| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. ச²ன்னஸுத்தவண்ணனா
8. Channasuttavaṇṇanā
90. அட்ட²மே ஆயஸ்மா ச²ன்னோதி ததா²க³தேன ஸத்³தி⁴ங் ஏகதி³வஸே ஜாதோ மஹாபி⁴னிக்க²மனதி³வஸே ஸத்³தி⁴ங் நிக்க²மித்வா புன அபரபா⁴கே³ ஸத்து² ஸந்திகே பப்³ப³ஜித்வா ‘‘அம்ஹாகங் பு³த்³தோ⁴ அம்ஹாகங் த⁴ம்மோ’’தி ஏவங் மக்கீ² சேவ பளாஸீ ச ஹுத்வா ஸப்³ரஹ்மசாரீனங் ப²ருஸவாசாய ஸங்க⁴ட்டனங் கரொந்தோ தே²ரோ. அவாபுரணங் ஆதா³யாதி குஞ்சிகங் க³ஹெத்வா. விஹாரேன விஹாரங் உபஸங்கமித்வாதி ஏகங் விஹாரங் பவிஸித்வா ததோ அஞ்ஞங், ததோ அஞ்ஞந்தி ஏவங் தேன தேன விஹாரேன தங் தங் விஹாரங் உபஸங்கமித்வா. ஏதத³வோச ஓவத³ந்து மந்தி கஸ்மா ஏவங் மஹந்தேன உஸ்ஸாஹேன தத்த² தத்த² க³ந்த்வா ஏதங் அவோசாதி? உப்பன்னஸங்வேக³தாய. தஸ்ஸ ஹி பரினிப்³பு³தே ஸத்த²ரி த⁴ம்மஸங்கா³ஹகத்தே²ரேஹி பேஸிதோ ஆயஸ்மா ஆனந்தோ³ கோஸம்பி³ங் க³ந்த்வா ப்³ரஹ்மத³ண்ட³ங் அதா³ஸி. ஸோ தி³ன்னே ப்³ரஹ்மத³ண்டே³ ஸஞ்ஜாதபரிளாஹோ விஸஞ்ஞீபூ⁴தோ பதித்வா புன ஸஞ்ஞங் லபி⁴த்வா வுட்டா²ய ஏகஸ்ஸ பி⁴க்கு²னோ ஸந்திகங் க³தோ, ஸோ தேன ஸத்³தி⁴ங் கிஞ்சி ந கதே²ஸி. அஞ்ஞஸ்ஸ ஸந்திகங் அக³மாஸி, ஸோபி ந கதே²ஸீதி ஏவங் ஸகலவிஹாரங் விசரித்வா நிப்³பி³ன்னோ பத்தசீவரங் ஆதா³ய பா³ராணஸிங் க³ந்த்வா உப்பன்னஸங்வேகோ³ தத்த² தத்த² க³ந்த்வா ஏவங் அவோச.
90. Aṭṭhame āyasmā channoti tathāgatena saddhiṃ ekadivase jāto mahābhinikkhamanadivase saddhiṃ nikkhamitvā puna aparabhāge satthu santike pabbajitvā ‘‘amhākaṃ buddho amhākaṃ dhammo’’ti evaṃ makkhī ceva paḷāsī ca hutvā sabrahmacārīnaṃ pharusavācāya saṅghaṭṭanaṃ karonto thero. Avāpuraṇaṃ ādāyāti kuñcikaṃ gahetvā. Vihārena vihāraṃ upasaṅkamitvāti ekaṃ vihāraṃ pavisitvā tato aññaṃ, tato aññanti evaṃ tena tena vihārena taṃ taṃ vihāraṃ upasaṅkamitvā. Etadavoca ovadantu manti kasmā evaṃ mahantena ussāhena tattha tattha gantvā etaṃ avocāti? Uppannasaṃvegatāya. Tassa hi parinibbute satthari dhammasaṅgāhakattherehi pesito āyasmā ānando kosambiṃ gantvā brahmadaṇḍaṃ adāsi. So dinne brahmadaṇḍe sañjātapariḷāho visaññībhūto patitvā puna saññaṃ labhitvā vuṭṭhāya ekassa bhikkhuno santikaṃ gato, so tena saddhiṃ kiñci na kathesi. Aññassa santikaṃ agamāsi, sopi na kathesīti evaṃ sakalavihāraṃ vicaritvā nibbinno pattacīvaraṃ ādāya bārāṇasiṃ gantvā uppannasaṃvego tattha tattha gantvā evaṃ avoca.
