| Library / Tipiṭaka / তিপিটক • Tipiṭaka / চূল়ৰগ্গপাল়ি • Cūḷavaggapāḷi |
৭. সঙ্ঘভেদকক্খন্ধকং
7. Saṅghabhedakakkhandhakaṃ
১. পঠমভাণৰারো
1. Paṭhamabhāṇavāro
ছসক্যপব্বজ্জাকথা
Chasakyapabbajjākathā
৩৩০. তেন সমযেন বুদ্ধো ভগৰা অনুপিযাযং ৰিহরতি, অনুপিযং নাম মল্লানং নিগমো। তেন খো পন সমযেন অভিঞ্ঞাতা অভিঞ্ঞাতা সক্যকুমারা ভগৰন্তং পব্বজিতং অনুপব্বজন্তি। তেন খো পন সমযেন মহানামো চ সক্কো অনুরুদ্ধো চ সক্কো দ্ৰেভাতিকা হোন্তি। অনুরুদ্ধো সক্কো সুখুমালো হোতি। তস্স তযো পাসাদা হোন্তি – একো হেমন্তিকো, একো গিম্হিকো, একো ৰস্সিকো। সো ৰস্সিকে পাসাদে চত্তারো মাসে 1 নিপ্পুরিসেহি তূরিযেহি পরিচারযমানো 2 ন হেট্ঠাপাসাদং ওরোহতি। অথ খো মহানামস্স সক্কস্স এতদহোসি – ‘‘এতরহি খো অভিঞ্ঞাতা অভিঞ্ঞাতা সক্যকুমারা ভগৰন্তং পব্বজিতং অনুপব্বজন্তি। অম্হাকঞ্চ পন কুলা নত্থি কোচি অগারস্মা অনগারিযং পব্বজিতো। যংনূনাহং ৰা পব্বজেয্যং, অনুরুদ্ধো ৰা’’তি। অথ খো মহানামো সক্কো যেন অনুরুদ্ধো সক্কো তেনুপসঙ্কমি, উপসঙ্কমিত্ৰা অনুরুদ্ধং সক্কং এতদৰোচ – ‘‘এতরহি, তাত অনুরুদ্ধ, অভিঞ্ঞাতা অভিঞ্ঞাতা সক্যকুমারা ভগৰন্তং পব্বজিতং অনুপব্বজন্তি। অম্হাকঞ্চ পন কুলা নত্থি কোচি অগারস্মা অনগারিযং পব্বজিতো। তেন হি ত্ৰং ৰা পব্বজ, অহং ৰা পব্বজিস্সামী’’তি। ‘‘অহং খো সুখুমালো, নাহং সক্কোমি অগারস্মা অনগারিযং পব্বজিতুং। ত্ৰং পব্বজাহী’’তি। ‘‘এহি খো তে, তাত অনুরুদ্ধ, ঘরাৰাসত্থং অনুসাসিস্সামি। পঠমং খেত্তং কসাপেতব্বং। কসাপেত্ৰা ৰপাপেতব্বং। ৰপাপেত্ৰা উদকং অভিনেতব্বং। উদকং অভিনেত্ৰা উদকং নিন্নেতব্বং। উদকং নিন্নেত্ৰা নিদ্ধাপেতব্বং। নিদ্ধাপেত্ৰা 3 লৰাপেতব্বং। লৰাপেত্ৰা উব্বাহাপেতব্বং। উব্বাহাপেত্ৰা পুঞ্জং কারাপেতব্বং। পুঞ্জং কারাপেত্ৰা মদ্দাপেতব্বং। মদ্দাপেত্ৰা পলালানি উদ্ধরাপেতব্বানি। পলালানি উদ্ধরাপেত্ৰা ভুসিকা উদ্ধরাপেতব্বা। ভুসিকং উদ্ধরাপেত্ৰা ওপুনাপেতব্বং 4। ওপুনাপেত্ৰা অতিহরাপেতব্বং। অতিহরাপেত্ৰা আযতিম্পি ৰস্সং এৰমেৰ কাতব্বং, আযতিম্পি ৰস্সং এৰমেৰ কাতব্ব’’ন্তি। ‘‘ন কম্মা খীযন্তি? ন কম্মানং অন্তো পঞ্ঞাযতি? কদা কম্মা খীযিস্সন্তি? কদা কম্মানং অন্তো পঞ্ঞাযিস্সতি? কদা মযং অপ্পোস্সুক্কা পঞ্চহি কামগুণেহি সমপ্পিতা সমঙ্গীভূতা পরিচারেস্সামা’’তি? ‘‘ন হি, তাত অনুরুদ্ধ, কম্মা খীযন্তি। ন কম্মানং অন্তো পঞ্ঞাযতি। অখীণেৰ কম্মে পিতরো চ পিতামহা চ কালঙ্কতা’’তি। ‘‘তেন হি ত্ৰঞ্ঞেৰ ঘরাৰাসত্থেন উপজানাহি। অহং অগারস্মা অনগারিযং পব্বজিস্সামী’’তি।
