‘রূপং অনিচ্চং, ৰেদনা… সঞ্ঞা… সঙ্খারা… ৰিঞ্ঞাণং অনিচ্চং; রূপং অনত্তা, ৰেদনা … সঞ্ঞা… সঙ্খারা… ৰিঞ্ঞাণং অনত্তা। সব্বে সঙ্খারা অনিচ্চা, সব্বে ধম্মা অনত্তা’তি। অথ চ পন মে সব্বসঙ্খারসমথে সব্বূপধিপটিনিস্সগ্গে তণ্হাক্খযে ৰিরাগে নিরোধে নিব্বানে চিত্তং ন পক্খন্দতি নপ্পসীদতি ন সন্তিট্ঠতি নাধিমুচ্চতি। পরিতস্সনা উপাদানং উপ্পজ্জতি; পচ্চুদাৰত্ততি মানসং – ‘অথ কো চরহি মে অত্তা’তি ? ন খো পনেৰং ধম্মং পস্সতো হোতি। কো নু খো মে তথা ধম্মং দেসেয্য যথাহং ধম্মং পস্সেয্য’’ন্তি।
Atha kho āyasmato channassa etadahosi – ‘‘mayhampi kho etaṃ evaṃ 4 hoti – ‘rūpaṃ aniccaṃ, vedanā… saññā… saṅkhārā… viññāṇaṃ aniccaṃ; rūpaṃ anattā, vedanā … saññā… saṅkhārā… viññāṇaṃ anattā. Sabbe saṅkhārā aniccā, sabbe dhammā anattā’ti. Atha ca pana me sabbasaṅkhārasamathe sabbūpadhipaṭinissagge taṇhākkhaye virāge nirodhe nibbāne cittaṃ na pakkhandati nappasīdati na santiṭṭhati nādhimuccati. Paritassanā upādānaṃ uppajjati; paccudāvattati mānasaṃ – ‘atha ko carahi me attā’ti ? Na kho panevaṃ dhammaṃ passato hoti. Ko nu kho me tathā dhammaṃ deseyya yathāhaṃ dhammaṃ passeyya’’nti.
অথ খো আযস্মতো ছন্নস্স এতদহোসি – ‘‘অযং খো আযস্মা আনন্দো কোসম্বিযং ৰিহরতি ঘোসিতারামে সত্থু চেৰ সংৰণ্ণিতো সম্ভাৰিতো চ ৰিঞ্ঞূনং সব্রহ্মচারীনং, পহোতি চ মে আযস্মা আনন্দো তথা ধম্মং দেসেতুং যথাহং ধম্মং পস্সেয্যং; অত্থি চ মে আযস্মন্তে আনন্দে তাৰতিকা ৰিস্সট্ঠি 5। যংনূনাহং যেনাযস্মা আনন্দো তেনুপসঙ্কমেয্য’’ন্তি। অথ খো আযস্মা ছন্নো সেনাসনং সংসামেত্ৰা পত্তচীৰরমাদায যেন কোসম্বী ঘোসিতারামো যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মতা আনন্দেন সদ্ধিং সম্মোদি…পে॰… একমন্তং নিসিন্নো খো আযস্মা ছন্নো আযস্মন্তং আনন্দং এতদৰোচ –
Atha kho āyasmato channassa etadahosi – ‘‘ayaṃ kho āyasmā ānando kosambiyaṃ viharati ghositārāme satthu ceva saṃvaṇṇito sambhāvito ca viññūnaṃ sabrahmacārīnaṃ, pahoti ca me āyasmā ānando tathā dhammaṃ desetuṃ yathāhaṃ dhammaṃ passeyyaṃ; atthi ca me āyasmante ānande tāvatikā vissaṭṭhi 6. Yaṃnūnāhaṃ yenāyasmā ānando tenupasaṅkameyya’’nti. Atha kho āyasmā channo senāsanaṃ saṃsāmetvā pattacīvaramādāya yena kosambī ghositārāmo yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi…pe… ekamantaṃ nisinno kho āyasmā channo āyasmantaṃ ānandaṃ etadavoca –
‘‘একমিদাহং , আৰুসো আনন্দ, সমযং বারাণসিযং ৰিহরামি ইসিপতনে মিগদাযে। অথ খ্ৰাহং, আৰুসো, সাযন্হসমযং পটিসল্লানা ৰুট্ঠিতো অৰাপুরণং আদায ৰিহারেন ৰিহারং উপসঙ্কমিং; উপসঙ্কমিত্ৰা থেরে ভিক্খূ এতদৰোচং – ‘ওৰদন্তু মং আযস্মন্তো থেরা, অনুসাসন্তু মং আযস্মন্তো থেরা, করোন্তু মে আযস্মন্তো থেরা ধম্মিং কথং যথাহং ধম্মং পস্সেয্য’ন্তি। এৰং ৰুত্তে মং, আৰুসো, থেরা ভিক্খূ এতদৰোচুং – ‘রূপং খো, আৰুসো ছন্ন, অনিচ্চং; ৰেদনা… সঞ্ঞা… সঙ্খারা… ৰিঞ্ঞাণং অনিচ্চং; রূপং অনত্তা…পে॰… ৰিঞ্ঞাণং অনত্তা। সব্বে সঙ্খারা অনিচ্চা, সব্বে ধম্মা অনত্তা’’’তি।
‘‘Ekamidāhaṃ , āvuso ānanda, samayaṃ bārāṇasiyaṃ viharāmi isipatane migadāye. Atha khvāhaṃ, āvuso, sāyanhasamayaṃ paṭisallānā vuṭṭhito avāpuraṇaṃ ādāya vihārena vihāraṃ upasaṅkamiṃ; upasaṅkamitvā there bhikkhū etadavocaṃ – ‘ovadantu maṃ āyasmanto therā, anusāsantu maṃ āyasmanto therā, karontu me āyasmanto therā dhammiṃ kathaṃ yathāhaṃ dhammaṃ passeyya’nti. Evaṃ vutte maṃ, āvuso, therā bhikkhū etadavocuṃ – ‘rūpaṃ kho, āvuso channa, aniccaṃ; vedanā… saññā… saṅkhārā… viññāṇaṃ aniccaṃ; rūpaṃ anattā…pe… viññāṇaṃ anattā. Sabbe saṅkhārā aniccā, sabbe dhammā anattā’’’ti.
