| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༢. ཚནྣོཝཱདསུཏྟཝཎྞནཱ
2. Channovādasuttavaṇṇanā
༣༨༩. ཨེཝཾ མེ སུཏནྟི ཚནྣོཝཱདསུཏྟཾ། ཏཏྠ ཚནྣོཏི ཨེཝཾནཱམཀོ ཐེརོ, ན ཨབྷིནིཀྑམནཾ ནིཀྑནྟཏྠེརོ། པཊིསལླཱནཱཏི ཕལསམཱཔཏྟིཏོ། གིལཱནཔུཙྪཀཱཏི གིལཱནུཔཊྛཱནཾ ནཱམ བུདྡྷཝཎྞིཏཾ, ཏསྨཱ ཨེཝམཱཧ། སཏྠནྟི ཛཱིཝིཏཧཱརཀསཏྠཾ། ནཱཝཀངྑཱམཱིཏི ཨིཙྪཱམི།
389.Evaṃme sutanti channovādasuttaṃ. Tattha channoti evaṃnāmako thero, na abhinikkhamanaṃ nikkhantatthero. Paṭisallānāti phalasamāpattito. Gilānapucchakāti gilānupaṭṭhānaṃ nāma buddhavaṇṇitaṃ, tasmā evamāha. Satthanti jīvitahārakasatthaṃ. Nāvakaṅkhāmīti icchāmi.
༣༩༠. ཨནུཔཝཛྫནྟི ཨནུཔྤཏྟིཀཾ ཨཔྤཊིསནྡྷིཀཾ།
390.Anupavajjanti anuppattikaṃ appaṭisandhikaṃ.
༣༩༡. ཨེཏཾ མམཱཏིཨཱདཱིནི ཏཎྷཱམཱནདིཊྛིགཱཧཝསེན ཝུཏྟཱནི། ནིརོདྷཾ དིསྭཱཏི ཁཡཝཡཾ ཉཏྭཱ། ནེཏཾ མམ ནེསོཧམསྨི ན མེསོ ཨཏྟཱཏི སམནུཔསྶཱམཱིཏི ཨནིཙྩཾ དུཀྑཾ ཨནཏྟཱཏི སམནུཔསྶཱམི།
391.Etaṃ mamātiādīni taṇhāmānadiṭṭhigāhavasena vuttāni. Nirodhaṃ disvāti khayavayaṃ ñatvā. Netaṃ mama nesohamasmi na meso attāti samanupassāmīti aniccaṃ dukkhaṃ anattāti samanupassāmi.
༣༩༣. ཏསྨཱཏི ཡསྨཱ མཱརཎནྟིཀཝེདནཾ ཨདྷིཝཱསེཏུཾ ཨསཀྐོནྟོ སཏྠཾ ཨཱཧརཱམཱིཏི ཝདཏི, ཏསྨཱ། པུཐུཛྫནོ ཨཱཡསྨཱ, ཏེན ཨིདམྤི མནསི ཀརོཧཱིཏི དཱིཔེཏི། ནིཙྩཀཔྤནྟི ནིཙྩཀཱལཾ། ནིསྶིཏསྶཱཏི ཏཎྷཱདིཊྛཱིཧི ནིསྶིཏསྶ། ཙལིཏནྟི ཝིཔྥནྡིཏཾ ཧོཏི། པསྶདྡྷཱིཏི ཀཱཡཙིཏྟཔསྶདྡྷི, ཀིལེསཔསྶདྡྷི ནཱམ ཧོཏཱིཏི ཨཏྠོ། ནཏཱིཏི ཏཎྷཱནཏི། ནཏིཡཱ ཨསཏཱིཏི བྷཝཏྠཱཡ ཨཱལཡནིཀནྟིཔརིཡུཊྛཱནེསུ ཨསཏི། ཨཱགཏིགཏི ན ཧོཏཱིཏི པཊིསནྡྷིཝསེན ཨཱགཏི ནཱམ ན ཧོཏི, ཙུཏིཝསེན གམནཾ ནཱམ ན ཧོཏི། ཙུཏཱུཔཔཱཏོཏི ཙཝནཝསེན ཙུཏི, ཨུཔཔཛྫནཝསེན ཨུཔཔཱཏོ། ནེཝིདྷ ན ཧུརཾ ན ཨུབྷཡམནྟརེནཱཏི ནཡིདྷ ལོཀེ, ན པརལོཀེ, ན ཨུབྷཡཏྠ ཧོཏི། ཨེསེཝནྟོ དུཀྑསྶཱཏི ཝཊྚདུཀྑཀིལེསདུཀྑསྶ ཨཡམེཝ ཨནྟོ ཨཡཾ པརིཙྪེདོ པརིཝཊུམབྷཱཝོ ཧོཏི། ཨཡམེཝ ཧི ཨེཏྠ ཨཏྠོ། ཡེ པན ‘‘ན ཨུབྷཡམནྟརེནཱ’’ཏི ཝཙནཾ གཧེཏྭཱ ཨནྟརཱབྷཝཾ ཨིཙྪནྟི, ཏེསཾ ཨུཏྟརཾ ཧེཊྛཱ ཝུཏྟམེཝ།
393.Tasmāti yasmā māraṇantikavedanaṃ adhivāsetuṃ asakkonto satthaṃ āharāmīti vadati, tasmā. Puthujjano āyasmā, tena idampi manasi karohīti dīpeti. Niccakappanti niccakālaṃ. Nissitassāti taṇhādiṭṭhīhi nissitassa. Calitanti vipphanditaṃ hoti. Passaddhīti kāyacittapassaddhi, kilesapassaddhi nāma hotīti attho. Natīti taṇhānati. Natiyā asatīti bhavatthāya ālayanikantipariyuṭṭhānesu asati. Āgatigati na hotīti paṭisandhivasena āgati nāma na hoti, cutivasena gamanaṃ nāma na hoti. Cutūpapātoti cavanavasena cuti, upapajjanavasena upapāto. Nevidha na huraṃ na ubhayamantarenāti nayidha loke, na paraloke, na ubhayattha hoti. Esevanto dukkhassāti vaṭṭadukkhakilesadukkhassa ayameva anto ayaṃ paricchedo parivaṭumabhāvo hoti. Ayameva hi ettha attho. Ye pana ‘‘na ubhayamantarenā’’ti vacanaṃ gahetvā antarābhavaṃ icchanti, tesaṃ uttaraṃ heṭṭhā vuttameva.
