| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៨. ឆន្នសុត្តវណ្ណនា
8. Channasuttavaṇṇanā
៩០. មក្ខីតិ គុណមក្ខនលក្ខណេន មក្ខេន សមន្នាគតោ។ បឡាសីតិ យុគគ្គាហលក្ខណេន បឡាសេន សមន្នាគតោ។ ឯតំ អវោចាតិ ‘‘ឱវទន្តុ មំ…បេ.… បស្សេយ្យ’’ន្តិ ឯតំ អវោច។
90.Makkhīti guṇamakkhanalakkhaṇena makkhena samannāgato. Paḷāsīti yugaggāhalakkhaṇena paḷāsena samannāgato. Etaṃ avocāti ‘‘ovadantu maṃ…pe… passeyya’’nti etaṃ avoca.
ថេរន្តិ ឆន្នត្ថេរំ។ អត្តនោ ទុគ្គហណេន កញ្ចិ ឧបារម្ភម្បិ ករេយ្យ។ តេន វុត្តំ ‘‘ឯវំ កិរ នេសំ អហោសី’’តិអាទិ។ និទ្ទោសមេវស្ស កត្វាតិ អាទិតោ អនុរូបត្តមេវ កត្វា សទ្ធម្មំ កថេស្សាមាតិ។
Theranti channattheraṃ. Attano duggahaṇena kañci upārambhampi kareyya. Tena vuttaṃ ‘‘evaṃ kira nesaṃ ahosī’’tiādi. Niddosamevassa katvāti ādito anurūpattameva katvā saddhammaṃ kathessāmāti.
បរិតស្សនា ឧបាទានន្តិ ភយបរិតស្សនា ទិដ្ឋុបាទានំ។ អនត្តនិ សតិ អនត្តកតានិ កម្មានិ កមត្តានំ ផុសិស្សន្តីតិ ភយបរិតស្សនា ចេវ ទិដ្ឋុបាទានញ្ច ឧប្បជ្ជតិ។ បដិនិវត្តតីតិ យថារទ្ធវិបស្សនាតោ បដិនិវត្តតិ, នាសក្ខីតិ អត្ថោ។ កស្មា បនេតស្ស វិបស្សនមនុយុញ្ជន្តស្ស ឯវំ អហោសីតិ តត្ថ ការណំ វទតិ ‘‘អយំ កិរា’’តិអាទិនា។ ឯវន្តិ ‘‘កោ នុ ខោ មេ អត្តា’’តិ ឯវំ ន ហោតិ។ តាវតិកា វិស្សត្ថីតិ ‘‘មយ្ហំ ធម្មំ ទេសេតូ’’តិ វុត្តវិស្សាសោ អត្ថីតិ អត្ថោ។ ឥទំ កច្ចានសត្ថំ អទ្ទសាតិ យោជនា។ ‘‘ទ្វយនិស្សិតោ, កច្ចាន, លោកោ’’តិអាទិ ទិដ្ឋិវិនិវេឋនា។ ‘‘ឯតេ តេ, កច្ចាន, ឧភោ អន្តេ អនុបគម្មា’’តិអាទិ ពុទ្ធពលទីបនា។
Paritassanā upādānanti bhayaparitassanā diṭṭhupādānaṃ. Anattani sati anattakatāni kammāni kamattānaṃ phusissantīti bhayaparitassanā ceva diṭṭhupādānañca uppajjati. Paṭinivattatīti yathāraddhavipassanāto paṭinivattati, nāsakkhīti attho. Kasmā panetassa vipassanamanuyuñjantassa evaṃ ahosīti tattha kāraṇaṃ vadati ‘‘ayaṃ kirā’’tiādinā. Evanti ‘‘ko nu kho me attā’’ti evaṃ na hoti. Tāvatikā vissatthīti ‘‘mayhaṃ dhammaṃ desetū’’ti vuttavissāso atthīti attho. Idaṃ kaccānasatthaṃ addasāti yojanā. ‘‘Dvayanissito, kaccāna, loko’’tiādi diṭṭhiviniveṭhanā. ‘‘Ete te, kaccāna, ubho ante anupagammā’’tiādi buddhabaladīpanā.
ឆន្នសុត្តវណ្ណនា និដ្ឋិតា។
Channasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៨. ឆន្នសុត្តំ • 8. Channasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៨. ឆន្នសុត្តវណ្ណនា • 8. Channasuttavaṇṇanā
