| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
(8) 3. ආනන්‌දවග්‌ගො
(8) 3. Ānandavaggo
1. ඡන්‌නසුත්‌තවණ්‌ණනා
1. Channasuttavaṇṇanā
72. තතියස්‌ස පඨමෙ ඡන්‌නොති එවංනාමකො ඡන්‌නපරිබ්‌බාජකො. තුම්‌හෙපි, ආවුසොති, ආවුසො, යථා මයං රාගාදීනං පහානං පඤ්‌ඤාපෙම, කිං එවං තුම්‌හෙපි පඤ්‌ඤාපෙථාති පුච්‌ඡති. තතො ථෙරො ‘‘අයං පරිබ්‌බාජකො අම්‌හෙ රාගාදීනං පහානං පඤ්‌ඤාපෙමාති වදති, නත්‌ථි පනෙතං බාහිරසමයෙ’’ති තං පටික්‌ඛිපන්‌තො මයං ඛො, ආවුසොතිආදිමාහ. තත්‌ථ ඛොති අවධාරණත්‌ථෙ නිපාතො, මයමෙව පඤ්‌ඤාපෙමාති අත්‌ථො. තතො පරිබ්‌බාජකො චින්‌තෙසි ‘‘අයං ථෙරො බාහිරසමයං ලුඤ්‌චිත්‌වා හරන්‌තො ‘මයමෙවා’ති ආහ. කිං නු ඛො ආදීනවං දිස්‌වා එතෙ එතෙසං පහානං පඤ්‌ඤාපෙන්‌තී’’ති. අථ ථෙරං පුච්‌ඡන්‌තො කිං පන තුම්‌හෙතිආදිමාහ. ථෙරො තස්‌ස බ්‍යාකරොන්‌තො රත්‌තො ඛොතිආදිමාහ. තත්‌ථ අත්‌තත්‌ථන්‌ති දිට්‌ඨධම්‌මිකසම්‌පරායිකං ලොකියලොකුත්‌තරං අත්‌තනො අත්‌ථං. පරත්‌ථඋභයත්‌ථෙසුපි එසෙව නයො.
72. Tatiyassa paṭhame channoti evaṃnāmako channaparibbājako. Tumhepi, āvusoti, āvuso, yathā mayaṃ rāgādīnaṃ pahānaṃ paññāpema, kiṃ evaṃ tumhepi paññāpethāti pucchati. Tato thero ‘‘ayaṃ paribbājako amhe rāgādīnaṃ pahānaṃ paññāpemāti vadati, natthi panetaṃ bāhirasamaye’’ti taṃ paṭikkhipanto mayaṃ kho, āvusotiādimāha. Tattha khoti avadhāraṇatthe nipāto, mayameva paññāpemāti attho. Tato paribbājako cintesi ‘‘ayaṃ thero bāhirasamayaṃ luñcitvā haranto ‘mayamevā’ti āha. Kiṃ nu kho ādīnavaṃ disvā ete etesaṃ pahānaṃ paññāpentī’’ti. Atha theraṃ pucchanto kiṃ pana tumhetiādimāha. Thero tassa byākaronto ratto khotiādimāha. Tattha attatthanti diṭṭhadhammikasamparāyikaṃ lokiyalokuttaraṃ attano atthaṃ. Paratthaubhayatthesupi eseva nayo.
අන්‌ධකරණොතිආදීසු යස්‌ස රාගො උප්‌පජ්‌ජති, තං යථාභූතදස්‌සනනිවාරණෙන අන්‌ධං කරොතීති අන්‌ධකරණො. පඤ්‌ඤාචක්‌ඛුං න කරොතීති අචක්‌ඛුකරණො. ඤාණං න කරොතීති අඤ්‌ඤාණකරණො. කම්‌මස්‌සකතපඤ්‌ඤා ඣානපඤ්‌ඤා විපස්‌සනාපඤ්‌ඤාති ඉමා තිස්‌සො පඤ්‌ඤා අප්‌පවත්‌තිකරණෙන නිරොධෙතීති පඤ්‌ඤානිරොධිකො. අනිට්‌ඨඵලදායකත්‌තා දුක්‌ඛසඞ්‌ඛාතස්‌ස විඝාතස්‌සෙව පක්‌ඛෙ වත්‌තතීති විඝාතපක්‌ඛිකො. කිලෙසනිබ්‌බානං න සංවත්‌තෙතීති අනිබ්‌බානසංවත්‌තනිකො. අලඤ්‌ච පනාවුසො ආනන්‌ද, අප්‌පමාදායාති, ආවුසො ආනන්‌ද, සචෙ එවරූපා පටිපදා අත්‌ථි, අලං තුම්‌හාකං අප්‌පමාදාය යුත්‌තං අනුච්‌ඡවිකං, අප්‌පමාදං කරොථ, ආවුසොති ථෙරස්‌ස වචනං අනුමොදිත්‌වා පක්‌කාමි. ඉමස්‌මිං සුත්‌තෙ අරියමග්‌ගො ලොකුත්‌තරමිස්‌සකො කථිතො. සෙසමෙත්‌ථ උත්‌තානත්‌ථමෙවාති.
Andhakaraṇotiādīsu yassa rāgo uppajjati, taṃ yathābhūtadassananivāraṇena andhaṃ karotīti andhakaraṇo. Paññācakkhuṃ na karotīti acakkhukaraṇo. Ñāṇaṃ na karotīti aññāṇakaraṇo. Kammassakatapaññā jhānapaññā vipassanāpaññāti imā tisso paññā appavattikaraṇena nirodhetīti paññānirodhiko. Aniṭṭhaphaladāyakattā dukkhasaṅkhātassa vighātasseva pakkhe vattatīti vighātapakkhiko. Kilesanibbānaṃ na saṃvattetīti anibbānasaṃvattaniko. Alañca panāvuso ānanda, appamādāyāti, āvuso ānanda, sace evarūpā paṭipadā atthi, alaṃ tumhākaṃ appamādāya yuttaṃ anucchavikaṃ, appamādaṃ karotha, āvusoti therassa vacanaṃ anumoditvā pakkāmi. Imasmiṃ sutte ariyamaggo lokuttaramissako kathito. Sesamettha uttānatthamevāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 1. ඡන්‌නසුත්‌තං • 1. Channasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1. ඡන්‌නසුත්‌තවණ්‌ණනා • 1. Channasuttavaṇṇanā
