| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৮. ছন্নসুত্তৰণ্ণনা
8. Channasuttavaṇṇanā
৯০. মক্খীতি গুণমক্খনলক্খণেন মক্খেন সমন্নাগতো। পল়াসীতি যুগগ্গাহলক্খণেন পল়াসেন সমন্নাগতো। এতং অৰোচাতি ‘‘ওৰদন্তু মং…পে॰… পস্সেয্য’’ন্তি এতং অৰোচ।
90.Makkhīti guṇamakkhanalakkhaṇena makkhena samannāgato. Paḷāsīti yugaggāhalakkhaṇena paḷāsena samannāgato. Etaṃ avocāti ‘‘ovadantu maṃ…pe… passeyya’’nti etaṃ avoca.
থেরন্তি ছন্নত্থেরং। অত্তনো দুগ্গহণেন কঞ্চি উপারম্ভম্পি করেয্য। তেন ৰুত্তং ‘‘এৰং কির নেসং অহোসী’’তিআদি। নিদ্দোসমেৰস্স কত্ৰাতি আদিতো অনুরূপত্তমেৰ কত্ৰা সদ্ধম্মং কথেস্সামাতি।
Theranti channattheraṃ. Attano duggahaṇena kañci upārambhampi kareyya. Tena vuttaṃ ‘‘evaṃ kira nesaṃ ahosī’’tiādi. Niddosamevassa katvāti ādito anurūpattameva katvā saddhammaṃ kathessāmāti.
পরিতস্সনা উপাদানন্তি ভযপরিতস্সনা দিট্ঠুপাদানং। অনত্তনি সতি অনত্তকতানি কম্মানি কমত্তানং ফুসিস্সন্তীতি ভযপরিতস্সনা চেৰ দিট্ঠুপাদানঞ্চ উপ্পজ্জতি। পটিনিৰত্ততীতি যথারদ্ধৰিপস্সনাতো পটিনিৰত্ততি, নাসক্খীতি অত্থো। কস্মা পনেতস্স ৰিপস্সনমনুযুঞ্জন্তস্স এৰং অহোসীতি তত্থ কারণং ৰদতি ‘‘অযং কিরা’’তিআদিনা। এৰন্তি ‘‘কো নু খো মে অত্তা’’তি এৰং ন হোতি। তাৰতিকা ৰিস্সত্থীতি ‘‘ময্হং ধম্মং দেসেতূ’’তি ৰুত্তৰিস্সাসো অত্থীতি অত্থো। ইদং কচ্চানসত্থং অদ্দসাতি যোজনা। ‘‘দ্ৰযনিস্সিতো, কচ্চান, লোকো’’তিআদি দিট্ঠিৰিনিৰেঠনা। ‘‘এতে তে, কচ্চান, উভো অন্তে অনুপগম্মা’’তিআদি বুদ্ধবলদীপনা।
Paritassanā upādānanti bhayaparitassanā diṭṭhupādānaṃ. Anattani sati anattakatāni kammāni kamattānaṃ phusissantīti bhayaparitassanā ceva diṭṭhupādānañca uppajjati. Paṭinivattatīti yathāraddhavipassanāto paṭinivattati, nāsakkhīti attho. Kasmā panetassa vipassanamanuyuñjantassa evaṃ ahosīti tattha kāraṇaṃ vadati ‘‘ayaṃ kirā’’tiādinā. Evanti ‘‘ko nu kho me attā’’ti evaṃ na hoti. Tāvatikā vissatthīti ‘‘mayhaṃ dhammaṃ desetū’’ti vuttavissāso atthīti attho. Idaṃ kaccānasatthaṃ addasāti yojanā. ‘‘Dvayanissito, kaccāna, loko’’tiādi diṭṭhiviniveṭhanā. ‘‘Ete te, kaccāna, ubho ante anupagammā’’tiādi buddhabaladīpanā.
ছন্নসুত্তৰণ্ণনা নিট্ঠিতা।
Channasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. ছন্নসুত্তং • 8. Channasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. ছন্নসুত্তৰণ্ণনা • 8. Channasuttavaṇṇanā
