| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
7. ஸங்க⁴பே⁴த³கக்க²ந்த⁴கங்
7. Saṅghabhedakakkhandhakaṃ
ச²ஸக்யபப்³ப³ஜ்ஜாகதா²
Chasakyapabbajjākathā
330. ஸங்க⁴பே⁴த³கக்க²ந்த⁴கே அபி⁴ஞ்ஞாதா அபி⁴ஞ்ஞாதாதி பாகடா பாகடா. ஸக்யகுமாரா நாம காளுதா³யிப்பபு⁴தயோ த³ஸ தூ³தா ஸத்³தி⁴ங் பரிவாரேஹி அஞ்ஞே ச ப³ஹூ ஜனா. அம்ஹாகந்தி அம்ஹேஸு; அம்ஹாகங் குலதோதி வா வுத்தங் ஹோதி. க⁴ராவாஸத்த²ங் அனுஸாஸிஸ்ஸாமீதி க⁴ராவாஸே யங் கத்தப்³ப³ங், தங் ஜானாபெஸ்ஸாமி. உத³கங் நின்னேதப்³ப³ந்தி யதா² உத³கங் ஸப்³ப³ட்டா²னே ஸமங் ஹோதி, ஏவங் காதப்³ப³ங். நித்³தா⁴பேதப்³ப³ந்தி திணானி உத்³த⁴ரிதப்³பா³னி. பு⁴ஸிகா உத்³த⁴ராபேதப்³பா³தி ஸுகு²மபலாலமிஸ்ஸத⁴ஞ்ஞா பலாலிகா பலாபேதப்³பா³. ஓபுனாபேதப்³ப³ந்தி ஸுகு²மபலாலங் அபனேதப்³ப³ங். த்வஞ்ஞேவ க⁴ராவாஸத்தே²ன உபஜானாஹீதி த்வஞ்ஞேவ க⁴ராவாஸத்த²ங் ஜானாஹி. அஹங் தயா யதா²ஸுக²ங் பப்³ப³ஜாஹீதி எத்த² அஹங் தயா ஸத்³தி⁴ங் பப்³ப³ஜிஸ்ஸாமீதி ஸஹாயஸினேஹேன ஸஹஸா வத்துகாமோ ஹுத்வா புன ரஜ்ஜஸிரிலோபே⁴ன பரிகட்³டி⁴யமானஹத³யோ ‘‘அஹங் தயா’’தி எத்தகமேவ வத்வா ஸேஸங் வத்துங் நாஸக்கீ²தி ஏவமத்தோ² வேதி³தப்³போ³ .
330. Saṅghabhedakakkhandhake abhiññātā abhiññātāti pākaṭā pākaṭā. Sakyakumārā nāma kāḷudāyippabhutayo dasa dūtā saddhiṃ parivārehi aññe ca bahū janā. Amhākanti amhesu; amhākaṃ kulatoti vā vuttaṃ hoti. Gharāvāsatthaṃ anusāsissāmīti gharāvāse yaṃ kattabbaṃ, taṃ jānāpessāmi. Udakaṃ ninnetabbanti yathā udakaṃ sabbaṭṭhāne samaṃ hoti, evaṃ kātabbaṃ. Niddhāpetabbanti tiṇāni uddharitabbāni. Bhusikā uddharāpetabbāti sukhumapalālamissadhaññā palālikā palāpetabbā. Opunāpetabbanti sukhumapalālaṃ apanetabbaṃ. Tvaññeva gharāvāsatthena upajānāhīti tvaññeva gharāvāsatthaṃ jānāhi. Ahaṃ tayā yathāsukhaṃ pabbajāhīti ettha ahaṃ tayā saddhiṃ pabbajissāmīti sahāyasinehena sahasā vattukāmo hutvā puna rajjasirilobhena parikaḍḍhiyamānahadayo ‘‘ahaṃ tayā’’ti ettakameva vatvā sesaṃ vattuṃ nāsakkhīti evamattho veditabbo .
331. நிப்பாதிதாதி நிக்க²மிதா. மானஸ்ஸினோதி மானஸ்ஸயினோ; மானநிஸ்ஸிதாதி வுத்தங் ஹோதி.
