| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. ச²ன்னஸுத்தவண்ணனா
4. Channasuttavaṇṇanā
87. சதுத்தே² ச²ன்னோதி ஏவங்னாமகோ தே²ரோ, ந அபி⁴னிக்க²மனங் நிக்க²ந்ததே²ரோ. படிஸல்லானாதி ப²லஸமாபத்திதோ. கி³லானபுச்ச²காதி கி³லானுபட்டா²கா. கி³லானுபட்டா²னங் நாம பு³த்³த⁴பஸத்த²ங் பு³த்³த⁴வண்ணிதங், தஸ்மா ஏவமாஹ. ஸீஸவேட²ங் த³தெ³ய்யாதி ஸீஸே வேட²னங் ஸீஸவேட²ங், தஞ்ச த³தெ³ய்ய. ஸத்த²ந்தி ஜீவிதஹாரகஸத்த²ங். நாவகங்கா²மீதி ந இச்சா²மி. பரிசிண்ணோதி பரிசரிதோ. மனாபேனாதி மனவட்³ட⁴னகேன காயகம்மாதி³னா. எத்த² ச ஸத்த ஸேகா² பரிசரந்தி நாம, அரஹா பரிசாரீ நாம, ப⁴க³வா பரிசிண்ணோ நாம.
87. Catutthe channoti evaṃnāmako thero, na abhinikkhamanaṃ nikkhantathero. Paṭisallānāti phalasamāpattito. Gilānapucchakāti gilānupaṭṭhākā. Gilānupaṭṭhānaṃ nāma buddhapasatthaṃ buddhavaṇṇitaṃ, tasmā evamāha. Sīsaveṭhaṃ dadeyyāti sīse veṭhanaṃ sīsaveṭhaṃ, tañca dadeyya. Satthanti jīvitahārakasatthaṃ. Nāvakaṅkhāmīti na icchāmi. Pariciṇṇoti paricarito. Manāpenāti manavaḍḍhanakena kāyakammādinā. Ettha ca satta sekhā paricaranti nāma, arahā paricārī nāma, bhagavā pariciṇṇo nāma.
ஏதஞ்ஹி, ஆவுஸோ, ஸாவகஸ்ஸ பதிரூபந்தி, ஆவுஸோ, ஸாவகஸ்ஸ நாம ஏதங் அனுச்ச²விகங். அனுபவஜ்ஜந்தி அப்பவத்திகங் அப்படிஸந்தி⁴கங். புச்சா²வுஸோ ஸாரிபுத்த, ஸுத்வா வேதி³ஸ்ஸாமாதி அயங் ஸாவகபவாரணா நாம. ஏதங் மமாதிஆதீ³னி தண்ஹாமானதி³ட்டி²க்³கா³ஹவஸேன வுத்தானி. நிரோத⁴ங் தி³ஸ்வாதி க²யவயங் ஞத்வா. நேதங் மம, நேஸோஹமஸ்மி, ந மேஸோ அத்தாதி ஸமனுபஸ்ஸாமீதி அனிச்சங் து³க்க²ங் அனத்தாதி ஸமனுபஸ்ஸாமி. எத்தகேஸு டா²னேஸு ச²ன்னத்தே²ரோ ஸாரிபுத்தத்தே²ரேன புச்சி²தங் பஞ்ஹங் அரஹத்தே பக்கி²பித்வா கதே²ஸி. ஸாரிபுத்தத்தே²ரோ பன தஸ்ஸ புது²ஜ்ஜனபா⁴வங் ஞத்வாபி தங் ‘‘புது²ஜ்ஜனோ’’தி வா ‘‘கீ²ணாஸவோ’’தி வா அவத்வா துண்ஹீயேவ அஹோஸி. சுந்த³த்தே²ரோ பனஸ்ஸ புது²ஜ்ஜனபா⁴வங் ஸஞ்ஞாபெஸ்ஸாமீதி சிந்தெத்வா ஓவாத³ங் அதா³ஸி.
Etañhi, āvuso, sāvakassa patirūpanti, āvuso, sāvakassa nāma etaṃ anucchavikaṃ. Anupavajjanti appavattikaṃ appaṭisandhikaṃ. Pucchāvuso sāriputta, sutvā vedissāmāti ayaṃ sāvakapavāraṇā nāma. Etaṃmamātiādīni taṇhāmānadiṭṭhiggāhavasena vuttāni. Nirodhaṃ disvāti khayavayaṃ ñatvā. Netaṃ mama, nesohamasmi, na meso attāti samanupassāmīti aniccaṃ dukkhaṃ anattāti samanupassāmi. Ettakesu ṭhānesu channatthero sāriputtattherena pucchitaṃ pañhaṃ arahatte pakkhipitvā kathesi. Sāriputtatthero pana tassa puthujjanabhāvaṃ ñatvāpi taṃ ‘‘puthujjano’’ti vā ‘‘khīṇāsavo’’ti vā avatvā tuṇhīyeva ahosi. Cundatthero panassa puthujjanabhāvaṃ saññāpessāmīti cintetvā ovādaṃ adāsi.
