| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. ச²ப்பாணகோபமஸுத்தங்
10. Chappāṇakopamasuttaṃ
247. ‘‘ஸெய்யதா²பி, பி⁴க்க²வே, புரிஸோ அருக³த்தோ பக்கக³த்தோ ஸரவனங் பவிஸெய்ய. தஸ்ஸ குஸகண்டகா சேவ பாதே³ விஜ்ஜெ²ய்யுங், ஸரபத்தானி ச க³த்தானி 1 விலேகெ²ய்யுங். ஏவஞ்ஹி ஸோ, பி⁴க்க²வே, புரிஸோ பி⁴ய்யோஸோமத்தாய ததோனிதா³னங் து³க்க²ங் தோ³மனஸ்ஸங் படிஸங்வேதி³யேத². ஏவமேவ கோ², பி⁴க்க²வே, இதே⁴கச்சோ பி⁴க்கு² கா³மக³தோ வா அரஞ்ஞக³தோ வா லப⁴தி வத்தாரங் – ‘அயஞ்ச ஸோ 2 ஆயஸ்மா ஏவங்காரீ ஏவங்ஸமாசாரோ அஸுசிகா³மகண்டகோ’தி. தங் கண்டகோதி 3 இதி விதி³த்வா ஸங்வரோ ச அஸங்வரோ ச வேதி³தப்³போ³.
247. ‘‘Seyyathāpi, bhikkhave, puriso arugatto pakkagatto saravanaṃ paviseyya. Tassa kusakaṇṭakā ceva pāde vijjheyyuṃ, sarapattāni ca gattāni 4 vilekheyyuṃ. Evañhi so, bhikkhave, puriso bhiyyosomattāya tatonidānaṃ dukkhaṃ domanassaṃ paṭisaṃvediyetha. Evameva kho, bhikkhave, idhekacco bhikkhu gāmagato vā araññagato vā labhati vattāraṃ – ‘ayañca so 5 āyasmā evaṃkārī evaṃsamācāro asucigāmakaṇṭako’ti. Taṃ kaṇṭakoti 6 iti viditvā saṃvaro ca asaṃvaro ca veditabbo.
‘‘கத²ஞ்ச , பி⁴க்க²வே, அஸங்வரோ ஹோதி? இத⁴, பி⁴க்க²வே, பி⁴க்கு² சக்கு²னா ரூபங் தி³ஸ்வா பியரூபே ரூபே அதி⁴முச்சதி, அப்பியரூபே ரூபே ப்³யாபஜ்ஜதி, அனுபட்டி²தகாயஸ்ஸதி ச விஹரதி பரித்தசேதஸோ. தஞ்ச சேதோவிமுத்திங் பஞ்ஞாவிமுத்திங் யதா²பூ⁴தங் நப்பஜானாதி, யத்த²ஸ்ஸ தே உப்பன்னா பாபகா அகுஸலா த⁴ம்மா அபரிஸேஸா நிருஜ்ஜ²ந்தி. ஸோதேன ஸத்³த³ங் ஸுத்வா… கா⁴னேன க³ந்த⁴ங் கா⁴யித்வா… ஜிவ்ஹாய ரஸங் ஸாயித்வா… காயேன பொ²ட்ட²ப்³ப³ங் பு²ஸித்வா… மனஸா த⁴ம்மங் விஞ்ஞாய பியரூபே த⁴ம்மே அதி⁴முச்சதி, அப்பியரூபே த⁴ம்மே ப்³யாபஜ்ஜதி, அனுபட்டி²தகாயஸ்ஸதி ச விஹரதி பரித்தசேதஸோ, தஞ்ச சேதோவிமுத்திங் பஞ்ஞாவிமுத்திங் யதா²பூ⁴தங் நப்பஜானாதி, யத்த²ஸ்ஸ தே உப்பன்னா பாபகா அகுஸலா த⁴ம்மா அபரிஸேஸா நிருஜ்ஜ²ந்தி.