ஸப்³பே³ ஸங்கா²ரா அனிச்சாதி ஸப்³பே³ தேபூ⁴மகஸங்கா²ரா அனிச்சா. ஸப்³பே³ த⁴ம்மா அனத்தாதி ஸப்³பே³ சதுபூ⁴மகத⁴ம்மா அனத்தா. இதி ஸப்³பே³பி தே பி⁴க்கூ² தே²ரங் ஓவத³ந்தா அனிச்சலக்க²ணங் அனத்தலக்க²ணந்தி த்³வேவ லக்க²ணானி கதெ²த்வா து³க்க²லக்க²ணங் ந கத²யிங்ஸு. கஸ்மா? ஏவங் கிர நேஸங் அஹோஸி – ‘‘அயங் பி⁴க்கு² வாதீ³ து³க்க²லக்க²ணே பஞ்ஞாபியமானே ரூபங் து³க்க²ங்…பே॰… விஞ்ஞாணங் து³க்க²ங், மக்³கோ³ து³க்கோ², ப²லங் து³க்க²ந்தி ‘தும்ஹே து³க்க²ப்பத்தா பி⁴க்கூ² நாமா’தி க³ஹணங் க³ண்ஹெய்ய, யதா² க³ஹணங் க³ஹேதுங் ந ஸக்கோதி, ஏவங் நித்³தோ³ஸமேவஸ்ஸ கத்வா கதெ²ஸ்ஸாமா’’தி த்³வேவ லக்க²ணானி கத²யிங்ஸு.
Sabbe saṅkhārā aniccāti sabbe tebhūmakasaṅkhārā aniccā. Sabbe dhammā anattāti sabbe catubhūmakadhammā anattā. Iti sabbepi te bhikkhū theraṃ ovadantā aniccalakkhaṇaṃ anattalakkhaṇanti dveva lakkhaṇāni kathetvā dukkhalakkhaṇaṃ na kathayiṃsu. Kasmā? Evaṃ kira nesaṃ ahosi – ‘‘ayaṃ bhikkhu vādī dukkhalakkhaṇe paññāpiyamāne rūpaṃ dukkhaṃ…pe… viññāṇaṃ dukkhaṃ, maggo dukkho, phalaṃ dukkhanti ‘tumhe dukkhappattā bhikkhū nāmā’ti gahaṇaṃ gaṇheyya, yathā gahaṇaṃ gahetuṃ na sakkoti, evaṃ niddosamevassa katvā kathessāmā’’ti dveva lakkhaṇāni kathayiṃsu.
