| Library / Tipiṭaka / д̇ибидага • Tipiṭaka / бан̃жабагаран̣а-анудийгаа • Pañcapakaraṇa-anuṭīkā |
6. чадтанаяо самбаяог̇авиббаяог̇абад̣̇аван̣н̣анаа
6. Chaṭṭhanayo sampayogavippayogapadavaṇṇanā
228. ‘‘д̇ад̇т̇аа’’д̇и иминаа ‘‘самбаяог̇авиббаяог̇абад̣̇ам̣ бхааж̇зд̇ваа’’д̇и зд̇т̇а самбаяог̇авиббаяог̇абад̣̇ам̣ бхааж̇ид̇ам̣, сам̣ван̣н̣зд̇аб̣б̣ад̇ааяа жа бад̇хаанабхууд̇ам̣ бажжаамадтам̣, на руубагканд̇хаад̣̇ибад̣̇анд̇и д̣̇ассзнд̇о ‘‘яам̣ лаб̣бхад̇и…бз… взд̣̇ид̇аб̣б̣а’’нд̇и вад̇ваа буна ‘‘руубагканд̇хаад̣̇ийсу хий’’д̇иаад̣̇инаа д̇амад̇т̇ам̣ виварад̇и. д̇ад̇т̇а на лаб̣бхад̇ийд̇и ‘‘самбаяуд̇д̇ам̣ виббаяуд̇д̇а’’нд̇и ваа г̇ахзд̇ум̣ на лаб̣бхад̇и, алаб̣бхамаанамби бужчааяа г̇ахид̇ам̣ бадигкзбзна виссаж̇ж̇зд̇ум̣. бадигкзбоби хи бужчааяа виссаж̇ж̇анамзва. д̇ат̇аа хи яамагз (яама. 1.канд̇хаяамага.59-61) ‘‘яасса руубагканд̇хо нуббаж̇ж̇ид̇т̇а, д̇асса взд̣̇анаагканд̇хо нуббаж̇ж̇ид̇т̇аа’’д̇и бужчааяа ‘‘над̇т̇ий’’д̇и виссаж̇ж̇ид̇ам̣. д̇зна банзд̇т̇а руубад̇хаммзсу самбаяог̇адто на лаб̣бхад̇ийд̇и аяамад̇т̇о д̣̇ассид̇о ход̇и. алаб̣бхамаанамби самбаяог̇абад̣̇ам̣ г̇ахид̇анд̇и самб̣анд̇хо. саб̣б̣ад̇т̇аад̇и руубагканд̇хавзд̣̇анаагканд̇хаад̣̇ийсу. зд̇зсанд̇и руубаниб̣б̣аанаанам̣. висабхааг̇ад̇аад̇и ад̇ам̣сабхааг̇ад̇аа. згуббаад̣̇аад̣̇ибхааво хи самбаяог̇з сабхааг̇ад̇аа, на сан̇г̇ахз вияа самаанасабхааг̇ад̇аа, д̇асмаа згуббаад̣̇аад̣̇ибхааварахид̇аанам̣ руубаниб̣б̣аанаанам̣ саа згуббаад̣̇аад̣̇ид̇аа висабхааг̇ад̇аа вуд̇д̇аа. д̇ад̣̇абхаавад̇од̇и д̇ассаа висабхааг̇ад̇ааяа згуббаад̣̇аад̣̇ид̇ааяа абхаавад̇о. виббаяог̇оби ниваарид̇о зва ход̇и, висабхааг̇о бхааво виббаяог̇од̇и вуд̇д̇овааяамад̇т̇од̇и. ‘‘жад̇уусу хий’’д̇иаад̣̇инаа вуд̇д̇амзвад̇т̇ам̣ баагадад̇арам̣ гарод̇и. д̇ад̇т̇а д̇зсам̣ д̇зхийд̇и жа аруубагканд̇хз зва бараамасад̇и. висабхааг̇ад̇аа жа ход̇и руубаниб̣б̣аанзсу авиж̇ж̇амаанад̇д̇аад̇и ад̇т̇о. д̇знааха ‘‘на жа руубзгад̣̇зсассаа’’д̇иаад̣̇и. д̇знзваад̇и жад̇угканд̇хасабхааг̇ад̇д̇аа зва.
228. ‘‘Tatthā’’ti iminā ‘‘sampayogavippayogapadaṃ bhājetvā’’ti ettha sampayogavippayogapadaṃ bhājitaṃ, saṃvaṇṇetabbatāya ca padhānabhūtaṃ paccāmaṭṭhaṃ, na rūpakkhandhādipadanti dassento ‘‘yaṃ labbhati…pe… veditabba’’nti vatvā puna ‘‘rūpakkhandhādīsu hī’’tiādinā tamatthaṃ vivarati. Tattha na labbhatīti ‘‘sampayuttaṃ vippayutta’’nti vā gahetuṃ na labbhati, alabbhamānampi pucchāya gahitaṃ paṭikkhepena vissajjetuṃ. Paṭikkhepopi hi pucchāya vissajjanameva. Tathā hi yamake (yama. 1.khandhayamaka.59-61) ‘‘yassa rūpakkhandho nuppajjittha, tassa vedanākkhandho nuppajjitthā’’ti pucchāya ‘‘natthī’’ti vissajjitaṃ. Tena panettha rūpadhammesu sampayogaṭṭho na labbhatīti ayamattho dassito hoti. Alabbhamānampi sampayogapadaṃ gahitanti sambandho. Sabbatthāti rūpakkhandhavedanākkhandhādīsu. Etesanti rūpanibbānānaṃ. Visabhāgatāti ataṃsabhāgatā. Ekuppādādibhāvo hi sampayoge sabhāgatā, na saṅgahe viya samānasabhāgatā, tasmā ekuppādādibhāvarahitānaṃ rūpanibbānānaṃ sā ekuppādāditā visabhāgatā vuttā. Tadabhāvatoti tassā visabhāgatāya ekuppādāditāya abhāvato. Vippayogopi nivārito eva hoti, visabhāgo bhāvo vippayogoti vuttovāyamatthoti. ‘‘Catūsuhī’’tiādinā vuttamevatthaṃ pākaṭataraṃ karoti. Tattha tesaṃ tehīti ca arūpakkhandhe eva parāmasati. Visabhāgatā ca hoti rūpanibbānesu avijjamānattāti attho. Tenāha ‘‘na ca rūpekadesassā’’tiādi. Tenevāti catukkhandhasabhāgattā eva.
