| Library / Tipiṭaka / තිපිටක • Tipiṭaka / චූළවග්‌ග-අට්‌ඨකථා • Cūḷavagga-aṭṭhakathā |
7. සඞ්‌ඝභෙදකක්‌ඛන්‌ධකං
7. Saṅghabhedakakkhandhakaṃ
ඡසක්‍යපබ්‌බජ්‌ජාකථා
Chasakyapabbajjākathā
330. සඞ්‌ඝභෙදකක්‌ඛන්‌ධකෙ අභිඤ්‌ඤාතා අභිඤ්‌ඤාතාති පාකටා පාකටා. සක්‍යකුමාරා නාම කාළුදායිප්‌පභුතයො දස දූතා සද්‌ධිං පරිවාරෙහි අඤ්‌ඤෙ ච බහූ ජනා. අම්‌හාකන්‌ති අම්‌හෙසු; අම්‌හාකං කුලතොති වා වුත්‌තං හොති. ඝරාවාසත්‌ථං අනුසාසිස්‌සාමීති ඝරාවාසෙ යං කත්‌තබ්‌බං, තං ජානාපෙස්‌සාමි. උදකං නින්‌නෙතබ්‌බන්‌ති යථා උදකං සබ්‌බට්‌ඨානෙ සමං හොති, එවං කාතබ්‌බං. නිද්‌ධාපෙතබ්‌බන්‌ති තිණානි උද්‌ධරිතබ්‌බානි. භුසිකා උද්‌ධරාපෙතබ්‌බාති සුඛුමපලාලමිස්‌සධඤ්‌ඤා පලාලිකා පලාපෙතබ්‌බා. ඔපුනාපෙතබ්‌බන්‌ති සුඛුමපලාලං අපනෙතබ්‌බං. ත්‌වඤ්‌ඤෙව ඝරාවාසත්‌ථෙන උපජානාහීති ත්‌වඤ්‌ඤෙව ඝරාවාසත්‌ථං ජානාහි. අහං තයා යථාසුඛං පබ්‌බජාහීති එත්‌ථ අහං තයා සද්‌ධිං පබ්‌බජිස්‌සාමීති සහායසිනෙහෙන සහසා වත්‌තුකාමො හුත්‌වා පුන රජ්‌ජසිරිලොභෙන පරිකඩ්‌ඪියමානහදයො ‘‘අහං තයා’’ති එත්‌තකමෙව වත්‌වා සෙසං වත්‌තුං නාසක්‌ඛීති එවමත්‌ථො වෙදිතබ්‌බො .
330. Saṅghabhedakakkhandhake abhiññātā abhiññātāti pākaṭā pākaṭā. Sakyakumārā nāma kāḷudāyippabhutayo dasa dūtā saddhiṃ parivārehi aññe ca bahū janā. Amhākanti amhesu; amhākaṃ kulatoti vā vuttaṃ hoti. Gharāvāsatthaṃ anusāsissāmīti gharāvāse yaṃ kattabbaṃ, taṃ jānāpessāmi. Udakaṃ ninnetabbanti yathā udakaṃ sabbaṭṭhāne samaṃ hoti, evaṃ kātabbaṃ. Niddhāpetabbanti tiṇāni uddharitabbāni. Bhusikā uddharāpetabbāti sukhumapalālamissadhaññā palālikā palāpetabbā. Opunāpetabbanti sukhumapalālaṃ apanetabbaṃ. Tvaññeva gharāvāsatthena upajānāhīti tvaññeva gharāvāsatthaṃ jānāhi. Ahaṃ tayā yathāsukhaṃ pabbajāhīti ettha ahaṃ tayā saddhiṃ pabbajissāmīti sahāyasinehena sahasā vattukāmo hutvā puna rajjasirilobhena parikaḍḍhiyamānahadayo ‘‘ahaṃ tayā’’ti ettakameva vatvā sesaṃ vattuṃ nāsakkhīti evamattho veditabbo .
331. නිප්‌පාතිතාති නික්‌ඛමිතා. මානස්‌සිනොති මානස්‌සයිනො; මානනිස්‌සිතාති වුත්‌තං හොති.
