| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
೭. ಸಙ್ಘಭೇದಕಕ್ಖನ್ಧಕೋ
7. Saṅghabhedakakkhandhako
ಛಸಕ್ಯಪಬ್ಬಜ್ಜಾಕಥಾದಿವಣ್ಣನಾ
Chasakyapabbajjākathādivaṇṇanā
೩೩೦. ಸಙ್ಘಭೇದಕಕ್ಖನ್ಧಕೇ ಪಾಳಿಯಂ ಅನುಪಿಯಂ ನಾಮಾತಿ ಅನುಪಿಯಾ ನಾಮ। ಹೇಟ್ಠಾ ಪಾಸಾದಾತಿ ಪಾಸಾದತೋ ಹೇಟ್ಠಾ ಹೇಟ್ಠಿಮತಲಂ, ‘‘ಹೇಟ್ಠಾಪಾಸಾದ’’ನ್ತಿಪಿ ಪಾಠೋ। ಅಭಿನೇತಬ್ಬನ್ತಿ ವಪಿತಖೇತ್ತೇಸು ಪವೇಸೇತಬ್ಬಂ। ನಿನ್ನೇತಬ್ಬನ್ತಿ ತತೋ ನೀಹರಿತಬ್ಬಂ। ನಿದ್ಧಾಪೇತಬ್ಬನ್ತಿ ಸಸ್ಸದೂಸಕತಿಣಾದೀನಿ ಉದ್ಧರಿತಬ್ಬಂ। ಉಜುಂ ಕಾರಾಪೇತಬ್ಬನ್ತಿ ಪುಞ್ಜಂ ಕಾರಾಪೇತಬ್ಬಂ, ಅಯಮೇವ ವಾ ಪಾಠೋ।
330. Saṅghabhedakakkhandhake pāḷiyaṃ anupiyaṃ nāmāti anupiyā nāma. Heṭṭhā pāsādāti pāsādato heṭṭhā heṭṭhimatalaṃ, ‘‘heṭṭhāpāsāda’’ntipi pāṭho. Abhinetabbanti vapitakhettesu pavesetabbaṃ. Ninnetabbanti tato nīharitabbaṃ. Niddhāpetabbanti sassadūsakatiṇādīni uddharitabbaṃ. Ujuṃ kārāpetabbanti puñjaṃ kārāpetabbaṃ, ayameva vā pāṭho.
೩೩೨. ಪರದತ್ತೋತಿ ಪರೇಹಿ ದಿನ್ನಪಚ್ಚಯೇಹಿ ಪವತ್ತಮಾನೋ। ಮಿಗಭೂತೇನ ಚೇತಸಾತಿ ಕತ್ಥಚಿ ಅಲಗ್ಗತಾಯ ಮಿಗಸ್ಸ ವಿಯ ಜಾತೇನ ಚಿತ್ತೇನ।
332.Paradattoti parehi dinnapaccayehi pavattamāno. Migabhūtena cetasāti katthaci alaggatāya migassa viya jātena cittena.
೩೩೩. ಮನೋಮಯಂ ಕಾಯನ್ತಿ ಝಾನಮನೇನ ನಿಬ್ಬತ್ತಂ ಬ್ರಹ್ಮಕಾಯಂ, ‘‘ಕಿಂ ನು ಖೋ ಅಹಂ ಪಸಾದೇಯ್ಯಂ, ಯಸ್ಮಿಂ ಮೇ ಪಸನ್ನೇ ಬಹುಲಾಭಸಕ್ಕಾರೋ ಉಪ್ಪಜ್ಜೇಯ್ಯಾ’’ತಿ ಪಠಮಂ ಉಪ್ಪನ್ನಪರಿವಿತಕ್ಕಸ್ಸ ಮನ್ದಪರಿಯುಟ್ಠಾನತಾಯ ದೇವದತ್ತಸ್ಸ ತಸ್ಮಿಂ ಖಣೇ ಝಾನಪರಿಹಾನಿ ನಾಹೋಸಿ, ಪಚ್ಛಾ ಏವ ಅಹೋಸೀತಿ ದಟ್ಠಬ್ಬಂ। ತೇನಾಹ ‘‘ಸಹ ಚಿತ್ತುಪ್ಪಾದಾ’’ತಿಆದಿ। ದ್ವೇ ವಾ ತೀಣಿ ವಾ ಮಾಗಧಕಾನಿ ಗಾಮಖೇತ್ತಾನೀತಿ ಏತ್ಥ ಮಗಧರಟ್ಠೇ ಖುದ್ದಕಂ ಗಾಮಖೇತ್ತಂ ಗಾವುತಮತ್ತಂ, ಮಜ್ಝಿಮಂ ಪನ ದಿಯಡ್ಢಗಾವುತಮತ್ತಂ, ಮಹನ್ತಂ ಅನೇಕಯೋಜನಮ್ಪಿ ಹೋತಿ। ತೇಸು ಮಜ್ಝಿಮೇನ ಗಾಮಖೇತ್ತೇನ ದ್ವೇ ವಾ ಖುದ್ದಕೇನ ತೀಣಿ ವಾ ಗಾಮಖೇತ್ತಾನಿ, ತಸ್ಸ ಸರೀರಂ ತಿಗಾವುತಪ್ಪಮಾಣೋ ಅತ್ತಭಾವೋತಿ ವುತ್ತಂ ಹೋತಿ।