‘‘Kathañca , bhikkhave, asaṃvaro hoti? Idha, bhikkhave, bhikkhu cakkhunā rūpaṃ disvā piyarūpe rūpe adhimuccati, appiyarūpe rūpe byāpajjati, anupaṭṭhitakāyassati ca viharati parittacetaso. Tañca cetovimuttiṃ paññāvimuttiṃ yathābhūtaṃ nappajānāti, yatthassa te uppannā pāpakā akusalā dhammā aparisesā nirujjhanti. Sotena saddaṃ sutvā… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā… manasā dhammaṃ viññāya piyarūpe dhamme adhimuccati, appiyarūpe dhamme byāpajjati, anupaṭṭhitakāyassati ca viharati parittacetaso, tañca cetovimuttiṃ paññāvimuttiṃ yathābhūtaṃ nappajānāti, yatthassa te uppannā pāpakā akusalā dhammā aparisesā nirujjhanti.
‘‘ஸெய்யதா²பி, பி⁴க்க²வே, புரிஸோ ச²ப்பாணகே க³ஹெத்வா நானாவிஸயே நானாகோ³சரே த³ள்ஹாய ரஜ்ஜுயா ப³ந்தெ⁴ய்ய. அஹிங் க³ஹெத்வா த³ள்ஹாய ரஜ்ஜுயா ப³ந்தெ⁴ய்ய. ஸுஸுமாரங் 7 க³ஹெத்வா த³ள்ஹாய ரஜ்ஜுயா ப³ந்தெ⁴ய்ய. பக்கி²ங் க³ஹெத்வா த³ள்ஹாய ரஜ்ஜுயா ப³ந்தெ⁴ய்ய. குக்குரங் க³ஹெத்வா த³ள்ஹாய ரஜ்ஜுயா ப³ந்தெ⁴ய்ய . ஸிங்கா³லங் க³ஹெத்வா த³ள்ஹாய ரஜ்ஜுயா ப³ந்தெ⁴ய்ய. மக்கடங் க³ஹெத்வா த³ள்ஹாய ரஜ்ஜுயா ப³ந்தெ⁴ய்ய. த³ள்ஹாய ரஜ்ஜுயா ப³ந்தி⁴த்வா மஜ்ஜே² க³ண்டி²ங் கரித்வா ஒஸ்ஸஜ்ஜெய்ய. அத² கோ², தே, பி⁴க்க²வே , ச²ப்பாணகா நானாவிஸயா நானாகோ³சரா ஸகங் ஸகங் கோ³சரவிஸயங் ஆவிஞ்செ²ய்யுங் 8 – அஹி ஆவிஞ்செ²ய்ய ‘வம்மிகங் பவெக்கா²மீ’தி, ஸுஸுமாரோ ஆவிஞ்செ²ய்ய ‘உத³கங் பவெக்கா²மீ’தி, பக்கீ² ஆவிஞ்செ²ய்ய ‘ஆகாஸங் டெ³ஸ்ஸாமீ’தி, குக்குரோ ஆவிஞ்செ²ய்ய ‘கா³மங் பவெக்கா²மீ’தி, ஸிங்கா³லோ ஆவிஞ்செ²ய்ய ‘ஸீவதி²கங் 9 பவெக்கா²மீ’தி, மக்கடோ ஆவிஞ்செ²ய்ய ‘வனங் பவெக்கா²மீ’தி. யதா³ கோ² தே, பி⁴க்க²வே, ச²ப்பாணகா ஜ²த்தா அஸ்ஸு கிலந்தா, அத² கோ² யோ நேஸங் பாணகானங் ப³லவதரோ அஸ்ஸ தஸ்ஸ தே அனுவத்தெய்யுங், அனுவிதா⁴யெய்யுங் வஸங் க³ச்செ²ய்யுங். ஏவமேவ கோ², பி⁴க்க²வே, யஸ்ஸ கஸ்ஸசி பி⁴க்கு²னோ காயக³தாஸதி அபா⁴விதா அப³ஹுலீகதா, தங் சக்கு² ஆவிஞ்ச²தி மனாபியேஸு ரூபேஸு, அமனாபியா ரூபா படிகூலா ஹொந்தி…பே॰… மனோ ஆவிஞ்ச²தி மனாபியேஸு த⁴ம்மேஸு, அமனாபியா த⁴ம்மா படிகூலா ஹொந்தி. ஏவங் கோ², பி⁴க்க²வே, அஸங்வரோ ஹோதி.