331.Nippātitāti nikkhamitā. Mānassinoti mānassayino; mānanissitāti vuttaṃ hoti.
332. යස්‌සන්‌තරතො න සන්‌ති කොපාති තතියමග්‌ගෙන සමූහතත්‌තා යස්‌ස චිත්‌තෙ කොපා න සන්‌ති. යස්‌මා පන භවොති සම්‌පත්‌ති, විභවොති විපත්‌ති; තථා භවොති වුඩ්‌ඪි, විභවොති හානි; භවොති සස්‌සතං, විභවොති උච්‌ඡෙදො; භවොති පුඤ්‌ඤං, විභවොති පාපං; විභවොති ච අභවොති ච අත්‌ථතො එකමෙව, තස්‌මා ඉතිභවාභවතඤ්‌ච වීතිවත්‌තොති එත්‌ථ යා එසා සම්‌පත්‌තිවිපත්‌තිවුඩ්‌ඪිහානිසස්‌සතුච්‌ඡෙදපුඤ්‌ඤපාපවසෙන ඉති අනෙකප්‌පකාරා භවාභවතා වුච්‌චති; චතූහිපි මග්‌ගෙහි යථාසම්‌භවං තෙන තෙන නයෙන තං ඉතිභවාභවතඤ්‌ච වීතිවත්‌තොති එවමත්‌ථො දට්‌ඨබ්‌බො. නානුභවන්‌තීති න සම්‌පාපුණන්‌ති; තස්‌ස දස්‌සනං දෙවානම්‌පි දුල්‌ලභන්‌ති අධිප්‌පායො.
332.Yassantarato na santi kopāti tatiyamaggena samūhatattā yassa citte kopā na santi. Yasmā pana bhavoti sampatti, vibhavoti vipatti; tathā bhavoti vuḍḍhi, vibhavoti hāni; bhavoti sassataṃ, vibhavoti ucchedo; bhavoti puññaṃ, vibhavoti pāpaṃ; vibhavoti ca abhavoti ca atthato ekameva, tasmā itibhavābhavatañca vītivattoti ettha yā esā sampattivipattivuḍḍhihānisassatucchedapuññapāpavasena iti anekappakārā bhavābhavatā vuccati; catūhipi maggehi yathāsambhavaṃ tena tena nayena taṃ itibhavābhavatañca vītivattoti evamattho daṭṭhabbo. Nānubhavantīti na sampāpuṇanti; tassa dassanaṃ devānampi dullabhanti adhippāyo.
333. අහිමෙඛලිකාති අහිං කටියං බන්‌ධිත්‌වා. උච්‌ඡඞ්‌ගෙති අඞ්‌කෙ.
333.Ahimekhalikāti ahiṃ kaṭiyaṃ bandhitvā. Ucchaṅgeti aṅke.
334. සම්‌මන්‌නතීති සම්‌මානෙති. යං තුමො කරිස්‌සතීති යං සො කරිස්‌සති.
334.Sammannatīti sammāneti. Yaṃ tumo karissatīti yaṃ so karissati.
ඡසක්‍යපබ්‌බජ්‌ජාකථා නිට්‌ඨිතා.
Chasakyapabbajjākathā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi
ඡසක්‍යපබ්‌බජ්‌ජාකථා • Chasakyapabbajjākathā
දෙවදත්‌තවත්‌ථු • Devadattavatthu
පඤ්‌චසත්‌ථුකථා • Pañcasatthukathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā
ඡසක්‍යපබ්‌බජ්‌ජාකථාවණ්‌ණනා • Chasakyapabbajjākathāvaṇṇanā
පඤ්‌චසත්‌ථුකථාවණ්‌ණනා • Pañcasatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / ඡසක්‍යපබ්‌බජ්‌ජාකථාවණ්‌ණනා • Chasakyapabbajjākathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ඡසක්‍යපබ්‌බජ්‌ජාකථාදිවණ්‌ණනා • Chasakyapabbajjākathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / ඡසක්‍යපබ්‌බජ්‌ජාකථා • Chasakyapabbajjākathā