330. Tena samayena buddho bhagavā anupiyāyaṃ viharati, anupiyaṃ nāma mallānaṃ nigamo. Tena kho pana samayena abhiññātā abhiññātā sakyakumārā bhagavantaṃ pabbajitaṃ anupabbajanti. Tena kho pana samayena mahānāmo ca sakko anuruddho ca sakko dvebhātikā honti. Anuruddho sakko sukhumālo hoti. Tassa tayo pāsādā honti – eko hemantiko, eko gimhiko, eko vassiko. So vassike pāsāde cattāro māse 5 nippurisehi tūriyehi paricārayamāno 6 na heṭṭhāpāsādaṃ orohati. Atha kho mahānāmassa sakkassa etadahosi – ‘‘etarahi kho abhiññātā abhiññātā sakyakumārā bhagavantaṃ pabbajitaṃ anupabbajanti. Amhākañca pana kulā natthi koci agārasmā anagāriyaṃ pabbajito. Yaṃnūnāhaṃ vā pabbajeyyaṃ, anuruddho vā’’ti. Atha kho mahānāmo sakko yena anuruddho sakko tenupasaṅkami, upasaṅkamitvā anuruddhaṃ sakkaṃ etadavoca – ‘‘etarahi, tāta anuruddha, abhiññātā abhiññātā sakyakumārā bhagavantaṃ pabbajitaṃ anupabbajanti. Amhākañca pana kulā natthi koci agārasmā anagāriyaṃ pabbajito. Tena hi tvaṃ vā pabbaja, ahaṃ vā pabbajissāmī’’ti. ‘‘Ahaṃ kho sukhumālo, nāhaṃ sakkomi agārasmā anagāriyaṃ pabbajituṃ. Tvaṃ pabbajāhī’’ti. ‘‘Ehi kho te, tāta anuruddha, gharāvāsatthaṃ anusāsissāmi. Paṭhamaṃ khettaṃ kasāpetabbaṃ. Kasāpetvā vapāpetabbaṃ. Vapāpetvā udakaṃ abhinetabbaṃ. Udakaṃ abhinetvā udakaṃ ninnetabbaṃ. Udakaṃ ninnetvā niddhāpetabbaṃ. Niddhāpetvā 7 lavāpetabbaṃ. Lavāpetvā ubbāhāpetabbaṃ. Ubbāhāpetvā puñjaṃ kārāpetabbaṃ. Puñjaṃ kārāpetvā maddāpetabbaṃ. Maddāpetvā palālāni uddharāpetabbāni. Palālāni uddharāpetvā bhusikā uddharāpetabbā. Bhusikaṃ uddharāpetvā opunāpetabbaṃ 8. Opunāpetvā atiharāpetabbaṃ. Atiharāpetvā āyatimpi vassaṃ evameva kātabbaṃ, āyatimpi vassaṃ evameva kātabba’’nti. ‘‘Na kammā khīyanti? Na kammānaṃ anto paññāyati? Kadā kammā khīyissanti? Kadā kammānaṃ anto paññāyissati? Kadā mayaṃ appossukkā pañcahi kāmaguṇehi samappitā samaṅgībhūtā paricāressāmā’’ti? ‘‘Na hi, tāta anuruddha, kammā khīyanti. Na kammānaṃ anto paññāyati. Akhīṇeva kamme pitaro ca pitāmahā ca kālaṅkatā’’ti. ‘‘Tena hi tvaññeva gharāvāsatthena upajānāhi. Ahaṃ agārasmā anagāriyaṃ pabbajissāmī’’ti.
অথ খো অনুরুদ্ধো সক্কো যেন মাতা তেনুপসঙ্কমি, উপসঙ্কমিত্ৰা মাতরং এতদৰোচ – ‘‘ইচ্ছামহং, অম্ম, অগারস্মা অনগারিযং পব্বজিতুং। অনুজানাহি মং অগারস্মা অনগারিযং পব্বজ্জাযা’’তি। এৰং ৰুত্তে অনুরুদ্ধস্স সক্কস্স মাতা অনুরুদ্ধং সক্কং এতদৰোচ – ‘‘তুম্হে খো মে, তাত অনুরুদ্ধ, দ্ৰে পুত্তা পিযা মনাপা অপ্পটিকূলা। মরণেনপি ৰো অকামকা ৰিনা ভৰিস্সামি। কিং পনাহং তুম্হে জীৰন্তে অনুজানিস্সামি অগারস্মা অনগারিযং পব্বজ্জাযা’’তি? দুতিযম্পি খো…পে॰… ততিযম্পি খো অনুরুদ্ধো সক্কো মাতরং এতদৰোচ – ‘‘ইচ্ছামহং, অম্ম, অগারস্মা অনগারিযং পব্বজিতুং। অনুজানাহি মং অগারস্মা অনগারিযং পব্বজ্জাযা’’তি 9। তেন খো পন সমযেন ভদ্দিযো সক্যরাজা সক্যানং রজ্জং কারেতি। সো চ অনুরুদ্ধস্স সক্কস্স সহাযো হোতি। অথ খো অনুরুদ্ধস্স সক্কস্স মাতা – ‘অযং খো ভদ্দিযো সক্যরাজা সক্যানং রজ্জং কারেতি; অনুরুদ্ধস্স সক্কস্স সহাযো; সো ন উস্সহতি অগারস্মা অনগারিযং পব্বজিতু’ন্তি – অনুরুদ্ধং সক্কং এতদৰোচ – ‘‘সচে, তাত অনুরুদ্ধ, ভদ্দিযো সক্যরাজা অগারস্মা অনগারিযং পব্বজতি, এৰং ত্ৰম্পি পব্বজাহী’’তি। অথ খো অনুরুদ্ধো সক্কো যেন ভদ্দিযো সক্যরাজা তেনুপসঙ্কমি, উপসঙ্কমিত্ৰা ভদ্দিযং সক্যরাজানং এতদৰোচ – ‘‘মম খো, সম্ম, পব্বজ্জা তৰ পটিবদ্ধা’’তি। ‘‘সচে তে, সম্ম, পব্বজ্জা মম পটিবদ্ধা ৰা অপ্পটিবদ্ধা ৰা সা হোতু, অহং তযা; যথা সুখং পব্বজাহী’’তি। ‘‘এহি, সম্ম, উভো অগারস্মা অনগারিযং পব্বজিস্সামা’’তি। ‘‘নাহং, সম্ম, সক্কোমি অগারস্মা অনগারিযং পব্বজিতুন্তি । যং তে সক্কা অঞ্ঞং মযা কাতুং, ক্যাহং 10 করিস্সামি। ত্ৰং পব্বজাহী’’তি। ‘‘মাতা খো মং, সম্ম, এৰমাহ – ‘সচে, তাত অনুরুদ্ধ, ভদ্দিযো সক্যরাজা অগারস্মা অনগারিযং পব্বজতি, এৰং ত্ৰম্পি পব্বজাহী’’’তি। ‘‘ভাসিতা খো পন তে, সম্ম, এসা ৰাচা। সচে তে, সম্ম, পব্বজ্জা মম পটিবদ্ধা ৰা, অপ্পটিবদ্ধা ৰা সা হোতু, অহং তযা; যথা সুখং পব্বজাহী’’তি। ‘‘এহি, সম্ম, উভো অগারস্মা অনগারিযং পব্বজিস্সামা’’তি।
Atha kho anuruddho sakko yena mātā tenupasaṅkami, upasaṅkamitvā mātaraṃ etadavoca – ‘‘icchāmahaṃ, amma, agārasmā anagāriyaṃ pabbajituṃ. Anujānāhi maṃ agārasmā anagāriyaṃ pabbajjāyā’’ti. Evaṃ vutte anuruddhassa sakkassa mātā anuruddhaṃ sakkaṃ etadavoca – ‘‘tumhe kho me, tāta anuruddha, dve puttā piyā manāpā appaṭikūlā. Maraṇenapi vo akāmakā vinā bhavissāmi. Kiṃ panāhaṃ tumhe jīvante anujānissāmi agārasmā anagāriyaṃ pabbajjāyā’’ti? Dutiyampi kho…pe… tatiyampi kho anuruddho sakko mātaraṃ etadavoca – ‘‘icchāmahaṃ, amma, agārasmā anagāriyaṃ pabbajituṃ. Anujānāhi maṃ agārasmā anagāriyaṃ pabbajjāyā’’ti 11. Tena kho pana samayena bhaddiyo sakyarājā sakyānaṃ rajjaṃ kāreti. So ca anuruddhassa sakkassa