| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
৭. সঙ্ঘভেদকক্খন্ধকো
7. Saṅghabhedakakkhandhako
ছসক্যপব্বজ্জাকথাদিৰণ্ণনা
Chasakyapabbajjākathādivaṇṇanā
৩৩০. সঙ্ঘভেদকক্খন্ধকে পাল়িযং অনুপিযং নামাতি অনুপিযা নাম। হেট্ঠা পাসাদাতি পাসাদতো হেট্ঠা হেট্ঠিমতলং, ‘‘হেট্ঠাপাসাদ’’ন্তিপি পাঠো। অভিনেতব্বন্তি ৰপিতখেত্তেসু পৰেসেতব্বং। নিন্নেতব্বন্তি ততো নীহরিতব্বং। নিদ্ধাপেতব্বন্তি সস্সদূসকতিণাদীনি উদ্ধরিতব্বং। উজুং কারাপেতব্বন্তি পুঞ্জং কারাপেতব্বং, অযমেৰ ৰা পাঠো।
330. Saṅghabhedakakkhandhake pāḷiyaṃ anupiyaṃ nāmāti anupiyā nāma. Heṭṭhā pāsādāti pāsādato heṭṭhā heṭṭhimatalaṃ, ‘‘heṭṭhāpāsāda’’ntipi pāṭho. Abhinetabbanti vapitakhettesu pavesetabbaṃ. Ninnetabbanti tato nīharitabbaṃ. Niddhāpetabbanti sassadūsakatiṇādīni uddharitabbaṃ. Ujuṃ kārāpetabbanti puñjaṃ kārāpetabbaṃ, ayameva vā pāṭho.
৩৩২. পরদত্তোতি পরেহি দিন্নপচ্চযেহি পৰত্তমানো। মিগভূতেন চেতসাতি কত্থচি অলগ্গতায মিগস্স ৰিয জাতেন চিত্তেন।
332.Paradattoti parehi dinnapaccayehi pavattamāno. Migabhūtena cetasāti katthaci alaggatāya migassa viya jātena cittena.
৩৩৩. মনোমযং কাযন্তি ঝানমনেন নিব্বত্তং ব্রহ্মকাযং, ‘‘কিং নু খো অহং পসাদেয্যং, যস্মিং মে পসন্নে বহুলাভসক্কারো উপ্পজ্জেয্যা’’তি পঠমং উপ্পন্নপরিৰিতক্কস্স মন্দপরিযুট্ঠানতায দেৰদত্তস্স তস্মিং খণে ঝানপরিহানি নাহোসি, পচ্ছা এৰ অহোসীতি দট্ঠব্বং। তেনাহ ‘‘সহ চিত্তুপ্পাদা’’তিআদি। দ্ৰে ৰা তীণি ৰা মাগধকানি গামখেত্তানীতি এত্থ মগধরট্ঠে খুদ্দকং গামখেত্তং গাৰুতমত্তং, মজ্ঝিমং পন দিযড্ঢগাৰুতমত্তং, মহন্তং অনেকযোজনম্পি হোতি। তেসু মজ্ঝিমেন গামখেত্তেন দ্ৰে ৰা খুদ্দকেন তীণি ৰা গামখেত্তানি, তস্স সরীরং তিগাৰুতপ্পমাণো অত্তভাৰোতি ৰুত্তং হোতি।
333.Manomayaṃ kāyanti jhānamanena nibbattaṃ brahmakāyaṃ, ‘‘kiṃ nu kho ahaṃ pasādeyyaṃ, yasmiṃ me pasanne bahulābhasakkāro uppajjeyyā’’ti paṭhamaṃ uppannaparivitakkassa mandapariyuṭṭhānatāya devadattassa tasmiṃ khaṇe jhānaparihāni nāhosi, pacchā eva ahosīti daṭṭhabbaṃ. Tenāha ‘‘saha cittuppādā’’tiādi. Dve vā tīṇi vā māgadhakāni gāmakhettānīti ettha magadharaṭṭhe khuddakaṃ gāmakhettaṃ gāvutamattaṃ, majjhimaṃ pana diyaḍḍhagāvutamattaṃ, mahantaṃ anekayojanampi hoti. Tesu majjhimena gāmakhettena dve vā khuddakena tīṇi vā gāmakhettāni, tassa sarīraṃ tigāvutappamāṇo attabhāvoti vuttaṃ hoti.
৩৩৪. সত্থারোতি গণসত্থারো। নাস্সস্সাতি ন এতস্স ভৰেয্য। তন্তি সত্থারং। তেনাতি অমনাপেন। সম্মন্নতীতি চীৰরাদিনা অম্হাকং সম্মানং করোতি, পরেহি ৰা অযং সত্থা সম্মানীযতীতি অত্থো।
334.Satthāroti gaṇasatthāro. Nāssassāti na etassa bhaveyya. Tanti satthāraṃ. Tenāti amanāpena. Sammannatīti cīvarādinā amhākaṃ sammānaṃ karoti, parehi vā ayaṃ satthā sammānīyatīti attho.
