| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
6. ச²ட்ட²ஸிக்கா²பத³ங்
6. Chaṭṭhasikkhāpadaṃ
1046. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா பி⁴க்கு²னியோ கா³மகாவாஸே வஸ்ஸங்வுட்டா² ஸாவத்தி²ங் அக³மங்ஸு. பி⁴க்கு²னியோ தா பி⁴க்கு²னியோ ஏதத³வோசுங் – ‘‘கத்தா²ய்யாயோ வஸ்ஸங்வுட்டா²? கச்சி ஓவாதோ³ இத்³தோ⁴ அஹோஸீ’’தி? ‘‘நத்த²ய்யே, தத்த² பி⁴க்கூ²; குதோ ஓவாதோ³ இத்³தோ⁴ ப⁴விஸ்ஸதீ’’தி! யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ அபி⁴க்கு²கே ஆவாஸே வஸ்ஸங் வஸிஸ்ஸந்தீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ அபி⁴க்கு²கே ஆவாஸே வஸ்ஸங் வஸந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே , பி⁴க்கு²னியோ அபி⁴க்கு²கே ஆவாஸே வஸ்ஸங் வஸிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1046. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulā bhikkhuniyo gāmakāvāse vassaṃvuṭṭhā sāvatthiṃ agamaṃsu. Bhikkhuniyo tā bhikkhuniyo etadavocuṃ – ‘‘katthāyyāyo vassaṃvuṭṭhā? Kacci ovādo iddho ahosī’’ti? ‘‘Natthayye, tattha bhikkhū; kuto ovādo iddho bhavissatī’’ti! Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo abhikkhuke āvāse vassaṃ vasissantī’’ti…pe… saccaṃ kira, bhikkhave, bhikkhuniyo abhikkhuke āvāse vassaṃ vasantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave , bhikkhuniyo abhikkhuke āvāse vassaṃ vasissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1047. ‘‘யா பன பி⁴க்கு²னீ அபி⁴க்கு²கே ஆவாஸே வஸ்ஸங் வஸெய்ய, பாசித்திய’’ந்தி.
1047.‘‘Yā pana bhikkhunī abhikkhuke āvāse vassaṃ vaseyya, pācittiya’’nti.
1048. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1048.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
அபி⁴க்கு²கோ நாம ஆவாஸோ ந ஸக்கா ஹோதி ஓவாதா³ய வா ஸங்வாஸாய வா க³ந்துங். ‘‘வஸ்ஸங் வஸிஸ்ஸாமீ’’தி ஸேனாஸனங் பஞ்ஞபேதி பானீயங் பரிபோ⁴ஜனீயங் உபட்ட²பேதி பரிவேணங் ஸம்மஜ்ஜதி, ஆபத்தி து³க்கடஸ்ஸ. ஸஹ அருணுக்³க³மனா ஆபத்தி பாசித்தியஸ்ஸ.
Abhikkhuko nāma āvāso na sakkā hoti ovādāya vā saṃvāsāya vā gantuṃ. ‘‘Vassaṃ vasissāmī’’ti senāsanaṃ paññapeti pānīyaṃ paribhojanīyaṃ upaṭṭhapeti pariveṇaṃ sammajjati, āpatti dukkaṭassa. Saha aruṇuggamanā āpatti pācittiyassa.
1049. அனாபத்தி வஸ்ஸுபக³தா பி⁴க்கூ² பக்கந்தா வா ஹொந்தி விப்³ப⁴ந்தா வா காலங்கதா வா பக்க²ஸங்கந்தா வா, ஆபதா³ஸு, உம்மத்திகாய, ஆதி³கம்மிகாயாதி.
1049. Anāpatti vassupagatā bhikkhū pakkantā vā honti vibbhantā vā kālaṅkatā vā pakkhasaṅkantā vā, āpadāsu, ummattikāya, ādikammikāyāti.
ச²ட்ட²ஸிக்கா²பத³ங் நிட்டி²தங்.
Chaṭṭhasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 6. ச²ட்ட²ஸிக்கா²பத³வண்ணனா • 6. Chaṭṭhasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மாதி³ஸிக்கா²பத³வண்ணனா • 1. Paṭhamādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 6. ச²ட்ட²ஸிக்கா²பத³ங் • 6. Chaṭṭhasikkhāpadaṃ
