| Library / Tipiṭaka / д̇ибидага • Tipiṭaka / бан̃жабагаран̣а-мууладийгаа • Pañcapakaraṇa-mūlaṭīkā |
6. чадтанаяо самбаяог̇авиббаяог̇абад̣̇аван̣н̣анаа
6. Chaṭṭhanayo sampayogavippayogapadavaṇṇanā
228. самбаяог̇авиббаяог̇абад̣̇з яам̣ лаб̣бхад̇и, яан̃жа на лаб̣бхад̇и, д̇ам̣ саб̣б̣ам̣ бужчааяа г̇ахид̇анд̇и ид̣̇ам̣ на руубагканд̇хаад̣̇ийни бад̣̇аани санд̇хааяа вуд̇д̇ам̣, ат̇а ко самбаяог̇абад̣̇ам̣ виббаяог̇абад̣̇ан̃жаад̇и взд̣̇ид̇аб̣б̣ам̣. руубагканд̇хаад̣̇ийсу хи яам̣ д̇хаммааяад̇анаад̣̇ибад̣̇ам̣ на лаб̣бхад̇и, д̇ам̣ бужчааяаби на г̇ахид̇ам̣. самбаяог̇абад̣̇ам̣ бана руубагканд̇хаад̣̇ийсу алаб̣бхамаанамби ‘‘руубагканд̇хо гад̇ихи…бз… самбаяуд̇д̇о’’д̇и звам̣ бужчааяа г̇ахид̇ам̣, взд̣̇анаагканд̇хаад̣̇ийсу лаб̣бхамаанам̣, виббаяог̇абад̣̇ам̣ бана саб̣б̣ад̇т̇а лаб̣бхамаанамзваад̇и. руубад̇хаммаанам̣ бана руубзна ниб̣б̣аанзна ваа, ниб̣б̣аанасса жа руубзна сад̣̇д̇хим̣ самбаяог̇о наама над̇т̇ийд̇и згуббаад̣̇аад̣̇исабхааг̇ад̇ааяа абхаавад̇о самбаяог̇ам̣ ниваарзнд̇зна саа зва згуббаад̣̇аад̣̇ид̇аа зд̇зсам̣ висабхааг̇ад̇аад̇и д̇ад̣̇абхаавад̇о виббаяог̇оби ниваарид̇о зва ход̇ийд̇и д̣̇адтаб̣б̣о. жад̇уусу хи канд̇хзсу виж̇ж̇амаанаа згуббаад̣̇аад̣̇ид̇аа д̇зсам̣ ан̃н̃аман̃н̃ам̣ сабхааг̇ад̇аа ход̇и руубаниб̣б̣аанзхи д̇зсам̣ д̇зхи жа руубаниб̣б̣аанаанам̣ висабхааг̇ад̇аа жа, на жа руубзгад̣̇зсасса ниб̣б̣аанасса ваа саа згуббаад̣̇аад̣̇ид̇аа ад̇т̇и, яаа руубзгад̣̇зсзна руубзгад̣̇зсаниб̣б̣аанаанам̣ ниб̣б̣аанзна жа руубасса висабхааг̇ад̇аа сияаа. д̇знзва ‘‘жад̇уухи виббаяог̇о’’д̇и вуд̇д̇анд̇и.
