| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
২. ছন্নোৰাদসুত্তৰণ্ণনা
2. Channovādasuttavaṇṇanā
৩৮৯. এৰং মে সুতন্তি ছন্নোৰাদসুত্তং। তত্থ ছন্নোতি এৰংনামকো থেরো, ন অভিনিক্খমনং নিক্খন্তত্থেরো। পটিসল্লানাতি ফলসমাপত্তিতো। গিলানপুচ্ছকাতি গিলানুপট্ঠানং নাম বুদ্ধৰণ্ণিতং, তস্মা এৰমাহ। সত্থন্তি জীৰিতহারকসত্থং। নাৰকঙ্খামীতি ইচ্ছামি।
389.Evaṃme sutanti channovādasuttaṃ. Tattha channoti evaṃnāmako thero, na abhinikkhamanaṃ nikkhantatthero. Paṭisallānāti phalasamāpattito. Gilānapucchakāti gilānupaṭṭhānaṃ nāma buddhavaṇṇitaṃ, tasmā evamāha. Satthanti jīvitahārakasatthaṃ. Nāvakaṅkhāmīti icchāmi.
৩৯০. অনুপৰজ্জন্তি অনুপ্পত্তিকং অপ্পটিসন্ধিকং।
390.Anupavajjanti anuppattikaṃ appaṭisandhikaṃ.
৩৯১. এতং মমাতিআদীনি তণ্হামানদিট্ঠিগাহৰসেন ৰুত্তানি। নিরোধং দিস্ৰাতি খযৰযং ঞত্ৰা। নেতং মম নেসোহমস্মি ন মেসো অত্তাতি সমনুপস্সামীতি অনিচ্চং দুক্খং অনত্তাতি সমনুপস্সামি।
391.Etaṃ mamātiādīni taṇhāmānadiṭṭhigāhavasena vuttāni. Nirodhaṃ disvāti khayavayaṃ ñatvā. Netaṃ mama nesohamasmi na meso attāti samanupassāmīti aniccaṃ dukkhaṃ anattāti samanupassāmi.
৩৯৩. তস্মাতি যস্মা মারণন্তিকৰেদনং অধিৰাসেতুং অসক্কোন্তো সত্থং আহরামীতি ৰদতি, তস্মা। পুথুজ্জনো আযস্মা, তেন ইদম্পি মনসি করোহীতি দীপেতি। নিচ্চকপ্পন্তি নিচ্চকালং। নিস্সিতস্সাতি তণ্হাদিট্ঠীহি নিস্সিতস্স। চলিতন্তি ৰিপ্ফন্দিতং হোতি। পস্সদ্ধীতি কাযচিত্তপস্সদ্ধি, কিলেসপস্সদ্ধি নাম হোতীতি অত্থো। নতীতি তণ্হানতি। নতিযা অসতীতি ভৰত্থায আলযনিকন্তিপরিযুট্ঠানেসু অসতি। আগতিগতি ন হোতীতি পটিসন্ধিৰসেন আগতি নাম ন হোতি, চুতিৰসেন গমনং নাম ন হোতি। চুতূপপাতোতি চৰনৰসেন চুতি, উপপজ্জনৰসেন উপপাতো। নেৰিধ ন হুরং ন উভযমন্তরেনাতি নযিধ লোকে, ন পরলোকে, ন উভযত্থ হোতি। এসেৰন্তো দুক্খস্সাতি ৰট্টদুক্খকিলেসদুক্খস্স অযমেৰ অন্তো অযং পরিচ্ছেদো পরিৰটুমভাৰো হোতি। অযমেৰ হি এত্থ অত্থো। যে পন ‘‘ন উভযমন্তরেনা’’তি ৰচনং গহেত্ৰা অন্তরাভৰং ইচ্ছন্তি, তেসং উত্তরং হেট্ঠা ৰুত্তমেৰ।
393.Tasmāti yasmā māraṇantikavedanaṃ adhivāsetuṃ asakkonto satthaṃ āharāmīti vadati, tasmā. Puthujjano āyasmā, tena idampi manasi karohīti dīpeti. Niccakappanti niccakālaṃ. Nissitassāti taṇhādiṭṭhīhi nissitassa. Calitanti vipphanditaṃ hoti. Passaddhīti kāyacittapassaddhi, kilesapassaddhi nāma hotīti attho. Natīti taṇhānati. Natiyā asatīti bhavatthāya ālayanikantipariyuṭṭhānesu asati. Āgatigati na hotīti paṭisandhivasena āgati nāma na hoti, cutivasena gamanaṃ nāma na hoti. Cutūpapātoti cavanavasena cuti, upapajjanavasena upapāto. Nevidha na huraṃ na ubhayamantarenāti nayidha loke, na paraloke, na ubhayattha hoti. Esevanto dukkhassāti vaṭṭadukkhakilesadukkhassa ayameva anto ayaṃ paricchedo parivaṭumabhāvo hoti. Ayameva hi ettha attho. Ye pana ‘‘na ubhayamantarenā’’ti vacanaṃ gahetvā antarābhavaṃ icchanti, tesaṃ uttaraṃ heṭṭhā vuttameva.
