| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. ছপ্পাণকোপমসুত্তৰণ্ণনা
10. Chappāṇakopamasuttavaṇṇanā
২৪৭. ৰণসরীরোতি ৰণিতসরীরো। পক্কত্তাতি কুথিতত্তা। সরদণ্ডেসু সরসমঞ্ঞাতি কণ্ড-সদ্দো সরপরিযাযোতি আহ – ‘‘সরৰনন্তি কণ্ডৰন’’ন্তি। অরুগত্তো…পে॰… ৰেদিতব্বো গুণসরীরস্স খণ্ডছিদ্দসীলাদীহি হেট্ঠা মজ্ঝে উপরিভাগে চ ভেদৰিসমচ্ছিন্নৰিকারদোসত্তা। এত্থ কুসা ‘‘কণ্টকা’’তি অধিপ্পেতা কণ্টকসদিসত্তা, কুসতিণানং এৰ ৰা ৰুত্তাকারপদেসো ‘‘কুসকণ্টকো’’তি ৰুত্তো।
247.Vaṇasarīroti vaṇitasarīro. Pakkattāti kuthitattā. Saradaṇḍesu sarasamaññāti kaṇḍa-saddo sarapariyāyoti āha – ‘‘saravananti kaṇḍavana’’nti. Arugatto…pe… veditabbo guṇasarīrassa khaṇḍachiddasīlādīhi heṭṭhā majjhe uparibhāge ca bhedavisamacchinnavikāradosattā. Ettha kusā ‘‘kaṇṭakā’’ti adhippetā kaṇṭakasadisattā, kusatiṇānaṃ eva vā vuttākārapadeso ‘‘kusakaṇṭako’’ti vutto.
গামৰাসীনং ৰিজ্ঝনট্ঠেনাতি নারহোৰ হুত্ৰা তেসং কারানং পটিগ্গহণৰসেন পীল়নট্ঠেন।
Gāmavāsīnaṃ vijjhanaṭṭhenāti nārahova hutvā tesaṃ kārānaṃ paṭiggahaṇavasena pīḷanaṭṭhena.
পক্খিন্তি হত্থিলিঙ্গসকুণং। তস্স কির হত্থিসোণ্ডসদিসং মুখং, তস্মা ‘‘হত্থিসোণ্ডসকুণ’’ন্তি ৰুত্তং। ৰিস্সজ্জেয্যাতি রজ্জুযা যথাবদ্ধং এৰ ৰিস্সজ্জেয্য।
Pakkhinti hatthiliṅgasakuṇaṃ. Tassa kira hatthisoṇḍasadisaṃ mukhaṃ, tasmā ‘‘hatthisoṇḍasakuṇa’’nti vuttaṃ. Vissajjeyyāti rajjuyā yathābaddhaṃ eva vissajjeyya.
ভোগেহীতি অত্তনো সরীরভোগেহি। মণ্ডলং বন্ধিত্ৰাতি যথা সরীরং মণ্ডলাকারেন তিট্ঠতি, এৰং কত্ৰা। সুপিস্সামীতি নিদ্দং ওক্কমিস্সামি। ডেতুকামোতি উপ্পতিতুকামো। দিসা দিসন্তি দিসতো দিসং।
Bhogehīti attano sarīrabhogehi. Maṇḍalaṃ bandhitvāti yathā sarīraṃ maṇḍalākārena tiṭṭhati, evaṃ katvā. Supissāmīti niddaṃ okkamissāmi. Ḍetukāmoti uppatitukāmo. Disā disanti disato disaṃ.
