| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga |
၆. ဆဋ္ဌသိက္ခာပဒံ
6. Chaṭṭhasikkhāpadaṃ
၁၀၉၅. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန ဘိက္ခုနိယော ပရိပုဏ္ဏဒ္ဝာဒသဝသ္သံ ဂိဟိဂတံ ဒ္ဝေ ဝသ္သာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေန္တိ။ တာ ဗာလာ ဟောန္တိ အဗ္ယတ္တာ န ဇာနန္တိ ကပ္ပိယံ ဝာ အကပ္ပိယံ ဝာ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခုနိယော ပရိပုဏ္ဏဒ္ဝာဒသဝသ္သံ ဂိဟိဂတံ ဒ္ဝေ ဝသ္သာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေသ္သန္တီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနိယော ပရိပုဏ္ဏဒ္ဝာဒသဝသ္သံ ဂိဟိဂတံ ဒ္ဝေ ဝသ္သာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေန္တီတိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ, ဘိက္ခုနိယော ပရိပုဏ္ဏဒ္ဝာဒသဝသ္သံ ဂိဟိဂတံ ဒ္ဝေ ဝသ္သာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေသ္သန္တိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဝိဂရဟိတ္ဝာ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ပရိပုဏ္ဏဒ္ဝာဒသဝသ္သာယ ဂိဟိဂတာယ ဒ္ဝေ ဝသ္သာနိ ဆသု ဓမ္မေသု သိက္ခာသမ္မုတိံ ဒာတုံ။ ဧဝဉ္စ ပန, ဘိက္ခဝေ, ဒာတဗ္ဗာ။ တာယ ပရိပုဏ္ဏဒ္ဝာဒသဝသ္သာယ ဂိဟိဂတာယ သင္ဃံ ဥပသင္ကမိတ္ဝာ ဧကံသံ ဥတ္တရာသင္ဂံ ကရိတ္ဝာ ဘိက္ခုနီနံ ပာဒေ ဝန္ဒိတ္ဝာ ဥက္ကုဋိကံ နိသီဒိတ္ဝာ အဉ္ဇလိံ ပဂ္ဂဟေတ္ဝာ ဧဝမသ္သ ဝစနီယော – အဟံ, အယ္ယေ, ဣတ္ထန္နာမာ ဣတ္ထန္နာမာယ အယ္ယာယ ပရိပုဏ္ဏဒ္ဝာဒသဝသ္သာ ဂိဟိဂတာ သင္ဃံ ဒ္ဝေ ဝသ္သာနိ ဆသု ဓမ္မေသု သိက္ခာသမ္မုတိံ ယာစာမီ’’တိ။ ဒုတိယမ္ပိ ယာစိတဗ္ဗာ။ တတိယမ္ပိ ယာစိတဗ္ဗာ။ ဗ္ယတ္တာယ ဘိက္ခုနိယာ ပဋိဗလာယ သင္ဃော ဉာပေတဗ္ဗော –
1095. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo paripuṇṇadvādasavassaṃ gihigataṃ dve vassāni chasu dhammesu asikkhitasikkhaṃ vuṭṭhāpenti. Tā bālā honti abyattā na jānanti kappiyaṃ vā akappiyaṃ vā. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo paripuṇṇadvādasavassaṃ gihigataṃ dve vassāni chasu dhammesu asikkhitasikkhaṃ vuṭṭhāpessantī’’ti…pe… saccaṃ kira, bhikkhave, bhikkhuniyo paripuṇṇadvādasavassaṃ gihigataṃ dve vassāni chasu dhammesu asikkhitasikkhaṃ vuṭṭhāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo paripuṇṇadvādasavassaṃ gihigataṃ dve vassāni chasu dhammesu asikkhitasikkhaṃ vuṭṭhāpessanti! Netaṃ, bhikkhave, appasannānaṃ vā pasādāya…pe… vigarahitvā dhammiṃ kathaṃ katvā bhikkhū āmantesi – ‘‘anujānāmi, bhikkhave, paripuṇṇadvādasavassāya gihigatāya dve vassāni chasu dhammesu sikkhāsammutiṃ dātuṃ. Evañca pana, bhikkhave, dātabbā. Tāya paripuṇṇadvādasavassāya gihigatāya saṅghaṃ upasaṅkamitvā ekaṃsaṃ uttarāsaṅgaṃ karitvā bhikkhunīnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ahaṃ, ayye, itthannāmā itthannāmāya ayyāya paripuṇṇadvādasavassā gihigatā saṅghaṃ dve vassāni chasu dhammesu sikkhāsammutiṃ yācāmī’’ti. Dutiyampi yācitabbā. Tatiyampi yācitabbā. Byattāya bhikkhuniyā paṭibalāya saṅgho ñāpetabbo –
၁၀၉၆. ‘‘သုဏာတု မေ, အယ္ယေ, သင္ဃော။ အယံ ဣတ္ထန္နာမာ ဣတ္ထန္နာမာယ အယ္ယာယ ပရိပုဏ္ဏဒ္ဝာဒသဝသ္သာ ဂိဟိဂတာ သင္ဃံ ဒ္ဝေ ဝသ္သာနိ ဆသု ဓမ္မေသု သိက္ခာသမ္မုတိံ ယာစတိ။ ယဒိ သင္ဃသ္သ ပတ္တကလ္လံ သင္ဃော ဣတ္ထန္နာမာယ ပရိပုဏ္ဏဒ္ဝာဒသဝသ္သာယ ဂိဟိဂတာယ ဒ္ဝေ ဝသ္သာနိ ဆသု ဓမ္မေသု သိက္ခာသမ္မုတိံ ဒဒေယ္ယ။ ဧသာ ဉတ္တိ။
1096. ‘‘Suṇātu me, ayye, saṅgho. Ayaṃ itthannāmā itthannāmāya ayyāya paripuṇṇadvādasavassā gihigatā saṅghaṃ dve vassāni chasu dhammesu sikkhāsammutiṃ yācati. Yadi saṅghassa pattakallaṃ saṅgho itthannāmāya paripuṇṇadvādasavassāya gihigatāya dve vassāni chasu dhammesu sikkhāsammutiṃ dadeyya. Esā ñatti.
