| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༤. ཚནྣསུཏྟཝཎྞནཱ
4. Channasuttavaṇṇanā
༨༧. སབྦནིམིཏྟེཧི པཊིསལླཱིཡཏི ཨེཏེནཱཏི པཊིསལླཱནཾ, ཕལསམཱཔཏྟི། ཛཱིཝིཏཧཱརཀསཏྠཾ ཛཱིཝིཏསྶ ཧརཎཏོ, སཏྟཱནཉྩ སསནཏོ ཧིཾསནཏོ ། པརིཙརིཏོཏི པཡིརུཔཱསིཏོ། ཏེན ཡཐཱནུསིཊྛཾ པཊིཔཛྫིནྟི དཱིཔེཏི།
87. Sabbanimittehi paṭisallīyati etenāti paṭisallānaṃ, phalasamāpatti. Jīvitahārakasatthaṃ jīvitassa haraṇato, sattānañca sasanato hiṃsanato . Paricaritoti payirupāsito. Tena yathānusiṭṭhaṃ paṭipajjinti dīpeti.
ཨནུཔཝཛྫནྟི པརེཧི ན ཨུཔཝདིཏབྦཾ། ཏཾ པནེཏྠ ཨཱཡཏིཾ ཨཔྤཊིསནྡྷིབྷཱཝཏོ ཧོཏཱིཏི ཨཱཧ ‘‘ཨཔྤཝཏྟིཀ’’ནྟི། ‘‘ནེཏཾ མམཱ’’ཏིཨཱདཱིནི ཝདནྟོ ཨརཧཏྟེ པཀྑིཔིཏྭཱ ཀཐེསི། པུཐུཛྫནབྷཱཝམེཝ དཱིཔེནྟོ ཝདཏི ཨཀཏཀིཙྩབྷཱཝདཱིཔནེན། ཀིཉྩཱཔི ཐེརོ པུཙྪིཏཾ པཉྷཾ ཨརཧཏྟེ པཀྑིཔིཏྭཱ ཀཐེསི, ‘‘ན སམནུཔསྶཱམཱི’’ཏི པན ཝདནྟོ ཀིཉྩི ནིཔྥཏྟིཾ ན ཀཐེསི, ཏསྨཱ ‘‘ཨིདམྤི མནསི ཀཱཏབྦ’’ནྟི ཨིདཾ ཨཱནེཏྭཱ སམྦནྡྷོ།
Anupavajjanti parehi na upavaditabbaṃ. Taṃ panettha āyatiṃ appaṭisandhibhāvato hotīti āha ‘‘appavattika’’nti. ‘‘Netaṃ mamā’’tiādīni vadanto arahatte pakkhipitvā kathesi. Puthujjanabhāvameva dīpento vadati akatakiccabhāvadīpanena. Kiñcāpi thero pucchitaṃ pañhaṃ arahatte pakkhipitvā kathesi, ‘‘na samanupassāmī’’ti pana vadanto kiñci nipphattiṃ na kathesi, tasmā ‘‘idampi manasi kātabba’’nti idaṃ ānetvā sambandho.
ཀིལེསཔསྶདྡྷཱིཏི ཀིལེསཔརིལཱ༹ཧཝཱུཔསམོ། བྷཝཏྠཱཡ པུན བྷཝཏྠཱཡ། ཨཱལཡནིཀནྟི པརིཡུཊྛཱནེཏི བྷཝནྟརེ ཨཔེཀྑཱསཉྙིཏེ ཨཱལཡེ ནིཀནྟིཡཱ ཙ པརིཡུཊྛཱནཔྤཏྟིཡཱ། ཨསཏི ཨཝིཛྫམཱནཱཡ། པཊིསནྡྷིཝསེན ཨཉྙབྷཝཏོ ཨིདྷཱགམནཾ ཨཱགཏི ནཱམ། ཙུཏིཝསེན གམནནྟི ཙཝནཝསེན ཨིཏོ གཏི། ཨནུརཱུཔགམནཾ གཏི ནཱམ ཏདུབྷཡཾ ན ཧོཏི། ཙུཏཱུཔཔཱཏོ ཨཔརཱཔརབྷཝནཝསེན ཙུཏི, ཨུཔཔཛྫནཝསེན ཨུཔཔཱཏོ, ཏདུབྷཡམྤི ན ཧོཏི། ཨེཝཾ པན ཙུཏཱུཔཔཱཏེ ཨསཏི ནེཝིདྷ ན ཨིདྷ ལོཀེ། ན ཧུརཾ ན པརལོཀེ ཧོཏི། ཏཏོ ཨེཝ ན ཨུབྷཡཏྠ ཧོཏི། ཨཡམེཝ ཨནྟོ ཨཡཾ ཨིདྷལོཀེ པརལོཀེ ཙ ཨབྷཱཝོཡེཝ དུཀྑསྶ པརིཡོསཱནཾ། ཨཡམེཝཱཏི ཡཐཱཝུཏྟོ ཨེཝ – ཨེཏྠ ཨེཏསྨིཾ པཱཋེ པརམྤརཱགཏོ པམཱཎབྷཱུཏོ ཨཏྠོ།