228. Sampayogavippayogapade yaṃ labbhati, yañca na labbhati, taṃ sabbaṃ pucchāya gahitanti idaṃ na rūpakkhandhādīni padāni sandhāya vuttaṃ, atha kho sampayogapadaṃ vippayogapadañcāti veditabbaṃ. Rūpakkhandhādīsu hi yaṃ dhammāyatanādipadaṃ na labbhati, taṃ pucchāyapi na gahitaṃ. Sampayogapadaṃ pana rūpakkhandhādīsu alabbhamānampi ‘‘rūpakkhandho katihi…pe… sampayutto’’ti evaṃ pucchāya gahitaṃ, vedanākkhandhādīsu labbhamānaṃ, vippayogapadaṃ pana sabbattha labbhamānamevāti. Rūpadhammānaṃ pana rūpena nibbānena vā, nibbānassa ca rūpena saddhiṃ sampayogo nāma natthīti ekuppādādisabhāgatāya abhāvato sampayogaṃ nivārentena sā eva ekuppādāditā etesaṃ visabhāgatāti tadabhāvato vippayogopi nivārito eva hotīti daṭṭhabbo. Catūsu hi khandhesu vijjamānā ekuppādāditā tesaṃ aññamaññaṃ sabhāgatā hoti rūpanibbānehi tesaṃ tehi ca rūpanibbānānaṃ visabhāgatā ca, na ca rūpekadesassa nibbānassa vā sā ekuppādāditā atthi, yā rūpekadesena rūpekadesanibbānānaṃ nibbānena ca rūpassa visabhāgatā siyā. Teneva ‘‘catūhi vippayogo’’ti vuttanti.
сад̇д̇асу вин̃н̃аан̣ад̇хаад̇уусу згааяаби авиббаяуд̇д̇зд̇и яат̇аа руубабхаво д̇ийхи вин̃н̃аан̣ад̇хаад̇уухи, нзвавибааганавибаагад̇хаммад̇хаммаа бан̃жахи, авид̇аггаавижаараа згааяа виббаяуд̇д̇з анаарамман̣амиссагз д̇хаммз д̣̇ийбзнд̇и, звам̣ ад̣̇ийбзд̇ваа згааяаби виббаяуд̇д̇з ахонд̇з сад̇д̇ахиби самбаяуд̇д̇з сад̇д̇аби ваа д̇аа д̣̇ийбзнд̇ийд̇и ад̇хиббааяо. авиббаяуд̇д̇зд̇и хи яз виббаяуд̇д̇аа на хонд̇и, д̇з д̇хаммзд̇и вуд̇д̇ам̣ ход̇и, на самбаяуд̇д̇зд̇и. д̇зна яаани д̇аахи самбаяуд̇д̇з д̣̇ийбзнд̇и д̇хаммааяад̇анаад̣̇ибад̣̇аани, яаани жа самбаяуд̇д̇авиббаяуд̇д̇абхаавзхи навад̇д̇аб̣б̣ам̣ д̣̇ийбзнд̇и ажзд̇асигаад̣̇ибад̣̇аани, яаани жа самбаяуд̇д̇анавад̇д̇аб̣б̣аани д̣̇ийбзнд̇и д̣̇угкасажжаад̣̇ибад̣̇аани, д̇зсам̣ саб̣б̣зсам̣ анаарамман̣амиссагад̇хаммад̣̇ийбагаанам̣ аг̇г̇ахан̣ам̣ вуд̇д̇ам̣ ход̇и. на хи анаарамман̣амиссагасаб̣б̣авин̃н̃аан̣ад̇хаад̇уд̇ам̣самбаяуд̇д̇ад̇ад̣̇убхаяасамуд̣̇ааяаанам̣ канд̇хааяад̇анад̇хаад̇уусу гзнажи самбаяог̇о виббаяог̇о ваа ад̇т̇ийд̇и.
Sattasuviññāṇadhātūsu ekāyapi avippayutteti yathā rūpabhavo tīhi viññāṇadhātūhi, nevavipākanavipākadhammadhammā pañcahi, avitakkaavicārā ekāya vippayutte anārammaṇamissake dhamme dīpenti, evaṃ adīpetvā ekāyapi vippayutte ahonte sattahipi sampayutte sattapi vā tā dīpentīti adhippāyo. Avippayutteti hi ye vippayuttā na honti, te dhammeti vuttaṃ hoti, na sampayutteti. Tena yāni tāhi sampayutte dīpenti dhammāyatanādipadāni, yāni ca sampayuttavippayuttabhāvehi navattabbaṃ dīpenti acetasikādipadāni, yāni ca sampayuttanavattabbāni dīpenti dukkhasaccādipadāni, tesaṃ sabbesaṃ anārammaṇamissakadhammadīpakānaṃ aggahaṇaṃ vuttaṃ hoti. Na hi anārammaṇamissakasabbaviññāṇadhātutaṃsampayuttatadubhayasamudāyānaṃ khandhāyatanadhātūsu kenaci sampayogo vippayogo vā atthīti.
