| Library / Tipiṭaka / д̇ибидага • Tipiṭaka / маж̇жхиманигааяа (дийгаа) • Majjhimanikāya (ṭīkā) |
2. чанноваад̣̇асуд̇д̇аван̣н̣анаа
2. Channovādasuttavaṇṇanā
389. чаннод̇и ид̣̇ам̣ д̇асса нааманд̇и ааха ‘‘звам̣наамаго т̇зро’’д̇и. яасса бана сад̇т̇аараа бариниб̣б̣аанагаалз б̣рахмад̣̇ан̣д̣о аан̣ад̇д̇о, аяам̣ со на ход̇ийд̇и д̣̇ассзнд̇о ааха – ‘‘на абхинигкаманам̣ нигканд̇ад̇т̇зро’’д̇и, логанаат̇асса абхинигкаманагаалз габилабурад̇о нигканд̇од̇и ад̇т̇о. г̇илаанабужчагаад̇и г̇илаанасса бужчанагаа, г̇илаанабхаавасса авад̇т̇ам̣ сод̇угаамаад̇и ад̇т̇о. сасанад̇о хим̣санад̇о сад̇т̇анд̇и ааха ‘‘ж̇ийвид̇ахаарагасад̇т̇а’’нд̇и.
389.Channoti idaṃ tassa nāmanti āha ‘‘evaṃnāmako thero’’ti. Yassa pana satthārā parinibbānakāle brahmadaṇḍo āṇatto, ayaṃ so na hotīti dassento āha – ‘‘na abhinikkhamanaṃ nikkhantatthero’’ti, lokanāthassa abhinikkhamanakāle kapilapurato nikkhantoti attho. Gilānapucchakāti gilānassa pucchanakā, gilānabhāvassa avatthaṃ sotukāmāti attho. Sasanato hiṃsanato satthanti āha ‘‘jīvitahārakasattha’’nti.
390. убаваж̇ж̇ам̣ зд̇асса над̇т̇ийд̇и анубаваж̇ж̇ам̣, гараж̇агааяам̣ гад̇ваа ааяад̇им̣ уббад̇д̇ирахид̇анд̇и ад̇т̇о. д̇знааха ‘‘ануббад̇д̇ига’’нд̇и.
390. Upavajjaṃ etassa natthīti anupavajjaṃ, karajakāyaṃ katvā āyatiṃ uppattirahitanti attho. Tenāha ‘‘anuppattika’’nti.
391. каяаваяам̣ н̃ад̇ваад̇и сан̇каараг̇ад̇ам̣ кан̣абхан̇г̇ам̣ нзд̇ваа н̃аан̣зна яаат̇аавад̇о н̃ад̇ваа. нзд̇ам̣ мамаад̇и д̣̇угкад̇о саманубассанаа сан̇каарзсу д̣̇идтзсу мамам̣гаараабхаавад̇о. нзсохамасмийд̇и анижжад̇о саманубассанаа анижжад̇о д̇зсу д̣̇идтзсу ахам̣гаараабхаавад̇о. на мзсо ад̇д̇аад̇и анад̇д̇ад̇о саманубассанаа анад̇д̇ад̇о д̇зсу д̣̇идтзсу ад̇д̇аг̇г̇аахаабхаавад̇од̇и ааха – ‘‘нзд̇ам̣ мама…бз… ад̇д̇аад̇и саманубассаамий’’д̇и.
391.Khayavayaṃ ñatvāti saṅkhāragataṃ khaṇabhaṅgaṃ netvā ñāṇena yāthāvato ñatvā. Netaṃ mamāti dukkhato samanupassanā saṅkhāresu diṭṭhesu mamaṃkārābhāvato. Nesohamasmīti aniccato samanupassanā aniccato tesu diṭṭhesu ahaṃkārābhāvato. Na meso attāti anattato samanupassanā anattato tesu diṭṭhesu attaggāhābhāvatoti āha – ‘‘netaṃ mama…pe… attāti samanupassāmī’’ti.