༣༩༤. སཏྠཾ ཨཱཧརེསཱིཏི ཛཱིཝིཏཧཱརཀཾ སཏྠཾ ཨཱཧརི, ཀཎྛནཱལི༹ཾ ཚིནྡི། ཨཐསྶ ཏསྨིཾ ཁཎེ མརཎབྷཡཾ ཨོཀྐམི, གཏིནིམིཏྟཾ ཨུཔཊྛཱསི། སོ ཨཏྟནོ པུཐུཛྫནབྷཱཝཾ ཉཏྭཱ སཾཝིགྒོ ཝིཔསྶནཾ པཊྛཔེཏྭཱ སངྑཱརེ པརིགྒཎྷནྟོ ཨརཧཏྟཾ པཏྭཱ སམསཱིསཱི ཧུཏྭཱ པརིནིབྦཱཡི། སམྨུཁཱཡེཝ ཨནུཔཝཛྫཏཱ བྱཱཀཏཱཏི ཀིཉྩཱཔི ཨིདཾ ཐེརསྶ པུཐུཛྫནཀཱལེ བྱཱཀརཎཾ ཧོཏི, ཨེཏེན པན བྱཱཀརཎེན ཨནནྟརཱཡམསྶ པརིནིབྦཱནཾ ཨཧོསི། ཏསྨཱ བྷགཝཱ ཏམེཝ བྱཱཀརཎཾ གཧེཏྭཱ ཀཐེསི། ཨུཔཝཛྫཀུལཱནཱིཏི ཨུཔསངྐམིཏབྦཀུལཱནི། ཨིམིནཱ ཐེརོ, – ‘‘བྷནྟེ, ཨེཝཾ ཨུཔཊྛཱཀེསུ ཙ ཨུཔཊྛཱཡིཀཱསུ ཙ ཝིཛྫམཱནཱསུ སོ བྷིཀྑུ ཏུམྷཱཀཾ སཱསནེ པརིནིབྦཱཡིསྶཏཱི’’ཏི པུཙྪཏི། ཨཐསྶ བྷགཝཱ ཀུལེསུ སཾསགྒཱབྷཱཝཾ དཱིཔེནྟོ ཧོནྟི ཧེཏེ སཱརིཔུཏྟཱཏིཨཱདིམཱཧ། ཨིམསྨིཾ ཀིར ཋཱནེ ཐེརསྶ ཀུལེསུ ཨསཾསཊྛབྷཱཝོ པཱཀཊོ ཨཧོསི། སེསཾ སབྦཏྠ ཨུཏྟཱནམེཝཱཏི།
394.Satthaṃ āharesīti jīvitahārakaṃ satthaṃ āhari, kaṇṭhanāḷiṃ chindi. Athassa tasmiṃ khaṇe maraṇabhayaṃ okkami, gatinimittaṃ upaṭṭhāsi. So attano puthujjanabhāvaṃ ñatvā saṃviggo vipassanaṃ paṭṭhapetvā saṅkhāre pariggaṇhanto arahattaṃ patvā samasīsī hutvā parinibbāyi. Sammukhāyeva anupavajjatā byākatāti kiñcāpi idaṃ therassa puthujjanakāle byākaraṇaṃ hoti, etena pana byākaraṇena anantarāyamassa parinibbānaṃ ahosi. Tasmā bhagavā tameva byākaraṇaṃ gahetvā kathesi. Upavajjakulānīti upasaṅkamitabbakulāni. Iminā thero, – ‘‘bhante, evaṃ upaṭṭhākesu ca upaṭṭhāyikāsu ca vijjamānāsu so bhikkhu tumhākaṃ sāsane parinibbāyissatī’’ti pucchati. Athassa bhagavā kulesu saṃsaggābhāvaṃ dīpento honti hete sāriputtātiādimāha. Imasmiṃ kira ṭhāne therassa kulesu asaṃsaṭṭhabhāvo pākaṭo ahosi. Sesaṃ sabbattha uttānamevāti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
ཚནྣོཝཱདསུཏྟཝཎྞནཱ ནིཊྛིཏཱ།
Channovādasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༢. ཚནྣོཝཱདསུཏྟཾ • 2. Channovādasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༢. ཚནྣོཝཱདསུཏྟཝཎྞནཱ • 2. Channovādasuttavaṇṇanā
