| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
৭. সঙ্ঘভেদকক্খন্ধকৰণ্ণনা
7. Saṅghabhedakakkhandhakavaṇṇanā
ছসক্যপব্বজ্জাকথাৰণ্ণনা
Chasakyapabbajjākathāvaṇṇanā
৩৩০. ‘‘অনুপিযং নামা’’তি একৰচনেন দিস্সতি, সত্তমিযং পন ‘‘অনুপিযায’’ন্তি। ‘‘কাল়ুদাযিপ্পভুতযো দস দূতা’’তি পাঠো। ‘‘ন হেট্ঠাপাসাদা ন হেট্ঠাপাসাদং ৰা’’তি লিখিতং।
330. ‘‘Anupiyaṃ nāmā’’ti ekavacanena dissati, sattamiyaṃ pana ‘‘anupiyāya’’nti. ‘‘Kāḷudāyippabhutayo dasa dūtā’’ti pāṭho. ‘‘Na heṭṭhāpāsādā na heṭṭhāpāsādaṃ vā’’ti likhitaṃ.
৩৩২. পুব্বে পুব্বকালে। ‘‘রঞ্ঞো সতো’’তি চ ‘‘রঞ্ঞোৰসতো’’তি চ পাঠো।
332.Pubbe pubbakāle. ‘‘Rañño sato’’ti ca ‘‘raññovasato’’ti ca pāṭho.
৩৩৩. ন লাভতণ্হা ইধ কামতণ্হা, ঝানস্স নেসা পরিহানি হেতু। বুদ্ধত্তসীলং পন পত্থযন্তো ঝানাপি নট্ঠোতি। ননু পত্তভাৰনা। মনোমযন্তি ঝানমনোমযং।
333. Na lābhataṇhā idha kāmataṇhā, jhānassa nesā parihāni hetu. Buddhattasīlaṃ pana patthayanto jhānāpi naṭṭhoti. Nanu pattabhāvanā. Manomayanti jhānamanomayaṃ.
৩৩৪. সত্থারোতি গণসত্থারো।
334.Satthāroti gaṇasatthāro.
৩৩৯. পোত্থনিকন্তি ছুরিকং।
339.Potthanikanti churikaṃ.
৩৪০. মনুস্সেতি পুরিসে।
340.Manusseti purise.
৩৪১. একরত্তাধিকারেন রক্খং পচ্চাসীসন্তা ঈদিসাতি দস্সনত্থং ‘‘পঞ্চিমে’’তিআদি ৰুত্তং। ‘‘পুব্বে রক্খস্সেত’’ন্তি ৰুত্তত্তা ময্হং পন রক্খণে কিচ্চং নত্থীতি দস্সনত্থং ৰুত্তং। পরূপক্কমেন তথাগতং জীৰিতা ৰোরোপেয্যাতি ইদং আণত্তিযা আগতত্তা এৰং ৰুত্তং।
341. Ekarattādhikārena rakkhaṃ paccāsīsantā īdisāti dassanatthaṃ ‘‘pañcime’’tiādi vuttaṃ. ‘‘Pubbe rakkhasseta’’nti vuttattā mayhaṃ pana rakkhaṇe kiccaṃ natthīti dassanatthaṃ vuttaṃ. Parūpakkamena tathāgataṃ jīvitā voropeyyāti idaṃ āṇattiyā āgatattā evaṃ vuttaṃ.
৩৪২. মা আসদোতি মা ৰধকচিত্তেন উপগচ্ছ। ইতোতি ইমম্হা জীৰিতম্হা। ‘‘যতোতি যস্মা, যতোতি ৰা গতস্সা’’তি লিখিতং। ‘‘পটিকুটিতোতি অপসক্কিত্ৰা সঙ্কুচিতো হুত্ৰা ৰা পটিসক্কতী’’তি লিখিতং।
342.Mā āsadoti mā vadhakacittena upagaccha. Itoti imamhā jīvitamhā. ‘‘Yatoti yasmā, yatoti vā gatassā’’ti likhitaṃ. ‘‘Paṭikuṭitoti apasakkitvā saṅkucito hutvā vā paṭisakkatī’’ti likhitaṃ.