яад̣̇и звам̣ виббаяуд̇д̇знавиббаяуд̇д̇абад̣̇анид̣̇д̣̇зсз ‘‘гусалзхи д̇хаммзхи яз д̇хаммаа виббаяуд̇д̇аа, д̇зхи д̇хаммзхи яз д̇хаммаа виббаяуд̇д̇аа’’д̇и на вад̇д̇аб̣б̣ам̣. агусалааб̣яаагад̇аа хи анаарамман̣амиссобхаяад̇хаммаад̇и? на, яат̇аавуд̇д̇асамуд̣̇ааяаанам̣ канд̇хаад̣̇ийхзва самбаяог̇авиббаяог̇аабхаававажанад̇о. канд̇хаад̣̇аяо хи д̇ад̣̇згад̣̇зсаа д̇ад̣̇згад̣̇зсан̃н̃асамуд̣̇ааяаа жа, самуд̣̇ааязгад̣̇зсаанан̃жа вибхааг̇аабхаавад̇о на сабхааг̇ависабхааг̇ад̇аа ад̇т̇и, д̇зна д̇зсам̣ канд̇хаад̣̇ийхи самбаяог̇авиббаяог̇аабхааво ход̇и. гусалаа бана д̇хаммаа агусалааб̣яаагад̇зхи вибхад̇д̇аа, д̇з жа гусалзхи, на д̇зсам̣ самуд̣̇ааязгад̣̇зсабхааво д̇ад̣̇згад̣̇зсан̃н̃асамуд̣̇ааяабхааво ваа, д̇асмаа канд̇хаад̣̇ийни анаамасид̇ваа виббаяуд̇д̇ад̇аамад̇д̇зна яат̇аанид̣̇д̇хаарид̇ад̇хаммад̣̇ассанз гусалзхи ид̇арзсам̣, ид̇арзхи жа гусалаанам̣ виббаяог̇о на на ход̇и висабхааг̇ад̇аасаб̣бхаавад̇од̇и д̇зсам̣ ан̃н̃аман̃н̃авиббаяуд̇д̇ад̇аа вуд̇д̇аа. зса наяо саб̣б̣зсу зваруубзсу.
Yadi evaṃ vippayuttenavippayuttapadaniddese ‘‘kusalehi dhammehi ye dhammā vippayuttā, tehi dhammehi ye dhammā vippayuttā’’ti na vattabbaṃ. Akusalābyākatā hi anārammaṇamissobhayadhammāti? Na, yathāvuttasamudāyānaṃ khandhādīheva sampayogavippayogābhāvavacanato. Khandhādayo hi tadekadesā tadekadesaññasamudāyā ca, samudāyekadesānañca vibhāgābhāvato na sabhāgavisabhāgatā atthi, tena tesaṃ khandhādīhi sampayogavippayogābhāvo hoti. Kusalā pana dhammā akusalābyākatehi vibhattā, te ca kusalehi, na tesaṃ samudāyekadesabhāvo tadekadesaññasamudāyabhāvo vā, tasmā khandhādīni anāmasitvā vippayuttatāmattena yathāniddhāritadhammadassane kusalehi itaresaṃ, itarehi ca kusalānaṃ vippayogo na na hoti visabhāgatāsabbhāvatoti tesaṃ aññamaññavippayuttatā vuttā. Esa nayo sabbesu evarūpesu.
