| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
১০. ছপ্পাণকোপমসুত্তৰণ্ণনা
10. Chappāṇakopamasuttavaṇṇanā
২৪৭. দসমে অরুগত্তোতি ৰণসরীরো। তেসংযেৰ অরূনং পক্কত্তা পক্কগত্তো। সরৰনন্তি কণ্ডৰনং। এৰমেৰ খোতি অরুগত্তো পুরিসো ৰিয দুস্সীলপুগ্গলো ৰেদিতব্বো। তস্স কুসকণ্টকেহি ৰিদ্ধস্স সরপত্তেহি চ অসিধারূপমেহি ৰিলিখিতগত্তস্স ভিয্যোসোমত্তায দুক্খদোমনস্সং ৰিয তত্থ তত্থ সব্রহ্মচারীহি ‘‘অযং সো ইমেসঞ্চ ইমেসঞ্চ কম্মানং কারকো’’তি ৰুচ্চমানস্স উপ্পজ্জনদুক্খং ৰেদিতব্বং।
247. Dasame arugattoti vaṇasarīro. Tesaṃyeva arūnaṃ pakkattā pakkagatto. Saravananti kaṇḍavanaṃ. Evameva khoti arugatto puriso viya dussīlapuggalo veditabbo. Tassa kusakaṇṭakehi viddhassa sarapattehi ca asidhārūpamehi vilikhitagattassa bhiyyosomattāya dukkhadomanassaṃ viya tattha tattha sabrahmacārīhi ‘‘ayaṃ so imesañca imesañca kammānaṃ kārako’’ti vuccamānassa uppajjanadukkhaṃ veditabbaṃ.
লভতি ৰত্তারন্তি লভতি চোদকং। এৰংকারীতি এৰরূপানং ৰেজ্জকম্মদূতকম্মাদীনং কারকো। এৰংসমাচারোতি ৰিধৰা গোচরাদিৰসেন এৰরূপগোচরো। অসুচিগামকণ্টকোতি অসুদ্ধট্ঠেন অসুচি, গামৰাসীনং ৰিজ্ঝনট্ঠেন কণ্টকোতি গামকণ্টকো।
Labhati vattāranti labhati codakaṃ. Evaṃkārīti evarūpānaṃ vejjakammadūtakammādīnaṃ kārako. Evaṃsamācāroti vidhavā gocarādivasena evarūpagocaro. Asucigāmakaṇṭakoti asuddhaṭṭhena asuci, gāmavāsīnaṃ vijjhanaṭṭhena kaṇṭakoti gāmakaṇṭako.
পক্খিন্তি হত্থিসোণ্ডসকুণং। ওস্সজ্জেয্যাতি ৰিস্সজ্জেয্য। আৰিঞ্ছেয্যুন্তি আকড্ঢেয্যুং। পৰেক্খামীতি পৰিসিস্সামি। আকাসং ডেস্সামীতি আকাসং উপ্পতিস্সামি।
Pakkhinti hatthisoṇḍasakuṇaṃ. Ossajjeyyāti vissajjeyya. Āviñcheyyunti ākaḍḍheyyuṃ. Pavekkhāmīti pavisissāmi. Ākāsaṃ ḍessāmīti ākāsaṃ uppatissāmi.