‘‘তস্স ময্হং, আৰুসো, এতদহোসি – ‘ময্হম্পি খো এতং এৰং হোতি – রূপং অনিচ্চং…পে॰… ৰিঞ্ঞাণং অনিচ্চং, রূপং অনত্তা, ৰেদনা… সঞ্ঞা… সঙ্খারা… ৰিঞ্ঞাণং অনত্তা। সব্বে সঙ্খারা অনিচ্চা, সব্বে ধম্মা অনত্তা’তি। অথ চ পন মে সব্বসঙ্খারসমথে সব্বূপধিপটিনিস্সগ্গে তণ্হাক্খযে ৰিরাগে নিরোধে নিব্বানে চিত্তং ন পক্খন্দতি নপ্পসীদতি ন সন্তিট্ঠতি নাধিমুচ্চতি। পরিতস্সনা উপাদানং উপ্পজ্জতি; পচ্চুদাৰত্ততি মানসং – ‘অথ কো চরহি মে অত্তা’তি? ন খো পনেৰং ধম্মং পস্সতো হোতি। কো নু খো মে তথা ধম্মং দেসেয্য যথাহং ধম্মং পস্সেয্যন্তি!
‘‘Tassa mayhaṃ, āvuso, etadahosi – ‘mayhampi kho etaṃ evaṃ hoti – rūpaṃ aniccaṃ…pe… viññāṇaṃ aniccaṃ, rūpaṃ anattā, vedanā… saññā… saṅkhārā… viññāṇaṃ anattā. Sabbe saṅkhārā aniccā, sabbe dhammā anattā’ti. Atha ca pana me sabbasaṅkhārasamathe sabbūpadhipaṭinissagge taṇhākkhaye virāge nirodhe nibbāne cittaṃ na pakkhandati nappasīdati na santiṭṭhati nādhimuccati. Paritassanā upādānaṃ uppajjati; paccudāvattati mānasaṃ – ‘atha ko carahi me attā’ti? Na kho panevaṃ dhammaṃ passato hoti. Ko nu kho me tathā dhammaṃ deseyya yathāhaṃ dhammaṃ passeyyanti!
‘‘তস্স ময্হং, আৰুসো, এতদহোসি – ‘অযং খো আযস্মা আনন্দো কোসম্বিযং ৰিহরতি ঘোসিতরামে সত্থু চেৰ সংৰণ্ণিতো সম্ভাৰিতো চ ৰিঞ্ঞূনং সব্রহ্মচারীনং, পহোতি চ মে আযস্মা আনন্দো তথা ধম্মং দেসেতুং যথাহং ধম্মং পস্সেয্যং। অত্থি চ মে আযস্মন্তে আনন্দে তাৰতিকা ৰিস্সট্ঠি। যংনূনাহং যেনাযস্মা আনন্দো তেনুপসঙ্কমেয্য’ন্তি। ওৰদতু মং, আযস্মা আনন্দো; অনুসাসতু মং, আযস্মা আনন্দো; করোতু মে, আযস্মা আনন্দো ধম্মিং কথং যথাহং ধম্মং পস্সেয্য’’ন্তি।
‘‘Tassa mayhaṃ, āvuso, etadahosi – ‘ayaṃ kho āyasmā ānando kosambiyaṃ viharati ghositarāme satthu ceva saṃvaṇṇito sambhāvito ca viññūnaṃ sabrahmacārīnaṃ, pahoti ca me āyasmā ānando tathā dhammaṃ desetuṃ yathāhaṃ dhammaṃ passeyyaṃ. Atthi ca me āyasmante ānande tāvatikā vissaṭṭhi. Yaṃnūnāhaṃ yenāyasmā ānando tenupasaṅkameyya’nti. Ovadatu maṃ, āyasmā ānando; anusāsatu maṃ, āyasmā ānando; karotu me, āyasmā ānando dhammiṃ kathaṃ yathāhaṃ dhammaṃ passeyya’’nti.