தத்த² தஸ்மாதி யஸ்மா மாரணந்திகங் வேத³னங் அதி⁴வாஸேதுங் அஸக்கொந்தோ ஸத்த²ங் ஆஹராமீதி வத³தி, தஸ்மா புது²ஜ்ஜனோ ஆயஸ்மா, தேன இத³ம்பி மனஸிகரோஹீதி தீ³பேதி. யஸ்மா வா ச²ன்னங் ஆயதனானங் நிரோத⁴ங் தி³ஸ்வா சக்கா²தீ³னி திண்ணங் கா³ஹானங் வஸேன ந ஸமனுபஸ்ஸாமீதி வத³ஸி. தஸ்மா இத³ம்பி தஸ்ஸ ப⁴க³வதோ ஸாஸனங் ஆயஸ்மதா மனஸிகாதப்³ப³ந்திபி புது²ஜ்ஜனபா⁴வமேவ தீ³பெந்தோ வத³தி. நிச்சகப்பந்தி நிச்சகாலங். நிஸ்ஸிதஸ்ஸாதி தண்ஹாமானதி³ட்டீ²ஹி நிஸ்ஸிதஸ்ஸ. சலிதந்தி விப்ப²ந்தி³தங் ஹோதி. யத²யித³ங் ஆயஸ்மதோ உப்பன்னங் வேத³னங் அதி⁴வாஸேதுங் அஸக்கொந்தஸ்ஸ ‘‘அஹங் வேத³யாமி, மம வேத³னா’’தி அப்பஹீனக்³கா³ஹஸ்ஸ இதா³னி விப்ப²ந்தி³தங் ஹோதி, இமினாபி நங் ‘‘புது²ஜ்ஜனோவ த்வ’’ந்தி வத³தி.
Tattha tasmāti yasmā māraṇantikaṃ vedanaṃ adhivāsetuṃ asakkonto satthaṃ āharāmīti vadati, tasmā puthujjano āyasmā, tena idampi manasikarohīti dīpeti. Yasmā vā channaṃ āyatanānaṃ nirodhaṃ disvā cakkhādīni tiṇṇaṃ gāhānaṃ vasena na samanupassāmīti vadasi. Tasmā idampi tassa bhagavato sāsanaṃ āyasmatā manasikātabbantipi puthujjanabhāvameva dīpento vadati. Niccakappanti niccakālaṃ. Nissitassāti taṇhāmānadiṭṭhīhi nissitassa. Calitanti vipphanditaṃ hoti. Yathayidaṃ āyasmato uppannaṃ vedanaṃ adhivāsetuṃ asakkontassa ‘‘ahaṃ vedayāmi, mama vedanā’’ti appahīnaggāhassa idāni vipphanditaṃ hoti, imināpi naṃ ‘‘puthujjanova tva’’nti vadati.
பஸ்ஸத்³தீ⁴தி காயசித்தபஸ்ஸத்³தி⁴, கிலேஸபஸ்ஸத்³தி⁴ நாம ஹோதீதி அத்தோ². நதியாதி தண்ஹானதியா. அஸதீதி ப⁴வத்தா²ய ஆலயனிகந்திபரியுட்டா²னே அஸதி. ஆக³திக³தி ந ஹோதீதி படிஸந்தி⁴வஸேன ஆக³தி நாம, சுதிவஸேன க³மனங் நாம ந ஹோதி. சுதூபபாதோதி சவனவஸேன சுதி, உபபஜ்ஜனவஸேன உபபாதோ. நேவித⁴ ந ஹுரங் ந உப⁴யமந்தரேனாதி ந இத⁴லோகே ந பரலோகே ந உப⁴யத்த² ஹோதி. ஏஸேவந்தோ து³க்க²ஸ்ஸாதி வட்டது³க்க²கிலேஸது³க்க²ஸ்ஸ அயமேவ அந்தோ அயங் பரிச்சே²தோ³ பரிவடுமபா⁴வோ ஹோதி. அயமேவ ஹி எத்த² அத்தோ². யே பன ‘‘உப⁴யமந்தரேனா’’தி வசனங் க³ஹெத்வா அந்தராப⁴வங் இச்ச²ந்தி, தேஸங் வசனங் நிரத்த²கங். அந்தராப⁴வஸ்ஸ ஹி பா⁴வோ அபி⁴த⁴ம்மே படிக்கி²த்தோயேவ. ‘‘அந்தரேனா’’தி வசனங் பன விகப்பந்தரதீ³பனங். தஸ்மா அயமெத்த² அத்தோ² – நேவ இத⁴ ந ஹுரங், அபரோ விகப்போ ந உப⁴யந்தி.