д̇ийхи вин̃н̃аан̣ад̇хаад̇уухийд̇и гхаанаж̇ивхаагааяавин̃н̃аан̣ад̇хаад̇уухи виббаяуд̇д̇з анаарамман̣амиссагз руубад̇хаммамиссагз д̇хаммз д̣̇ийбзд̇и руубабхавод̇и яож̇анаа. бан̃жахийд̇и жагкувин̃н̃аан̣аад̣̇ийхи бан̃жахи вин̃н̃аан̣ад̇хаад̇уухи. згааяа манод̇хаад̇уяаа. на самбаяуд̇д̇зд̇и на самбаяуд̇д̇з зва. д̇ат̇аа хи ‘‘виббаяуд̇д̇з ахонд̇з сад̇д̇ахиби самбаяуд̇д̇з сад̇д̇аби ваа д̇аа’’д̇и вуд̇д̇ам̣. д̇знаад̇и виббаяуд̇д̇ад̇аабадигкзбзна. д̇аахийд̇и сад̇д̇авин̃н̃аан̣ад̇хаад̇уухи. самбаяуд̇д̇з д̣̇ийбзнд̇ийд̇и самбаяуд̇д̇з д̣̇ийбзнд̇иязва, на самбаяуд̇д̇з зваад̇и звамавад̇хааран̣ам̣ г̇ахзд̇аб̣б̣ам̣. зса наяо сзсзсуби. самбаяуд̇д̇з взд̣̇анаад̣̇игз. самбаяуд̇д̇авиббаяуд̇д̇абхаавзхи навад̇д̇аб̣б̣ам̣, д̇ам̣язва вин̃н̃аан̣ад̇хаад̇усад̇д̇агам̣. самбаяуд̇д̇абхаавзна навад̇д̇аб̣б̣аани самбаяуд̇д̇анавад̇д̇аб̣б̣аани, бхиннасанд̇аанигаани, наанаагкан̣игаани жа аруубааниби д̇хаммаж̇аад̇аани. анаарамман̣амиссагасаб̣б̣авин̃н̃аан̣ад̇хаад̇уд̇ам̣самбаяуд̇д̇аа д̇хаммааяад̇анаад̣̇ибад̣̇зхи д̣̇ийбзд̇аб̣б̣аа, анаарамман̣амиссагасаб̣б̣авин̃н̃аан̣ад̇хаад̇уяо ажзд̇асигаад̣̇ибад̣̇зхи д̣̇ийбзд̇аб̣б̣аа, д̇ад̣̇убхаяасамуд̣̇ааяаа д̣̇угкасажжаад̣̇ибад̣̇зхи д̣̇ийбзд̇аб̣б̣аад̇и взд̣̇ид̇аб̣б̣аа.
Tīhi viññāṇadhātūhīti ghānajivhākāyaviññāṇadhātūhi vippayutte anārammaṇamissake rūpadhammamissake dhamme dīpeti rūpabhavoti yojanā. Pañcahīti cakkhuviññāṇādīhi pañcahi viññāṇadhātūhi. Ekāya manodhātuyā. Na sampayutteti na sampayutte eva. Tathā hi ‘‘vippayutte ahonte sattahipi sampayutte sattapi vā tā’’ti vuttaṃ. Tenāti vippayuttatāpaṭikkhepena. Tāhīti sattaviññāṇadhātūhi. Sampayutte dīpentīti sampayutte dīpentiyeva, na sampayutte evāti evamavadhāraṇaṃ gahetabbaṃ. Esa nayo sesesupi. Sampayutte vedanādike. Sampayuttavippayuttabhāvehi navattabbaṃ, taṃyeva viññāṇadhātusattakaṃ. Sampayuttabhāvena navattabbāni sampayuttanavattabbāni, bhinnasantānikāni, nānākkhaṇikāni ca arūpānipi dhammajātāni. Anārammaṇamissakasabbaviññāṇadhātutaṃsampayuttā dhammāyatanādipadehi dīpetabbā, anārammaṇamissakasabbaviññāṇadhātuyo acetasikādipadehi dīpetabbā, tadubhayasamudāyā dukkhasaccādipadehi dīpetabbāti veditabbā.