393. д̇асмаа бут̇уж̇ж̇анод̇и яасмаа арияо саб̣б̣асо барин̃н̃аад̇авад̇т̇уго д̣̇угкавзд̣̇анам̣ ад̇хиваасзд̇ум̣ асаггонд̇о наама над̇т̇и, д̇асмаа бут̇уж̇ж̇ано, гзвалам̣ бана ад̇химаанзнзва – ‘‘наабхиган̇каами ж̇ийвид̇ам̣, барижин̣н̣о мз сад̇т̇аа, нирод̇хам̣ д̣̇исваа’’д̇и вад̣̇ад̇ийд̇и ад̇хиббааяо. ид̣̇амбийд̇и ид̣̇амби, ‘‘ниссид̇асса жалид̇а’’нд̇иаад̣̇и. д̇ан̣хааниссид̇абхаавзна хи ааяасмаа чанно мааран̣анд̇игам̣ взд̣̇анам̣ ад̇хиваасзд̇ум̣ асаггонд̇о ид̇о жид̇о баривад̇д̇анд̇о жалад̇и вибпанд̣̇ад̇и, д̇асмаа ‘‘ниссид̇асса жалид̇а’’нд̇иаад̣̇и манасигаад̇аб̣б̣ам̣, д̇зна ид̣̇ам̣ саб̣б̣ам̣ д̇ам̣ вибпанд̣̇ид̇ам̣ на бхависсад̇ийд̇и ад̇хиббааяо. габбасад̣̇д̣̇о гаалабарияааяоби ход̇и, на гаалависзсаваажаго зваад̇и ааха – ‘‘нижжагаббанд̇и нижжагаала’’нд̇и. яат̇аа аббахийнад̇ан̣хаад̣̇идтиго буг̇г̇ало д̇ам̣ниссид̇о аллино, звам̣ д̇аахиби ниссид̇о амуд̇д̇абхаавад̇од̇и ааха – ‘‘д̇ан̣хаад̣̇идтийхи ниссид̇ассаа’’д̇и. жалид̇анд̇и яат̇аа яат̇аа асамаарад̣̇д̇хааяа саммаабадибад̇д̇ияаа аад̣̇ийнававасзна жаланд̇ам̣ бана яасмаа арияасса винаяз вируубам̣ жалид̇ам̣ наама ход̇и, д̇асмаа ааха – ‘‘вибпанд̣̇ид̇ам̣ ход̇ий’’д̇и. д̇аад̣̇исз бана бабан̃жавигкамбханавасзна жид̇д̇асса жалид̇з асад̇и бхааванааяа вийт̇ибадибаннад̇ааяа гилзсабадиббассад̣̇д̇хи зва ход̇ийд̇и ааха ‘‘жалид̇з асад̇и бассад̣̇д̇хий’’д̇и. д̇зна вуд̇д̇ам̣ – ‘‘гилзсабассад̣̇д̇хи наама ход̇ий’’д̇и.
393.Tasmā puthujjanoti yasmā ariyo sabbaso pariññātavatthuko dukkhavedanaṃ adhivāsetuṃ asakkonto nāma natthi, tasmā puthujjano, kevalaṃ pana adhimāneneva – ‘‘nābhikaṅkhāmi jīvitaṃ, pariciṇṇo me satthā, nirodhaṃ disvā’’ti vadatīti adhippāyo. Idampīti idampi, ‘‘nissitassa calita’’ntiādi. Taṇhānissitabhāvena hi āyasmā channo māraṇantikaṃ vedanaṃ adhivāsetuṃ asakkonto ito cito parivattanto calati vipphandati, tasmā ‘‘nissitassa calita’’ntiādi manasikātabbaṃ, tena idaṃ sabbaṃ taṃ vipphanditaṃ na bhavissatīti adhippāyo. Kappasaddo kālapariyāyopi hoti, na kālavisesavācako evāti āha – ‘‘niccakappanti niccakāla’’nti. Yathā appahīnataṇhādiṭṭhiko puggalo taṃnissito allino, evaṃ tāhipi nissito amuttabhāvatoti āha – ‘‘taṇhādiṭṭhīhi nissitassā’’ti. Calitanti yathā yathā asamāraddhāya sammāpaṭipattiyā ādīnavavasena calantaṃ pana yasmā ariyassa vinaye virūpaṃ calitaṃ nāma hoti, tasmā āha – ‘‘vipphanditaṃ hotī’’ti. Tādise pana papañcavikkhambhanavasena cittassa calite asati bhāvanāya vīthipaṭipannatāya kilesapaṭippassaddhi eva hotīti āha ‘‘calite asati passaddhī’’ti. Tena vuttaṃ – ‘‘kilesapassaddhi nāma hotī’’ti.
