| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
(8) 3. ஆனந்த³வக்³கோ³
(8) 3. Ānandavaggo
1. ச²ன்னஸுத்தவண்ணனா
1. Channasuttavaṇṇanā
72. ததியஸ்ஸ பட²மே ச²ன்னோதி ஏவங்னாமகோ ச²ன்னபரிப்³பா³ஜகோ. தும்ஹேபி, ஆவுஸோதி, ஆவுஸோ, யதா² மயங் ராகா³தீ³னங் பஹானங் பஞ்ஞாபேம, கிங் ஏவங் தும்ஹேபி பஞ்ஞாபேதா²தி புச்ச²தி. ததோ தே²ரோ ‘‘அயங் பரிப்³பா³ஜகோ அம்ஹே ராகா³தீ³னங் பஹானங் பஞ்ஞாபேமாதி வத³தி, நத்தி² பனேதங் பா³ஹிரஸமயே’’தி தங் படிக்கி²பந்தோ மயங் கோ², ஆவுஸோதிஆதி³மாஹ. தத்த² கோ²தி அவதா⁴ரணத்தே² நிபாதோ, மயமேவ பஞ்ஞாபேமாதி அத்தோ². ததோ பரிப்³பா³ஜகோ சிந்தேஸி ‘‘அயங் தே²ரோ பா³ஹிரஸமயங் லுஞ்சித்வா ஹரந்தோ ‘மயமேவா’தி ஆஹ. கிங் நு கோ² ஆதீ³னவங் தி³ஸ்வா ஏதே ஏதேஸங் பஹானங் பஞ்ஞாபெந்தீ’’தி. அத² தே²ரங் புச்ச²ந்தோ கிங் பன தும்ஹேதிஆதி³மாஹ. தே²ரோ தஸ்ஸ ப்³யாகரொந்தோ ரத்தோ கோ²திஆதி³மாஹ. தத்த² அத்தத்த²ந்தி தி³ட்ட²த⁴ம்மிகஸம்பராயிகங் லோகியலோகுத்தரங் அத்தனோ அத்த²ங். பரத்த²உப⁴யத்தே²ஸுபி ஏஸேவ நயோ.
72. Tatiyassa paṭhame channoti evaṃnāmako channaparibbājako. Tumhepi, āvusoti, āvuso, yathā mayaṃ rāgādīnaṃ pahānaṃ paññāpema, kiṃ evaṃ tumhepi paññāpethāti pucchati. Tato thero ‘‘ayaṃ paribbājako amhe rāgādīnaṃ pahānaṃ paññāpemāti vadati, natthi panetaṃ bāhirasamaye’’ti taṃ paṭikkhipanto mayaṃ kho, āvusotiādimāha. Tattha khoti avadhāraṇatthe nipāto, mayameva paññāpemāti attho. Tato paribbājako cintesi ‘‘ayaṃ thero bāhirasamayaṃ luñcitvā haranto ‘mayamevā’ti āha. Kiṃ nu kho ādīnavaṃ disvā ete etesaṃ pahānaṃ paññāpentī’’ti. Atha theraṃ pucchanto kiṃ pana tumhetiādimāha. Thero tassa byākaronto ratto khotiādimāha. Tattha attatthanti diṭṭhadhammikasamparāyikaṃ lokiyalokuttaraṃ attano atthaṃ. Paratthaubhayatthesupi eseva nayo.
அந்த⁴கரணோதிஆதீ³ஸு யஸ்ஸ ராகோ³ உப்பஜ்ஜதி, தங் யதா²பூ⁴தத³ஸ்ஸனநிவாரணேன அந்த⁴ங் கரோதீதி அந்த⁴கரணோ. பஞ்ஞாசக்கு²ங் ந கரோதீதி அசக்கு²கரணோ. ஞாணங் ந கரோதீதி அஞ்ஞாணகரணோ. கம்மஸ்ஸகதபஞ்ஞா ஜா²னபஞ்ஞா விபஸ்ஸனாபஞ்ஞாதி இமா திஸ்ஸோ பஞ்ஞா அப்பவத்திகரணேன நிரோதே⁴தீதி பஞ்ஞானிரோதி⁴கோ. அனிட்ட²ப²லதா³யகத்தா து³க்க²ஸங்கா²தஸ்ஸ விகா⁴தஸ்ஸேவ பக்கே² வத்ததீதி விகா⁴தபக்கி²கோ. கிலேஸனிப்³பா³னங் ந ஸங்வத்தேதீதி அனிப்³பா³னஸங்வத்தனிகோ. அலஞ்ச பனாவுஸோ ஆனந்த³, அப்பமாதா³யாதி, ஆவுஸோ ஆனந்த³, ஸசே ஏவரூபா படிபதா³ அத்தி², அலங் தும்ஹாகங் அப்பமாதா³ய யுத்தங் அனுச்ச²விகங், அப்பமாத³ங் கரோத², ஆவுஸோதி தே²ரஸ்ஸ வசனங் அனுமோதி³த்வா பக்காமி. இமஸ்மிங் ஸுத்தே அரியமக்³கோ³ லோகுத்தரமிஸ்ஸகோ கதி²தோ. ஸேஸமெத்த² உத்தானத்த²மேவாதி.
Andhakaraṇotiādīsu yassa rāgo uppajjati, taṃ yathābhūtadassananivāraṇena andhaṃ karotīti andhakaraṇo. Paññācakkhuṃ na karotīti acakkhukaraṇo. Ñāṇaṃ na karotīti aññāṇakaraṇo. Kammassakatapaññā jhānapaññā vipassanāpaññāti imā tisso paññā appavattikaraṇena nirodhetīti paññānirodhiko. Aniṭṭhaphaladāyakattā dukkhasaṅkhātassa vighātasseva pakkhe vattatīti vighātapakkhiko. Kilesanibbānaṃ na saṃvattetīti anibbānasaṃvattaniko. Alañca panāvuso ānanda, appamādāyāti, āvuso ānanda, sace evarūpā paṭipadā atthi, alaṃ tumhākaṃ appamādāya yuttaṃ anucchavikaṃ, appamādaṃ karotha, āvusoti therassa vacanaṃ anumoditvā pakkāmi. Imasmiṃ sutte ariyamaggo lokuttaramissako kathito. Sesamettha uttānatthamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ச²ன்னஸுத்தங் • 1. Channasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. ச²ன்னஸுத்தவண்ணனா • 1. Channasuttavaṇṇanā
