| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
6. ச²ட்ட²ஸங்கா⁴தி³ஸேஸஸிக்கா²பத³ங்
6. Chaṭṭhasaṅghādisesasikkhāpadaṃ
704. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸுந்த³ரீனந்தா³ பி⁴க்கு²னீ அபி⁴ரூபா ஹோதி த³ஸ்ஸனீயா பாஸாதி³கா. மனுஸ்ஸா ப⁴த்தக்³கே³ ஸுந்த³ரீனந்த³ங் பி⁴க்கு²னிங் பஸ்ஸித்வா அவஸ்ஸுதா ஸுந்த³ரீனந்தா³ய பி⁴க்கு²னியா அக்³க³மக்³கா³னி போ⁴ஜனானி தெ³ந்தி. ஸுந்த³ரீனந்தா³ பி⁴க்கு²னீ குக்குச்சாயந்தீ ந படிக்³க³ண்ஹாதி. அனந்தரிகா பி⁴க்கு²னீ ஸுந்த³ரீனந்த³ங் பி⁴க்கு²னிங் ஏதத³வோச – ‘‘கிஸ்ஸ த்வங், அய்யே, ந படிக்³க³ண்ஹாஸீ’’தி? ‘‘அவஸ்ஸுதா, அய்யே’’தி. ‘‘த்வங் பன, அய்யே, அவஸ்ஸுதா’’தி? ‘‘நாஹங், அய்யே, அவஸ்ஸுதா’’தி. ‘‘கிங் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா, யதோ த்வங் அனவஸ்ஸுதா. இங்க⁴ங், அய்யே, யங் தே ஏஸோ புரிஸபுக்³க³லோ தே³தி கா²த³னீயங் வா போ⁴ஜனீயங் வா தங் த்வங் ஸஹத்தா² படிக்³க³ஹெத்வா கா²த³ வா, பு⁴ஞ்ஜ வா’’தி.
704. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sundarīnandā bhikkhunī abhirūpā hoti dassanīyā pāsādikā. Manussā bhattagge sundarīnandaṃ bhikkhuniṃ passitvā avassutā sundarīnandāya bhikkhuniyā aggamaggāni bhojanāni denti. Sundarīnandā bhikkhunī kukkuccāyantī na paṭiggaṇhāti. Anantarikā bhikkhunī sundarīnandaṃ bhikkhuniṃ etadavoca – ‘‘kissa tvaṃ, ayye, na paṭiggaṇhāsī’’ti? ‘‘Avassutā, ayye’’ti. ‘‘Tvaṃ pana, ayye, avassutā’’ti? ‘‘Nāhaṃ, ayye, avassutā’’ti. ‘‘Kiṃ te, ayye, eso purisapuggalo karissati avassuto vā anavassuto vā, yato tvaṃ anavassutā. Iṅghaṃ, ayye, yaṃ te eso purisapuggalo deti khādanīyaṃ vā bhojanīyaṃ vā taṃ tvaṃ sahatthā paṭiggahetvā khāda vā, bhuñja vā’’ti.
யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னீ ஏவங் வக்க²தி – ‘கிங் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா, யதோ த்வங் அனவஸ்ஸுதா. இங்க⁴, அய்யே, யங் தே ஏஸோ புரிஸபுக்³க³லோ தே³தி கா²த³னீயங் வா போ⁴ஜனீயங் வா தங் த்வங் ஸஹத்தா² படிக்³க³ஹெத்வா கா²த³ வா பு⁴ஞ்ஜ வா’’தி…பே॰… ஸச்சங் கிர, பி⁴க்க²வே, பி⁴க்கு²னீ ஏவங் வதே³தி – ‘‘கிங் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா யதோ த்வங் அனவஸ்ஸுதா! இங்க⁴, அய்யே, யங் தே ஏஸோ புரிஸபுக்³க³லோ தே³தி கா²த³னீயங் வா போ⁴ஜனீயங் வா தங் த்வங் ஸஹத்தா² படிக்³க³ஹெத்வா கா²த³ வா பு⁴ஞ்ஜ வா’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னீ ஏவங் வக்க²தி – ‘‘கிங் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா யதோ த்வங் அனவஸ்ஸுதா; இங்க⁴, அய்யே, யங் தே ஏஸோ புரிஸபுக்³க³லோ தே³தி கா²த³னீயங் வா போ⁴ஜனீயங் வா தங் த்வங் ஸஹத்தா² படிக்³க³ஹெத்வா கா²த³ வா பு⁴ஞ்ஜ வா’’. நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī evaṃ vakkhati – ‘kiṃ te, ayye, eso purisapuggalo karissati avassuto vā anavassuto vā, yato tvaṃ anavassutā. Iṅgha, ayye, yaṃ te eso purisapuggalo deti khādanīyaṃ vā bhojanīyaṃ vā taṃ tvaṃ sahatthā paṭiggahetvā khāda vā bhuñja vā’’ti…pe… saccaṃ kira, bhikkhave, bhikkhunī evaṃ vadeti – ‘‘kiṃ te, ayye, eso purisapuggalo karissati avassuto vā anavassuto vā yato tvaṃ anavassutā! Iṅgha, ayye, yaṃ te eso purisapuggalo deti khādanīyaṃ vā bhojanīyaṃ vā taṃ tvaṃ sahatthā paṭiggahetvā khāda vā bhuñja vā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī evaṃ vakkhati – ‘‘kiṃ te, ayye, eso purisapuggalo karissati avassuto vā anavassuto vā yato tvaṃ anavassutā; iṅgha, ayye, yaṃ te eso purisapuggalo deti khādanīyaṃ vā bhojanīyaṃ vā taṃ tvaṃ sahatthā paṭiggahetvā khāda vā bhuñja vā’’. Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
705. ‘‘யா பன பி⁴க்கு²னீ ஏவங் வதெ³ய்ய – ‘கிங் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா, யதோ த்வங் அனவஸ்ஸுதா. இங்க⁴, அய்யே, யங் தே ஏஸோ புரிஸபுக்³க³லோ தே³தி கா²த³னீயங் வா போ⁴ஜனீயங் வா தங் த்வங் ஸஹத்தா² படிக்³க³ஹெத்வா கா²த³ வா பு⁴ஞ்ஜ வா’தி, அயம்பி பி⁴க்கு²னீ பட²மாபத்திகங் த⁴ம்மங் ஆபன்னா நிஸ்ஸாரணீயங் ஸங்கா⁴தி³ஸேஸ’’ந்தி.
705.‘‘Yā pana bhikkhunī evaṃ vadeyya – ‘kiṃ te, ayye, eso purisapuggalo karissati avassuto vā anavassuto vā, yato tvaṃ anavassutā. Iṅgha, ayye, yaṃ te eso purisapuggalo deti khādanīyaṃ vā bhojanīyaṃ vā taṃ tvaṃ sahatthā paṭiggahetvā khāda vā bhuñja vā’ti, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
706. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
706.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஏவங் வதெ³ய்யாதி – ‘‘கிங் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா, யதோ த்வங் அனவஸ்ஸுதா. இங்க⁴, அய்யே, யங் தே ஏஸோ புரிஸபுக்³க³லோ தே³தி கா²த³னீயங் வா போ⁴ஜனீயங் வா தங் த்வங் ஸஹத்தா² படிக்³க³ஹெத்வா கா²த³ வா பு⁴ஞ்ஜ வா’’தி உய்யோஜேதி, ஆபத்தி து³க்கடஸ்ஸ. தஸ்ஸா வசனேன ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து²ல்லச்சயஸ்ஸ. போ⁴ஜனபரியோஸானே ஆபத்தி ஸங்கா⁴தி³ஸேஸஸ்ஸ.
Evaṃ vadeyyāti – ‘‘kiṃ te, ayye, eso purisapuggalo karissati avassuto vā anavassuto vā, yato tvaṃ anavassutā. Iṅgha, ayye, yaṃ te eso purisapuggalo deti khādanīyaṃ vā bhojanīyaṃ vā taṃ tvaṃ sahatthā paṭiggahetvā khāda vā bhuñja vā’’ti uyyojeti, āpatti dukkaṭassa. Tassā vacanena ‘‘khādissāmi bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti thullaccayassa. Bhojanapariyosāne āpatti saṅghādisesassa.
அயம்பீதி புரிமாயோ உபாதா³ய வுச்சதி.
Ayampīti purimāyo upādāya vuccati.
பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.
Paṭhamāpattikanti saha vatthujjhācārā āpajjati asamanubhāsanāya.
நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.
Nissāraṇīyanti saṅghamhā nissārīyati.
ஸங்கா⁴தி³ஸேஸோதி…பே॰… தேனபி வுச்சதி ஸங்கா⁴தி³ஸேஸோதி.
Saṅghādisesoti…pe… tenapi vuccati saṅghādisesoti.
உத³கத³ந்தபோனங் ‘‘படிக்³க³ண்ஹா’’தி உய்யோஜேதி, ஆபத்தி து³க்கடஸ்ஸ. தஸ்ஸா வசனேன கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ.
Udakadantaponaṃ ‘‘paṭiggaṇhā’’ti uyyojeti, āpatti dukkaṭassa. Tassā vacanena khādissāmi bhuñjissāmī’’ti paṭiggaṇhāti, āpatti dukkaṭassa.
707. ஏகதோஅவஸ்ஸுதே யக்க²ஸ்ஸ வா பேதஸ்ஸ வா பண்ட³கஸ்ஸ வா திரச்சா²னக³தமனுஸ்ஸவிக்³க³ஹஸ்ஸ வா ஹத்த²தோ கா²த³னீயங் வா போ⁴ஜனீயங் வா ‘‘கா²த³ வா பு⁴ஞ்ஜ வா’’தி உய்யோஜேதி, ஆபத்தி து³க்கடஸ்ஸ. தஸ்ஸா வசனேன ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ. போ⁴ஜனபரியோஸானே ஆபத்தி து²ல்லச்சயஸ்ஸ. உத³கத³ந்தபோனங் படிக்³க³ண்ஹாதி உய்யோஜேதி, ஆபத்தி து³க்கடஸ்ஸ. தஸ்ஸா வசனேன ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ.
707. Ekatoavassute yakkhassa vā petassa vā paṇḍakassa vā tiracchānagatamanussaviggahassa vā hatthato khādanīyaṃ vā bhojanīyaṃ vā ‘‘khāda vā bhuñja vā’’ti uyyojeti, āpatti dukkaṭassa. Tassā vacanena ‘‘khādissāmi bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassa. Bhojanapariyosāne āpatti thullaccayassa. Udakadantaponaṃ paṭiggaṇhāti uyyojeti, āpatti dukkaṭassa. Tassā vacanena ‘‘khādissāmi bhuñjissāmī’’ti paṭiggaṇhāti, āpatti dukkaṭassa.
708. அனாபத்தி ‘‘அனவஸ்ஸுதோ’’தி ஜானந்தீ உய்யோஜேதி, ‘‘குபிதா ந படிக்³க³ண்ஹாதீ’’தி உய்யோஜேதி, ‘‘குலானுத்³த³யதாய ந படிக்³க³ண்ஹாதீ’’தி உய்யோஜேதி, உம்மத்திகாய, ஆதி³கம்மிகாயாதி.
708. Anāpatti ‘‘anavassuto’’ti jānantī uyyojeti, ‘‘kupitā na paṭiggaṇhātī’’ti uyyojeti, ‘‘kulānuddayatāya na paṭiggaṇhātī’’ti uyyojeti, ummattikāya, ādikammikāyāti.
ச²ட்ட²ஸங்கா⁴தி³ஸேஸஸிக்கா²பத³ங் நிட்டி²தங்.
Chaṭṭhasaṅghādisesasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 6. ச²ட்ட²ஸங்கா⁴தி³ஸேஸஸிக்கா²பத³வண்ணனா • 6. Chaṭṭhasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. ச²ட்ட²ஸங்கா⁴தி³ஸேஸஸிக்கா²பத³வண்ணனா • 6. Chaṭṭhasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. ச²ட்ட²ஸங்கா⁴தி³ஸேஸஸிக்கா²பத³வண்ணனா • 6. Chaṭṭhasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. ச²ட்ட²ஸங்கா⁴தி³ஸேஸஸிக்கா²பத³வண்ணனா • 6. Chaṭṭhasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 6. ச²ட்ட²ஸங்கா⁴தி³ஸேஸஸிக்கா²பத³ங் • 6. Chaṭṭhasaṅghādisesasikkhāpadaṃ