яад̣̇и званд̇и яад̣̇и анаарамман̣амиссаанам̣ д̇хаммаанам̣ виббаяог̇о над̇т̇и. анаарамман̣амиссобхаяад̇хаммаад̇и руубаниб̣б̣аанасахид̇асаб̣б̣авин̃н̃аан̣ад̇хаад̇уд̇ам̣самбаяуд̇д̇ад̇хаммаа. канд̇хаад̣̇ийхзваад̇и канд̇хааяад̇анад̇хаад̇уухи зва, на аруубагканд̇хамад̇д̇зна. аруубагканд̇хзязва бана санд̇хааяа ‘‘д̇зхи д̇хаммзхи яз д̇хаммаа виббаяуд̇д̇аа’’д̇и вуд̇д̇анд̇и нааяам̣ д̣̇осод̇и д̣̇ассзд̇и. д̇ад̣̇згад̣̇зсаад̇и ‘‘анаарамман̣амиссаа’’д̇иаад̣̇инаа вуд̇д̇ад̇хаммасамуд̣̇ааяасса згад̣̇зсаа. д̇ад̣̇згад̣̇зсан̃н̃асамуд̣̇ааяаад̇и д̇ассзва яат̇аавуд̇д̇асса самуд̣̇ааяасса згад̣̇зсаа худ̇ваа ан̃н̃зсам̣ аваяаваанам̣ руубагканд̇хаад̣̇ийнам̣ самуд̣̇ааяабхууд̇аа. вибхааг̇аабхаавад̇од̇и бхзд̣̇аабхаавад̇о. бхзд̣̇од̇и жзд̇т̇а ажжанд̇абхзд̣̇о ад̇хиббзд̇о. на хи самуд̣̇ааяааваяаваанам̣ сааман̃н̃ависзсаанам̣ вияа ажжанд̇абхзд̣̇о ад̇т̇и бхзд̣̇аабхзд̣̇аяуд̇д̇ад̇д̇аа. д̇зсам̣ ажжанд̇абхзд̣̇амзва хи санд̇хааяа ‘‘самуд̣̇ааяанд̇ог̇ад̇хаанам̣ згад̣̇зсаанам̣ на вибхааг̇о ад̇т̇ий’’д̇и сан̇г̇ахзби вуд̇д̇ам̣. д̇знаад̇и авибхааг̇асаб̣бхаавад̇о сабхааг̇ависабхааг̇ад̇д̇аабхаавзна. д̇зсанд̇и анаарамман̣амиссагасаб̣б̣авин̃н̃аан̣ад̇хаад̇уаад̣̇ийнам̣ . д̇з жа агусалааб̣яаагад̇аа. д̇зсанд̇и гусалаагусалааб̣яаагад̇ад̇хаммаанам̣. д̇асмаад̇и яасмаа вибхад̇д̇асабхааваанам̣ на д̇зсам̣ самуд̣̇ааязгад̣̇зсаад̣̇ибхааво, д̇асмаа. яасмаа бана гусалаад̣̇аяо зва канд̇хаад̣̇аяод̇и канд̇хаад̣̇иаамасанзна самуд̣̇ааязгад̣̇зсаад̣̇ибхааво аабанно зваад̇и вуд̇д̇анаязна виббаяог̇аабхааво ход̇и, д̇асмаа д̇ам̣ барихаранд̇о ‘‘канд̇хаад̣̇ийни анаамасид̇ваа’’д̇иаад̣̇имааха. д̇зсанд̇и гусалаад̣̇ийнам̣. ан̃н̃аман̃н̃авиббаяуд̇д̇ад̇аа вуд̇д̇аа ‘‘гусалзхи д̇хаммзхи яз д̇хаммаа виббаяуд̇д̇аа’’д̇иаад̣̇инаа. саб̣б̣зсууд̇и д̣̇уд̇ияаад̣̇исаб̣б̣абан̃хзсу.
Yadi evanti yadi anārammaṇamissānaṃ dhammānaṃ vippayogo natthi. Anārammaṇamissobhayadhammāti rūpanibbānasahitasabbaviññāṇadhātutaṃsampayuttadhammā. Khandhādīhevāti khandhāyatanadhātūhi eva, na arūpakkhandhamattena. Arūpakkhandheyeva pana sandhāya ‘‘tehi dhammehi ye dhammā vippayuttā’’ti vuttanti nāyaṃ dosoti dasseti. Tadekadesāti ‘‘anārammaṇamissā’’tiādinā vuttadhammasamudāyassa ekadesā. Tadekadesaññasamudāyāti tasseva yathāvuttassa samudāyassa ekadesā hutvā aññesaṃ avayavānaṃ rūpakkhandhādīnaṃ samudāyabhūtā. Vibhāgābhāvatoti bhedābhāvato. Bhedoti cettha accantabhedo adhippeto. Na hi samudāyāvayavānaṃ sāmaññavisesānaṃ viya accantabhedo atthi bhedābhedayuttattā. Tesaṃ accantabhedameva hi sandhāya ‘‘samudāyantogadhānaṃ ekadesānaṃ na vibhāgo atthī’’ti saṅgahepi vuttaṃ. Tenāti avibhāgasabbhāvato sabhāgavisabhāgattābhāvena. Tesanti anārammaṇamissakasabbaviññāṇadhātuādīnaṃ . Te ca akusalābyākatā. Tesanti kusalākusalābyākatadhammānaṃ. Tasmāti yasmā vibhattasabhāvānaṃ na tesaṃ samudāyekadesādibhāvo, tasmā. Yasmā pana kusalādayo eva khandhādayoti khandhādiāmasanena samudāyekadesādibhāvo āpanno evāti vuttanayena vippayogābhāvo hoti, tasmā taṃ pariharanto ‘‘khandhādīni anāmasitvā’’tiādimāha. Tesanti kusalādīnaṃ. Aññamaññavippayuttatā vuttā ‘‘kusalehi dhammehi ye dhammā vippayuttā’’tiādinā. Sabbesūti dutiyādisabbapañhesu.