৩৪৩. তিকভোজনন্তি তীহি ভুঞ্জিতব্বভোজনং। ‘‘তিকভোজনীয’’ন্তিপি পাঠো। পরিকপ্পতো হি তিণ্ণং ভুঞ্জিতুং অনুজানামি, ততো উদ্ধং গণভোজনমেৰ হোতি, তস্সাপি ইদমেৰ ৰুত্তং। ইধ অপুব্বং নত্থি। ‘‘অকতৰিঞ্ঞত্তিলদ্ধং তিণ্ণং ভুঞ্জন্তানং কিঞ্চাপি তং গণভোজনং নাম ন হোতি, ৰিঞ্ঞত্তিৰসেন পন ন ৰট্টতী’’তি লিখিতং। তযো অত্থৰসে পটিচ্চাতি এত্থাপি ‘‘মা পাপিচ্ছাপক্খং নিস্সায সঙ্ঘং ভিন্দেয্যু’’ন্তি পেসলানং ভিক্খূনং ফাসুৰিহারাযাতি যোজেতব্বং। কুলানুদ্দযতায চাতি কুলানং পসাদরক্খণত্থং। ৰজ্জন্তি ৰজ্জমেৰ। ‘‘ৰজ্জমিমং ফুসেয্যা’’তি লিখিতং। ‘‘ৰজ্জনীযং পুগ্গলং ফুসেয্যা’’তি ৰুত্তং। ‘‘ইমস্স মনো ন ফুসেয্যা’’তি ৰত্তব্বম্পি সিযা। চক্কভেদন্তি সাসনভেদং। আযুকপ্পন্তি এত্থ কিঞ্চাপি অৰীচিম্হি আযুপরিমাণং নত্থি, যেন পন কম্মেন যত্তকং অনুভৰিতব্বং, তস্স আযুকপ্পন্তি ৰেদিতব্বং।
343.Tikabhojananti tīhi bhuñjitabbabhojanaṃ. ‘‘Tikabhojanīya’’ntipi pāṭho. Parikappato hi tiṇṇaṃ bhuñjituṃ anujānāmi, tato uddhaṃ gaṇabhojanameva hoti, tassāpi idameva vuttaṃ. Idha apubbaṃ natthi. ‘‘Akataviññattiladdhaṃ tiṇṇaṃ bhuñjantānaṃ kiñcāpi taṃ gaṇabhojanaṃ nāma na hoti, viññattivasena pana na vaṭṭatī’’ti likhitaṃ. Tayo atthavase paṭiccāti etthāpi ‘‘mā pāpicchāpakkhaṃ nissāya saṅghaṃ bhindeyyu’’nti pesalānaṃ bhikkhūnaṃ phāsuvihārāyāti yojetabbaṃ. Kulānuddayatāya cāti kulānaṃ pasādarakkhaṇatthaṃ. Vajjanti vajjameva. ‘‘Vajjamimaṃ phuseyyā’’ti likhitaṃ. ‘‘Vajjanīyaṃ puggalaṃ phuseyyā’’ti vuttaṃ. ‘‘Imassa mano na phuseyyā’’ti vattabbampi siyā. Cakkabhedanti sāsanabhedaṃ. Āyukappanti ettha kiñcāpi avīcimhi āyuparimāṇaṃ natthi, yena pana kammena yattakaṃ anubhavitabbaṃ, tassa āyukappanti veditabbaṃ.