уд̣̇д̣̇аанз бана адтаараса д̇ад̇о барзд̇и ид̣̇ам̣ ‘‘сол̣асаа’’д̇и вад̇д̇аб̣б̣ам̣, д̇звийсанд̇и ид̣̇ан̃жа ‘‘згавийса’’нд̇и. саб̣б̣ад̇т̇а жа гааласанд̇аанабхзд̣̇арахид̇аарахид̇аб̣ахуд̇хаммасамод̇хаанаанам̣ сан̇каарагканд̇хад̇хаммааяад̇анад̇хаммад̇хаад̇уунам̣ згад̣̇зсаа самуд̣̇аяасажжавзд̣̇анаагканд̇хаад̣̇аяо згад̣̇зсасаммиссаа жа ид̣̇д̇хибаад̣̇аад̣̇аяо анаарамман̣зхи асаммиссаа руубагканд̇хаад̣̇аяо жа саарамман̣зхи асаммиссаа самбаяог̇ийвиббаяог̇ийбхаавзна самаанагааласанд̇аанзхи жа згад̣̇зсанд̇арзхи вибхад̇д̇аа зва г̇ахид̇аад̇и д̇зхи д̇з гзхижи згад̣̇зсанд̇арзхи вибхад̇д̇зхи яат̇ааяог̇ам̣ самбаяог̇ам̣ виббаяог̇ан̃жа лабханд̇и. ад̇т̇и хи д̇зсам̣ згуббаад̣̇аад̣̇ид̇аа сабхааг̇ад̇аа висабхааг̇ад̇аа жаад̇и. д̇зна д̇ад̇т̇а д̇ад̇т̇а ‘‘згзна канд̇хзна згзнааяад̇анзна згааяа д̇хаад̇уяаа гзхижи самбаяуд̇д̇а’’нд̇и жа, ‘‘згзнааяад̇анзна згааяа д̇хаад̇уяаа гзхижи виббаяуд̇д̇а’’нд̇и жа вуд̇д̇ам̣. бхиннагааласамуд̣̇ааяаа зва бана взд̣̇анаасан̃н̃аавин̃н̃аан̣агканд̇хаа вад̇д̇амаанаа жа згзгад̇хаммаа зва, д̇асмаа д̇зсам̣ самаанагааласса вибхаж̇ид̇аб̣б̣асса абхаавад̇о на сукинд̣̇рияаад̣̇ийни взд̣̇анаагканд̇хасса вибхааг̇ам̣ гаронд̇и, жагкувин̃н̃аан̣ад̇хаад̇аад̣̇аяо жа вин̃н̃аан̣агканд̇хасса манааяад̇анасса жа. д̇зна ‘‘сукинд̣̇рияам̣ згзна канд̇хзна гзхижи виббаяуд̇д̇а’’нд̇и, ‘‘жагкувин̃н̃аан̣ад̇хаад̇у згзна канд̇хзна згзнааяад̇анзна гзхижи виббаяуд̇д̇аа’’д̇и жа звамаад̣̇и на вуд̇д̇ам̣, канд̇хааяад̇анавибхааг̇авирахид̇амби бана вин̃н̃аан̣ам̣ д̇хаад̇увибхааг̇зна вибхад̇д̇амзва вуд̇д̇анд̇и ‘‘жагкувин̃н̃аан̣ад̇хаад̇у…бз… мановин̃н̃аан̣ад̇хаад̇у сол̣асахи д̇хаад̇уухи виббаяуд̇д̇аа’’д̇и вуд̇д̇ам̣, звамзвам̣ инд̣̇рияавибхааг̇зна вибхад̇д̇аанам̣ сукинд̣̇рияаад̣̇ийнам̣ ‘‘сукинд̣̇риязна яз д̇хаммаа виббаяуд̇д̇аа’’д̇иаад̣̇ийсу яат̇ааяог̇ам̣ виббаяог̇о д̣̇адтаб̣б̣о, наавибхад̇д̇асса взд̣̇анаагканд̇хассаад̇и.