‘‘Seyyathāpi, bhikkhave, puriso chappāṇake gahetvā nānāvisaye nānāgocare daḷhāya rajjuyā bandheyya. Ahiṃ gahetvā daḷhāya rajjuyā bandheyya. Susumāraṃ 10 gahetvā daḷhāya rajjuyā bandheyya. Pakkhiṃ gahetvā daḷhāya rajjuyā bandheyya. Kukkuraṃ gahetvā daḷhāya rajjuyā bandheyya . Siṅgālaṃ gahetvā daḷhāya rajjuyā bandheyya. Makkaṭaṃ gahetvā daḷhāya rajjuyā bandheyya. Daḷhāya rajjuyā bandhitvā majjhe gaṇṭhiṃ karitvā ossajjeyya. Atha kho, te, bhikkhave , chappāṇakā nānāvisayā nānāgocarā sakaṃ sakaṃ gocaravisayaṃ āviñcheyyuṃ 11 – ahi āviñcheyya ‘vammikaṃ pavekkhāmī’ti, susumāro āviñcheyya ‘udakaṃ pavekkhāmī’ti, pakkhī āviñcheyya ‘ākāsaṃ ḍessāmī’ti, kukkuro āviñcheyya ‘gāmaṃ pavekkhāmī’ti, siṅgālo āviñcheyya ‘sīvathikaṃ 12 pavekkhāmī’ti, makkaṭo āviñcheyya ‘vanaṃ pavekkhāmī’ti. Yadā kho te, bhikkhave, chappāṇakā jhattā assu kilantā, atha kho yo nesaṃ pāṇakānaṃ balavataro assa tassa te anuvatteyyuṃ, anuvidhāyeyyuṃ vasaṃ gaccheyyuṃ. Evameva kho, bhikkhave, yassa kassaci bhikkhuno kāyagatāsati abhāvitā abahulīkatā, taṃ cakkhu āviñchati manāpiyesu rūpesu, amanāpiyā rūpā paṭikūlā honti…pe… mano āviñchati manāpiyesu dhammesu, amanāpiyā dhammā paṭikūlā honti. Evaṃ kho, bhikkhave, asaṃvaro hoti.
‘‘கத²ஞ்ச, பி⁴க்க²வே, ஸங்வரோ ஹோதி? இத⁴, பி⁴க்க²வே, பி⁴க்கு² சக்கு²னா ரூபங் தி³ஸ்வா பியரூபே ரூபே நாதி⁴முச்சதி, அப்பியரூபே ரூபே ந ப்³யாபஜ்ஜதி, உபட்டி²தகாயஸ்ஸதி ச விஹரதி அப்பமாணசேதஸோ, தஞ்ச சேதோவிமுத்திங் பஞ்ஞாவிமுத்திங் யதா²பூ⁴தங் பஜானாதி, யத்த²ஸ்ஸ தே உப்பன்னா பாபகா அகுஸலா த⁴ம்மா அபரிஸேஸா நிருஜ்ஜ²ந்தி…பே॰… ஜிவ்ஹா ரஸங் ஸாயித்வா…பே॰… மனஸா த⁴ம்மங் விஞ்ஞாய பியரூபே த⁴ம்மே நாதி⁴முச்சதி, அப்பியரூபே த⁴ம்மே ந ப்³யாபஜ்ஜதி, உபட்டி²தகாயஸ்ஸதி ச விஹரதி அப்பமாணசேதஸோ, தஞ்ச சேதோவிமுத்திங் பஞ்ஞாவிமுத்திங் யதா²பூ⁴தங் பஜானாதி யத்த²ஸ்ஸ தே உப்பன்னா பாபகா அகுஸலா த⁴ம்மா அபரிஸேஸா நிருஜ்ஜ²ந்தி.