ছ পাণকা ৰিয ছ আযতনানি নানজ্ঝাসযত্তা, নানজ্ঝাসযতা চ নেসং নানাৰিসযনিন্নতায দট্ঠব্বা। দল়্হরজ্জু ৰিয তণ্হা তেসং বন্ধনতো। মজ্ঝে গণ্ঠি ৰিয অৰিজ্জা বন্ধনস্স দুব্বিনিম্মোচনহেতুতো। আরম্মণং বলৰং হোতি মনুঞ্ঞভাৰেন চেৰ তত্থ তণ্হাভিনিৰেসস্স দল়্হভাৰেন চ।
Cha pāṇakā viya cha āyatanāni nānajjhāsayattā, nānajjhāsayatā ca nesaṃ nānāvisayaninnatāya daṭṭhabbā. Daḷharajju viya taṇhā tesaṃ bandhanato. Majjhe gaṇṭhi viya avijjā bandhanassa dubbinimmocanahetuto. Ārammaṇaṃ balavaṃ hoti manuññabhāvena ceva tattha taṇhābhinivesassa daḷhabhāvena ca.
সরিক্খকেন ৰা উপমায আহরণপক্খে। অপ্পনাতি সংসন্দনা। পাল়িযংযেৰ অপ্পিতা উপমা ‘‘এৰমেৰ খো’’তিআদিনা। রূপচিত্তাদিৰিসমনিন্নত্তা চক্খুস্স ৰিসমজ্ঝাসযতা। এস নযো সেসেসুপি।
Sarikkhakena vā upamāya āharaṇapakkhe. Appanāti saṃsandanā. Pāḷiyaṃyeva appitā upamā ‘‘evameva kho’’tiādinā. Rūpacittādivisamaninnattā cakkhussa visamajjhāsayatā. Esa nayo sesesupi.
কণ্ণচ্ছিদ্দকূপকেতি কণ্ণচ্ছিদ্দসঞ্ঞিতে আৰাটে। তস্সাতি সোতস্স। পচ্চযো হোতীতি উপনিস্সযো হোতি তেন ৰিনা সদ্দগ্গহণস্স অভাৰতো। ‘‘অজটাকাসোপি ৰট্টতি এৰা’’তি ৰত্ৰা তস্স পচ্চযভাৰং দস্সেতুং ‘‘অন্তোলেণস্মি’’ন্তিআদি ৰুত্তং। ধাতুপরম্পরা ঘট্টেন্তোতি ভূতপরম্পরাসঙ্ঘট্টেন্তো।
Kaṇṇacchiddakūpaketi kaṇṇacchiddasaññite āvāṭe. Tassāti sotassa. Paccayo hotīti upanissayo hoti tena vinā saddaggahaṇassa abhāvato. ‘‘Ajaṭākāsopi vaṭṭati evā’’ti vatvā tassa paccayabhāvaṃ dassetuṃ ‘‘antoleṇasmi’’ntiādi vuttaṃ. Dhātuparamparā ghaṭṭentoti bhūtaparamparāsaṅghaṭṭento.
এৰং সন্তেতি এৰং ভূতপরম্পরাৰসেন সদ্দে সোতপথমাগচ্ছন্তে। সম্পত্তগোচরতা হোতি সোতস্স। ঘানাদীনং ৰিয ‘‘দূরে সদ্দো’’তি জাননং ন সম্ভৰেয্য সম্পত্তগাহিভাৰতো। তথা তথা জাননাকারো হোতি মনোৰিঞ্ঞাণস্স গহণাকারৰিসেসতো। সোতৰিঞ্ঞাণপ্পৰত্তি পন উভযত্থ সমানাৰ। দূরে ঠিতোপি সদ্দো তাদিসে ঠানে পটিঘোসাদীনং পচ্চযো হোতি অযোকন্তো ৰিয অযোচলনস্সাতি দট্ঠব্বং। ধম্মতাতি ধম্মসভাৰো, সদ্দস্স সো সভাৰোতি অত্থো। ততো ততো সৰনং হোতি আকাসসঞ্ঞিতস্স উপনিস্সযস্স লব্ভনতো। যদি পন সোতং সম্পত্তগাহী সিযা, চিত্তসমুট্ঠানসদ্দো সোতৰিঞ্ঞাণস্স আরম্মণপচ্চযো ন সিযা। পট্ঠানে চ অৰিসেসেন ‘‘সদ্দাযতনং সোতৰিঞ্ঞাণস্স আরম্মণপচ্চযেন পচ্চযো’’তি ৰুত্তো, বহিদ্ধা চ চিত্তজস্স সদ্দস্স সম্ভৰো নত্থি। অথ ৰা চিত্তজো সদ্দো ধাতুপরম্পরায সোতপসাদং ঘট্টেতি, ন সো চিত্তজো সদ্দো, যো পরম্পরায পৰত্তো। উতুজো হি সো, তস্মা যথুপ্পন্নো সদ্দো, তত্থ ঠিতোৰ সোতপসাদস্স আপাথং আগচ্ছতীতি নিট্ঠমেত্থ গন্তব্বং। তেন ৰুত্তং ‘‘অসম্পত্তগোচরমেৰেত’’ন্তি।