Uddāne pana aṭṭhārasa tato pareti idaṃ ‘‘soḷasā’’ti vattabbaṃ, tevīsanti idañca ‘‘ekavīsa’’nti. Sabbattha ca kālasantānabhedarahitārahitabahudhammasamodhānānaṃ saṅkhārakkhandhadhammāyatanadhammadhātūnaṃ ekadesā samudayasaccavedanākkhandhādayo ekadesasammissā ca iddhipādādayo anārammaṇehi asammissā rūpakkhandhādayo ca sārammaṇehi asammissā sampayogīvippayogībhāvena samānakālasantānehi ca ekadesantarehi vibhattā eva gahitāti tehi te kehici ekadesantarehi vibhattehi yathāyogaṃ sampayogaṃ vippayogañca labhanti. Atthi hi tesaṃ ekuppādāditā sabhāgatā visabhāgatā cāti. Tena tattha tattha ‘‘ekena khandhena ekenāyatanena ekāya dhātuyā kehici sampayutta’’nti ca, ‘‘ekenāyatanena ekāya dhātuyā kehici vippayutta’’nti ca vuttaṃ. Bhinnakālasamudāyā eva pana vedanāsaññāviññāṇakkhandhā vattamānā ca ekekadhammā eva, tasmā tesaṃ samānakālassa vibhajitabbassa abhāvato na sukhindriyādīni vedanākkhandhassa vibhāgaṃ karonti, cakkhuviññāṇadhātādayo ca viññāṇakkhandhassa manāyatanassa ca. Tena ‘‘sukhindriyaṃ ekena khandhena kehici vippayutta’’nti, ‘‘cakkhuviññāṇadhātu ekena khandhena ekenāyatanena kehici vippayuttā’’ti ca evamādi na vuttaṃ, khandhāyatanavibhāgavirahitampi pana viññāṇaṃ dhātuvibhāgena vibhattameva vuttanti ‘‘cakkhuviññāṇadhātu…pe… manoviññāṇadhātu soḷasahi dhātūhi vippayuttā’’ti vuttaṃ, evamevaṃ indriyavibhāgena vibhattānaṃ sukhindriyādīnaṃ ‘‘sukhindriyena ye dhammā vippayuttā’’tiādīsu yathāyogaṃ vippayogo daṭṭhabbo, nāvibhattassa vedanākkhandhassāti.
235. яат̇аа д̇ам̣самбаяог̇ийбхаавам̣ санд̇хааяа ‘‘самуд̣̇аяасажжам̣ д̇ийхи канд̇хзхи самбаяуд̇д̇а’’нд̇и вуд̇д̇ам̣, звам̣ д̇ам̣виббаяог̇ийбхаавам̣ санд̇хааяа ‘‘д̇ийхи канд̇хзхи виббаяуд̇д̇а’’нд̇и гасмаа на вуд̇д̇анд̇и жз? авибхааг̇зхи д̇зхи виббаяог̇аважанасса аяуд̇д̇ад̇д̇аа. вибхааг̇з хи сад̇и самуд̣̇аяасажжам̣ сукад̣̇угкад̣̇оманассинд̣̇риязхи мановин̃н̃аан̣ад̇хаад̇уд̇о ан̃н̃авин̃н̃аан̣ад̇хаад̇уухи виббаяуд̇д̇анд̇и яуд̇д̇ам̣ вад̇д̇ум̣ вибхааг̇знзва висабхааг̇ад̇ааяа сан̇г̇ахид̇ад̇д̇аа, вибхааг̇арахид̇зхи бана взд̣̇анаагканд̇хаад̣̇ийхи на яуд̇д̇ам̣, д̇зхи виж̇ж̇амаанзхи виж̇ж̇амаанасса самуд̣̇аяасса висабхааг̇абхааваабхаавад̇о. яан̃хи ануббаннаа д̇хаммаа вияа аамадтагаалабхзд̣̇ам̣ на ход̇и сан̇кад̇ам̣ уд̣̇д̇харид̇аб̣б̣ам̣, д̇ам̣ бажжуббаннабхаавам̣ ниссааяа самбаяог̇ийвиббаяог̇ийбхаавзна