| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
3. ඡත්‌තඞ්‌ගපඤ්‌හො
3. Chattaṅgapañho
3. ‘‘භන්‌තෙ නාගසෙන, ‘ඡත්‌තස්‌ස තීණි අඞ්‌ගානි ගහෙතබ්‌බානී’ති යං වදෙසි, කතමානි තානි තීණි අඞ්‌ගානි ගහෙතබ්‌බානී’’ති? ‘‘යථා, මහාරාජ, ඡත්‌තං උපරි මුද්‌ධනි චරති, එවමෙව ඛො, මහාරාජ, යොගිනා යොගාවචරෙන කිලෙසානං උපරි මුද්‌ධනි චරෙන භවිතබ්‌බං. ඉදං, මහාරාජ, ඡත්‌තස්‌ස පඨමං අඞ්‌ගං ගහෙතබ්‌බං.
3. ‘‘Bhante nāgasena, ‘chattassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, chattaṃ upari muddhani carati, evameva kho, mahārāja, yoginā yogāvacarena kilesānaṃ upari muddhani carena bhavitabbaṃ. Idaṃ, mahārāja, chattassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, ඡත්‌තං මුද්‌ධනුපත්‌ථම්‌භං හොති, එවමෙව ඛො, මහාරාජ, යොගිනා යොගාවචරෙන යොනිසො මනසිකාරුපත්‌ථම්‌භෙන භවිතබ්‌බං. ඉදං, මහාරාජ, ඡත්‌තස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, chattaṃ muddhanupatthambhaṃ hoti, evameva kho, mahārāja, yoginā yogāvacarena yoniso manasikārupatthambhena bhavitabbaṃ. Idaṃ, mahārāja, chattassa dutiyaṃ aṅgaṃ gahetabbaṃ.
‘‘පුන චපරං, මහාරාජ, ඡත්‌තං වාතාතපමෙඝවුට්‌ඨියො පටිහනති, එවමෙව ඛො, මහාරාජ, යොගිනා යොගාවචරෙන නානාවිධදිට්‌ඨිපුථුසමණබ්‍රාහ්‌මණානං 1 මතවාතතිවිධග්‌ගිසන්‌තාපකිලෙසවුට්‌ඨියො පටිහන්‌තබ්‌බා . ඉදං, මහාරාජ, ඡත්‌තස්‌ස තතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන සාරිපුත්‌තෙන ධම්‌මසෙනාපතිනා –
‘‘Puna caparaṃ, mahārāja, chattaṃ vātātapameghavuṭṭhiyo paṭihanati, evameva kho, mahārāja, yoginā yogāvacarena nānāvidhadiṭṭhiputhusamaṇabrāhmaṇānaṃ 2 matavātatividhaggisantāpakilesavuṭṭhiyo paṭihantabbā . Idaṃ, mahārāja, chattassa tatiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘යථාපි ඡත්‌තං විපුලං, අච්‌ඡිද්‌දං ථිරසංහිතං;
‘‘‘Yathāpi chattaṃ vipulaṃ, acchiddaṃ thirasaṃhitaṃ;
වාතාතපං නිවාරෙති, මහතී මෙඝවුට්‌ඨියො.
Vātātapaṃ nivāreti, mahatī meghavuṭṭhiyo.
‘‘‘තථෙව බුද්‌ධපුත්‌තොපි, සීලඡත්‌තධරො සුචි;
‘‘‘Tatheva buddhaputtopi, sīlachattadharo suci;
කිලෙසවුට්‌ඨිං වාරෙති, සන්‌තාපතිවිධග්‌ගයො’’’ති.
Kilesavuṭṭhiṃ vāreti, santāpatividhaggayo’’’ti.
ඡත්‌තඞ්‌ගපඤ්‌හො තතියො.
Chattaṅgapañho tatiyo.
Footnotes:
