| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
(৮) ৩. আনন্দৰগ্গো
(8) 3. Ānandavaggo
১. ছন্নসুত্তৰণ্ণনা
1. Channasuttavaṇṇanā
৭২. ততিযস্স পঠমে ছন্নপরিব্বাজকোতি ন নগ্গপরিব্বাজকো। বাহিরকসমযং লুঞ্চিত্ৰা হরন্তোতি বাহিরকানং সমযং নিসেধেত্ৰা আপন্নো।
72. Tatiyassa paṭhame channaparibbājakoti na naggaparibbājako. Bāhirakasamayaṃ luñcitvā harantoti bāhirakānaṃ samayaṃ nisedhetvā āpanno.
পঞ্ঞাচক্খুস্স ৰিবন্ধনতো অন্ধং করোতীতি অন্ধকরণোতি আহ ‘‘যস্স রাগো উপ্পজ্জতী’’তিআদি। অচক্খুকরণোতি অসমত্থসমাসোযং ‘‘অসূরিযপস্সানি মুখানী’’তিআদীসু ৰিযাতি আহ ‘‘পঞ্ঞাচক্খুং ন করোতীতি অচক্খুকরণো’’তি। পঞ্ঞানিরোধিকোতি অনুপ্পন্নায লোকিযলোকুত্তরায পঞ্ঞায উপ্পজ্জিতুং ন দেতি, লোকিযপঞ্ঞং পন অট্ঠসমাপত্তিপঞ্চাভিঞ্ঞাৰসেন উপ্পন্নম্পি সমুচ্ছিন্দিত্ৰা খিপতীতি পঞ্ঞানিরোধিকোতি এৰম্পেত্থ অত্থো দট্ঠব্বো। অনুপ্পন্নানুপ্পাদউপ্পন্নপরিহানিনিমিত্ততায হি পঞ্ঞং নিরোধেতীতি পঞ্ঞানিরোধিকো। ৰিহনতি ৰিবাধতীতি ৰিঘাতো, দুক্খন্তি আহ ‘‘দুক্খসঙ্খাতস্স ৰিঘাতস্সা’’তি। কিলেসনিব্বানন্তি ইমিনা অসঙ্খতনিব্বানমেৰ ৰদতি। অসঙ্খতঞ্হি নিব্বানং নাম, তং পচ্চক্খং কাতুং ন দেতীতি অনিব্বানসংৰত্তনিকো। লোকুত্তরমিস্সকো কথিতো পুব্বভাগিযস্সপি অরিযমগ্গস্স কথিতত্তা।
Paññācakkhussa vibandhanato andhaṃ karotīti andhakaraṇoti āha ‘‘yassa rāgo uppajjatī’’tiādi. Acakkhukaraṇoti asamatthasamāsoyaṃ ‘‘asūriyapassāni mukhānī’’tiādīsu viyāti āha ‘‘paññācakkhuṃ na karotīti acakkhukaraṇo’’ti. Paññānirodhikoti anuppannāya lokiyalokuttarāya paññāya uppajjituṃ na deti, lokiyapaññaṃ pana aṭṭhasamāpattipañcābhiññāvasena uppannampi samucchinditvā khipatīti paññānirodhikoti evampettha attho daṭṭhabbo. Anuppannānuppādauppannaparihāninimittatāya hi paññaṃ nirodhetīti paññānirodhiko. Vihanati vibādhatīti vighāto, dukkhanti āha ‘‘dukkhasaṅkhātassa vighātassā’’ti. Kilesanibbānanti iminā asaṅkhatanibbānameva vadati. Asaṅkhatañhi nibbānaṃ nāma, taṃ paccakkhaṃ kātuṃ na detīti anibbānasaṃvattaniko. Lokuttaramissako kathito pubbabhāgiyassapi ariyamaggassa kathitattā.
ছন্নসুত্তৰণ্ণনা নিট্ঠিতা।
Channasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. ছন্নসুত্তং • 1. Channasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১. ছন্নসুত্তৰণ্ণনা • 1. Channasuttavaṇṇanā