Evaṃ santeti evaṃ bhūtaparamparāvasena sadde sotapathamāgacchante. Sampattagocaratā hoti sotassa. Ghānādīnaṃ viya ‘‘dūre saddo’’ti jānanaṃ na sambhaveyya sampattagāhibhāvato. Tathā tathā jānanākāro hoti manoviññāṇassa gahaṇākāravisesato. Sotaviññāṇappavatti pana ubhayattha samānāva. Dūre ṭhitopi saddo tādise ṭhāne paṭighosādīnaṃ paccayo hoti ayokanto viya ayocalanassāti daṭṭhabbaṃ. Dhammatāti dhammasabhāvo, saddassa so sabhāvoti attho. Tato tato savanaṃ hoti ākāsasaññitassa upanissayassa labbhanato. Yadi pana sotaṃ sampattagāhī siyā, cittasamuṭṭhānasaddo sotaviññāṇassa ārammaṇapaccayo na siyā. Paṭṭhāne ca avisesena ‘‘saddāyatanaṃ sotaviññāṇassa ārammaṇapaccayena paccayo’’ti vutto, bahiddhā ca cittajassa saddassa sambhavo natthi. Atha vā cittajo saddo dhātuparamparāya sotapasādaṃ ghaṭṭeti, na so cittajo saddo, yo paramparāya pavatto. Utujo hi so, tasmā yathuppanno saddo, tattha ṭhitova sotapasādassa āpāthaṃ āgacchatīti niṭṭhamettha gantabbaṃ. Tena vuttaṃ ‘‘asampattagocarameveta’’nti.
তদা একগ্গচিত্ততং আপজ্জতি পরিস্সযানং অভাৰতো। নাসচ্ছিদ্দসঙ্খাতআকাসসন্নিস্সযে ৰত্তনতো ঘানং আকাসজ্ঝাসযং ৰুত্তং। ৰাতেন ৰিনা গন্ধগহণস্স অসম্ভৰতো ৰাতূপনিস্সযগন্ধগোচরং। তেনাহ ‘‘তথা হী’’তিআদি।
Tadā ekaggacittataṃ āpajjati parissayānaṃ abhāvato. Nāsacchiddasaṅkhātaākāsasannissaye vattanato ghānaṃ ākāsajjhāsayaṃ vuttaṃ. Vātena vinā gandhagahaṇassa asambhavato vātūpanissayagandhagocaraṃ. Tenāha ‘‘tathā hī’’tiādi.
গামতো লদ্ধব্বং আহারং গামং, তন্নিন্নতায গামজ্ঝাসযতা ৰুত্তা। তথা হি জীৰিতনিমিত্তং রসো জীৰিতং, তস্মিং নিন্নতায তং অৰ্হাযতীতি জিৰ্হা। ন সক্কা খেল়েন অতেমিতস্স রসং জানিতুং, তস্মা আপোসন্নিস্সিতরসারম্মণা জিৰ্হাতি।
Gāmato laddhabbaṃ āhāraṃ gāmaṃ, tanninnatāya gāmajjhāsayatā vuttā. Tathā hi jīvitanimittaṃ raso jīvitaṃ, tasmiṃ ninnatāya taṃ avhāyatīti jivhā. Na sakkā kheḷena atemitassa rasaṃ jānituṃ, tasmā āposannissitarasārammaṇā jivhāti.