‘‘সম্মুখা মেতং, আৰুসো ছন্ন, ভগৰতো সুতং, সম্মুখা চ পটিগ্গহিতং কচ্চানগোত্তং ভিক্খুং ওৰদন্তস্স – দ্ৰযনিস্সিতো খ্ৰাযং, কচ্চান, লোকো যেভুয্যেন অত্থিতঞ্চেৰ নত্থিতঞ্চ। লোকসমুদযং খো, কচ্চান, যথাভূতং সম্মপ্পঞ্ঞায পস্সতো যা লোকে নত্থিতা, সা ন হোতি। লোকনিরোধং খো, কচ্চান, যথাভূতং সম্মপ্পঞ্ঞায পস্সতো যা লোকে অত্থিতা, সা ন হোতি। উপযুপাদানাভিনিৰেসৰিনিবন্ধো খ্ৰাযং, কচ্চান, লোকো যেভুয্যেন তং চাযং উপযুপাদানং চেতসো অধিট্ঠানাভিনিৰেসানুসযং ন উপেতি ন উপাদিযতি নাধিট্ঠাতি ‘অত্তা মে’তি। দুক্খমেৰ উপ্পজ্জমানং উপ্পজ্জতি, দুক্খং নিরুজ্ঝমানং নিরুজ্ঝতীতি ন কঙ্খতি ন ৰিচিকিচ্ছতি। অপরপ্পচ্চযা ঞাণমেৰস্স এত্থ হোতি। এত্তাৰতা খো, কচ্চান, সম্মাদিট্ঠি হোতি। সব্বমত্থীতি খো, কচ্চান, অযমেকো অন্তো। সব্বং নত্থীতি অযং দুতিযো অন্তো। এতে তে, কচ্চান, উভো অন্তে অনুপগম্ম মজ্ঝেন তথাগতো ধম্মং দেসেতি – অৰিজ্জাপচ্চযা সঙ্খারা; সঙ্খারপচ্চযা ৰিঞ্ঞাণং…পে॰… এৰমেতস্স কেৰলস্স দুক্খক্খন্ধস্স সমুদযো হোতি। অৰিজ্জায ত্ৰেৰ অসেসৰিরাগনিরোধা সঙ্খারনিরোধো…পে॰… এৰমেতস্স কেৰলস্স দুক্খক্খন্ধস্স নিরোধো হোতী’’তি।
‘‘Sammukhā metaṃ, āvuso channa, bhagavato sutaṃ, sammukhā ca paṭiggahitaṃ kaccānagottaṃ bhikkhuṃ ovadantassa – dvayanissito khvāyaṃ, kaccāna, loko yebhuyyena atthitañceva natthitañca. Lokasamudayaṃ kho, kaccāna, yathābhūtaṃ sammappaññāya passato yā loke natthitā, sā na hoti. Lokanirodhaṃ kho, kaccāna, yathābhūtaṃ sammappaññāya passato yā loke atthitā, sā na hoti. Upayupādānābhinivesavinibandho khvāyaṃ, kaccāna, loko yebhuyyena taṃ cāyaṃ upayupādānaṃ cetaso adhiṭṭhānābhinivesānusayaṃ na upeti na upādiyati nādhiṭṭhāti ‘attā me’ti. Dukkhameva uppajjamānaṃ uppajjati, dukkhaṃ nirujjhamānaṃ nirujjhatīti na kaṅkhati na vicikicchati. Aparappaccayā ñāṇamevassa ettha hoti. Ettāvatā kho, kaccāna, sammādiṭṭhi hoti. Sabbamatthīti kho, kaccāna, ayameko anto. Sabbaṃ natthīti ayaṃ dutiyo anto. Ete te, kaccāna, ubho ante anupagamma majjhena tathāgato dhammaṃ deseti – avijjāpaccayā saṅkhārā; saṅkhārapaccayā viññāṇaṃ…pe… evametassa kevalassa dukkhakkhandhassa samudayo hoti. Avijjāya tveva asesavirāganirodhā saṅkhāranirodho…pe… evametassa kevalassa dukkhakkhandhassa nirodho hotī’’ti.
‘‘এৰমেতং, আৰুসো আনন্দ, হোতি যেসং আযস্মন্তানং তাদিসা সব্রহ্মচারযো অনুকম্পকা অত্থকামা ওৰাদকা অনুসাসকা। ইদঞ্চ পন মে আযস্মতো আনন্দস্স ধম্মদেসনং সুত্ৰা ধম্মো অভিসমিতো’’তি। অট্ঠমং।
‘‘Evametaṃ, āvuso ānanda, hoti yesaṃ āyasmantānaṃ tādisā sabrahmacārayo anukampakā atthakāmā ovādakā anusāsakā. Idañca pana me āyasmato ānandassa dhammadesanaṃ sutvā dhammo abhisamito’’ti. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. ছন্নসুত্তৰণ্ণনা • 8. Channasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. ছন্নসুত্তৰণ্ণনা • 8. Channasuttavaṇṇanā