Kilesapassaddhīti kilesapariḷāhavūpasamo. Bhavatthāya puna bhavatthāya. Ālayanikanti pariyuṭṭhāneti bhavantare apekkhāsaññite ālaye nikantiyā ca pariyuṭṭhānappattiyā. Asati avijjamānāya. Paṭisandhivasena aññabhavato idhāgamanaṃ āgati nāma. Cutivasena gamananti cavanavasena ito gati. Anurūpagamanaṃ gati nāma tadubhayaṃ na hoti. Cutūpapāto aparāparabhavanavasena cuti, upapajjanavasena upapāto, tadubhayampi na hoti. Evaṃ pana cutūpapāte asati nevidha na idha loke. Na huraṃ na paraloke hoti. Tato eva na ubhayattha hoti. Ayameva anto ayaṃ idhaloke paraloke ca abhāvoyeva dukkhassa pariyosānaṃ. Ayamevāti yathāvutto eva – ettha etasmiṃ pāṭhe paramparāgato pamāṇabhūto attho.
ཡེ པནཱཏི སམྨཝཱདིནོ སནྡྷཱཡ ཝདཏི། ཨནྟརཱབྷཝཾ ཨིཙྪནྟི ‘‘ཨེཝཾ བྷཝེན བྷཝནྟརསམྦནྡྷོ ཡུཛྫེཡྻཱ’’ཏི། ནིརཏྠཀཾ ཨནྟརཱབྷཝསྶ ནཱམ ཀསྶཙི ཨབྷཱཝཏོ། ཙུཏིཀྑནྡྷཱནནྟརཉྷི པཊིསནྡྷིཀྑནྡྷཱནཾཡེཝ པཱཏུབྷཱཝོ། ཏེནཱཧ ‘‘ཨནྟརཱབྷཝསྶ…པེ॰… པཊིཀྑིཏྟོཡེཝཱ’’ཏི། ཏཏྠ བྷཱཝོཏི ཨཏྠིཏཱ། ཨབྷིདྷམྨེ ཀཐཱཝཏྠུཔྤཀརཎེ (ཀཐཱ॰ ༥༠༥-༥༠༧) པཊིཀྑིཏྟོཡེཝ། ཡདི ཨེཝཾ ‘‘ཨནྟརེནཱ’’ཏི ཨིདཾ ཀཐནྟི ཨཱཧ ‘‘ཨནྟརེནཱ’’ཏིཨཱདི། ཝིཀཔྤཏོ ཨཉྙཾ ཝིཀཔྤནྟརཾ, ཏསྶ དཱིཔནཾ ‘‘ཨནྟརེནཱ’’ཏི ཝཙནཾ། ན ཨནྟརཱབྷཝདཱིཔནཾ ཏཱདིསསྶ ཨནུཔལབྦྷནཏོ པཡོཛནཱབྷཱཝཏོ ཙ། ཡཏྠ ཧི ཝིཔཱཀཝིཉྙཱཎསྶ པཙྩཡོ, ཏཏྠསྶ ནིསྶཡབྷཱུཏསྶ ཝཏྠུསྶ སཧབྷཱཝཱིནཉྩ ཁནྡྷཱནཾ སམྦྷཝོཏི སདྡྷིཾ ཨཏྟནོ ནིསྶཡེན ཝིཉྙཱཎཾ ཨུཔྤཛྫཏེཝཱཏི ནཱསྶ ཨུཔྤཏྟིཡཱ དེསདཱུརཏཱ ཝེདིཏབྦཱ། ‘‘ནེཝ ཨིདྷ ན ཧུར’’ནྟི ཝུཏྟདྭཡཏོ ཨཔརཾ ཝིཀཔྤེན ‘‘ན ཨུབྷཡ’’ནྟི, ཏཏྠཔི ན ཧོཏིཡེཝཱཏི ཨདྷིཔྤཱཡོ། ‘‘ཨནྟརེནཱ’’ཏི ཝཱ ‘‘ཝིནཱ’’ཏི ཨིམིནཱ སམཱནཏྠོ ནིཔཱཏོ, ཏསྨཱ ནེཝིདྷ, ན ཧུརཾ, ཨུབྷཡཾ ཝིནཱཔི ནེཝཱཏི ཨཏྠོ།