sahāyo hoti. Atha kho anuruddhassa sakkassa mātā – ‘ayaṃ kho bhaddiyo sakyarājā sakyānaṃ rajjaṃ kāreti; anuruddhassa sakkassa sahāyo; so na ussahati agārasmā anagāriyaṃ pabbajitu’nti – anuruddhaṃ sakkaṃ etadavoca – ‘‘sace, tāta anuruddha, bhaddiyo sakyarājā agārasmā anagāriyaṃ pabbajati, evaṃ tvampi pabbajāhī’’ti. Atha kho anuruddho sakko yena bhaddiyo sakyarājā tenupasaṅkami, upasaṅkamitvā bhaddiyaṃ sakyarājānaṃ etadavoca – ‘‘mama kho, samma, pabbajjā tava paṭibaddhā’’ti. ‘‘Sace te, samma, pabbajjā mama paṭibaddhā vā appaṭibaddhā vā sā hotu, ahaṃ tayā; yathā sukhaṃ pabbajāhī’’ti. ‘‘Ehi, samma, ubho agārasmā anagāriyaṃ pabbajissāmā’’ti. ‘‘Nāhaṃ, samma, sakkomi agārasmā anagāriyaṃ pabbajitunti . Yaṃ te sakkā aññaṃ mayā kātuṃ, kyāhaṃ 12 karissāmi. Tvaṃ pabbajāhī’’ti. ‘‘Mātā kho maṃ, samma, evamāha – ‘sace, tāta anuruddha, bhaddiyo sakyarājā agārasmā anagāriyaṃ pabbajati, evaṃ tvampi pabbajāhī’’’ti. ‘‘Bhāsitā kho pana te, samma, esā vācā. Sace te, samma, pabbajjā mama paṭibaddhā vā, appaṭibaddhā vā sā hotu, ahaṃ tayā; yathā sukhaṃ pabbajāhī’’ti. ‘‘Ehi, samma, ubho agārasmā anagāriyaṃ pabbajissāmā’’ti.
তেন খো পন সমযেন মনুস্সা সচ্চৰাদিনো হোন্তি, সচ্চপটিঞ্ঞা। অথ খো ভদ্দিযো সক্যরাজা অনুরুদ্ধং সক্কং এতদৰোচ – ‘‘আগমেহি, সম্ম, সত্তৰস্সানি। সত্তন্নং ৰস্সানং অচ্চযেন উভো অগারস্মা অনগারিযং পব্বজিস্সামা’’তি। ‘‘অতিচিরং, সম্ম, সত্তৰস্সানি। নাহং সক্কোমি সত্তৰস্সানি আগমেতু’’ন্তি। ‘‘আগমেহি, সম্ম, ছৰস্সানি…পে॰… পঞ্চৰস্সানি… চত্তারি ৰস্সানি… তীণি ৰস্সানি… দ্ৰে ৰস্সানি… একং ৰস্সং। একস্স ৰস্সস্স অচ্চযেন উভো অগারস্মা অনগারিযং পব্বজিস্সামা’’তি। ‘‘অতিচিরং, সম্ম, একৰস্সং। নাহং সক্কোমি একং ৰস্সং আগমেতু’’ন্তি। ‘‘আগমেহি, সম্ম, সত্তমাসে। সত্তন্নং মাসানং অচ্চযেন উভোপি অগারস্মা অনগারিযং পব্বজিস্সামা’’তি। ‘‘অতিচিরং, সম্ম, সত্তমাসা। নাহং সক্কোমি সত্তমাসে আগমেতু’’ন্তি। ‘‘আগমেহি, সম্ম, ছ মাসে…পে॰… পঞ্চ মাসে… চত্তারো মাসে… তযো মাসে… দ্ৰে মাসে… একং মাসং… অড্ঢমাসং। অড্ঢমাসস্স অচ্চযেন উভোপি অগারস্মা অনগারিযং পব্বজিস্সামা’’তি। ‘‘অতিচিরং, সম্ম, অড্ঢমাসো। নাহং সক্কোমি অড্ঢমাসং আগমেতু’’ন্তি। ‘‘আগমেহি, সম্ম, সত্তাহং যাৰাহং পুত্তে চ ভাতরো চ রজ্জং নিয্যাদেমী’’তি। ‘‘ন চিরং, সম্ম, সত্তাহো, আগমেস্সামী’’তি।