чад̇д̇им̣сааяа бидтид̣̇угабад̣̇зсу вийсад̇и д̣̇угабад̣̇аани имасмим̣ наяз лаб̣бханд̇и, авасидтаани сол̣асзваад̇и ааха ‘‘сол̣асаад̇и вад̇д̇аб̣б̣а’’нд̇и. д̇ад̇о зва ‘‘д̇звийсабад̣̇асад̇а’’нд̇и зд̇т̇а ‘‘д̇звийса’’нд̇и ид̣̇ан̃жа ‘‘згавийса’’нд̇и вад̇д̇аб̣б̣анд̇и яож̇анаа. саб̣б̣ад̇т̇аад̇и саб̣б̣абан̃хзсу. згагаалзгасанд̇аанаанам̣ бхиннагаалабхиннасанд̇аанаанан̃жа анзгзсам̣ д̇хаммаанам̣ самуд̣̇ааяабхууд̇аа сан̇каарагканд̇хад̇хаммааяад̇анад̇хаммад̇хаад̇уяод̇и ааха ‘‘гааласанд̇аана…бз… д̇хаад̇ууна’’нд̇и. згад̣̇зсасаммиссаад̇и жид̇д̇ид̣̇д̇хибаад̣̇аад̣̇инаа ад̇д̇ано згад̣̇зсзнзва канд̇ханд̇араад̣̇ийхи саммиссаа ид̣̇д̇хибаад̣̇аад̣̇аяо, анаарамман̣зхи руубаниб̣б̣аанзхи жа асаммиссаа. самаанагааласанд̇аанзхийд̇и згагааласанд̇аанзхи гааласанд̇аанабхзд̣̇арахид̇зхи згад̣̇зсанд̇арзхи, сан̇каарагканд̇хаад̣̇ийнам̣ згад̣̇зсанд̇арзхи, сан̇каарагканд̇хаад̣̇ийнам̣ згад̣̇зсависзсабхууд̇зхи сад̇ибадтаанасаммаббад̇хаанасан̃н̃аагканд̇хаад̣̇ийхи вибхад̇д̇аа зва самуд̣̇аяасажжаад̣̇аяо самбаяог̇ийвиббаяог̇ийбхаавзна, руубагканд̇хаад̣̇аяо виббаяог̇ийбхаавзна г̇ахид̇аад̇и яож̇анаа. д̇зхи самуд̣̇аяасажжаад̣̇ийхи. д̇з сан̃н̃аагканд̇хаад̣̇аяо. гзхижи сахуббаж̇ж̇анаарахзхи згад̣̇зсанд̇арзхи вибхад̇д̇зхи. на хи сан̇каарагканд̇хаад̣̇ибарияаабаннад̇д̇зби самуд̣̇аяасажжаад̣̇аяо маг̇г̇асажжаад̣̇ийхи самбаяог̇ам̣ лабханд̇и. д̇зсанд̇и взд̣̇анаагканд̇хасан̃н̃аагканд̇хаад̣̇ийнам̣. згуббаад̣̇аа…бз… висабхааг̇ад̇аа жаад̇и згуббаад̣̇аад̣̇ид̇аасан̇каад̇аа яат̇аарахам̣ сабхааг̇ад̇аа висабхааг̇ад̇аа жа. д̇зна яат̇аавуд̇д̇агааран̣зна самбаяог̇асса виббаяог̇асса жа лабханад̇о.
Chattiṃsāya piṭṭhidukapadesu vīsati dukapadāni imasmiṃ naye labbhanti, avasiṭṭhāni soḷasevāti āha ‘‘soḷasāti vattabba’’nti. Tato eva ‘‘tevīsapadasata’’nti ettha ‘‘tevīsa’’nti idañca ‘‘ekavīsa’’nti vattabbanti yojanā. Sabbatthāti sabbapañhesu. Ekakālekasantānānaṃ bhinnakālabhinnasantānānañca anekesaṃ dhammānaṃ samudāyabhūtā saṅkhārakkhandhadhammāyatanadhammadhātuyoti āha ‘‘kālasantāna…pe… dhātūna’’nti. Ekadesasammissāti cittiddhipādādinā attano ekadeseneva khandhantarādīhi sammissā iddhipādādayo, anārammaṇehi rūpanibbānehi ca asammissā. Samānakālasantānehīti ekakālasantānehi kālasantānabhedarahitehi ekadesantarehi, saṅkhārakkhandhādīnaṃ ekadesantarehi, saṅkhārakkhandhādīnaṃ ekadesavisesabhūtehi satipaṭṭhānasammappadhānasaññākkhandhādīhi vibhattā eva samudayasaccādayo sampayogīvippayogībhāvena, rūpakkhandhādayo vippayogībhāvena gahitāti yojanā. Tehi samudayasaccādīhi. Te saññākkhandhādayo. Kehici sahuppajjanārahehi ekadesantarehi vibhattehi. Na hi saṅkhārakkhandhādipariyāpannattepi samudayasaccādayo maggasaccādīhi sampayogaṃ labhanti. Tesanti vedanākkhandhasaññākkhandhādīnaṃ. Ekuppādā…pe… visabhāgatā cāti ekuppādāditāsaṅkhātā yathārahaṃ sabhāgatā visabhāgatā ca. Tena yathāvuttakāraṇena sampayogassa vippayogassa ca labhanato.
бхиннагаалаанам̣ самуд̣̇ааяийнам̣ самуд̣̇ааяаа бхиннагааласамуд̣̇ааяаа. вад̇д̇амаанаа жа згасмим̣ санд̇аанз згзгад̇хаммаа вад̇д̇анд̇и. д̇асмаад̇и яасмаа зд̇ад̣̇зва, д̇асмаа. д̇зсам̣ взд̣̇анаагканд̇хаад̣̇ийнам̣ вибхаж̇ид̇аб̣б̣асса згад̣̇зсабхууд̇асса абхаавад̇о. сукинд̣̇рияаад̣̇ийни взд̣̇анаагканд̇хзгад̣̇зсабхууд̇ааниби. д̇зна вибхааг̇аагаран̣зна . яад̣̇и самаанагааласса вибхаж̇ид̇аб̣б̣асса абхаавад̇о жагкувин̃н̃аан̣ад̇хаад̇аад̣̇аяо вин̃н̃аан̣агканд̇хасса вибхааг̇ам̣ на гаронд̇и, ат̇а гасмаа ‘‘жагкувин̃н̃аан̣ад̇хаад̇у…бз… мановин̃н̃аан̣ад̇хаад̇у сол̣асахи д̇хаад̇уухи виббаяуд̇д̇аа’’д̇и вуд̇д̇анд̇и жод̣̇анам̣ манаси гад̇ваа ааха ‘‘канд̇хааяад̇ана…бз… виббаяуд̇д̇аад̇и вуд̇д̇а’’нд̇и. звамзванд̇и яат̇аа д̇хаад̇увибхааг̇зна вибхад̇д̇асса вин̃н̃аан̣асса, звамзвам̣.
Bhinnakālānaṃ samudāyīnaṃ samudāyā bhinnakālasamudāyā. Vattamānā ca ekasmiṃ santāne ekekadhammā vattanti. Tasmāti yasmā etadeva, tasmā. Tesaṃ vedanākkhandhādīnaṃ vibhajitabbassa ekadesabhūtassa abhāvato. Sukhindriyādīni vedanākkhandhekadesabhūtānipi. Tena vibhāgākaraṇena . Yadi samānakālassa vibhajitabbassa abhāvato cakkhuviññāṇadhātādayo viññāṇakkhandhassa vibhāgaṃ na karonti, atha kasmā ‘‘cakkhuviññāṇadhātu…pe… manoviññāṇadhātu soḷasahi dhātūhi vippayuttā’’ti vuttanti codanaṃ manasi katvā āha ‘‘khandhāyatana…pe… vippayuttāti vutta’’nti. Evamevanti yathā dhātuvibhāgena vibhattassa viññāṇassa, evamevaṃ.