এতেসু পন অহি ‘‘ভোগেহি মণ্ডলং বন্ধিত্ৰা সুপিস্সামী’’তি ৰম্মিকং পৰিসিতুকামো হোতি। সুসুমারো ‘‘দূরে বিলং পৰিসিত্ৰা নিপজ্জিস্সামী’’তি উদকং পৰিসিতুকামো হোতি। পক্খী ‘‘অজটাকাসে সুখং ৰিচরিস্সামী’’তি আকাসং ডেতুকামো হোতি। কুক্কুরো ‘‘উদ্ধনট্ঠানে ছারিকং ব্যূহিত্ৰা উসুমং গণ্হন্তো নিপজ্জিস্সামী’’তি গামং পৰিসিতুকামো হোতি। সিঙ্গালো ‘‘মনুস্সমংসং খাদিত্ৰা পিট্ঠিং পসারেত্ৰা সযিস্সামী’’তি আমকসুসানং পৰিসিতুকামো হোতি। মক্কটো ‘‘উচ্চে রুক্খে অভিরুহিত্ৰা দিসাদিসং পক্খন্দিস্সামী’’তি ৰনং পৰিসিতুকামো হোতি।
Etesu pana ahi ‘‘bhogehi maṇḍalaṃ bandhitvā supissāmī’’ti vammikaṃ pavisitukāmo hoti. Susumāro ‘‘dūre bilaṃ pavisitvā nipajjissāmī’’ti udakaṃ pavisitukāmo hoti. Pakkhī ‘‘ajaṭākāse sukhaṃ vicarissāmī’’ti ākāsaṃ ḍetukāmo hoti. Kukkuro ‘‘uddhanaṭṭhāne chārikaṃ byūhitvā usumaṃ gaṇhanto nipajjissāmī’’ti gāmaṃ pavisitukāmo hoti. Siṅgālo ‘‘manussamaṃsaṃ khāditvā piṭṭhiṃ pasāretvā sayissāmī’’ti āmakasusānaṃ pavisitukāmo hoti. Makkaṭo ‘‘ucce rukkhe abhiruhitvā disādisaṃ pakkhandissāmī’’ti vanaṃ pavisitukāmo hoti.
অনুৰিধাযেয্যুন্তি অনুগচ্ছেয্যুং, অনুৰিধিযেয্যুন্তিপি পাঠো, অনুৰিধানং আপজ্জেয্যুন্তি অত্থো। যত্থ সো যাতি, তত্থেৰ গচ্ছেয্যুন্তি ৰুত্তং হোতি। এৰমেৰাতি এত্থ ছ পাণকা ৰিয ছাযতনানি দট্ঠব্বানি, দল়্হরজ্জু ৰিয তণ্হা, মজ্ঝে গণ্ঠি ৰিয অৰিজ্জা। যস্মিং যস্মিং দ্ৰারে আরম্মণং বলৰং হোতি, তং তং আযতনং তস্মিং তস্মিং আরম্মণে আৰিঞ্ছতি।
Anuvidhāyeyyunti anugaccheyyuṃ, anuvidhiyeyyuntipi pāṭho, anuvidhānaṃ āpajjeyyunti attho. Yattha so yāti, tattheva gaccheyyunti vuttaṃ hoti. Evamevāti ettha cha pāṇakā viya chāyatanāni daṭṭhabbāni, daḷharajju viya taṇhā, majjhe gaṇṭhi viya avijjā. Yasmiṃ yasmiṃ dvāre ārammaṇaṃ balavaṃ hoti, taṃ taṃ āyatanaṃ tasmiṃ tasmiṃ ārammaṇe āviñchati.
ইমং পন উপমং ভগৰা সরিক্খকেন ৰা আহরেয্য আযতনানং ৰা নানত্তদস্সনৰসেন। তত্থ সরিক্খকেন তাৰ ৰিসুং অপ্পনাকিচ্চং নত্থি, পাল়িযংযেৰ অপ্পিতা। আযতনানং নানত্তদস্সনেন পন অযং অপ্পনা – অহি নামেস বহি সিত্তসম্মট্ঠে ঠানে নাভিরমতি, সঙ্কারট্ঠানতিণপণ্ণগহনৰম্মিকানিযেৰ পন পৰিসিত্ৰা নিপন্নকালে অভিরমতি, একগ্গতং আপজ্জতি। এৰমেৰ চক্খুপেতং ৰিসমজ্ঝাসযং, মট্ঠাসু সুৰণ্ণভিত্তিআদীসু নাভিরমতি, ওলোকেতুম্পি ন ইচ্ছতি, রূপচিত্তপুপ্ফলতাদিৰিচিত্তেসুযেৰ পন অভিরমতি। তাদিসেসু হি ঠানেসু চক্খুম্হি অপ্পহোন্তে মুখম্পি ৰিৰরিত্ৰা ওলোকেতুকামো হোতি।
Imaṃ pana upamaṃ bhagavā sarikkhakena vā āhareyya āyatanānaṃ vā nānattadassanavasena. Tattha sarikkhakena tāva visuṃ appanākiccaṃ natthi, pāḷiyaṃyeva appitā. Āyatanānaṃ nānattadassanena pana ayaṃ appanā – ahi nāmesa bahi sittasammaṭṭhe ṭhāne nābhiramati, saṅkāraṭṭhānatiṇapaṇṇagahanavammikāniyeva pana pavisitvā nipannakāle abhiramati, ekaggataṃ āpajjati. Evameva cakkhupetaṃ visamajjhāsayaṃ, maṭṭhāsu suvaṇṇabhittiādīsu nābhiramati, oloketumpi na icchati, rūpacittapupphalatādivicittesuyeva pana abhiramati. Tādisesu hi ṭhānesu cakkhumhi appahonte mukhampi vivaritvā oloketukāmo hoti.