৩৩৫. নাসায পিত্তং ভিন্দেয্যুন্তি অচ্ছপিত্তং ৰা মচ্ছপিত্তং ৰা নাসাপুটে পক্খিপেয্যুং। অস্সতরীতি ৰল়ৰায কুচ্ছিস্মিং গদ্রভস্স জাতা। তস্সা হি গহিতগব্ভায ৰিজাযিতুমসক্কোন্তিযা উদরং ফালেত্ৰা পোতকং নীহরন্তি। তেনাহ ‘‘অত্তৰধায গব্ভং গণ্হাতী’’তি।
335.Nāsāyapittaṃ bhindeyyunti acchapittaṃ vā macchapittaṃ vā nāsāpuṭe pakkhipeyyuṃ. Assatarīti vaḷavāya kucchismiṃ gadrabhassa jātā. Tassā hi gahitagabbhāya vijāyitumasakkontiyā udaraṃ phāletvā potakaṃ nīharanti. Tenāha ‘‘attavadhāya gabbhaṃ gaṇhātī’’ti.
৩৩৯. পোত্থনিকন্তি ছুরিকং, ‘‘খর’’ন্তিপি ৰুচ্চতি।
339.Potthanikanti churikaṃ, ‘‘khara’’ntipi vuccati.
৩৪২. মা কুঞ্জর নাগমাসদোতি হে কুঞ্জর বুদ্ধনাগং ৰধকচিত্তেন মা উপগচ্ছ। দুক্খন্তি দুক্খকারণত্তা দুক্খং। ইতোতি ইতো জাতিতো। যতোতি যস্মা, যন্তস্স ৰা, গচ্ছন্তস্সাতি অত্থো। মা চ মদোতি মদো তযা ন কাতব্বোতি অত্থো।
342.Mākuñjara nāgamāsadoti he kuñjara buddhanāgaṃ vadhakacittena mā upagaccha. Dukkhanti dukkhakāraṇattā dukkhaṃ. Itoti ito jātito. Yatoti yasmā, yantassa vā, gacchantassāti attho. Mā ca madoti mado tayā na kātabboti attho.
৩৪৩. তিকভোজনন্তি তীহি ভুঞ্জিতব্বং ভোজনং, ততো অধিকেহি একতো পটিগ্গহেত্ৰা ভুঞ্জিতুং ন ৰট্টনকং গণভোজনপটিপক্খং ভোজনন্তি অত্থো। কোকালিকোতিআদীনি দেৰদত্তপরিসায গণপামোক্খানং নামানি। কপ্পন্তি মহানিরযে আযুকপ্পং, তং অন্তরকপ্পন্তি কেচি। কেচি পন ‘‘অসঙ্খ্যেয্যকপ্প’’ন্তি।
343.Tikabhojananti tīhi bhuñjitabbaṃ bhojanaṃ, tato adhikehi ekato paṭiggahetvā bhuñjituṃ na vaṭṭanakaṃ gaṇabhojanapaṭipakkhaṃ bhojananti attho. Kokālikotiādīni devadattaparisāya gaṇapāmokkhānaṃ nāmāni. Kappanti mahāniraye āyukappaṃ, taṃ antarakappanti keci. Keci pana ‘‘asaṅkhyeyyakappa’’nti.
ছসক্যপব্বজ্জাকথাদিৰণ্ণনা নিট্ঠিতা।
Chasakyapabbajjākathādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
ছসক্যপব্বজ্জাকথা • Chasakyapabbajjākathā
দেৰদত্তৰত্থু • Devadattavatthu
পঞ্চসত্থুকথা • Pañcasatthukathā
অজাতসত্তুকুমারৰত্থু • Ajātasattukumāravatthu
নাল়াগিরিপেসনং • Nāḷāgiripesanaṃ
পঞ্চৰত্থুযাচনকথা • Pañcavatthuyācanakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā
ছসক্যপব্বজ্জাকথা • Chasakyapabbajjākathā
পকাসনীযকম্মাদিকথা • Pakāsanīyakammādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
ছসক্যপব্বজ্জাকথাৰণ্ণনা • Chasakyapabbajjākathāvaṇṇanā
পঞ্চসত্থুকথাৰণ্ণনা • Pañcasatthukathāvaṇṇanā
নাল়াগিরিপেসনকথাৰণ্ণনা • Nāḷāgiripesanakathāvaṇṇanā
পঞ্চৰত্থুযাচনকথাৰণ্ণনা • Pañcavatthuyācanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ছসক্যপব্বজ্জাকথাৰণ্ণনা • Chasakyapabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
ছসক্যপব্বজ্জাকথা • Chasakyapabbajjākathā
পকাসনীযকম্মাদিকথা • Pakāsanīyakammādikathā