Tena kho pana samayena manussā saccavādino honti, saccapaṭiññā. Atha kho bhaddiyo sakyarājā anuruddhaṃ sakkaṃ etadavoca – ‘‘āgamehi, samma, sattavassāni. Sattannaṃ vassānaṃ accayena ubho agārasmā anagāriyaṃ pabbajissāmā’’ti. ‘‘Aticiraṃ, samma, sattavassāni. Nāhaṃ sakkomi sattavassāni āgametu’’nti. ‘‘Āgamehi, samma, chavassāni…pe… pañcavassāni… cattāri vassāni… tīṇi vassāni… dve vassāni… ekaṃ vassaṃ. Ekassa vassassa accayena ubho agārasmā anagāriyaṃ pabbajissāmā’’ti. ‘‘Aticiraṃ, samma, ekavassaṃ. Nāhaṃ sakkomi ekaṃ vassaṃ āgametu’’nti. ‘‘Āgamehi, samma, sattamāse. Sattannaṃ māsānaṃ accayena ubhopi agārasmā anagāriyaṃ pabbajissāmā’’ti. ‘‘Aticiraṃ, samma, sattamāsā. Nāhaṃ sakkomi sattamāse āgametu’’nti. ‘‘Āgamehi, samma, cha māse…pe… pañca māse… cattāro māse… tayo māse… dve māse… ekaṃ māsaṃ… aḍḍhamāsaṃ. Aḍḍhamāsassa accayena ubhopi agārasmā anagāriyaṃ pabbajissāmā’’ti. ‘‘Aticiraṃ, samma, aḍḍhamāso. Nāhaṃ sakkomi aḍḍhamāsaṃ āgametu’’nti. ‘‘Āgamehi, samma, sattāhaṃ yāvāhaṃ putte ca bhātaro ca rajjaṃ niyyādemī’’ti. ‘‘Na ciraṃ, samma, sattāho, āgamessāmī’’ti.
৩৩১. অথ খো ভদ্দিযো চ সক্যরাজা অনুরুদ্ধো চ আনন্দো চ ভগু চ কিমিলো চ দেৰদত্তো চ, উপালিকপ্পকেন সত্তমা, যথা পুরে চতুরঙ্গিনিযা সেনায উয্যানভূমিং নিয্যন্তি, এৰমেৰ চতুরঙ্গিনিযা সেনায নিয্যিংসু। তে দূরং গন্ত্ৰা সেনং নিৰত্তাপেত্ৰা পরৰিসযং ওক্কমিত্ৰা আভরণং ওমুঞ্চিত্ৰা উত্তরাসঙ্গেন ভণ্ডিকং বন্ধিত্ৰা উপালিং কপ্পকং এতদৰোচুং – ‘‘হন্দ, ভণে উপালি, নিৰত্তস্সু; অলং তে এত্তকং জীৰিকাযা’’তি। অথ খো উপালিস্স কপ্পকস্স নিৰত্তন্তস্স এতদহোসি – ‘‘চণ্ডা খো সাকিযা; ইমিনা কুমারা নিপ্পাতিতাতি ঘাতাপেয্যুম্পি মং। ইমে হি নাম সক্যকুমারা অগারস্মা অনগারিযং পব্বজিস্সন্তি। কিমঙ্গ 13 পনাহ’’ন্তি। ভণ্ডিকং মুঞ্চিত্ৰা তং ভণ্ডং রুক্খে আলগ্গেত্ৰা ‘যো পস্সতি, দিন্নংযেৰ হরতূ’তি ৰত্ৰা যেন তে সক্যকুমারা তেনুপসঙ্কমি। অদ্দসাসুং খো তে সক্যকুমারা উপালিং কপ্পকং দূরতোৰ আগচ্ছন্তং। দিস্ৰান উপালিং কপ্পকং এতদৰোচুং – ‘‘কিস্স, ভণে উপালি, নিৰত্তেসী’’তি? ‘‘ইধ মে, অয্যপুত্তা, নিৰত্তন্তস্স এতদহোসি – ‘চণ্ডা খো সাকিযা; ইমিনা কুমারা নিপ্পাতিতাতি ঘাতাপেয্যুম্পি মং। ইমে হি নাম সক্যকুমারা অগারস্মা অনগারিযং পব্বজিস্সন্তি। কিমঙ্গ পনাহ’ন্তি। সো খো অহং, অয্যপুত্তা, ভণ্ডিকং মুঞ্চিত্ৰা তং ভণ্ডং রুক্খে আলগ্গেত্ৰা ‘যো পস্সতি, দিন্নঞ্ঞেৰ হরতূ’তি ৰত্ৰা ততোম্হি পটিনিৰত্তো’’তি। ‘‘সুট্ঠু, ভণে উপালি, অকাসি যম্পি ন নিৰত্তো 14। চণ্ডা খো সাকিযা; ইমিনা কুমারা নিপ্পাতিতাতি ঘাতাপেয্যুম্পি ত’’ন্তি।
