| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
7. ஸங்க⁴பே⁴த³கக்க²ந்த⁴கங்
7. Saṅghabhedakakkhandhakaṃ
ச²ஸக்யபப்³ப³ஜ்ஜாகதா²
Chasakyapabbajjākathā
330. ஸங்க⁴பே⁴த³கக்க²ந்த⁴கே அபி⁴ஞ்ஞாதா அபி⁴ஞ்ஞாதாதி எத்த² அபி⁴புப்³போ³ ஞாதஸத்³தோ³ பாகடத்தோ²தி ஆஹ ‘‘பாகடா பாகடா’’தி. காளுதா³யிப்பபூ⁴தயோதி காளுதா³யிஆத³யோ. பரிவாரேஹி ஸத்³தி⁴ங் த³ஸ தூ³தா ச அஞ்ஞே ச ப³ஹூ ஜனா ஸக்யகுமாரா நாமாதி யோஜனா. அம்ஹேஸூதி ஸக்யகுலஸங்கா²தேஸு அம்ஹேஸு, நித்³தா⁴ரணே பு⁴ம்மங். இமினா பாட²ஸேஸங் த³ஸ்ஸேதி. ‘‘குலதோ’’தி இமினா ‘‘குலா’’தி எத்த² நிஸ்ஸக்கத்தே² நிஸ்ஸக்கவசனந்தி த³ஸ்ஸேதி. க⁴ராவாஸத்த²ந்தி எத்த² க⁴ரே ஆவஸந்தானங் மனுஸ்ஸானங் கிச்சந்தி த³ஸ்ஸெந்தோ ஆஹ ‘‘க⁴ராவாஸே ய’’ந்திஆதி³. தத்த² யந்தி யங்கிஞ்சி. உத³கங் நின்னேதப்³ப³ந்தி எத்த² உத³கங் நீஹரித்வா நேதப்³ப³ங் அபனேதப்³ப³ந்தி த³ஸ்ஸெந்தோ ஆஹ ‘‘யதா² உத³கங் ஸப்³ப³ட்டா²னேஸு ஸுஸங் ஹோதீ’’தி. ஸுஸந்தி ஸுக்க²ங். திணானீதி ஸஸ்ஸதூ³ஸகானி திணானி. ‘‘உத்³த⁴ரிதப்³பா³னீ’’தி இமினா நித்³தா⁴பேதப்³ப³ந்தி எத்த² து⁴தா⁴துயா பப்போ²டனத⁴ங்ஸனத்தே² த³ஸ்ஸேதி . பு⁴ஸாதி ஸஸ்ஸனாளத³ண்டா³, தேஹி மிஸ்ஸா பலாலா பு⁴ஸிகா. ஓபு²ணாபேதப்³ப³ந்தி எத்த² பு²ணதா⁴துயா அவகிரணத்த²ங் த³ஸ்ஸெந்தோ ஆஹ ‘‘அபனேதப்³ப³’’ந்தி. த்வஞ்ஞேவ க⁴ராவாஸத்தே²ன உபஜானாதி எத்த² க⁴ராவாஸத்தே²னாதி உபயோக³த்தே² கரணவசனங். உபஜானாதி உபத்யூபஸக்³கோ³ தா⁴த்வத்தா²னுவத்தகோ, ஹிவிப⁴த்தி ச லோபோ ஹோதி, தேன வுத்தங் ‘‘த்வஞ்ஞேவ க⁴ராவாஸத்த²ங் ஜானாஹீ’’தி. அஹந்தி ப⁴த்³தி³யகுமாரனாமகோ அஹங். தயாதி அனுருத்³த⁴குமாரனாமகேன தயா. ‘‘ஸத்³தி⁴ங் பப்³ப³ஜிஸ்ஸாமீ’’தி இமினா பாட²ஸேஸங் த³ஸ்ஸேதி. ஸேஸந்தி ‘‘ஸத்³தி⁴ங் பப்³ப³ஜிஸ்ஸாமீ’’தி வசனங்.