235. д̇ам̣самбаяог̇ийбхааванд̇и д̇зхи канд̇хзхи самбаяог̇ийбхаавам̣. яат̇аа хи самаанагааласанд̇аанзхи згажид̇д̇уббаад̣̇аг̇ад̇зхи взд̣̇анаасан̃н̃аавин̃н̃аан̣агканд̇хзхи самуд̣̇аяасажжасса самбаяуд̇д̇ад̇аа, звам̣ бхиннасанд̇аанзхи бхиннагаалзхи жа д̇зхи д̇асса виббаяуд̇д̇ад̇аад̇и ааха ‘‘звам̣ д̇ам̣виббаяог̇ийбхаавам̣…бз… на вуд̇д̇а’’нд̇и. висабхааг̇ад̇ааниб̣анд̇хасса вибхааг̇асса абхаавзна авибхааг̇зхи д̇зхи д̇ийхи канд̇хзхи. вибхааг̇з хийд̇иаад̣̇инаа д̇амзвад̇т̇ам̣ баагадад̇арам̣ гарод̇и. вибхааг̇арахид̇зхийд̇и самаанагааласанд̇аанзхи згажид̇д̇уббаад̣̇аг̇ад̇ад̇д̇аа авибхад̇д̇зхи взд̣̇анаагканд̇хаад̣̇ийхи на яуд̇д̇ам̣ виббаяуд̇д̇анд̇и вад̇д̇ум̣. д̇знааха ‘‘виж̇ж̇амаанзхи…бз… бхаавад̇о’’д̇и. д̇ад̇т̇а виж̇ж̇амаанасса самаанасса самаанаж̇аад̇игассаад̇и ад̇хиббааяо. на хи виж̇ж̇амаанам̣ руубааруубам̣ ан̃н̃аман̃н̃асса висабхааг̇ам̣ на ход̇и. ануббаннаа д̇хаммаа вияаад̇и ид̣̇ам̣ висад̣̇исуд̣̇аахаран̣ад̣̇ассанам̣. яат̇аа ‘‘ануббаннаа д̇хаммаа’’д̇и анааг̇ад̇агаалам̣ вужжад̇ийд̇и аамадтагаалабхзд̣̇ам̣, звам̣ яам̣ аамадтагаалабхзд̣̇ам̣ на ход̇ийд̇и ад̇т̇о. уд̣̇д̇харид̇аб̣б̣ам̣ д̣̇зсанааяа д̣̇зсзд̇аб̣б̣анд̇и вуд̇д̇ам̣ ход̇и. виж̇ж̇амаанассзва виж̇ж̇амаанзна самбаяог̇о, самбаяог̇аарахассзва жа виббаяог̇од̇и ад̇т̇ибхаавасанниссаяаа самбаяуд̇д̇авиббаяуд̇д̇ад̇аад̇и ааха ‘‘бажжуббаннабхаавам̣ ниссааяаа’’д̇и. д̇знзвааха ‘‘авиж̇ж̇амаанассаа’’д̇иаад̣̇и. д̇ан̃жаад̇и уд̣̇д̇харан̣ам̣.
235. Taṃsampayogībhāvanti tehi khandhehi sampayogībhāvaṃ. Yathā hi samānakālasantānehi ekacittuppādagatehi vedanāsaññāviññāṇakkhandhehi samudayasaccassa sampayuttatā, evaṃ bhinnasantānehi bhinnakālehi ca tehi tassa vippayuttatāti āha ‘‘evaṃ taṃvippayogībhāvaṃ…pe… na vutta’’nti. Visabhāgatānibandhassa vibhāgassa abhāvena avibhāgehi tehi tīhi khandhehi. Vibhāge hītiādinā tamevatthaṃ pākaṭataraṃ karoti. Vibhāgarahitehīti samānakālasantānehi ekacittuppādagatattā avibhattehi vedanākkhandhādīhi na yuttaṃ vippayuttanti vattuṃ. Tenāha ‘‘vijjamānehi…pe… bhāvato’’ti. Tattha vijjamānassa samānassa samānajātikassāti adhippāyo. Na hi vijjamānaṃ rūpārūpaṃ aññamaññassa visabhāgaṃ na hoti. Anuppannā dhammā viyāti idaṃ visadisudāharaṇadassanaṃ. Yathā ‘‘anuppannā dhammā’’ti anāgatakālaṃ vuccatīti āmaṭṭhakālabhedaṃ, evaṃ yaṃ āmaṭṭhakālabhedaṃ na hotīti attho. Uddharitabbaṃ desanāya desetabbanti vuttaṃ hoti. Vijjamānasseva vijjamānena sampayogo, sampayogārahasseva ca vippayogoti atthibhāvasannissayā sampayuttavippayuttatāti āha ‘‘paccuppannabhāvaṃ nissāyā’’ti. Tenevāha ‘‘avijjamānassā’’tiādi. Tañcāti uddharaṇaṃ.