331.Nippātitāti nikkhamitā. Mānassinoti mānassayino; mānanissitāti vuttaṃ hoti.
332. யஸ்ஸந்தரதோ ந ஸந்தி கோபாதி ததியமக்³கே³ன ஸமூஹதத்தா யஸ்ஸ சித்தே கோபா ந ஸந்தி. யஸ்மா பன ப⁴வோதி ஸம்பத்தி, விப⁴வோதி விபத்தி; ததா² ப⁴வோதி வுட்³டி⁴, விப⁴வோதி ஹானி; ப⁴வோதி ஸஸ்ஸதங், விப⁴வோதி உச்சே²தோ³; ப⁴வோதி புஞ்ஞங், விப⁴வோதி பாபங்; விப⁴வோதி ச அப⁴வோதி ச அத்த²தோ ஏகமேவ, தஸ்மா இதிப⁴வாப⁴வதஞ்ச வீதிவத்தோதி எத்த² யா ஏஸா ஸம்பத்திவிபத்திவுட்³டி⁴ஹானிஸஸ்ஸதுச்சே²த³புஞ்ஞபாபவஸேன இதி அனேகப்பகாரா ப⁴வாப⁴வதா வுச்சதி; சதூஹிபி மக்³கே³ஹி யதா²ஸம்ப⁴வங் தேன தேன நயேன தங் இதிப⁴வாப⁴வதஞ்ச வீதிவத்தோதி ஏவமத்தோ² த³ட்ட²ப்³போ³. நானுப⁴வந்தீதி ந ஸம்பாபுணந்தி; தஸ்ஸ த³ஸ்ஸனங் தே³வானம்பி து³ல்லப⁴ந்தி அதி⁴ப்பாயோ.
332.Yassantarato na santi kopāti tatiyamaggena samūhatattā yassa citte kopā na santi. Yasmā pana bhavoti sampatti, vibhavoti vipatti; tathā bhavoti vuḍḍhi, vibhavoti hāni; bhavoti sassataṃ, vibhavoti ucchedo; bhavoti puññaṃ, vibhavoti pāpaṃ; vibhavoti ca abhavoti ca atthato ekameva, tasmā itibhavābhavatañca vītivattoti ettha yā esā sampattivipattivuḍḍhihānisassatucchedapuññapāpavasena iti anekappakārā bhavābhavatā vuccati; catūhipi maggehi yathāsambhavaṃ tena tena nayena taṃ itibhavābhavatañca vītivattoti evamattho daṭṭhabbo. Nānubhavantīti na sampāpuṇanti; tassa dassanaṃ devānampi dullabhanti adhippāyo.
333. அஹிமேக²லிகாதி அஹிங் கடியங் ப³ந்தி⁴த்வா. உச்ச²ங்கே³தி அங்கே.
333.Ahimekhalikāti ahiṃ kaṭiyaṃ bandhitvā. Ucchaṅgeti aṅke.
334. ஸம்மன்னதீதி ஸம்மானேதி. யங் துமோ கரிஸ்ஸதீதி யங் ஸோ கரிஸ்ஸதி.
334.Sammannatīti sammāneti. Yaṃ tumo karissatīti yaṃ so karissati.
ச²ஸக்யபப்³ப³ஜ்ஜாகதா² நிட்டி²தா.
Chasakyapabbajjākathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
ச²ஸக்யபப்³ப³ஜ்ஜாகதா² • Chasakyapabbajjākathā
தே³வத³த்தவத்து² • Devadattavatthu
பஞ்சஸத்து²கதா² • Pañcasatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
ச²ஸக்யபப்³ப³ஜ்ஜாகதா²வண்ணனா • Chasakyapabbajjākathāvaṇṇanā
பஞ்சஸத்து²கதா²வண்ணனா • Pañcasatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ச²ஸக்யபப்³ப³ஜ்ஜாகதா²வண்ணனா • Chasakyapabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ச²ஸக்யபப்³ப³ஜ்ஜாகதா²தி³வண்ணனா • Chasakyapabbajjākathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ச²ஸக்யபப்³ப³ஜ்ஜாகதா² • Chasakyapabbajjākathā