330. Saṅghabhedakakkhandhake abhiññātā abhiññātāti ettha abhipubbo ñātasaddo pākaṭatthoti āha ‘‘pākaṭā pākaṭā’’ti. Kāḷudāyippabhūtayoti kāḷudāyiādayo. Parivārehi saddhiṃ dasa dūtā ca aññe ca bahū janā sakyakumārā nāmāti yojanā. Amhesūti sakyakulasaṅkhātesu amhesu, niddhāraṇe bhummaṃ. Iminā pāṭhasesaṃ dasseti. ‘‘Kulato’’ti iminā ‘‘kulā’’ti ettha nissakkatthe nissakkavacananti dasseti. Gharāvāsatthanti ettha ghare āvasantānaṃ manussānaṃ kiccanti dassento āha ‘‘gharāvāse ya’’ntiādi. Tattha yanti yaṃkiñci. Udakaṃ ninnetabbanti ettha udakaṃ nīharitvā netabbaṃ apanetabbanti dassento āha ‘‘yathā udakaṃ sabbaṭṭhānesu susaṃ hotī’’ti. Susanti sukkhaṃ. Tiṇānīti sassadūsakāni tiṇāni. ‘‘Uddharitabbānī’’ti iminā niddhāpetabbanti ettha dhudhātuyā papphoṭanadhaṃsanatthe dasseti . Bhusāti sassanāḷadaṇḍā, tehi missā palālā bhusikā. Ophuṇāpetabbanti ettha phuṇadhātuyā avakiraṇatthaṃ dassento āha ‘‘apanetabba’’nti. Tvaññeva gharāvāsatthena upajānāti ettha gharāvāsatthenāti upayogatthe karaṇavacanaṃ. Upajānāti upatyūpasaggo dhātvatthānuvattako, hivibhatti ca lopo hoti, tena vuttaṃ ‘‘tvaññeva gharāvāsatthaṃ jānāhī’’ti. Ahanti bhaddiyakumāranāmako ahaṃ. Tayāti anuruddhakumāranāmakena tayā. ‘‘Saddhiṃ pabbajissāmī’’ti iminā pāṭhasesaṃ dasseti. Sesanti ‘‘saddhiṃ pabbajissāmī’’ti vacanaṃ.
331. நிப்பாதிதாதி எத்த² நிக்க²மித்வா க³மாபிதாதி த³ஸ்ஸெந்தோ ஆஹ ‘‘நிக்கா²மிதா’’தி. மானஸ்ஸினோதி எத்த² மானங் ஸயந்தி நிஸ்ஸயந்தீதி மானஸ்ஸினோதி த³ஸ்ஸெந்தோ ஆஹ ‘‘மானஸ்ஸயினோ’’தி.
331.Nippātitāti ettha nikkhamitvā gamāpitāti dassento āha ‘‘nikkhāmitā’’ti. Mānassinoti ettha mānaṃ sayanti nissayantīti mānassinoti dassento āha ‘‘mānassayino’’ti.
332. யஸ்ஸந்தரதோ ந ஸந்தி கோபாதி எத்த² அந்தரஸத்³தோ³ சித்தவாசகோ, தோபச்சயோ ச ஸத்தம்யத்த²வாசகோதி த³ஸ்ஸெந்தோ ஆஹ ‘‘யஸ்ஸ சித்தே’’தி. கஸ்மா கோபா ந ஸந்தீதி ஆஹ ‘‘ததியமக்³கே³ன ஸமூஹதத்தா’’தி. அனாகா³மிமக்³கே³ன தோ³ஸஸ்ஸ ஸமூஹதத்தா யஸ்ஸ கீ²ணாஸவஸ்ஸ சித்தே கோபா ந ஸந்தீதி அதி⁴ப்பாயோ. இதி ப⁴வாப⁴வதஞ்ச வீதிவத்தோதி எத்த² அத்த²ங் த³ஸ்ஸெந்தோ ஆஹ ‘‘யஸ்மா பனா’’திஆதி³. தத்த² யஸ்மா பன வுச்சதி, தஸ்மா ஏவமத்தோ² த³ட்ட²ப்³போ³தி யோஜனா . விப⁴வோதி பாபங் வுச்சதீதி ஸம்ப³ந்தோ⁴. நனு பாளியங் ‘‘விப⁴வோ’’தி நத்தி², ‘‘அப⁴வோ’’தி ஏவ அத்தி², அத² கஸ்மா ‘‘விப⁴வோதி அப⁴வோ’’தி வுத்தந்தி ஆஹ ‘‘விப⁴வோதி ச அப⁴வோதி ச அத்த²தோ ஏகமேவா’’தி. இமினா ஸத்³த³தோயேவ நானந்தி த³ஸ்ஸேதி. யா ஏஸா ப⁴வாப⁴வதா வுச்சதீதி ஸம்ப³ந்தோ⁴. ‘‘அனேகப்பகாரா’’தி இமினா இதிஸத்³த³ஸ்ஸ பகாரத்த²ங் த³ஸ்ஸேதி. சதூஹிபி மக்³கே³ஹி வீதிவத்தோதி ஸம்ப³ந்தோ⁴. தஸ்ஸாதி கீ²ணாஸவஸ்ஸ.