‘‘Kathañca, bhikkhave, saṃvaro hoti? Idha, bhikkhave, bhikkhu cakkhunā rūpaṃ disvā piyarūpe rūpe nādhimuccati, appiyarūpe rūpe na byāpajjati, upaṭṭhitakāyassati ca viharati appamāṇacetaso, tañca cetovimuttiṃ paññāvimuttiṃ yathābhūtaṃ pajānāti, yatthassa te uppannā pāpakā akusalā dhammā aparisesā nirujjhanti…pe… jivhā rasaṃ sāyitvā…pe… manasā dhammaṃ viññāya piyarūpe dhamme nādhimuccati, appiyarūpe dhamme na byāpajjati, upaṭṭhitakāyassati ca viharati appamāṇacetaso, tañca cetovimuttiṃ paññāvimuttiṃ yathābhūtaṃ pajānāti yatthassa te uppannā pāpakā akusalā dhammā aparisesā nirujjhanti.
‘‘ஸெய்யதா²பி, பி⁴க்க²வே, புரிஸோ ச²ப்பாணகே க³ஹெத்வா நானாவிஸயே நானாகோ³சரே த³ள்ஹாய ரஜ்ஜுயா ப³ந்தெ⁴ய்ய. அஹிங் க³ஹெத்வா த³ள்ஹாய ரஜ்ஜுயா ப³ந்தெ⁴ய்ய. ஸுஸுமாரங் க³ஹெத்வா த³ள்ஹாய ரஜ்ஜுயா ப³ந்தெ⁴ய்ய. பக்கி²ங் க³ஹெத்வா…பே॰… குக்குரங் க³ஹெத்வா… ஸிங்கா³லங் க³ஹெத்வா… மக்கடங் க³ஹெத்வா த³ள்ஹாய ரஜ்ஜுயா ப³ந்தெ⁴ய்ய. த³ள்ஹாய ரஜ்ஜுயா ப³ந்தி⁴த்வா த³ள்ஹே கீ²லே வா த²ம்பே⁴ வா உபனிப³ந்தெ⁴ய்ய. அத² கோ² தே, பி⁴க்க²வே, ச²ப்பாணகா நானாவிஸயா நானாகோ³சரா ஸகங் ஸகங் கோ³சரவிஸயங் ஆவிஞ்செ²ய்யுங் – அஹி ஆவிஞ்செ²ய்ய ‘வம்மிகங் பவெக்கா²மீ’தி, ஸுஸுமாரோ ஆவிஞ்செ²ய்ய ‘உத³கங் பவெக்கா²மீ’தி, பக்கீ² ஆவிஞ்செ²ய்ய ‘ஆகாஸங் டெ³ஸ்ஸாமீ’தி, குக்குரோ ஆவிஞ்செ²ய்ய ‘கா³மங் பவெக்கா²மீ’தி, ஸிங்கா³லோ ஆவிஞ்செ²ய்ய ‘ஸீவதி²கங் பவெக்கா²மீ’தி, மக்கடோ ஆவிஞ்செ²ய்ய ‘வனங் பவெக்கா²மீ’தி . யதா³ கோ² தே, பி⁴க்க²வே, ச²ப்பாணகா ஜ²த்தா அஸ்ஸு கிலந்தா , அத² தமேவ கீ²லங் வா த²ம்ப⁴ங் வா உபதிட்டெ²ய்யுங், உபனிஸீதெ³ய்யுங், உபனிபஜ்ஜெய்யுங். ஏவமேவ கோ², பி⁴க்க²வே, யஸ்ஸ கஸ்ஸசி பி⁴க்கு²னோ காயக³தாஸதி பா⁴விதா ப³ஹுலீகதா, தங் சக்கு² நாவிஞ்ச²தி மனாபியேஸு ரூபேஸு, அமனாபியா ரூபா நப்படிகூலா ஹொந்தி…பே॰… ஜிவ்ஹா நாவிஞ்ச²தி மனாபியேஸு ரஸேஸு…பே॰… மனோ நாவிஞ்ச²தி மனாபியேஸு த⁴ம்மேஸு, அமனாபியா த⁴ம்மா நப்படிகூலா ஹொந்தி. ஏவங் கோ², பி⁴க்க²வே, ஸங்வரோ ஹோதி.
