| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
6. ச²ட்ட²ஸிக்கா²பத³ங்
6. Chaṭṭhasikkhāpadaṃ
1146. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன சண்ட³காளீ பி⁴க்கு²னீ பி⁴க்கு²னிஸங்க⁴ங் உபஸங்கமித்வா வுட்டா²பனஸம்முதிங் யாசதி. அத² கோ² பி⁴க்கு²னிஸங்கோ⁴ சண்ட³காளிங் பி⁴க்கு²னிங் பரிச்சி²ந்தி³த்வா – ‘‘அலங் தாவ தே, அய்யே, வுட்டா²பிதேனா’’தி, வுட்டா²பனஸம்முதிங் ந அதா³ஸி. சண்ட³காளீ பி⁴க்கு²னீ ‘ஸாதூ⁴’தி படிஸ்ஸுணி. தேன கோ² பன ஸமயேன பி⁴க்கு²னிஸங்கோ⁴ அஞ்ஞாஸங் பி⁴க்கு²னீனங் வுட்டா²பனஸம்முதிங் தே³தி. சண்ட³காளீ பி⁴க்கு²னீ உஜ்ஜா²யதி கி²ய்யதி விபாசேதி – ‘‘அஹமேவ நூன பா³லா, அஹமேவ நூன அலஜ்ஜினீ; யங் ஸங்கோ⁴ அஞ்ஞாஸங் பி⁴க்கு²னீனங் வுட்டா²பனஸம்முதிங் தே³தி, மய்ஹமேவ ந தே³தீ’’தி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா சண்ட³காளீ – ‘அலங் தாவ தே, அய்யே, வுட்டா²பிதேனா’தி வுச்சமானா ‘ஸாதூ⁴’தி படிஸ்ஸுணித்வா பச்சா² கீ²யனத⁴ம்மங் ஆபஜ்ஜிஸ்ஸதீ’’தி…பே॰… ஸச்சங் கிர, பி⁴க்க²வே, ‘சண்ட³காளீ பி⁴க்கு²னீ அலங் தாவ தே அய்யே வுட்டா²பிதேனா’தி வுச்சமானா ‘‘ஸாதூ⁴’’தி படிஸ்ஸுணித்வா பச்சா² கீ²யனத⁴ம்மங் ஆபஜ்ஜதீதி 1? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, சண்ட³காளீ பி⁴க்கு²னீ – ‘‘அலங் தாவ தே, அய்யே, வுட்டா²பிதேனா’’தி வுச்சமானா ‘ஸாதூ⁴’தி படிஸ்ஸுணித்வா பச்சா² கீ²யனத⁴ம்மங் ஆபஜ்ஜிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1146. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena caṇḍakāḷī bhikkhunī bhikkhunisaṅghaṃ upasaṅkamitvā vuṭṭhāpanasammutiṃ yācati. Atha kho bhikkhunisaṅgho caṇḍakāḷiṃ bhikkhuniṃ paricchinditvā – ‘‘alaṃ tāva te, ayye, vuṭṭhāpitenā’’ti, vuṭṭhāpanasammutiṃ na adāsi. Caṇḍakāḷī bhikkhunī ‘sādhū’ti paṭissuṇi. Tena kho pana samayena bhikkhunisaṅgho aññāsaṃ bhikkhunīnaṃ vuṭṭhāpanasammutiṃ deti. Caṇḍakāḷī bhikkhunī ujjhāyati khiyyati vipāceti – ‘‘ahameva nūna bālā, ahameva nūna alajjinī; yaṃ saṅgho aññāsaṃ bhikkhunīnaṃ vuṭṭhāpanasammutiṃ deti, mayhameva na detī’’ti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā caṇḍakāḷī – ‘alaṃ tāva te, ayye, vuṭṭhāpitenā’ti vuccamānā ‘sādhū’ti paṭissuṇitvā pacchā khīyanadhammaṃ āpajjissatī’’ti…pe… saccaṃ kira, bhikkhave, ‘caṇḍakāḷī bhikkhunī alaṃ tāva te ayye vuṭṭhāpitenā’ti vuccamānā ‘‘sādhū’’ti paṭissuṇitvā pacchā khīyanadhammaṃ āpajjatīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, caṇḍakāḷī bhikkhunī – ‘‘alaṃ tāva te, ayye, vuṭṭhāpitenā’’ti vuccamānā ‘sādhū’ti paṭissuṇitvā pacchā khīyanadhammaṃ āpajjissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1147. ‘‘யா பன பி⁴க்கு²னீ – ‘அலங் தாவ தே, அய்யே, வுட்டா²பிதேனா’தி வுச்சமானா ‘ஸாதூ⁴’தி படிஸ்ஸுணித்வா பச்சா² கீ²யனத⁴ம்மங் ஆபஜ்ஜெய்ய, பாசித்திய’’ந்தி.
1147.‘‘Yā pana bhikkhunī – ‘alaṃ tāva te, ayye, vuṭṭhāpitenā’ti vuccamānā ‘sādhū’tipaṭissuṇitvā pacchā khīyanadhammaṃ āpajjeyya, pācittiya’’nti.
1148. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1148.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
அலங் தாவ தே அய்யே வுட்டா²பிதேனாதி அலங் தாவ தே, அய்யே, உபஸம்பாதி³தேன. ‘ஸாதூ⁴’தி படிஸ்ஸுணித்வா பச்சா² கீ²யனத⁴ம்மங் ஆபஜ்ஜதி, ஆபத்தி பாசித்தியஸ்ஸ.
Alaṃ tāva te ayye vuṭṭhāpitenāti alaṃ tāva te, ayye, upasampāditena. ‘Sādhū’ti paṭissuṇitvā pacchā khīyanadhammaṃ āpajjati, āpatti pācittiyassa.
1149. அனாபத்தி பகதியா ச²ந்தா³ தோ³ஸா மோஹா ப⁴யா கரொந்தங் கி²ய்யதி, உம்மத்திகாய, ஆதி³கம்மிகாயாதி.
1149. Anāpatti pakatiyā chandā dosā mohā bhayā karontaṃ khiyyati, ummattikāya, ādikammikāyāti.
ச²ட்ட²ஸிக்கா²பத³ங் நிட்டி²தங்.
Chaṭṭhasikkhāpadaṃ niṭṭhitaṃ.
Footnotes:
Related texts:
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியாதி³ஸிக்கா²பத³வண்ணனா • 2. Dutiyādisikkhāpadavaṇṇanā