সুসুমারোপি বহি নিক্খন্তো গহেতব্বং ন পস্সতি, অক্খিং নিমীলেত্ৰা চরতি। যদা পন ব্যামসতমত্তং উদকং ওগাহিত্ৰা বিলং পৰিসিত্ৰা নিপন্নো হোতি, তদা তস্স চিত্তং একগ্গং হোতি, সুখং সুপতি। এৰমেৰ সোতম্পেতং বিলজ্ঝাসযং আকাসসন্নিস্সিতং, কণ্ণচ্ছিদ্দকূপকেযেৰ অজ্ঝাসযং করোতি, কণ্ণচ্ছিদ্দাকাসোযেৰ তস্স সদ্দসৰনে পচ্চযো হোতি। অজটাকাসোপি ৰট্টতিযেৰ। অন্তোলেণস্মিঞ্হি সজ্ঝাযে কযিরমানে ন লেণচ্ছদনং ভিন্দিত্ৰা সদ্দো বহি নিক্খমতি, দ্ৰারৰাতপানছিদ্দেহি পন নিক্খমিত্ৰা ধাতুপরম্পরা ঘট্টেন্তো আগন্ত্ৰা সোতপসাদং ঘট্টেতি। অথ তস্মিং কালে ‘‘অসুকং নাম সজ্ঝাযতী’’তি লেণপিট্ঠে নিসিন্না জানন্তি।
Susumāropi bahi nikkhanto gahetabbaṃ na passati, akkhiṃ nimīletvā carati. Yadā pana byāmasatamattaṃ udakaṃ ogāhitvā bilaṃ pavisitvā nipanno hoti, tadā tassa cittaṃ ekaggaṃ hoti, sukhaṃ supati. Evameva sotampetaṃ bilajjhāsayaṃ ākāsasannissitaṃ, kaṇṇacchiddakūpakeyeva ajjhāsayaṃ karoti, kaṇṇacchiddākāsoyeva tassa saddasavane paccayo hoti. Ajaṭākāsopi vaṭṭatiyeva. Antoleṇasmiñhi sajjhāye kayiramāne na leṇacchadanaṃ bhinditvā saddo bahi nikkhamati, dvāravātapānachiddehi pana nikkhamitvā dhātuparamparā ghaṭṭento āgantvā sotapasādaṃ ghaṭṭeti. Atha tasmiṃ kāle ‘‘asukaṃ nāma sajjhāyatī’’ti leṇapiṭṭhe nisinnā jānanti.