вибхааг̇арахид̇зхийд̇и висабхааг̇ад̇аабхаавад̇о авибхааг̇зхи. анаамадтагаалабхзд̣̇зд̇и анаамадтагаалависзсз. авиж̇ж̇амаанасса…бз… самбаяог̇о над̇т̇ийд̇и зд̇зна баарисзсад̇о виж̇ж̇амаанасса жа виж̇ж̇амаанзна самбаяог̇о д̣̇ассид̇о. авиж̇ж̇амаанад̇аад̣̇ийбагз бхзд̣̇з г̇ахид̇зд̇и яат̇ааг̇ахид̇зсу д̇хаммзсу д̇зхи виббаяог̇ийнам̣ авиж̇ж̇амаанабхаавад̣̇ийбагз д̇зсам̣язва висзсз ‘‘аруубабхаво згзна канд̇хзна д̣̇асахааяад̇анзхи сол̣асахи д̇хаад̇уухи виббаяуд̇д̇о’’д̇иаад̣̇инаа (д̇хаад̇у. 246) г̇ахид̇з д̇знзва руббанаад̣̇инаа бхзд̣̇зна д̇зсам̣ ан̃н̃аман̃н̃ам̣ висабхааг̇ад̇ааби г̇ахид̇аа зваад̇и виббаяог̇о ход̇ийд̇и яож̇анаа. бхзд̣̇з бана аг̇г̇ахид̇з д̇зна д̇зна г̇ахан̣знаад̇и яат̇аавуд̇д̇з авиж̇ж̇амаанад̇аад̣̇ийбагз висзсз, висабхааг̇з ваа аг̇г̇ахид̇з ‘‘взд̣̇анаа, сан̃н̃аа, сан̇каарагканд̇хо д̇ийхи канд̇хзхи згзнааяад̇анзна сад̇д̇ахи д̇хаад̇уухи самбаяуд̇д̇о’’д̇иаад̣̇инаа д̇зна д̇зна г̇ахан̣зна сабхааг̇ад̇аад̣̇ийбанзна висабхааг̇ад̇ааяа аг̇г̇ахид̇ад̇д̇аа сабхааг̇ад̇аава ход̇и. д̇ат̇аа жа сад̇и сабхааг̇ад̇д̇з гаа банзд̇т̇а сабхааг̇ад̇аад̇и ааха ‘‘виж̇ж̇амаанад̇ааяа…бз… ход̇ий’’д̇и. д̇ассаад̇и сабхааг̇ад̇ааяа. д̇асмаад̇и висабхааг̇ад̇ааяа алаб̣бхамаанад̇д̇аа, сабхааг̇ад̇ааяа жа лаб̣бхамаанад̇д̇аа.
Vibhāgarahitehīti visabhāgatābhāvato avibhāgehi. Anāmaṭṭhakālabhedeti anāmaṭṭhakālavisese. Avijjamānassa…pe… sampayogo natthīti etena pārisesato vijjamānassa ca vijjamānena sampayogo dassito. Avijjamānatādīpake bhede gahiteti yathāgahitesu dhammesu tehi vippayogīnaṃ avijjamānabhāvadīpake tesaṃyeva visese ‘‘arūpabhavo ekena khandhena dasahāyatanehi soḷasahi dhātūhi vippayutto’’tiādinā (dhātu. 246) gahite teneva ruppanādinā bhedena tesaṃ aññamaññaṃ visabhāgatāpi gahitā evāti vippayogo hotīti yojanā. Bhede pana aggahite tena tena gahaṇenāti yathāvutte avijjamānatādīpake visese, visabhāge vā aggahite ‘‘vedanā, saññā, saṅkhārakkhandho tīhi khandhehi ekenāyatanena sattahi dhātūhi sampayutto’’tiādinā tena tena gahaṇena sabhāgatādīpanena visabhāgatāya aggahitattā sabhāgatāva hoti. Tathā ca sati sabhāgatte kā panettha sabhāgatāti āha ‘‘vijjamānatāya…pe… hotī’’ti. Tassāti sabhāgatāya. Tasmāti visabhāgatāya alabbhamānattā, sabhāgatāya ca labbhamānattā.
262. вид̇агго вияаад̇и савид̇аггасавижаарзсу жид̇д̇уббаад̣̇зсу вид̇агго вияа. со хи вид̇аггарахид̇ад̇д̇аа авид̇агго вижаарамад̇д̇о жа. д̇знааха ‘‘годтаасанд̇аражид̇д̇уббаад̣̇зсу алийнаа’’д̇и. д̇ад̇о зва со аббад̇хаано, д̣̇уд̇ияажхаанад̇хаммаа звзд̇т̇а бад̇хаанаад̇и ааха ‘‘яз бад̇хаанаа’’д̇и. д̇знзваад̇и савид̇аггасавижаарзсу жид̇д̇уббаад̣̇зсу вид̇аггасса авид̇аггавижаарамад̇д̇аг̇г̇ахан̣зна ид̇ха аг̇г̇ахид̇ад̇д̇аа, вид̇аггад̇д̇игз д̣̇уд̇ияараасиязва жа ад̇хиббзд̇ад̇д̇аа. ананд̇аранаязд̇и самбаяуд̇д̇знавиббаяуд̇д̇абад̣̇анид̣̇д̣̇зсз. самуд̣̇аяасажжзна самаанаг̇ад̇игаа сад̣̇исаббавад̇д̇игаа. ид̇ийд̇и иминаа гааран̣зна. д̇з авид̇аггавижаарамад̇д̇аа д̇хаммаа на г̇ахид̇аа, самуд̣̇аяасажжам̣ вияа на д̣̇зсанаарул̣хаа. на савид̇аггасавижаарзхи самаанаг̇ад̇игаад̇и яож̇анаа. яад̣̇и хи д̇з савид̇аггасавижаарзхи самаанаг̇ад̇игаа сияум̣, ‘‘авид̇аггавижаарамад̇д̇зхи д̇хаммзхи яз д̇хаммаа самбаяуд̇д̇аа, д̇зхи д̇хаммзхи яз д̇хаммаа виббаяуд̇д̇аа, д̇з д̇хаммаа на гзхижи канд̇хзхи, на гзхижи ааяад̇анзхи, згааяа д̇хаад̇уяаа виббаяуд̇д̇аа’’д̇и вад̇д̇аб̣б̣аа сияум̣. яасмаа бана д̇з самуд̣̇аяасажжзна самаанаг̇ад̇игаа. яат̇аа хи яз самуд̣̇аяасажжзна самбаяуд̇д̇зхи виббаяуд̇д̇аа, д̇зсам̣ гзхижи виббаяог̇ам̣ вад̇д̇ум̣ на саггаа, звам̣ д̇зхиби . д̇ат̇аа хи вагкад̇и ‘‘самуд̣̇аяасажжаад̣̇ийний’’д̇иаад̣̇и. д̣̇асамо…бз… вуд̇д̇од̇и зд̇т̇а д̣̇асаманаяз д̇зхи авид̇аггавижаарамад̇д̇зхи виббаяуд̇д̇зхи виббаяуд̇д̇аанам̣ сол̣асахи д̇хаад̇уухи виббаяог̇о вуд̇д̇о, осаананаяз д̇зхи виббаяуд̇д̇аанам̣ адтаарасахи д̇хаад̇уухи сан̇г̇ахо жа вуд̇д̇од̇и д̇асмаа на д̇з савид̇аггасавижаарзхи самаанаг̇ад̇игаад̇и д̣̇ассзд̇и.