আমকসুসানতো বহি। উপাদিণ্ণকজ্ঝাসযোতি উপাদিণ্ণকনিন্নো। কাযপসাদসন্নিস্সযভূতায পথৰিযা ফোট্ঠব্বারম্মণে ঘটিতে এৰ তত্থ ৰিঞ্ঞাণুপ্পত্তি, ন অঞ্ঞথাতি ৰুত্তং ‘‘পথৰীসন্নিস্সিতফোট্ঠব্বারম্মণো’’তি। তথা হীতিআদি কাযস্স উপাদিণ্ণকজ্ঝাসযতায সাধকং । অজ্ঝত্তিকবাহিরাতি অজ্ঝত্তিকা বাহিরা ৰা। অস্সাতি কাযস্স। সুসন্থতস্সাতিআদি তস্স পথৰিযা পচ্চযভাৰদস্সনং।
Āmakasusānato bahi. Upādiṇṇakajjhāsayoti upādiṇṇakaninno. Kāyapasādasannissayabhūtāya pathaviyā phoṭṭhabbārammaṇe ghaṭite eva tattha viññāṇuppatti, na aññathāti vuttaṃ ‘‘pathavīsannissitaphoṭṭhabbārammaṇo’’ti. Tathā hītiādi kāyassa upādiṇṇakajjhāsayatāya sādhakaṃ . Ajjhattikabāhirāti ajjhattikā bāhirā vā. Assāti kāyassa. Susanthatassātiādi tassa pathaviyā paccayabhāvadassanaṃ.
নানজ্ঝাসযোতি নানারম্মণনিন্নো। তেন মনস্স মক্কটস্স ৰিয অনৰট্ঠিততং দস্সেতি। তেনাহ ‘‘দিট্ঠপুব্বেপী’’তিআদি। মূলভৰঙ্গগ্গহণেন পিট্ঠিভৰঙ্গং নিৰত্তেতি। অস্সাতি মনস্স। এৰং কিরিযমযং ৰিঞ্ঞাণং দট্ঠব্বং। নানত্তন্তি ভেদো।
Nānajjhāsayoti nānārammaṇaninno. Tena manassa makkaṭassa viya anavaṭṭhitataṃ dasseti. Tenāha ‘‘diṭṭhapubbepī’’tiādi. Mūlabhavaṅgaggahaṇena piṭṭhibhavaṅgaṃ nivatteti. Assāti manassa. Evaṃ kiriyamayaṃ viññāṇaṃ daṭṭhabbaṃ. Nānattanti bhedo.
যথারুচিপ্পৰত্তিযা নিৰারণৰসেন বদ্ধানং। নিব্বিসেৰনভাৰন্তি লোলতাসঙ্খাতপরিপ্ফন্দস্স অভাৰং। নাকড্ঢতীতি সৰিসযে রূপারম্মণে চিত্তসন্তানং, তংসমঙ্গিনং ৰা পুগ্গলং নাকড্ঢতি। পুব্বভাগৰিপস্সনাৰ কথিতা আযতনমুখেন ‘‘এৰঞ্হি ৰো, ভিক্খৰে, সিক্খিতব্ব’’ন্তি ৰুত্তত্তা।
Yathārucippavattiyā nivāraṇavasena baddhānaṃ. Nibbisevanabhāvanti lolatāsaṅkhātaparipphandassa abhāvaṃ. Nākaḍḍhatīti savisaye rūpārammaṇe cittasantānaṃ, taṃsamaṅginaṃ vā puggalaṃ nākaḍḍhati. Pubbabhāgavipassanāva kathitā āyatanamukhena ‘‘evañhi vo, bhikkhave, sikkhitabba’’nti vuttattā.
ছপ্পাণকোপমসুত্তৰণ্ণনা নিট্ঠিতা।
Chappāṇakopamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. ছপ্পাণকোপমসুত্তং • 10. Chappāṇakopamasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. ছপ্পাণকোপমসুত্তৰণ্ণনা • 10. Chappāṇakopamasuttavaṇṇanā