Passaddhīti kāyacittapassaddhi, kilesapassaddhi nāma hotīti attho. Natiyāti taṇhānatiyā. Asatīti bhavatthāya ālayanikantipariyuṭṭhāne asati. Āgatigati na hotīti paṭisandhivasena āgati nāma, cutivasena gamanaṃ nāma na hoti. Cutūpapātoti cavanavasena cuti, upapajjanavasena upapāto. Nevidha na huraṃ na ubhayamantarenāti na idhaloke na paraloke na ubhayattha hoti. Esevanto dukkhassāti vaṭṭadukkhakilesadukkhassa ayameva anto ayaṃ paricchedo parivaṭumabhāvo hoti. Ayameva hi ettha attho. Ye pana ‘‘ubhayamantarenā’’ti vacanaṃ gahetvā antarābhavaṃ icchanti, tesaṃ vacanaṃ niratthakaṃ. Antarābhavassa hi bhāvo abhidhamme paṭikkhittoyeva. ‘‘Antarenā’’ti vacanaṃ pana vikappantaradīpanaṃ. Tasmā ayamettha attho – neva idha na huraṃ, aparo vikappo na ubhayanti.
ஸத்த²ங் ஆஹரேஸீதி ஜீவிதஹாரகஸத்த²ங் ஆஹரி, ஆஹரித்வா கண்ட²னாளங் சி²ந்தி³. அத²ஸ்ஸ தஸ்மிங் க²ணே மரணப⁴யங் ஓக்கமி, க³தினிமித்தங் உபட்டா²ஸி. ஸோ அத்தனோ புது²ஜ்ஜனபா⁴வங் ஞத்வா, ஸங்விக்³க³சித்தோ விபஸ்ஸனங் பட்ட²பெத்வா, ஸங்கா²ரே பரிக்³க³ண்ஹந்தோ அரஹத்தங் பத்வா, ஸமஸீஸீ ஹுத்வா பரினிப்³பு³தோ. ஸம்முகா²யேவ அனுபவஜ்ஜதா ப்³யாகதாதி கிஞ்சாபி இத³ங் தே²ரஸ்ஸ புது²ஜ்ஜனகாலே ப்³யாகரணங் ஹோதி; ஏதேன பன ப்³யாகரணேன அனந்தராயமஸ்ஸ பரினிப்³பா³னங் அஹோஸி. தஸ்மா ப⁴க³வா ததே³வ ப்³யாகரணங் க³ஹெத்வா கதே²ஸி.
Satthaṃ āharesīti jīvitahārakasatthaṃ āhari, āharitvā kaṇṭhanāḷaṃ chindi. Athassa tasmiṃ khaṇe maraṇabhayaṃ okkami, gatinimittaṃ upaṭṭhāsi. So attano puthujjanabhāvaṃ ñatvā, saṃviggacitto vipassanaṃ paṭṭhapetvā, saṅkhāre pariggaṇhanto arahattaṃ patvā, samasīsī hutvā parinibbuto. Sammukhāyeva anupavajjatā byākatāti kiñcāpi idaṃ therassa puthujjanakāle byākaraṇaṃ hoti; etena pana byākaraṇena anantarāyamassa parinibbānaṃ ahosi. Tasmā bhagavā tadeva byākaraṇaṃ gahetvā kathesi.
உபவஜ்ஜகுலானீதி உபஸங்கமிதப்³ப³குலானி. இமினா தே²ரோ, ‘‘ப⁴ந்தே, ஏவங் உபட்டா²கேஸு ச உபட்டா²யிகாஸு ச விஜ்ஜமானாஸு ஸோ பி⁴க்கு² தும்ஹாகங் ஸாஸனே பரினிப்³பா³யிஸ்ஸதீ’’தி புப்³ப³பா⁴க³படிபத்தியங் குலஸங்ஸக்³க³தோ³ஸங் த³ஸ்ஸெந்தோ புச்ச²தி. அத²ஸ்ஸ ப⁴க³வா குலேஸு ஸங்ஸக்³கா³பா⁴வங் தீ³பெந்தோ ஹொந்தி ஹேதே ஸாரிபுத்தாதிஆதி³மாஹ. இமஸ்மிங் கிர டா²னே தே²ரஸ்ஸ குலேஸு அஸங்ஸட்ட²பா⁴வோ பாகடோ அஹோஸி. ஸேஸங் ஸப்³ப³த்த² உத்தானமேவ.
Upavajjakulānīti upasaṅkamitabbakulāni. Iminā thero, ‘‘bhante, evaṃ upaṭṭhākesu ca upaṭṭhāyikāsu ca vijjamānāsu so bhikkhu tumhākaṃ sāsane parinibbāyissatī’’ti pubbabhāgapaṭipattiyaṃ kulasaṃsaggadosaṃ dassento pucchati. Athassa bhagavā kulesu saṃsaggābhāvaṃ dīpento honti hete sāriputtātiādimāha. Imasmiṃ kira ṭhāne therassa kulesu asaṃsaṭṭhabhāvo pākaṭo ahosi. Sesaṃ sabbattha uttānameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. ச²ன்னஸுத்தங் • 4. Channasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. ச²ன்னஸுத்தவண்ணனா • 4. Channasuttavaṇṇanā