331. Atha kho bhaddiyo ca sakyarājā anuruddho ca ānando ca bhagu ca kimilo ca devadatto ca, upālikappakena sattamā, yathā pure caturaṅginiyā senāya uyyānabhūmiṃ niyyanti, evameva caturaṅginiyā senāya niyyiṃsu. Te dūraṃ gantvā senaṃ nivattāpetvā paravisayaṃ okkamitvā ābharaṇaṃ omuñcitvā uttarāsaṅgena bhaṇḍikaṃ bandhitvā upāliṃ kappakaṃ etadavocuṃ – ‘‘handa, bhaṇe upāli, nivattassu; alaṃ te ettakaṃ jīvikāyā’’ti. Atha kho upālissa kappakassa nivattantassa etadahosi – ‘‘caṇḍā kho sākiyā; iminā kumārā nippātitāti ghātāpeyyumpi maṃ. Ime hi nāma sakyakumārā agārasmā anagāriyaṃ pabbajissanti. Kimaṅga 15 panāha’’nti. Bhaṇḍikaṃ muñcitvā taṃ bhaṇḍaṃ rukkhe ālaggetvā ‘yo passati, dinnaṃyeva haratū’ti vatvā yena te sakyakumārā tenupasaṅkami. Addasāsuṃ kho te sakyakumārā upāliṃ kappakaṃ dūratova āgacchantaṃ. Disvāna upāliṃ kappakaṃ etadavocuṃ – ‘‘kissa, bhaṇe upāli, nivattesī’’ti? ‘‘Idha me, ayyaputtā, nivattantassa etadahosi – ‘caṇḍā kho sākiyā; iminā kumārā nippātitāti ghātāpeyyumpi maṃ. Ime hi nāma sakyakumārā agārasmā anagāriyaṃ pabbajissanti. Kimaṅga panāha’nti. So kho ahaṃ, ayyaputtā, bhaṇḍikaṃ muñcitvā taṃ bhaṇḍaṃ rukkhe ālaggetvā ‘yo passati, dinnaññeva haratū’ti vatvā tatomhi paṭinivatto’’ti. ‘‘Suṭṭhu, bhaṇe upāli, akāsi yampi na nivatto 16. Caṇḍā kho sākiyā; iminā kumārā nippātitāti ghātāpeyyumpi ta’’nti.
অথ খো সক্যকুমারা উপালিং কপ্পকং আদায যেন ভগৰা তেনুপসঙ্কমিংসু, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে সক্যকুমারা ভগৰন্তং এতদৰোচুং – ‘‘মযং, ভন্তে, সাকিযা নাম মানস্সিনো। অযং , ভন্তে, উপালি কপ্পকো অম্হাকং দীঘরত্তং পরিচারকো। ইমং ভগৰা পঠমং পব্বাজেতু। ইমস্স মযং অভিৰাদনপচ্চুট্ঠানঅঞ্জলিকম্মসামীচিকম্মং করিস্সাম। এৰং অম্হাকং সাকিযানং সাকিযমানো নিম্মানাযিস্সতী’’তি 17।
Atha kho sakyakumārā upāliṃ kappakaṃ ādāya yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te sakyakumārā bhagavantaṃ etadavocuṃ – ‘‘mayaṃ, bhante, sākiyā nāma mānassino. Ayaṃ , bhante, upāli kappako amhākaṃ dīgharattaṃ paricārako. Imaṃ bhagavā paṭhamaṃ pabbājetu. Imassa mayaṃ abhivādanapaccuṭṭhānaañjalikammasāmīcikammaṃ karissāma. Evaṃ amhākaṃ sākiyānaṃ sākiyamāno nimmānāyissatī’’ti 18.
অথ খো ভগৰা উপালিং কপ্পকং পঠমং পব্বাজেসি, পচ্ছা তে সক্যকুমারে। অথ খো আযস্মা ভদ্দিযো তেনেৰ অন্তরৰস্সেন তিস্সো ৰিজ্জা সচ্ছাকাসি। আযস্মা অনুরুদ্ধো দিব্বচক্খুং উপ্পাদেসি। আযস্মা আনন্দো সোতাপত্তিফলং সচ্ছাকাসি। দেৰদত্তো পোথুজ্জনিকং ইদ্ধিং অভিনিপ্ফাদেসি।
Atha kho bhagavā upāliṃ kappakaṃ paṭhamaṃ pabbājesi, pacchā te sakyakumāre. Atha kho āyasmā bhaddiyo teneva antaravassena tisso vijjā sacchākāsi. Āyasmā anuruddho dibbacakkhuṃ uppādesi. Āyasmā ānando sotāpattiphalaṃ sacchākāsi. Devadatto pothujjanikaṃ iddhiṃ abhinipphādesi.