৩৪৫. ‘‘অঞ্ঞতরং আসনং গহেত্ৰা নিসীদী’’তি ৰচনতো ৰিসভাগট্ঠানং গতস্স পেসলস্সপি ভিক্খুনো তেসং আসনে নিসীদিতুং ৰট্টতীতি সিদ্ধং। আগিলাযতীতি রুজ্জতি। আদেসনাপাটিহারিযানুসাসনিযাতি তস্স তস্স চিত্তাচারং আদিস্স আদিস্স দেসনা, আদেসনাপাটিহারিযানুসাসনী। ইদ্ধি এৰ পাটিহারিযং ইদ্ধিপাটিহারিযং, ইদ্ধিপাটিহারিযসংযুত্তায অনুসাসনিযা ওৰদতীতি অত্থো। ননু তং আৰুসোতি এত্থ তং ৰচনং ননু মযা ৰুত্তোসীতি অত্থো।
345. ‘‘Aññataraṃ āsanaṃ gahetvā nisīdī’’ti vacanato visabhāgaṭṭhānaṃ gatassa pesalassapi bhikkhuno tesaṃ āsane nisīdituṃ vaṭṭatīti siddhaṃ. Āgilāyatīti rujjati. Ādesanāpāṭihāriyānusāsaniyāti tassa tassa cittācāraṃ ādissa ādissa desanā, ādesanāpāṭihāriyānusāsanī. Iddhi eva pāṭihāriyaṃ iddhipāṭihāriyaṃ, iddhipāṭihāriyasaṃyuttāya anusāsaniyā ovadatīti attho. Nanu taṃ āvusoti ettha taṃ vacanaṃ nanu mayā vuttosīti attho.
৩৪৬-৯. সুৰিক্খালিতন্তি সুধোতং। সংখাদিত্ৰাতি সুট্ঠু খাদিত্ৰা। ‘‘মহিং ৰিকুব্বতোতি মহাৰিসালো’’তি লিখিতং। তস্স ভিসং ঘসমানস্স। তত্থ নদীসু জগ্গতোতি পালেন্তস্স। ‘‘কিং? হত্থিযূথং গন্তু’’ন্তি ৰদন্তি। ‘‘অসংপাতো’তি পাঠো, অপত্তো হুত্ৰাতি অত্থো’’তি লিখিতং। ‘‘অপাযবহুত্তা পুন দস্সিতো’’তি ৰুত্তং। ‘‘এৰংসতেতি এৰং অস্স তে আসৰা’’তি লিখিতং।
346-9.Suvikkhālitanti sudhotaṃ. Saṃkhāditvāti suṭṭhu khāditvā. ‘‘Mahiṃ vikubbatoti mahāvisālo’’ti likhitaṃ. Tassa bhisaṃ ghasamānassa. Tattha nadīsu jaggatoti pālentassa. ‘‘Kiṃ? Hatthiyūthaṃ gantu’’nti vadanti. ‘‘Asaṃpāto’ti pāṭho, apatto hutvāti attho’’ti likhitaṃ. ‘‘Apāyabahuttā puna dassito’’ti vuttaṃ. ‘‘Evaṃsateti evaṃ assa te āsavā’’ti likhitaṃ.
৩৫০. ‘‘ৰোসানং পরিনিট্ঠানং ৰা’’তি চ লিখিতং। জাতূতি দল়্হত্থে নিপাতো। মা উদপজ্জথাতি মা উপ্পজ্জেয্য। ‘‘সো পমাদমনুযুঞ্জন্তো’’তি পাঠো। অনাদরং কুসলেসু। উদধি মহাতি কিত্তকো মহা? ভেস্মা যাৰ ভযানকো, তাৰ মহাতি ৰুত্তং হোতি।
350.‘‘Vosānaṃ pariniṭṭhānaṃ vā’’ti ca likhitaṃ. Jātūti daḷhatthe nipāto. Mā udapajjathāti mā uppajjeyya. ‘‘So pamādamanuyuñjanto’’ti pāṭho. Anādaraṃ kusalesu. Udadhi mahāti kittako mahā? Bhesmā yāva bhayānako, tāva mahāti vuttaṃ hoti.
৩৫১. ন খো, উপালি, ভিক্খুনী সঙ্ঘং ভিন্দতীতি এত্থ ভিক্খু সঙ্ঘং ন ভিন্দতি, ভিক্খুনী সঙ্ঘং ভিন্দতীতি কেচি, নেতং গহেতব্বং। কেৰলং ‘‘সঙ্ঘো’’তি ৰুত্তে ভিক্খুসঙ্ঘোৰ অধিপ্পেতো। ‘‘সঙ্ঘস্স দেতি, উভতোসঙ্ঘস্স দেতি চা’’তি (মহাৰ॰ ৩৭৯) মাতিকাৰচনম্পি সাধেতি। তস্মিং অধম্মদিট্ঠিভেদে ধম্মদিট্ঠি সিযা। ‘‘সীলসতিভেদেসুপি সমানো ধম্মং কাতুন্তি সঙ্ঘভেদে ৰেমতিকোপি তাদিসো ৰা’’তি লিখিতং। ৰিনিধাযাতি অত্তনো ৰঞ্চনাধিপ্পাযতং ছাদেত্ৰা।
351.Na kho, upāli, bhikkhunī saṅghaṃ bhindatīti ettha bhikkhu saṅghaṃ na bhindati, bhikkhunī saṅghaṃ bhindatīti keci, netaṃ gahetabbaṃ. Kevalaṃ ‘‘saṅgho’’ti vutte bhikkhusaṅghova adhippeto. ‘‘Saṅghassa deti, ubhatosaṅghassa deti cā’’ti (mahāva. 379) mātikāvacanampi sādheti. Tasmiṃ adhammadiṭṭhibhede dhammadiṭṭhi siyā. ‘‘Sīlasatibhedesupi samāno dhammaṃ kātunti saṅghabhede vematikopi tādiso vā’’ti likhitaṃ. Vinidhāyāti attano vañcanādhippāyataṃ chādetvā.
সঙ্ঘভেদকক্খন্ধকৰণ্ণনা নিট্ঠিতা।
Saṅghabhedakakkhandhakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
ছসক্যপব্বজ্জাকথা • Chasakyapabbajjākathā
দেৰদত্তৰত্থু • Devadattavatthu
পঞ্চসত্থুকথা • Pañcasatthukathā
অজাতসত্তুকুমারৰত্থু • Ajātasattukumāravatthu
অভিমারপেসনং • Abhimārapesanaṃ
লোহিতুপ্পাদককম্মং • Lohituppādakakammaṃ
নাল়াগিরিপেসনং • Nāḷāgiripesanaṃ
পঞ্চৰত্থুযাচনকথা • Pañcavatthuyācanakathā
সঙ্ঘভেদকথা • Saṅghabhedakathā
উপালিপঞ্হা • Upālipañhā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā
ছসক্যপব্বজ্জাকথা • Chasakyapabbajjākathā
পকাসনীযকম্মাদিকথা • Pakāsanīyakammādikathā
সঙ্ঘভেদককথা • Saṅghabhedakakathā
উপালিপঞ্হাকথা • Upālipañhākathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
ছসক্যপব্বজ্জাকথাৰণ্ণনা • Chasakyapabbajjākathāvaṇṇanā
পঞ্চসত্থুকথাৰণ্ণনা • Pañcasatthukathāvaṇṇanā
নাল়াগিরিপেসনকথাৰণ্ণনা • Nāḷāgiripesanakathāvaṇṇanā
পঞ্চৰত্থুযাচনকথাৰণ্ণনা • Pañcavatthuyācanakathāvaṇṇanā
সঙ্ঘভেদকথাৰণ্ণনা • Saṅghabhedakathāvaṇṇanā
উপালিপঞ্হকথাৰণ্ণনা • Upālipañhakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā
ছসক্যপব্বজ্জাকথাদিৰণ্ণনা • Chasakyapabbajjākathādivaṇṇanā
সঙ্ঘভেদককথাৰণ্ণনা • Saṅghabhedakakathāvaṇṇanā
উপালিপঞ্হাকথাৰণ্ণনা • Upālipañhākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
ছসক্যপব্বজ্জাকথা • Chasakyapabbajjākathā
পকাসনীযকম্মাদিকথা • Pakāsanīyakammādikathā
সঙ্ঘভেদকথা • Saṅghabhedakathā
উপালিপঞ্হাকথা • Upālipañhākathā