‘‘Seyyathāpi, bhikkhave, puriso chappāṇake gahetvā nānāvisaye nānāgocare daḷhāya rajjuyā bandheyya. Ahiṃ gahetvā daḷhāya rajjuyā bandheyya. Susumāraṃ gahetvā daḷhāya rajjuyā bandheyya. Pakkhiṃ gahetvā…pe… kukkuraṃ gahetvā… siṅgālaṃ gahetvā… makkaṭaṃ gahetvā daḷhāya rajjuyā bandheyya. Daḷhāya rajjuyā bandhitvā daḷhe khīle vā thambhe vā upanibandheyya. Atha kho te, bhikkhave, chappāṇakā nānāvisayā nānāgocarā sakaṃ sakaṃ gocaravisayaṃ āviñcheyyuṃ – ahi āviñcheyya ‘vammikaṃ pavekkhāmī’ti, susumāro āviñcheyya ‘udakaṃ pavekkhāmī’ti, pakkhī āviñcheyya ‘ākāsaṃ ḍessāmī’ti, kukkuro āviñcheyya ‘gāmaṃ pavekkhāmī’ti, siṅgālo āviñcheyya ‘sīvathikaṃ pavekkhāmī’ti, makkaṭo āviñcheyya ‘vanaṃ pavekkhāmī’ti . Yadā kho te, bhikkhave, chappāṇakā jhattā assu kilantā , atha tameva khīlaṃ vā thambhaṃ vā upatiṭṭheyyuṃ, upanisīdeyyuṃ, upanipajjeyyuṃ. Evameva kho, bhikkhave, yassa kassaci bhikkhuno kāyagatāsati bhāvitā bahulīkatā, taṃ cakkhu nāviñchati manāpiyesu rūpesu, amanāpiyā rūpā nappaṭikūlā honti…pe… jivhā nāviñchati manāpiyesu rasesu…pe… mano nāviñchati manāpiyesu dhammesu, amanāpiyā dhammā nappaṭikūlā honti. Evaṃ kho, bhikkhave, saṃvaro hoti.
‘‘‘த³ள்ஹே கீ²லே வா த²ம்பே⁴ வா’தி கோ², பி⁴க்க²வே, காயக³தாய ஸதியா ஏதங் அதி⁴வசனங். தஸ்மாதிஹ வோ, பி⁴க்க²வே, ஏவங் ஸிக்கி²தப்³ப³ங் – ‘காயக³தா நோ ஸதி பா⁴விதா ப⁴விஸ்ஸதி ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴’தி. ஏவஞ்ஹி கோ², பி⁴க்க²வே, ஸிக்கி²தப்³ப³’’ந்தி. த³ஸமங்.
‘‘‘Daḷhe khīle vā thambhe vā’ti kho, bhikkhave, kāyagatāya satiyā etaṃ adhivacanaṃ. Tasmātiha vo, bhikkhave, evaṃ sikkhitabbaṃ – ‘kāyagatā no sati bhāvitā bhavissati bahulīkatā yānīkatā vatthukatā anuṭṭhitā paricitā susamāraddhā’ti. Evañhi kho, bhikkhave, sikkhitabba’’nti. Dasamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. ச²ப்பாணகோபமஸுத்தவண்ணனா • 10. Chappāṇakopamasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ச²ப்பாணகோபமஸுத்தவண்ணனா • 10. Chappāṇakopamasuttavaṇṇanā