262. Vitakko viyāti savitakkasavicāresu cittuppādesu vitakko viya. So hi vitakkarahitattā avitakko vicāramatto ca. Tenāha ‘‘koṭṭhāsantaracittuppādesu alīnā’’ti. Tato eva so appadhāno, dutiyajhānadhammā evettha padhānāti āha ‘‘ye padhānā’’ti. Tenevāti savitakkasavicāresu cittuppādesu vitakkassa avitakkavicāramattaggahaṇena idha aggahitattā, vitakkattike dutiyarāsiyeva ca adhippetattā. Anantaranayeti sampayuttenavippayuttapadaniddese. Samudayasaccena samānagatikā sadisappavattikā. Itīti iminā kāraṇena. Te avitakkavicāramattā dhammā na gahitā, samudayasaccaṃ viya na desanāruḷhā. Na savitakkasavicārehi samānagatikāti yojanā. Yadi hi te savitakkasavicārehi samānagatikā siyuṃ, ‘‘avitakkavicāramattehi dhammehi ye dhammā sampayuttā, tehi dhammehi ye dhammā vippayuttā, te dhammā na kehici khandhehi, na kehici āyatanehi, ekāya dhātuyā vippayuttā’’ti vattabbā siyuṃ. Yasmā pana te samudayasaccena samānagatikā. Yathā hi ye samudayasaccena sampayuttehi vippayuttā, tesaṃ kehici vippayogaṃ vattuṃ na sakkā, evaṃ tehipi . Tathā hi vakkhati ‘‘samudayasaccādīnī’’tiādi. Dasamo…pe… vuttoti ettha dasamanaye tehi avitakkavicāramattehi vippayuttehi vippayuttānaṃ soḷasahi dhātūhi vippayogo vutto, osānanaye tehi vippayuttānaṃ aṭṭhārasahi dhātūhi saṅgaho ca vuttoti tasmā na te savitakkasavicārehi samānagatikāti dasseti.
вид̇аггасахид̇зсууд̇и сахавид̇аггзсу. д̇зсууд̇и авид̇аггавижаарамад̇д̇зсу саха вид̇аггзна д̣̇уд̇ияаж̇жхаанад̇хаммзсу, ‘‘авид̇аггавижаарамад̇д̇аа’’д̇и г̇ахид̇зсу вуд̇д̇зсууд̇и ад̇т̇о. саб̣б̣зби д̇зд̇и д̣̇уд̇ияаж̇жхаанад̇хаммаа вид̇агго жаад̇и саб̣б̣зби д̇з д̇хаммаа саггаа вад̇д̇ум̣. д̇ат̇аа хи самбаяог̇авиббаяог̇абад̣̇анид̣̇д̣̇зсз ‘‘авид̇аггавижаарамад̇д̇аа д̇хаммаа згзна канд̇хзна згзнааяад̇анзна згааяа д̇хаад̇уяаа гзхижи самбаяуд̇д̇аа’’д̇и вуд̇д̇ам̣. д̇ад̇т̇а згзна канд̇хзнаад̇и сан̇каарагканд̇хзна. со хи самуд̣̇ааяод̇и ‘‘авид̇аггавижаарамад̇д̇аа д̇хаммаа’’д̇и вуд̇д̇ад̇хаммасамуд̣̇ааяо. нану вид̇аггобзд̇т̇а д̇хаммасан̇г̇ахам̣ г̇ад̇о, со жа вижаарад̇о ан̃н̃знаби самбаяуд̇д̇од̇и жод̣̇анам̣ санд̇хааяааха ‘‘на хи д̇ад̣̇згад̣̇зсасса…бз… ход̇ий’’д̇и. яат̇аад̇иаад̣̇инаа д̇амзвад̇т̇ам̣ ид̣̇д̇хибаад̣̇анид̣̇ассанзна вибхаавзд̇и. д̇ассад̇т̇о – яат̇аа ид̣̇д̇хибаад̣̇асамуд̣̇ааяасса згад̣̇зсабхууд̇аанам̣ чанд̣̇ид̣̇д̇хибаад̣̇аад̣̇ийнам̣ д̇ийхи канд̇хзхи самбаяог̇о вуд̇д̇о, д̇ам̣самуд̣̇ааяасса на ход̇и, звам̣ ид̇хааби вид̇аггасса ан̃н̃зхи самбаяог̇о авид̇аггавижаарамад̇д̇асса самуд̣̇ааяасса на ход̇ийд̇и.
Vitakkasahitesūti sahavitakkesu. Tesūti avitakkavicāramattesu saha vitakkena dutiyajjhānadhammesu, ‘‘avitakkavicāramattā’’ti gahitesu vuttesūti attho. Sabbepi teti dutiyajjhānadhammā vitakko cāti sabbepi te dhammā sakkā vattuṃ. Tathā hi sampayogavippayogapadaniddese ‘‘avitakkavicāramattā dhammā ekena khandhena ekenāyatanena ekāya dhātuyā kehici sampayuttā’’ti vuttaṃ. Tattha ekena khandhenāti saṅkhārakkhandhena. So hi samudāyoti ‘‘avitakkavicāramattā dhammā’’ti vuttadhammasamudāyo. Nanu vitakkopettha dhammasaṅgahaṃ gato, so ca vicārato aññenapi sampayuttoti codanaṃ sandhāyāha ‘‘na hi tadekadesassa…pe… hotī’’ti. Yathātiādinā tamevatthaṃ iddhipādanidassanena vibhāveti. Tassattho – yathā iddhipādasamudāyassa ekadesabhūtānaṃ chandiddhipādādīnaṃ tīhi khandhehi sampayogo vutto, taṃsamudāyassa na hoti, evaṃ idhāpi vitakkassa aññehi sampayogo avitakkavicāramattassa samudāyassa na hotīti.