৩৯৪. সত্থং আহরেসীতি জীৰিতহারকং সত্থং আহরি, কণ্ঠনাল়িং ছিন্দি। অথস্স তস্মিং খণে মরণভযং ওক্কমি, গতিনিমিত্তং উপট্ঠাসি। সো অত্তনো পুথুজ্জনভাৰং ঞত্ৰা সংৰিগ্গো ৰিপস্সনং পট্ঠপেত্ৰা সঙ্খারে পরিগ্গণ্হন্তো অরহত্তং পত্ৰা সমসীসী হুত্ৰা পরিনিব্বাযি। সম্মুখাযেৰ অনুপৰজ্জতা ব্যাকতাতি কিঞ্চাপি ইদং থেরস্স পুথুজ্জনকালে ব্যাকরণং হোতি, এতেন পন ব্যাকরণেন অনন্তরাযমস্স পরিনিব্বানং অহোসি। তস্মা ভগৰা তমেৰ ব্যাকরণং গহেত্ৰা কথেসি। উপৰজ্জকুলানীতি উপসঙ্কমিতব্বকুলানি। ইমিনা থেরো, – ‘‘ভন্তে, এৰং উপট্ঠাকেসু চ উপট্ঠাযিকাসু চ ৰিজ্জমানাসু সো ভিক্খু তুম্হাকং সাসনে পরিনিব্বাযিস্সতী’’তি পুচ্ছতি। অথস্স ভগৰা কুলেসু সংসগ্গাভাৰং দীপেন্তো হোন্তি হেতে সারিপুত্তাতিআদিমাহ। ইমস্মিং কির ঠানে থেরস্স কুলেসু অসংসট্ঠভাৰো পাকটো অহোসি। সেসং সব্বত্থ উত্তানমেৰাতি।
394.Satthaṃ āharesīti jīvitahārakaṃ satthaṃ āhari, kaṇṭhanāḷiṃ chindi. Athassa tasmiṃ khaṇe maraṇabhayaṃ okkami, gatinimittaṃ upaṭṭhāsi. So attano puthujjanabhāvaṃ ñatvā saṃviggo vipassanaṃ paṭṭhapetvā saṅkhāre pariggaṇhanto arahattaṃ patvā samasīsī hutvā parinibbāyi. Sammukhāyeva anupavajjatā byākatāti kiñcāpi idaṃ therassa puthujjanakāle byākaraṇaṃ hoti, etena pana byākaraṇena anantarāyamassa parinibbānaṃ ahosi. Tasmā bhagavā tameva byākaraṇaṃ gahetvā kathesi. Upavajjakulānīti upasaṅkamitabbakulāni. Iminā thero, – ‘‘bhante, evaṃ upaṭṭhākesu ca upaṭṭhāyikāsu ca vijjamānāsu so bhikkhu tumhākaṃ sāsane parinibbāyissatī’’ti pucchati. Athassa bhagavā kulesu saṃsaggābhāvaṃ dīpento honti hete sāriputtātiādimāha. Imasmiṃ kira ṭhāne therassa kulesu asaṃsaṭṭhabhāvo pākaṭo ahosi. Sesaṃ sabbattha uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
ছন্নোৰাদসুত্তৰণ্ণনা নিট্ঠিতা।
Channovādasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ২. ছন্নোৰাদসুত্তং • 2. Channovādasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ২. ছন্নোৰাদসুত্তৰণ্ণনা • 2. Channovādasuttavaṇṇanā