332.Yassantarato na santi kopāti ettha antarasaddo cittavācako, topaccayo ca sattamyatthavācakoti dassento āha ‘‘yassa citte’’ti. Kasmā kopā na santīti āha ‘‘tatiyamaggena samūhatattā’’ti. Anāgāmimaggena dosassa samūhatattā yassa khīṇāsavassa citte kopā na santīti adhippāyo. Iti bhavābhavatañca vītivattoti ettha atthaṃ dassento āha ‘‘yasmā panā’’tiādi. Tattha yasmā pana vuccati, tasmā evamattho daṭṭhabboti yojanā . Vibhavoti pāpaṃ vuccatīti sambandho. Nanu pāḷiyaṃ ‘‘vibhavo’’ti natthi, ‘‘abhavo’’ti eva atthi, atha kasmā ‘‘vibhavoti abhavo’’ti vuttanti āha ‘‘vibhavoti ca abhavoti ca atthato ekamevā’’ti. Iminā saddatoyeva nānanti dasseti. Yā esā bhavābhavatā vuccatīti sambandho. ‘‘Anekappakārā’’ti iminā itisaddassa pakāratthaṃ dasseti. Catūhipi maggehi vītivattoti sambandho. Tassāti khīṇāsavassa.
333. அஹிமேக²லிகாதி மேக²லா விய மேக²லிகா, அஹிமேவ மேக²லிகா அஹிமேக²லிகா. தமேவத்த²ங் த³ஸ்ஸெந்தோ ஆஹ ‘‘அஹிங் கடியங் ப³ந்தி⁴த்வா’’தி.
333.Ahimekhalikāti mekhalā viya mekhalikā, ahimeva mekhalikā ahimekhalikā. Tamevatthaṃ dassento āha ‘‘ahiṃ kaṭiyaṃ bandhitvā’’ti.
334. ஸம்மன்னதீதி எத்த² ‘‘ஸம்மானேதீ’’தி சுராதி³க³ணிகதா⁴துவஸேன வத்தப்³பே³ தி³வாதி³க³ணிகதா⁴துவஸேன வுத்தந்தி த³ஸ்ஸெந்தோ ஆஹ ‘‘ஸம்மானேதீ’’தி. அசிந்தெய்யோ ஹி பாளினயோ. ஸம்மானேதீதி ஸம்மானங் கரோதி. யந்தி கம்மங். ஸோதி ஸத்தா². இமினா யங் துமோதி எத்த² துமோதி ருள்ஹீஸத்³தோ³ இத⁴ ‘‘ஸோ’’தி ஸப்³ப³னாமஸத்³தே³ன ஸதி³ஸத்தோ²தி த³ஸ்ஸேதி.
334.Sammannatīti ettha ‘‘sammānetī’’ti curādigaṇikadhātuvasena vattabbe divādigaṇikadhātuvasena vuttanti dassento āha ‘‘sammānetī’’ti. Acinteyyo hi pāḷinayo. Sammānetīti sammānaṃ karoti. Yanti kammaṃ. Soti satthā. Iminā yaṃ tumoti ettha tumoti ruḷhīsaddo idha ‘‘so’’ti sabbanāmasaddena sadisatthoti dasseti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
ச²ஸக்யபப்³ப³ஜ்ஜாகதா² • Chasakyapabbajjākathā
தே³வத³த்தவத்து² • Devadattavatthu
பஞ்சஸத்து²கதா² • Pañcasatthukathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ச²ஸக்யபப்³ப³ஜ்ஜாகதா² • Chasakyapabbajjākathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
ச²ஸக்யபப்³ப³ஜ்ஜாகதா²வண்ணனா • Chasakyapabbajjākathāvaṇṇanā
பஞ்சஸத்து²கதா²வண்ணனா • Pañcasatthukathāvaṇṇanā