৩৩২. তেন খো পন সমযেন আযস্মা ভদ্দিযো অরঞ্ঞগতোপি রুক্খমূলগতোপি সুঞ্ঞাগারগতোপি অভিক্খণং উদানং উদানেসি – ‘‘অহো সুখং, অহো সুখ’’ন্তি। অথ খো সম্বহুলা ভিক্খূ যেন ভগৰা তেনুপসঙ্কমিংসু, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে ভিক্খূ ভগৰন্তং এতদৰোচুং – ‘‘আযস্মা, ভন্তে, ভদ্দিযো অরঞ্ঞগতোপি রুক্খমূলগতোপি সুঞ্ঞাগারগতোপি অভিক্খণং উদানং উদানেসি – ‘অহো সুখং, অহো সুখ’ন্তি। নিস্সংসযং খো, ভন্তে, আযস্মা ভদ্দিযো অনভিরতোৰ ব্রহ্মচরিযং চরতি। তংযেৰ ৰা পুরিমং রজ্জসুখং সমনুস্সরন্তো অরঞ্ঞগতোপি রুক্খমূলগতোপি সুঞ্ঞাগারগতোপি অভিক্খণং উদানং উদানেসি – ‘অহো সুখং, অহো সুখ’’’ন্তি।
332. Tena kho pana samayena āyasmā bhaddiyo araññagatopi rukkhamūlagatopi suññāgāragatopi abhikkhaṇaṃ udānaṃ udānesi – ‘‘aho sukhaṃ, aho sukha’’nti. Atha kho sambahulā bhikkhū yena bhagavā tenupasaṅkamiṃsu, upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘āyasmā, bhante, bhaddiyo araññagatopi rukkhamūlagatopi suññāgāragatopi abhikkhaṇaṃ udānaṃ udānesi – ‘aho sukhaṃ, aho sukha’nti. Nissaṃsayaṃ kho, bhante, āyasmā bhaddiyo anabhiratova brahmacariyaṃ carati. Taṃyeva vā purimaṃ rajjasukhaṃ samanussaranto araññagatopi rukkhamūlagatopi suññāgāragatopi abhikkhaṇaṃ udānaṃ udānesi – ‘aho sukhaṃ, aho sukha’’’nti.
অথ খো ভগৰা অঞ্ঞতরং ভিক্খুং আমন্তেসি – ‘‘এহি ত্ৰং, ভিক্খু, মম ৰচনেন ভদ্দিযং ভিক্খুং আমন্তেহি – ‘সত্থা তং, আৰুসো ভদ্দিয, আমন্তেতী’’’তি । ‘‘এৰং ভন্তে’’তি খো সো ভিক্খু ভগৰতো পটিস্সুত্ৰা যেনাযস্মা ভদ্দিযো তেনুপসঙ্কমি, উপসঙ্কমিত্ৰা আযস্মন্তং ভদ্দিযং এতদৰোচ – ‘‘সত্থা তং, আৰুসো ভদ্দিয, আমন্তেতী’’তি। ‘‘এৰমাৰুসো’’তি খো আযস্মা ভদ্দিযো তস্স ভিক্খুনো পটিস্সুত্ৰা যেন ভগৰা তেনুপসঙ্কমি, উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো আযস্মন্তং ভদ্দিযং ভগৰা এতদৰোচ – ‘‘সচ্চং কির ত্ৰং, ভদ্দিয, অরঞ্ঞগতোপি রুক্খমূলগতোপি সুঞ্ঞাগারগতোপি অভিক্খণং উদানং উদানেসি – ‘অহো সুখং, অহো সুখ’’’ন্তি? ‘‘এৰং ভন্তে’’তি। ‘‘কিং পন ত্ৰং, ভদ্দিয, অত্থৰসং সম্পস্সমানো অরঞ্ঞগতোপি রুক্খমূলগতোপি সুঞ্ঞাগারগতোপি অভিক্খণং উদানং উদানেসি – ‘অহো সুখং অহো সুখ’’’ন্তি? ‘‘পুব্বে মে, ভন্তে, রঞ্ঞো সতোপি অন্তোপি অন্তেপুরে রক্খা সুসংৰিহিতা হোতি, বহিপি অন্তেপুরে রক্খা সুসংৰিহিতা হোতি, অন্তোপি নগরে রক্খা সুসংৰিহিতা হোতি, বহিপি নগরে রক্খা সুসংৰিহিতা হোতি, অন্তোপি জনপদে রক্খা সুসংৰিহিতা হোতি, বহিপি জনপদে রক্খা সুসংৰিহিতা হোতি। সো খো অহং, ভন্তে, এৰং রক্খিতোপি গোপিতোপি সন্তো ভীতো উব্বিগ্গো উস্সঙ্কী উত্রস্তো ৰিহরামি। এতরহি খো পন অহং একো, ভন্তে, অরঞ্ঞগতোপি রুক্খমূলগতোপি সুঞ্ঞাগারগতোপি অভীতো অনুব্বিগ্গো অনুস্সঙ্কী অনুত্রস্তো অপ্পোস্সুক্কো পন্নলোমো পরদত্তৰুত্তো মিগভূতেন চেতসা ৰিহরামীতি। ইমং খো অহং, ভন্তে, অত্থৰসং সম্পস্সমানো অরঞ্ঞগতোপি রুক্খমূলগতোপি সুঞ্ঞাগারগতোপি অভিক্খণং উদানং উদানেমি – ‘অহো সুখং, অহো সুখ’’’ন্তি। অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –
Atha kho bhagavā aññataraṃ bhikkhuṃ āmantesi – ‘‘ehi tvaṃ, bhikkhu, mama vacanena bhaddiyaṃ bhikkhuṃ āmantehi – ‘satthā taṃ, āvuso bhaddiya, āmantetī’’’ti . ‘‘Evaṃ bhante’’ti kho so bhikkhu bhagavato paṭissutvā yenāyasmā bhaddiyo tenupasaṅkami, upasaṅkamitvā āyasmantaṃ bhaddiyaṃ etadavoca – ‘‘satthā taṃ, āvuso bhaddiya, āmantetī’’ti. ‘‘Evamāvuso’’ti kho āyasmā bhaddiyo tassa bhikkhuno paṭissutvā yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ bhaddiyaṃ bhagavā etadavoca – ‘‘saccaṃ kira tvaṃ, bhaddiya, araññagatopi rukkhamūlagatopi suññāgāragatopi abhikkhaṇaṃ udānaṃ udānesi – ‘aho sukhaṃ, aho sukha’’’nti? ‘‘Evaṃ bhante’’ti. ‘‘Kiṃ pana tvaṃ, bhaddiya, atthavasaṃ sampassamāno araññagatopi rukkhamūlagatopi suññāgāragatopi abhikkhaṇaṃ udānaṃ udānesi – ‘aho sukhaṃ aho sukha’’’nti? ‘‘Pubbe me, bhante, rañño satopi antopi antepure rakkhā susaṃvihitā hoti, bahipi antepure rakkhā susaṃvihitā hoti, antopi nagare rakkhā susaṃvihitā hoti, bahipi nagare rakkhā susaṃvihitā hoti, antopi janapade rakkhā susaṃvihitā hoti, bahipi janapade rakkhā susaṃvihitā hoti. So kho ahaṃ, bhante, evaṃ rakkhitopi gopitopi santo bhīto ubbiggo ussaṅkī utrasto viharāmi. Etarahi kho pana ahaṃ eko, bhante, araññagatopi rukkhamūlagatopi suññāgāragatopi abhīto anubbiggo anussaṅkī anutrasto appossukko pannalomo paradattavutto migabhūtena cetasā viharāmīti. Imaṃ kho ahaṃ, bhante, atthavasaṃ sampassamāno araññagatopi rukkhamūlagatopi suññāgāragatopi abhikkhaṇaṃ udānaṃ udānemi – ‘aho sukhaṃ, aho sukha’’’nti. Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
19 ‘‘যস্সন্তরতো ন সন্তি কোপা, ইতি ভৰাভৰতঞ্চ ৰীতিৰত্তো।
20 ‘‘Yassantarato na santi kopā, iti bhavābhavatañca vītivatto;
তং ৰিগতভযং সুখিং অসোকং, দেৰা নানুভৰন্তি দস্সনাযা’’তি॥
Taṃ vigatabhayaṃ sukhiṃ asokaṃ, devā nānubhavanti dassanāyā’’ti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / ছসক্যপব্বজ্জাকথা • Chasakyapabbajjākathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ছসক্যপব্বজ্জাকথাৰণ্ণনা • Chasakyapabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ছসক্যপব্বজ্জাকথাৰণ্ণনা • Chasakyapabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ছসক্যপব্বজ্জাকথাদিৰণ্ণনা • Chasakyapabbajjākathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ছসক্যপব্বজ্জাকথা • Chasakyapabbajjākathā