уд̣̇д̇харийяад̇и, д̇ан̃жа вибхааг̇арахид̇зхи канд̇хаад̣̇ийхи сан̇кад̇зхи бажжуббаннабхаавамзва ниссааяа анаамадтагаалабхзд̣̇з ад̇т̇ид̇ааяа зва ниссид̇аб̣б̣ад̇д̇аа. авиж̇ж̇амаанасса хи авиж̇ж̇амаанзна, авиж̇ж̇амаанасса жа виж̇ж̇амаанзна, виж̇ж̇амаанасса жа авиж̇ж̇амаанзна самбаяог̇о над̇т̇и, виббаяог̇о бана авиж̇ж̇амаанад̇аад̣̇ийбагз бхзд̣̇з г̇ахид̇з д̇знзва висабхааг̇ад̇ааби г̇ахид̇аа зваад̇и ход̇и . бхзд̣̇з бана аг̇г̇ахид̇з д̇зна д̇зна г̇ахан̣зна висабхааг̇ад̇ааяа аг̇г̇ахид̇ад̇д̇аа сад̇и сабхааг̇ад̇д̇з виж̇ж̇амаанад̇ааяа зва д̇хаммаанам̣ сабхааг̇асса барижчинд̣̇анад̇о виж̇ж̇амаанад̇аа д̣̇ассид̇аад̇и згуббаад̣̇аад̣̇ибхаавасан̇каад̇аа сабхааг̇ад̇ааби г̇ахид̇аа зва ход̇и. д̇ассаа жа г̇ахид̇ад̇д̇аа самбаяог̇ова лаб̣бхад̇и, на виббаяог̇о, д̇асмаа самуд̣̇аяасажжам̣ взд̣̇анаагканд̇хаад̣̇ийхи самбаяуд̇д̇ад̇д̇зна вуд̇д̇ам̣, на виббаяуд̇д̇ад̇д̇знаад̇и. зса наяо маг̇г̇асажжаад̣̇ийсубийд̇и.
235. Yathā taṃsampayogībhāvaṃ sandhāya ‘‘samudayasaccaṃ tīhi khandhehi sampayutta’’nti vuttaṃ, evaṃ taṃvippayogībhāvaṃ sandhāya ‘‘tīhi khandhehi vippayutta’’nti kasmā na vuttanti ce? Avibhāgehi tehi vippayogavacanassa ayuttattā. Vibhāge hi sati samudayasaccaṃ sukhadukkhadomanassindriyehi manoviññāṇadhātuto aññaviññāṇadhātūhi vippayuttanti yuttaṃ vattuṃ vibhāgeneva visabhāgatāya saṅgahitattā, vibhāgarahitehi pana vedanākkhandhādīhi na yuttaṃ, tehi vijjamānehi vijjamānassa samudayassa visabhāgabhāvābhāvato. Yañhi anuppannā dhammā viya āmaṭṭhakālabhedaṃ na hoti saṅkhataṃ uddharitabbaṃ, taṃ paccuppannabhāvaṃ nissāya sampayogīvippayogībhāvena uddharīyati, tañca vibhāgarahitehi khandhādīhi saṅkhatehi paccuppannabhāvameva nissāya anāmaṭṭhakālabhede atthitāya eva nissitabbattā. Avijjamānassa hi avijjamānena, avijjamānassa ca vijjamānena, vijjamānassa ca avijjamānena sampayogo natthi, vippayogo pana avijjamānatādīpake bhede gahite teneva visabhāgatāpi gahitā evāti hoti . Bhede pana aggahite tena tena gahaṇena visabhāgatāya aggahitattā sati sabhāgatte vijjamānatāya eva dhammānaṃ sabhāgassa paricchindanato vijjamānatā dassitāti ekuppādādibhāvasaṅkhātā sabhāgatāpi gahitā eva hoti. Tassā ca gahitattā sampayogova labbhati, na vippayogo, tasmā samudayasaccaṃ vedanākkhandhādīhi sampayuttattena vuttaṃ, na vippayuttattenāti. Esa nayo maggasaccādīsupīti.