бхаванд̇арам̣ д̣̇исваа наманадтзна над̇и. д̇знааха – ‘‘над̇ияаа асад̇ийд̇и бхавад̇т̇ааяа аалаяаниганд̇ибарияудтаанзсу асад̇ий’’д̇и. бадисанд̇хивасзна ааг̇ад̇и наамаад̇и бадисанд̇хиг̇г̇ахан̣авасзна бхаванд̇арад̇о ид̇хзва ааг̇аманам̣ наама, жуд̇ивасзна жаванавасзна ид̇о бхаванд̇арасса г̇аманам̣ наама на ход̇и ааг̇ад̇иг̇ад̇ияаа асад̇и гад̇уубажид̇ассаби гаммасса уббад̇д̇ибаригаббавасзна бавад̇д̇ияаа абхаавад̇о. жаванавасзнаад̇и ниб̣б̣ад̇д̇абхавад̇о жаванавасзна жуд̇и, ааяад̇им̣ убабаж̇ж̇анавасзна убабаад̇о на ход̇и. яад̇о г̇ад̇и ааг̇ад̇и жаванам̣ убабаад̇о на ход̇и, д̇ад̇о зва нзвид̇ха, на хурам̣, на убхаяаманд̇арзна, гааяасса г̇ад̇ияаа ааг̇ад̇ияаа жа абхаавад̇о саб̣б̣асо жуд̇уубабаад̇о над̇т̇и; д̇зна на ид̇халогз тид̇од̇и вад̇д̇аб̣б̣о. на баралогз тид̇од̇и вад̇д̇аб̣б̣о, на убхаяаманд̇арзна тид̇од̇и вад̇д̇аб̣б̣о. д̇знааха ‘‘наяид̇ха логз’’д̇иаад̣̇и. д̇ад̇т̇а ид̇халогабаралогавинимуд̇д̇асса сам̣саран̣абад̣̇зсасса абхаавад̇о, ‘‘на убхаяаманд̇арзнаа’’д̇и вуд̇д̇од̇и убхаяабарияаабанно на ход̇ийд̇и бадигкибанд̇о, ‘‘на убхаяад̇т̇а ход̇ий’’д̇и ааха. аяамзва анд̇од̇и яо ид̇халогз баралогз жа абхааво авиж̇ж̇амаанад̇аа ануббаж̇ж̇анам̣, аяамзва сагаласса д̣̇угкамууласса анд̇о барияосаанам̣.
Bhavantaraṃ disvā namanaṭṭhena nati. Tenāha – ‘‘natiyā asatīti bhavatthāya ālayanikantipariyuṭṭhānesu asatī’’ti. Paṭisandhivasena āgati nāmāti paṭisandhiggahaṇavasena bhavantarato idheva āgamanaṃ nāma, cutivasena cavanavasena ito bhavantarassa gamanaṃ nāma na hoti āgatigatiyā asati katūpacitassapi kammassa uppattiparikappavasena pavattiyā abhāvato. Cavanavasenāti nibbattabhavato cavanavasena cuti, āyatiṃ upapajjanavasena upapāto na hoti. Yato gati āgati cavanaṃ upapāto na hoti, tato eva nevidha, na huraṃ, na ubhayamantarena, kāyassa gatiyā āgatiyā ca abhāvato sabbaso cutūpapāto natthi; tena na idhaloke ṭhitoti vattabbo. Na paraloke ṭhitoti vattabbo, na ubhayamantarena ṭhitoti vattabbo. Tenāha ‘‘nayidha loke’’tiādi. Tattha idhalokaparalokavinimuttassa saṃsaraṇapadesassa abhāvato, ‘‘na ubhayamantarenā’’ti vuttoti ubhayapariyāpanno na hotīti paṭikkhipanto, ‘‘na ubhayattha hotī’’ti āha. Ayameva antoti yo idhaloke paraloke ca abhāvo avijjamānatā anuppajjanaṃ, ayameva sakalassa dukkhamūlassa anto pariyosānaṃ.
394. ган̣танаал̣им̣ чинд̣̇ийд̇и наал̣им̣ чинд̣̇ид̇ум̣ аарабхи. д̇асмим̣ чинд̣̇ид̇ум̣ аарад̣̇д̇хагкан̣з чзд̣̇о жа вад̇д̇ад̇и; маран̣абхаяан̃жа оггами авийд̇арааг̇абхаавад̇о, д̇ад̇о зва г̇ад̇инимид̇д̇ам̣ убадтаад̇и. ‘‘соби наама саб̣рахмажаарийнам̣ анубаваж̇ж̇ад̇ам̣ б̣яаагарид̇ваа сарааг̇амаран̣ам̣ мариссад̇ий’’д̇и сам̣виг̇г̇амаанасо сан̇каарз анижжаад̣̇ивасзна бариг̇г̇ан̣ханд̇о. арахад̇д̇ам̣ бад̇ваад̇и буб̣б̣з б̣ахусо вибассанааяа уд̣̇аяаб̣б̣аяан̃аан̣ам̣ баавид̇ад̇д̇аа д̇аавад̣̇зва арахад̇д̇ам̣ бад̇ваа арахад̇д̇апалабажжавзгкан̣аананд̇арам̣ ган̣танаал̣ижчзд̣̇абажжаяаа ж̇ийвид̇анирод̇хзна самасийсий худ̇ваа бариниб̣б̣ааяи. на хи анд̇имабхавигасса арахад̇д̇ам̣ аббад̇ваа ж̇ийвид̇анд̇арааяо ход̇и. т̇зрассаад̇и ааяасмад̇о чаннад̇т̇зрасса. б̣яаагаран̣знаад̇и хзд̇умхи гаран̣аважанам̣ ‘‘б̣яаагаран̣зна хзд̇унаа’’д̇и. д̇аннимид̇д̇ан̃хи т̇зро вийрияам̣ баг̇г̇ан̣ханд̇о вибассанам̣ уссуггаабзд̇и. иминаад̇и, ‘‘ад̇т̇и, бханд̇з’’д̇иаад̣̇иважанзна. т̇зрод̇и ааяасмаа саарибуд̇д̇ад̇т̇зро. бужчад̇ийд̇и, бханд̇з, д̇ат̇аа гуласам̣саг̇г̇абасуд̇о гат̇ам̣ бариниб̣б̣ааяиссад̇ийд̇и бужчад̇и. ‘‘буб̣б̣з гулзсу сам̣садтавихаарий’’д̇и саб̣рахмажаарийнам̣ бан̃н̃аад̇ассаби имасмим̣ ‘‘хонд̇и хзд̇з саарибуд̇д̇аа’’д̇иаад̣̇инаа бхаг̇авад̇о вуд̇д̇а-дтаанз асам̣садтабхааво баагадо ахоси. баггамби нибаггам̣ вияа саммаабадибаж̇ж̇амаанааби гзжи асан̃н̃ад̇аа убадтаханд̇и. сзсам̣ сувин̃н̃зяяамзва.
394.Kaṇṭhanāḷiṃ chindīti nāḷiṃ chindituṃ ārabhi. Tasmiṃ chindituṃ āraddhakkhaṇe chedo ca vattati; maraṇabhayañca okkami avītarāgabhāvato, tato eva gatinimittaṃ upaṭṭhāti. ‘‘Sopi nāma sabrahmacārīnaṃ anupavajjataṃ byākaritvā sarāgamaraṇaṃ marissatī’’ti saṃviggamānaso saṅkhāre aniccādivasena pariggaṇhanto. Arahattaṃ patvāti pubbe bahuso vipassanāya udayabbayañāṇaṃ pāvitattā tāvadeva arahattaṃ patvā arahattaphalapaccavekkhaṇānantaraṃ kaṇṭhanāḷicchedapaccayā jīvitanirodhena samasīsī hutvā parinibbāyi. Na hi antimabhavikassa arahattaṃ appatvā jīvitantarāyo hoti. Therassāti āyasmato channattherassa. Byākaraṇenāti hetumhi karaṇavacanaṃ ‘‘byākaraṇena hetunā’’ti. Tannimittañhi thero vīriyaṃ paggaṇhanto vipassanaṃ ussukkāpeti. Imināti, ‘‘atthi, bhante’’tiādivacanena. Theroti āyasmā sāriputtatthero. Pucchatīti, bhante, tathā kulasaṃsaggapasuto kathaṃ parinibbāyissatīti pucchati. ‘‘Pubbe kulesu saṃsaṭṭhavihārī’’ti sabrahmacārīnaṃ paññātassapi imasmiṃ ‘‘honti hete sāriputtā’’tiādinā bhagavato vutta-ṭṭhāne asaṃsaṭṭhabhāvo pākaṭo ahosi. Pakkampi nipakkaṃ viya sammāpaṭipajjamānāpi keci asaññatā upaṭṭhahanti. Sesaṃ suviññeyyameva.
чанноваад̣̇асуд̇д̇аван̣н̣анааяа лийнад̇т̇аббагаасанаа самад̇д̇аа.
Channovādasuttavaṇṇanāya līnatthappakāsanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 2. чанноваад̣̇асуд̇д̇ам̣ • 2. Channovādasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 2. чанноваад̣̇асуд̇д̇аван̣н̣анаа • 2. Channovādasuttavaṇṇanā