яад̣̇и звам̣ ‘‘ид̣̇д̇хибаад̣̇о д̣̇вийхи канд̇хзхи самбаяуд̇д̇о’’д̇иаад̣̇и на вад̇д̇аб̣б̣анд̇и жз? но на вад̇д̇аб̣б̣анд̇и д̣̇ассзнд̇о ‘‘яат̇аа банаа’’д̇иаад̣̇имааха. д̇ад̇т̇а д̇зсууд̇и ид̣̇д̇хибаад̣̇зсу. самуд̣̇ааяассаад̇и ид̣̇д̇хибаад̣̇асамуд̣̇ааяасса. д̇зхи взд̣̇анаагканд̇хаад̣̇ийхи самбаяуд̇д̇ад̇аа вуд̇д̇аа ‘‘ид̣̇д̇хибаад̣̇о д̣̇вийхи канд̇хзхи самбаяуд̇д̇о’’д̇иаад̣̇инаа. д̇знаад̇и вижаарзна. на хийд̇иаад̣̇инаа яат̇аад̇хиг̇ад̇ад̇хаммаанам̣ самбаяуд̇д̇ад̇ааяа навад̇д̇аб̣б̣аабхаавам̣ уд̣̇аахаран̣ад̣̇ассанавасзна вибхаавзд̇и. гзжи вижигижчаа д̇ам̣сахаг̇ад̇аа жа мохаваж̇ж̇аа мохзна самбаяуд̇д̇аа, гзжи асамбаяуд̇д̇аа. мохзнаад̇и вижигижчаасахаг̇ад̇амохамзва санд̇хааяа вад̣̇ад̇и. ид̇и иминаа гааран̣зна на самуд̣̇ааяо д̇зна мохзна самбаяуд̇д̇о. ан̃н̃о гожи д̇хаммо хзд̇убхааво нааби ад̇т̇и, язна хзд̇унаа со д̣̇ассанзнабахаад̇аб̣б̣ахзд̇угод̇и вуд̇д̇о самуд̣̇ааяо. званд̇и иминаа наязна ‘‘бхааванаа…бз… яоби самбаяуд̇д̇аа’’д̇и навад̇д̇аб̣б̣ад̇ааяа нид̣̇ассзд̇аб̣б̣аад̇и ад̇т̇о. званд̇и яат̇аа д̣̇ассанзнабахаад̇аб̣б̣ахзд̇угасамуд̣̇ааяасса самбаяуд̇д̇ад̇аа на вад̇д̇аб̣б̣аа, звам̣ язна д̇хаммзна авид̇агга…бз… сияаа, д̇ам̣ на над̇т̇и. д̇асмаад̇и яасмаа авид̇аггавижаарамад̇д̇зсу гожиби вижаарзна асамбаяуд̇д̇о над̇т̇и, д̇асмаа. д̇зд̇и авид̇аггавижаарамад̇д̇аа д̇хаммаа. згад̇хаммзби…бз… гад̇о яат̇аа ‘‘аббажжаяаа д̇хаммаа асан̇кад̇аа д̇хаммаа’’д̇и.
Yadi evaṃ ‘‘iddhipādo dvīhi khandhehi sampayutto’’tiādi na vattabbanti ce? No na vattabbanti dassento ‘‘yathā panā’’tiādimāha. Tattha tesūti iddhipādesu. Samudāyassāti iddhipādasamudāyassa. Tehi vedanākkhandhādīhi sampayuttatā vuttā ‘‘iddhipādo dvīhi khandhehi sampayutto’’tiādinā. Tenāti vicārena. Na hītiādinā yathādhigatadhammānaṃ sampayuttatāya navattabbābhāvaṃ udāharaṇadassanavasena vibhāveti. Keci vicikicchā taṃsahagatā ca mohavajjā mohena sampayuttā, keci asampayuttā. Mohenāti vicikicchāsahagatamohameva sandhāya vadati. Iti iminā kāraṇena na samudāyo tena mohena sampayutto. Añño koci dhammo hetubhāvo nāpi atthi, yena hetunā so dassanenapahātabbahetukoti vutto samudāyo. Evanti iminā nayena ‘‘bhāvanā…pe… yopi sampayuttā’’ti navattabbatāya nidassetabbāti attho. Evanti yathā dassanenapahātabbahetukasamudāyassa sampayuttatā na vattabbā, evaṃ yena dhammena avitakka…pe… siyā, taṃ na natthi. Tasmāti yasmā avitakkavicāramattesu kocipi vicārena asampayutto natthi, tasmā. Teti avitakkavicāramattā dhammā. Ekadhammepi…pe… kato yathā ‘‘appaccayā dhammā asaṅkhatā dhammā’’ti.
чадтанаяасамбаяог̇авиббаяог̇абад̣̇аван̣н̣анаа нидтид̇аа.
Chaṭṭhanayasampayogavippayogapadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / д̇хаад̇угат̇аабаал̣и • Dhātukathāpāḷi / 6. самбаяог̇авиббаяог̇абад̣̇анид̣̇д̣̇зсо • 6. Sampayogavippayogapadaniddeso
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 6. чадтанаяо самбаяог̇авиббаяог̇абад̣̇аван̣н̣анаа • 6. Chaṭṭhanayo sampayogavippayogapadavaṇṇanā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 6. чадтанаяо самбаяог̇авиббаяог̇абад̣̇аван̣н̣анаа • 6. Chaṭṭhanayo sampayogavippayogapadavaṇṇanā