262. ‘‘д̣̇уд̇ияаж̇жхаанавижааран̃хи табзд̇ваа сзсаа авид̇аггавижаарамад̇д̇аа’’д̇и адтагат̇ааважанам̣ яз бад̇хаанаа вид̇агго вияа годтаасанд̇аражид̇д̇уббаад̣̇зсу алийнаа, д̇з зва ид̇ха авид̇аггавижаарамад̇д̇аад̇и ад̇хиббзд̇аад̇и д̣̇ассзд̇и. д̇знзва хи ананд̇аранаяз самуд̣̇аяасажжзна самаанаг̇ад̇игаа на савид̇аггасавижаарзхийд̇и д̇з на г̇ахид̇аа. д̣̇асамосаананаязсу жа д̇зхи виббаяуд̇д̇зхи виббаяуд̇д̇аанам̣ д̇зхи виббаяуд̇д̇аанан̃жа сол̣асахи д̇хаад̇уухи виббаяог̇о адтаарасасан̇г̇ахид̇о жа вуд̇д̇о. вид̇аггасахид̇зсуби бана д̇зсу г̇ахид̇зсу саб̣б̣зби д̇з вижаарзна самбаяуд̇д̇аад̇и ‘‘згзна канд̇хзна гзхижи самбаяуд̇д̇аа’’д̇и саггаа вад̇д̇ум̣. со хи самуд̣̇ааяо вижаарам̣ важ̇ж̇зд̇ваа ан̃н̃зна гзнажи самбаяуд̇д̇о на ход̇и. на хи д̇ад̣̇згад̣̇зсасса вид̇аггасса вижаарад̇о ан̃н̃зна самбаяог̇о самуд̣̇ааяасса ход̇и. яат̇аа наанаажид̇д̇уббаад̣̇зсу уббаж̇ж̇амаанаанам̣ ид̣̇д̇хибаад̣̇аанам̣ самуд̣̇ааяасса ид̣̇д̇хибаад̣̇асса згад̣̇зсаанам̣ д̇ийхи канд̇хзхи самбаяог̇о самуд̣̇ааяасса на ход̇и, звамид̇хааби д̣̇адтаб̣б̣ам̣. яат̇аа бана д̇зсу згоби взд̣̇анаасан̃н̃аагканд̇хзхи сан̇каарагканд̇хзгад̣̇зсзна жа асамбаяуд̇д̇о наама над̇т̇ийд̇и самуд̣̇ааяасса д̇зхи самбаяуд̇д̇ад̇аа вуд̇д̇аа, звамид̇хааби вижаарзна асамбаяуд̇д̇асса авид̇аггавижаарамад̇д̇асса гассажи абхаавад̇о самуд̣̇ааяасса д̇зна самбаяуд̇д̇ад̇аа на на саггаа вад̇д̇ум̣. на хи авид̇аггавижаарамад̇д̇аанам̣ д̣̇ассанзнабахаад̇аб̣б̣ахзд̇угаад̣̇ийнам̣ вияа самбаяуд̇д̇ад̇аа на вад̇д̇аб̣б̣аа. яат̇аа хи д̣̇ассанзнабахаад̇аб̣б̣ахзд̇угзсу гзжи сан̇каарагканд̇хзгад̣̇зсзна мохзна самбаяуд̇д̇аа, гзжи асамбаяуд̇д̇аад̇и на самуд̣̇ааяо д̇зна самбаяуд̇д̇о, нааби ан̃н̃о гожи д̇хаммо ад̇т̇и, язна со самуд̣̇ааяо самбаяуд̇д̇о сияаад̇и ‘‘д̣̇ассанзнабахаад̇аб̣б̣ахзд̇угаа д̇хаммаа самбаяуд̇д̇аад̇и над̇т̇ий’’д̇и вуд̇д̇ам̣, звам̣ бхааванааяабахаад̇аб̣б̣ахзд̇угасахзд̇угаад̣̇аяоби. на банзвам̣ язна авид̇аггавижаарамад̇д̇асамуд̣̇ааяо самбаяуд̇д̇о сияаа, д̇ам̣ над̇т̇и авид̇аггавижаарамад̇д̇зсу гассажи вижаарзна асамбаяуд̇д̇асса абхааваа, д̇асмаа д̇з ‘‘самбаяуд̇д̇аа’’д̇и на на вад̇д̇аб̣б̣аад̇и. саб̣б̣ад̇т̇а жа згад̇хаммзби гзхижийд̇и б̣ахуважананид̣̇д̣̇зсо сан̇кааяа анияамид̇ад̇д̇аа гад̇од̇и взд̣̇ид̇аб̣б̣о.