பரிதஸ்ஸனா உபாதா³னங் உப்பஜ்ஜதீதி பரிதஸ்ஸனா ச உபாதா³னஞ்ச உப்பஜ்ஜதி. பச்சுதா³வத்ததி மானஸங், அத² கோ சரஹி மே அத்தாதி யதி³ ரூபாதீ³ஸு ஏகோபி அனத்தா, அத² கோ நாம மே அத்தாதி ஏவங் படினிவத்ததி ‘‘மய்ஹங் மானஸ’’ந்தி. அயங் கிர தே²ரோ பச்சயே அபரிக்³க³ஹெத்வா விபஸ்ஸனங் பட்ட²பேஸி, ஸாஸ்ஸ து³ப்³ப³லவிபஸ்ஸனா அத்தகா³ஹங் பரியாதா³துங் அஸக்குணந்தீ ஸங்கா²ரேஸு ஸுஞ்ஞதோ உபட்ட²ஹந்தேஸு ‘‘உச்சி²ஜ்ஜிஸ்ஸாமி வினஸ்ஸிஸ்ஸாமீ’’தி உச்சே²த³தி³ட்டி²யா சேவ பரிதஸ்ஸனாய ச பச்சயோ அஹோஸி. ஸோ ச அத்தானங் பாபதே பபதந்தங் விய தி³ஸ்வா, ‘‘பரிதஸ்ஸனா உபாதா³னங் உப்பஜ்ஜதி, பச்சுதா³வத்ததி மானஸங், அத² கோ சரஹி மே அத்தா’’தி ஆஹ. ந கோ² பனேவங் த⁴ம்மங் பஸ்ஸதோ ஹோதீதி சதுஸச்சத⁴ம்மங் பஸ்ஸந்தஸ்ஸ ஏவங் ந ஹோதி. தாவதிகா விஸ்ஸட்டீ²தி தத்தகோ விஸ்ஸாஸோ. ஸம்முகா² மேதந்தி தே²ரோ தஸ்ஸ வசனங் ஸுத்வா, ‘‘கீதி³ஸா நு கோ² இமஸ்ஸ த⁴ம்மதே³ஸனா ஸப்பாயா’’தி? சிந்தெந்தோ தேபிடகங் பு³த்³த⁴வசனங் விசினித்வா கச்சானஸுத்தங் (ஸங்॰ நி॰ 2.15) அத்³த³ஸ ‘‘இத³ங் ஆதி³தோவ தி³ட்டி²வினிவேட²னங் கத்வா மஜ்ஜே² பு³த்³த⁴ப³லங் தீ³பெத்வா ஸண்ஹஸுகு²மபச்சயாகாரங் பகாஸயமானங் க³தங், இத³மஸ்ஸ தே³ஸெஸ்ஸாமீ’’தி த³ஸ்ஸெந்தோ ‘‘ஸம்முகா² மேத’’ந்திஆதி³மாஹ. அட்ட²மங்.
Paritassanā upādānaṃ uppajjatīti paritassanā ca upādānañca uppajjati. Paccudāvattati mānasaṃ, atha ko carahi me attāti yadi rūpādīsu ekopi anattā, atha ko nāma me attāti evaṃ paṭinivattati ‘‘mayhaṃ mānasa’’nti. Ayaṃ kira thero paccaye apariggahetvā vipassanaṃ paṭṭhapesi, sāssa dubbalavipassanā attagāhaṃ pariyādātuṃ asakkuṇantī saṅkhāresu suññato upaṭṭhahantesu ‘‘ucchijjissāmi vinassissāmī’’ti ucchedadiṭṭhiyā ceva paritassanāya ca paccayo ahosi. So ca attānaṃ pāpate papatantaṃ viya disvā, ‘‘paritassanā upādānaṃ uppajjati, paccudāvattati mānasaṃ, atha ko carahi me attā’’ti āha. Na kho panevaṃ dhammaṃ passato hotīti catusaccadhammaṃ passantassa evaṃ na hoti. Tāvatikā vissaṭṭhīti tattako vissāso. Sammukhā metanti thero tassa vacanaṃ sutvā, ‘‘kīdisā nu kho imassa dhammadesanā sappāyā’’ti? Cintento tepiṭakaṃ buddhavacanaṃ vicinitvā kaccānasuttaṃ (saṃ. ni. 2.15) addasa ‘‘idaṃ āditova diṭṭhiviniveṭhanaṃ katvā majjhe buddhabalaṃ dīpetvā saṇhasukhumapaccayākāraṃ pakāsayamānaṃ gataṃ, idamassa desessāmī’’ti dassento ‘‘sammukhā meta’’ntiādimāha. Aṭṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. ச²ன்னஸுத்தங் • 8. Channasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. ச²ன்னஸுத்தவண்ணனா • 8. Channasuttavaṇṇanā