Ye panāti sammavādino sandhāya vadati. Antarābhavaṃ icchanti ‘‘evaṃ bhavena bhavantarasambandho yujjeyyā’’ti. Niratthakaṃ antarābhavassa nāma kassaci abhāvato. Cutikkhandhānantarañhi paṭisandhikkhandhānaṃyeva pātubhāvo. Tenāha ‘‘antarābhavassa…pe… paṭikkhittoyevā’’ti. Tattha bhāvoti atthitā. Abhidhamme kathāvatthuppakaraṇe (kathā. 505-507) paṭikkhittoyeva. Yadi evaṃ ‘‘antarenā’’ti idaṃ kathanti āha ‘‘antarenā’’tiādi. Vikappato aññaṃ vikappantaraṃ, tassa dīpanaṃ ‘‘antarenā’’ti vacanaṃ. Na antarābhavadīpanaṃ tādisassa anupalabbhanato payojanābhāvato ca. Yattha hi vipākaviññāṇassa paccayo, tatthassa nissayabhūtassa vatthussa sahabhāvīnañca khandhānaṃ sambhavoti saddhiṃ attano nissayena viññāṇaṃ uppajjatevāti nāssa uppattiyā desadūratā veditabbā. ‘‘Neva idha na hura’’nti vuttadvayato aparaṃ vikappena ‘‘na ubhaya’’nti, tatthapi na hotiyevāti adhippāyo. ‘‘Antarenā’’ti vā ‘‘vinā’’ti iminā samānattho nipāto, tasmā nevidha, na huraṃ, ubhayaṃ vināpi nevāti attho.
ཨཱཧརཱིཏི ཚིནྣཝསེན གཎྷི། ཏེནཱཧ ‘‘ཀཎྛནཱལ༹ཾ ཚིནྡཱི’’ཏི། པརིགྒཎྷནྟོཏི སམྨསནྟོ། པརིནིབྦུཏོ དཱིགྷརཏྟཾ ཝིཔསྶནཱཡཾ ཡུཏྟཔཡུཏྟབྷཱཝཏོ། ‘‘ཨནུཔཝཛྫཾ ཚནྣེན བྷིཀྑུནཱ སཏྠཾ ཨཱཧརིཏ’’ནྟི, ཀཐེསཱིཏི ཨསེཀྑཀཱལེ བྱཱཀརཎཾ ཝིཡ ཀཏྭཱ ཀཐེསི།
Āharīti chinnavasena gaṇhi. Tenāha ‘‘kaṇṭhanāḷaṃ chindī’’ti. Pariggaṇhantoti sammasanto. Parinibbuto dīgharattaṃ vipassanāyaṃ yuttapayuttabhāvato. ‘‘Anupavajjaṃ channena bhikkhunā satthaṃ āharita’’nti, kathesīti asekkhakāle byākaraṇaṃ viya katvā kathesi.
ཨིམིནཱཏི ‘‘ཨུཔཝཛྫཀུལཱནཱི’’ཏི ཨིམིནཱ ཝཙནེན། ཐེརོཏི སཱརིཔུཏྟཏྠེརོ། ཨེཝནྟི ཨེཝཾ པུབྦཀཱལེསུ སཾསཊྛཝིཧཱརཱི ཧུཏྭཱ ཋིཏོ པཙྪཱ ཨརཧཏྟཾ པཱཔུཎིསྶཏཱིཏི ཨཱསངྐནྟོ པུཙྪཏི། སེསཾ ཨུཏྟཱནམེཝ།
Imināti ‘‘upavajjakulānī’’ti iminā vacanena. Theroti sāriputtatthero. Evanti evaṃ pubbakālesu saṃsaṭṭhavihārī hutvā ṭhito pacchā arahattaṃ pāpuṇissatīti āsaṅkanto pucchati. Sesaṃ uttānameva.
ཚནྣསུཏྟཝཎྞནཱ ནིཊྛིཏཱ།
Channasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༤. ཚནྣསུཏྟཾ • 4. Channasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༤. ཚནྣསུཏྟཝཎྞནཱ • 4. Channasuttavaṇṇanā