333.Manomayaṃ kāyanti jhānamanena nibbattaṃ brahmakāyaṃ, ‘‘kiṃ nu kho ahaṃ pasādeyyaṃ, yasmiṃ me pasanne bahulābhasakkāro uppajjeyyā’’ti paṭhamaṃ uppannaparivitakkassa mandapariyuṭṭhānatāya devadattassa tasmiṃ khaṇe jhānaparihāni nāhosi, pacchā eva ahosīti daṭṭhabbaṃ. Tenāha ‘‘saha cittuppādā’’tiādi. Dve vā tīṇi vā māgadhakāni gāmakhettānīti ettha magadharaṭṭhe khuddakaṃ gāmakhettaṃ gāvutamattaṃ, majjhimaṃ pana diyaḍḍhagāvutamattaṃ, mahantaṃ anekayojanampi hoti. Tesu majjhimena gāmakhettena dve vā khuddakena tīṇi vā gāmakhettāni, tassa sarīraṃ tigāvutappamāṇo attabhāvoti vuttaṃ hoti.
೩೩೪. ಸತ್ಥಾರೋತಿ ಗಣಸತ್ಥಾರೋ। ನಾಸ್ಸಸ್ಸಾತಿ ನ ಏತಸ್ಸ ಭವೇಯ್ಯ। ತನ್ತಿ ಸತ್ಥಾರಂ। ತೇನಾತಿ ಅಮನಾಪೇನ। ಸಮ್ಮನ್ನತೀತಿ ಚೀವರಾದಿನಾ ಅಮ್ಹಾಕಂ ಸಮ್ಮಾನಂ ಕರೋತಿ, ಪರೇಹಿ ವಾ ಅಯಂ ಸತ್ಥಾ ಸಮ್ಮಾನೀಯತೀತಿ ಅತ್ಥೋ।
334.Satthāroti gaṇasatthāro. Nāssassāti na etassa bhaveyya. Tanti satthāraṃ. Tenāti amanāpena. Sammannatīti cīvarādinā amhākaṃ sammānaṃ karoti, parehi vā ayaṃ satthā sammānīyatīti attho.
೩೩೫. ನಾಸಾಯ ಪಿತ್ತಂ ಭಿನ್ದೇಯ್ಯುನ್ತಿ ಅಚ್ಛಪಿತ್ತಂ ವಾ ಮಚ್ಛಪಿತ್ತಂ ವಾ ನಾಸಾಪುಟೇ ಪಕ್ಖಿಪೇಯ್ಯುಂ। ಅಸ್ಸತರೀತಿ ವಳವಾಯ ಕುಚ್ಛಿಸ್ಮಿಂ ಗದ್ರಭಸ್ಸ ಜಾತಾ। ತಸ್ಸಾ ಹಿ ಗಹಿತಗಬ್ಭಾಯ ವಿಜಾಯಿತುಮಸಕ್ಕೋನ್ತಿಯಾ ಉದರಂ ಫಾಲೇತ್ವಾ ಪೋತಕಂ ನೀಹರನ್ತಿ। ತೇನಾಹ ‘‘ಅತ್ತವಧಾಯ ಗಬ್ಭಂ ಗಣ್ಹಾತೀ’’ತಿ।
335.Nāsāyapittaṃ bhindeyyunti acchapittaṃ vā macchapittaṃ vā nāsāpuṭe pakkhipeyyuṃ. Assatarīti vaḷavāya kucchismiṃ gadrabhassa jātā. Tassā hi gahitagabbhāya vijāyitumasakkontiyā udaraṃ phāletvā potakaṃ nīharanti. Tenāha ‘‘attavadhāya gabbhaṃ gaṇhātī’’ti.
೩೩೯. ಪೋತ್ಥನಿಕನ್ತಿ ಛುರಿಕಂ, ‘‘ಖರ’’ನ್ತಿಪಿ ವುಚ್ಚತಿ।
339.Potthanikanti churikaṃ, ‘‘khara’’ntipi vuccati.