এৰং সন্তে সম্পত্তগোচরতা হোতি, কিং পনেতং সম্পত্তগোচরন্তি? আম সম্পত্তগোচরং। যদি এৰং দূরে ভেরিআদীসু ৰজ্জমানেসু ‘‘দূরে সদ্দো’’তি জাননং ন ভৰেয্যাতি। নো ন ভৰতি। সোতপসাদস্মিঞ্হি ঘট্টিতে ‘‘দূরে সদ্দো, আসন্নে সদ্দো, পরতীরে ওরিমতীরে’’তি তথা তথা জাননাকারো হোতি, ধম্মতা এসাতি। কিং এতায ধম্মতায? যতো যতো ছিদ্দং, ততো ততো সৰনং হোতি চন্দিমসূরিযাদীনং দস্সনং ৰিযাতি অসম্পত্তগোচরমেৰেতং।
Evaṃ sante sampattagocaratā hoti, kiṃ panetaṃ sampattagocaranti? Āma sampattagocaraṃ. Yadi evaṃ dūre bheriādīsu vajjamānesu ‘‘dūre saddo’’ti jānanaṃ na bhaveyyāti. No na bhavati. Sotapasādasmiñhi ghaṭṭite ‘‘dūre saddo, āsanne saddo, paratīre orimatīre’’ti tathā tathā jānanākāro hoti, dhammatā esāti. Kiṃ etāya dhammatāya? Yato yato chiddaṃ, tato tato savanaṃ hoti candimasūriyādīnaṃ dassanaṃ viyāti asampattagocaramevetaṃ.
পক্খীপি রুক্খে ৰা ভূমিযং ৰা ন রমতি। যদা পন একং ৰা দ্ৰে ৰা লেড্ডুপাতে অতিক্কম্ম অজটাকাসং পক্খন্দো হোতি, তদা একগ্গচিত্ততং আপজ্জতি। এৰমেৰ ঘানম্পি আকাসজ্ঝাসযং ৰাতূপনিস্সযগন্ধগোচরং। তথা হি গাৰো নৰৰুট্ঠে দেৰে ভূমিং ঘাযিত্ৰা ঘাযিত্ৰা আকাসাভিমুখো হুত্ৰা ৰাতং আকড্ঢন্তি। অঙ্গুলীহি গন্ধপিণ্ডং গহেত্ৰাপি চ উপসিঙ্ঘনকালে ৰাতং অনাকড্ঢন্তো নেৰ তস্স গন্ধং জানাতি।
Pakkhīpi rukkhe vā bhūmiyaṃ vā na ramati. Yadā pana ekaṃ vā dve vā leḍḍupāte atikkamma ajaṭākāsaṃ pakkhando hoti, tadā ekaggacittataṃ āpajjati. Evameva ghānampi ākāsajjhāsayaṃ vātūpanissayagandhagocaraṃ. Tathā hi gāvo navavuṭṭhe deve bhūmiṃ ghāyitvā ghāyitvā ākāsābhimukho hutvā vātaṃ ākaḍḍhanti. Aṅgulīhi gandhapiṇḍaṃ gahetvāpi ca upasiṅghanakāle vātaṃ anākaḍḍhanto neva tassa gandhaṃ jānāti.
কুক্কুরোপি বহি চরন্তো খেমট্ঠানং ন পস্সতি, লেড্ডুদণ্ডাদীহি উপদ্দুতো হোতি। অন্তোগামং পৰিসিত্ৰা উদ্ধনট্ঠানে ছারিকং ব্যূহিত্ৰা নিপন্নস্স পনস্স ফাসু হোতি। এৰমেৰ জিৰ্হাপি গামজ্ঝাসযা আপোসন্নিস্সিতরসারম্মণা। তথা হি তিযামরত্তিং সমণধম্মং কত্ৰাপি পাতোৰ পত্তচীৰরমাদায গামং পৰিসিতব্বং হোতি। সুক্খখাদনীযস্স চ ন সক্কা খেল়েন অতেমিতস্স রসং জানিতুং।
Kukkuropi bahi caranto khemaṭṭhānaṃ na passati, leḍḍudaṇḍādīhi upadduto hoti. Antogāmaṃ pavisitvā uddhanaṭṭhāne chārikaṃ byūhitvā nipannassa panassa phāsu hoti. Evameva jivhāpi gāmajjhāsayā āposannissitarasārammaṇā. Tathā hi tiyāmarattiṃ samaṇadhammaṃ katvāpi pātova pattacīvaramādāya gāmaṃ pavisitabbaṃ hoti. Sukkhakhādanīyassa ca na sakkā kheḷena atemitassa rasaṃ jānituṃ.
