7. ஸங்க⁴பே⁴த³கக்க²ந்த⁴கோ

ச²ஸக்யபப்³ப³ஜ்ஜாகதா²தி³வண்ணனா

330. ஸங்க⁴பே⁴த³கக்க²ந்த⁴கே பாளியங் அனுபியங் நாமாதி அனுபியா நாம. ஹெட்டா² பாஸாதா³தி பாஸாத³தோ ஹெட்டா² ஹெட்டி²மதலங், ‘‘ஹெட்டா²பாஸாத³’’ந்திபி பாடோ². அபி⁴னேதப்³ப³ந்தி வபிதகெ²த்தேஸு பவேஸேதப்³ப³ங். நின்னேதப்³ப³ந்தி ததோ நீஹரிதப்³ப³ங். நித்³தா⁴பேதப்³ப³ந்தி ஸஸ்ஸதூ³ஸகதிணாதீ³னி உத்³த⁴ரிதப்³ப³ங். உஜுங் காராபேதப்³ப³ந்தி புஞ்ஜங் காராபேதப்³ப³ங், அயமேவ வா பாடோ².

332. பரத³த்தோதி பரேஹி தி³ன்னபச்சயேஹி பவத்தமானோ. மிக³பூ⁴தேன சேதஸாதி கத்த²சி அலக்³க³தாய மிக³ஸ்ஸ விய ஜாதேன சித்தேன.

333. மனோமயங் காயந்தி ஜா²னமனேன நிப்³ப³த்தங் ப்³ரஹ்மகாயங், ‘‘கிங் நு கோ² அஹங் பஸாதெ³ய்யங், யஸ்மிங் மே பஸன்னே ப³ஹுலாப⁴ஸக்காரோ உப்பஜ்ஜெய்யா’’தி பட²மங் உப்பன்னபரிவிதக்கஸ்ஸ மந்த³பரியுட்டா²னதாய தே³வத³த்தஸ்ஸ தஸ்மிங் க²ணே ஜா²னபரிஹானி நாஹோஸி, பச்சா² ஏவ அஹோஸீதி த³ட்ட²ப்³ப³ங். தேனாஹ ‘‘ஸஹ சித்துப்பாதா³’’திஆதி³. த்³வே வா தீணி வா மாக³த⁴கானி கா³மகெ²த்தானீதி எத்த² மக³த⁴ரட்டே² கு²த்³த³கங் கா³மகெ²த்தங் கா³வுதமத்தங், மஜ்ஜி²மங் பன தி³யட்³ட⁴கா³வுதமத்தங், மஹந்தங் அனேகயோஜனம்பி ஹோதி. தேஸு மஜ்ஜி²மேன கா³மகெ²த்தேன த்³வே வா கு²த்³த³கேன தீணி வா கா³மகெ²த்தானி, தஸ்ஸ ஸரீரங் திகா³வுதப்பமாணோ அத்தபா⁴வோதி வுத்தங் ஹோதி.

334. ஸத்தா²ரோதி க³ணஸத்தா²ரோ. நாஸ்ஸஸ்ஸாதி ந ஏதஸ்ஸ ப⁴வெய்ய. தந்தி ஸத்தா²ரங். தேனாதி அமனாபேன. ஸம்மன்னதீதி சீவராதி³னா அம்ஹாகங் ஸம்மானங் கரோதி, பரேஹி வா அயங் ஸத்தா² ஸம்மானீயதீதி அத்தோ².

335. நாஸாய பித்தங் பி⁴ந்தெ³ய்யுந்தி அச்ச²பித்தங் வா மச்ச²பித்தங் வா நாஸாபுடே பக்கி²பெய்யுங். அஸ்ஸதரீதி வளவாய குச்சி²ஸ்மிங் க³த்³ரப⁴ஸ்ஸ ஜாதா. தஸ்ஸா ஹி க³ஹிதக³ப்³பா⁴ய விஜாயிதுமஸக்கொந்தியா உத³ரங் பா²லெத்வா போதகங் நீஹரந்தி. தேனாஹ ‘‘அத்தவதா⁴ய க³ப்³ப⁴ங் க³ண்ஹாதீ’’தி.

339. பொத்த²னிகந்தி சு²ரிகங், ‘‘க²ர’’ந்திபி வுச்சதி.

342. மா குஞ்ஜர நாக³மாஸதோ³தி ஹே குஞ்ஜர பு³த்³த⁴னாக³ங் வத⁴கசித்தேன மா உபக³ச்ச². து³க்க²ந்தி து³க்க²காரணத்தா து³க்க²ங். இதோதி இதோ ஜாதிதோ. யதோதி யஸ்மா, யந்தஸ்ஸ வா, க³ச்ச²ந்தஸ்ஸாதி அத்தோ². மா ச மதோ³தி மதோ³ தயா ந காதப்³போ³தி அத்தோ².

343. திகபோ⁴ஜனந்தி தீஹி பு⁴ஞ்ஜிதப்³ப³ங் போ⁴ஜனங், ததோ அதி⁴கேஹி ஏகதோ படிக்³க³ஹெத்வா பு⁴ஞ்ஜிதுங் ந வட்டனகங் க³ணபோ⁴ஜனபடிபக்க²ங் போ⁴ஜனந்தி அத்தோ². கோகாலிகோதிஆதீ³னி தே³வத³த்தபரிஸாய க³ணபாமொக்கா²னங் நாமானி. கப்பந்தி மஹானிரயே ஆயுகப்பங், தங் அந்தரகப்பந்தி கேசி. கேசி பன ‘‘அஸங்க்²யெய்யகப்ப’’ந்தி.

ச²ஸக்யபப்³ப³ஜ்ஜாகதா²தி³வண்ணனா நிட்டி²தா.