೩೪೨. ಮಾ ಕುಞ್ಜರ ನಾಗಮಾಸದೋತಿ ಹೇ ಕುಞ್ಜರ ಬುದ್ಧನಾಗಂ ವಧಕಚಿತ್ತೇನ ಮಾ ಉಪಗಚ್ಛ। ದುಕ್ಖನ್ತಿ ದುಕ್ಖಕಾರಣತ್ತಾ ದುಕ್ಖಂ। ಇತೋತಿ ಇತೋ ಜಾತಿತೋ। ಯತೋತಿ ಯಸ್ಮಾ, ಯನ್ತಸ್ಸ ವಾ, ಗಚ್ಛನ್ತಸ್ಸಾತಿ ಅತ್ಥೋ। ಮಾ ಚ ಮದೋತಿ ಮದೋ ತಯಾ ನ ಕಾತಬ್ಬೋತಿ ಅತ್ಥೋ।
342.Mākuñjara nāgamāsadoti he kuñjara buddhanāgaṃ vadhakacittena mā upagaccha. Dukkhanti dukkhakāraṇattā dukkhaṃ. Itoti ito jātito. Yatoti yasmā, yantassa vā, gacchantassāti attho. Mā ca madoti mado tayā na kātabboti attho.
೩೪೩. ತಿಕಭೋಜನನ್ತಿ ತೀಹಿ ಭುಞ್ಜಿತಬ್ಬಂ ಭೋಜನಂ, ತತೋ ಅಧಿಕೇಹಿ ಏಕತೋ ಪಟಿಗ್ಗಹೇತ್ವಾ ಭುಞ್ಜಿತುಂ ನ ವಟ್ಟನಕಂ ಗಣಭೋಜನಪಟಿಪಕ್ಖಂ ಭೋಜನನ್ತಿ ಅತ್ಥೋ। ಕೋಕಾಲಿಕೋತಿಆದೀನಿ ದೇವದತ್ತಪರಿಸಾಯ ಗಣಪಾಮೋಕ್ಖಾನಂ ನಾಮಾನಿ। ಕಪ್ಪನ್ತಿ ಮಹಾನಿರಯೇ ಆಯುಕಪ್ಪಂ, ತಂ ಅನ್ತರಕಪ್ಪನ್ತಿ ಕೇಚಿ। ಕೇಚಿ ಪನ ‘‘ಅಸಙ್ಖ್ಯೇಯ್ಯಕಪ್ಪ’’ನ್ತಿ।
343.Tikabhojananti tīhi bhuñjitabbaṃ bhojanaṃ, tato adhikehi ekato paṭiggahetvā bhuñjituṃ na vaṭṭanakaṃ gaṇabhojanapaṭipakkhaṃ bhojananti attho. Kokālikotiādīni devadattaparisāya gaṇapāmokkhānaṃ nāmāni. Kappanti mahāniraye āyukappaṃ, taṃ antarakappanti keci. Keci pana ‘‘asaṅkhyeyyakappa’’nti.
ಛಸಕ್ಯಪಬ್ಬಜ್ಜಾಕಥಾದಿವಣ್ಣನಾ ನಿಟ್ಠಿತಾ।
Chasakyapabbajjākathādivaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi
ಛಸಕ್ಯಪಬ್ಬಜ್ಜಾಕಥಾ • Chasakyapabbajjākathā
ದೇವದತ್ತವತ್ಥು • Devadattavatthu
ಪಞ್ಚಸತ್ಥುಕಥಾ • Pañcasatthukathā
ಅಜಾತಸತ್ತುಕುಮಾರವತ್ಥು • Ajātasattukumāravatthu
ನಾಳಾಗಿರಿಪೇಸನಂ • Nāḷāgiripesanaṃ
ಪಞ್ಚವತ್ಥುಯಾಚನಕಥಾ • Pañcavatthuyācanakathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā
ಛಸಕ್ಯಪಬ್ಬಜ್ಜಾಕಥಾ • Chasakyapabbajjākathā
ಪಕಾಸನೀಯಕಮ್ಮಾದಿಕಥಾ • Pakāsanīyakammādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā
ಛಸಕ್ಯಪಬ್ಬಜ್ಜಾಕಥಾವಣ್ಣನಾ • Chasakyapabbajjākathāvaṇṇanā
ಪಞ್ಚಸತ್ಥುಕಥಾವಣ್ಣನಾ • Pañcasatthukathāvaṇṇanā
ನಾಳಾಗಿರಿಪೇಸನಕಥಾವಣ್ಣನಾ • Nāḷāgiripesanakathāvaṇṇanā
ಪಞ್ಚವತ್ಥುಯಾಚನಕಥಾವಣ್ಣನಾ • Pañcavatthuyācanakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಛಸಕ್ಯಪಬ್ಬಜ್ಜಾಕಥಾವಣ್ಣನಾ • Chasakyapabbajjākathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi
ಛಸಕ್ಯಪಬ್ಬಜ್ಜಾಕಥಾ • Chasakyapabbajjākathā
ಪಕಾಸನೀಯಕಮ್ಮಾದಿಕಥಾ • Pakāsanīyakammādikathā