সিঙ্গালোপি বহি চরন্তো রতিং ন ৰিন্দতি, আমকসুসানে মনুস্সমংসং খাদিত্ৰা নিপন্নস্সেৰ পনস্স ফাসু হোতি। এৰমেৰ কাযোপি উপাদিণ্ণকজ্ঝাসযো পথৰীসন্নিস্সিতফোট্ঠব্বারম্মণো। তথা হি অঞ্ঞং উপাদিণ্ণকং অলভমানা সত্তা অত্তনোৰ হত্থতলে সীসং কত্ৰা নিপজ্জন্তি। অজ্ঝত্তিকবাহিরা চস্স পথৰী আরম্মণগ্গহণে পচ্চযো হোতি। সুসন্থতস্সাপি হি সযনস্স হেট্ঠাঠিতানম্পি ৰা ফলকানং ন সক্কা অনিসীদন্তেন ৰা অনুপ্পীল়ন্তেন ৰা থদ্ধমুদুভাৰো জানিতুন্তি অজ্ঝত্তিকবাহিরা পথৰী এতস্স ফোট্ঠব্বজাননে পচ্চযো হোতি।
Siṅgālopi bahi caranto ratiṃ na vindati, āmakasusāne manussamaṃsaṃ khāditvā nipannasseva panassa phāsu hoti. Evameva kāyopi upādiṇṇakajjhāsayo pathavīsannissitaphoṭṭhabbārammaṇo. Tathā hi aññaṃ upādiṇṇakaṃ alabhamānā sattā attanova hatthatale sīsaṃ katvā nipajjanti. Ajjhattikabāhirā cassa pathavī ārammaṇaggahaṇe paccayo hoti. Susanthatassāpi hi sayanassa heṭṭhāṭhitānampi vā phalakānaṃ na sakkā anisīdantena vā anuppīḷantena vā thaddhamudubhāvo jānitunti ajjhattikabāhirā pathavī etassa phoṭṭhabbajānane paccayo hoti.
মক্কটোপি ভূমিযং ৰিচরন্তো নাভিরমতি, হত্থসতুব্বেধং পনস্স রুক্খং আরুয্হ ৰিটপপিট্ঠে নিসীদিত্ৰা দিসাৰিদিসা ওলোকেন্তস্সেৰ ফাসুকো হোতি। এৰং মনোপি নানজ্ঝাসযো ভৰঙ্গপচ্চযো, দিট্ঠপুব্বেপি নানারম্মণজ্ঝাসযং করোতিযেৰ মূলভৰঙ্গং পনস্স পচ্চযো হোতীতি অযমেত্থ সঙ্খেপো, ৰিত্থারেন পন আযতনানং নানত্তং ৰিসুদ্ধিমগ্গে আযতননিদ্দেসে ৰুত্তমেৰ।
Makkaṭopi bhūmiyaṃ vicaranto nābhiramati, hatthasatubbedhaṃ panassa rukkhaṃ āruyha viṭapapiṭṭhe nisīditvā disāvidisā olokentasseva phāsuko hoti. Evaṃ manopi nānajjhāsayo bhavaṅgapaccayo, diṭṭhapubbepi nānārammaṇajjhāsayaṃ karotiyeva mūlabhavaṅgaṃ panassa paccayo hotīti ayamettha saṅkhepo, vitthārena pana āyatanānaṃ nānattaṃ visuddhimagge āyatananiddese vuttameva.
তং চক্খু নাৰিঞ্ছতীতি তণ্হারজ্জুকানং আযতনপাণকানং কাযগতাসতিথম্ভে বদ্ধানং নিব্বিসেৰনভাৰং আপন্নত্তা নাকড্ঢতীতি ইমস্মিং সুত্তে পুব্বভাগৰিপস্সনাৰ কথিতা।
Taṃ cakkhu nāviñchatīti taṇhārajjukānaṃ āyatanapāṇakānaṃ kāyagatāsatithambhe baddhānaṃ nibbisevanabhāvaṃ āpannattā nākaḍḍhatīti imasmiṃ sutte pubbabhāgavipassanāva kathitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. ছপ্পাণকোপমসুত্তং • 10. Chappāṇakopamasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. ছপ্পাণকোপমসুত্তৰণ্ণনা • 10. Chappāṇakopamasuttavaṇṇanā