262. ‘‘Dutiyajjhānavicārañhi ṭhapetvā sesā avitakkavicāramattā’’ti aṭṭhakathāvacanaṃ ye padhānā vitakko viya koṭṭhāsantaracittuppādesu alīnā, te eva idha avitakkavicāramattāti adhippetāti dasseti. Teneva hi anantaranaye samudayasaccena samānagatikā na savitakkasavicārehīti te na gahitā. Dasamosānanayesu ca tehi vippayuttehi vippayuttānaṃ tehi vippayuttānañca soḷasahi dhātūhi vippayogo aṭṭhārasasaṅgahito ca vutto. Vitakkasahitesupi pana tesu gahitesu sabbepi te vicārena sampayuttāti ‘‘ekena khandhena kehici sampayuttā’’ti sakkā vattuṃ. So hi samudāyo vicāraṃ vajjetvā aññena kenaci sampayutto na hoti. Na hi tadekadesassa vitakkassa vicārato aññena sampayogo samudāyassa hoti. Yathā nānācittuppādesu uppajjamānānaṃ iddhipādānaṃ samudāyassa iddhipādassa ekadesānaṃ tīhi khandhehi sampayogo samudāyassa na hoti, evamidhāpi daṭṭhabbaṃ. Yathā pana tesu ekopi vedanāsaññākkhandhehi saṅkhārakkhandhekadesena ca asampayutto nāma natthīti samudāyassa tehi sampayuttatā vuttā, evamidhāpi vicārena asampayuttassa avitakkavicāramattassa kassaci abhāvato samudāyassa tena sampayuttatā na na sakkā vattuṃ. Na hi avitakkavicāramattānaṃ dassanenapahātabbahetukādīnaṃ viya sampayuttatā na vattabbā. Yathā hi dassanenapahātabbahetukesu keci saṅkhārakkhandhekadesena mohena sampayuttā, keci asampayuttāti na samudāyo tena sampayutto, nāpi añño koci dhammo atthi, yena so samudāyo sampayutto siyāti ‘‘dassanenapahātabbahetukā dhammā sampayuttāti natthī’’ti vuttaṃ, evaṃ bhāvanāyapahātabbahetukasahetukādayopi. Na panevaṃ yena avitakkavicāramattasamudāyo sampayutto siyā, taṃ natthi avitakkavicāramattesu kassaci vicārena asampayuttassa abhāvā, tasmā te ‘‘sampayuttā’’ti na na vattabbāti. Sabbattha ca ekadhammepi kehicīti bahuvacananiddeso saṅkhāya aniyamitattā katoti veditabbo.
чадтанаяасамбаяог̇авиббаяог̇абад̣̇аван̣н̣анаа нидтид̇аа.
Chaṭṭhanayasampayogavippayogapadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / д̇хаад̇угат̇аабаал̣и • Dhātukathāpāḷi / 6. самбаяог̇авиббаяог̇абад̣̇анид̣̇д̣̇зсо • 6. Sampayogavippayogapadaniddeso
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 6. чадтанаяо самбаяог̇авиббаяог̇абад̣̇аван̣н̣анаа • 6. Chaṭṭhanayo sampayogavippayogapadavaṇṇanā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 6. чадтанаяо самбаяог̇авиббаяог̇абад̣̇аван̣н̣анаа • 6. Chaṭṭhanayo sampayogavippayogapadavaṇṇanā