‘‘သုဏာတု မေ, အယ္ယေ, သင္ဃော။ အယံ ဣတ္ထန္နာမာ ဣတ္ထန္နာမာယ အယ္ယာယ ပရိပုဏ္ဏဒ္ဝာဒသဝသ္သာ ဂိဟိဂတာ သင္ဃံ ဒ္ဝေ ဝသ္သာနိ ဆသု ဓမ္မေသု သိက္ခာသမ္မုတိံ ယာစတိ။ သင္ဃော ဣတ္ထန္နာမာယ ပရိပုဏ္ဏဒ္ဝာဒသဝသ္သာယ ဂိဟိဂတာယ ဒ္ဝေ ဝသ္သာနိ ဆသု ဓမ္မေသု သိက္ခာသမ္မုတိံ ဒေတိ။ ယသ္သာ အယ္ယာယ ခမတိ ဣတ္ထန္နာမာယ ပရိပုဏ္ဏဒ္ဝာဒသဝသ္သာယ ဂိဟိဂတာယ ဒ္ဝေ ဝသ္သာနိ ဆသု ဓမ္မေသု သိက္ခာသမ္မုတိယာ ဒာနံ, သာ တုဏ္ဟသ္သ; ယသ္သာ နက္ခမတိ, သာ ဘာသေယ္ယ။
‘‘Suṇātu me, ayye, saṅgho. Ayaṃ itthannāmā itthannāmāya ayyāya paripuṇṇadvādasavassā gihigatā saṅghaṃ dve vassāni chasu dhammesu sikkhāsammutiṃ yācati. Saṅgho itthannāmāya paripuṇṇadvādasavassāya gihigatāya dve vassāni chasu dhammesu sikkhāsammutiṃ deti. Yassā ayyāya khamati itthannāmāya paripuṇṇadvādasavassāya gihigatāya dve vassāni chasu dhammesu sikkhāsammutiyā dānaṃ, sā tuṇhassa; yassā nakkhamati, sā bhāseyya.
‘‘ဒိန္နာ သင္ဃေန ဣတ္ထန္နာမာယ ပရိပုဏ္ဏဒ္ဝာဒသဝသ္သာယ ဂိဟိဂတာယ ဒ္ဝေ ဝသ္သာနိ ဆသု ဓမ္မေသု သိက္ခာသမ္မုတိ။ ခမတိ သင္ဃသ္သ, တသ္မာ တုဏ္ဟီ, ဧဝမေတံ ဓာရယာမီ’’တိ။
‘‘Dinnā saṅghena itthannāmāya paripuṇṇadvādasavassāya gihigatāya dve vassāni chasu dhammesu sikkhāsammuti. Khamati saṅghassa, tasmā tuṇhī, evametaṃ dhārayāmī’’ti.
သာ ပရိပုဏ္ဏဒ္ဝာဒသဝသ္သာ ဂိဟိဂတာ ဧဝံ ဝဒေဟီတိ ဝတ္တဗ္ဗာ – ‘‘ပာဏာတိပာတာ ဝေရမဏိံ ဒ္ဝေ ဝသ္သာနိ အဝီတိက္ကမ္မ သမာဒာနံ သမာဒိယာမိ။ပေ.။ ဝိကာလဘောဇနာ ဝေရမဏိံ ဒ္ဝေ ဝသ္သာနိ အဝီတိက္ကမ္မ သမာဒာနံ သမာဒိယာမီ’’တိ။
Sā paripuṇṇadvādasavassā gihigatā evaṃ vadehīti vattabbā – ‘‘pāṇātipātā veramaṇiṃ dve vassāni avītikkamma samādānaṃ samādiyāmi…pe… vikālabhojanā veramaṇiṃ dve vassāni avītikkamma samādānaṃ samādiyāmī’’ti.
အထ ခော ဘဂဝာ တာ ဘိက္ခုနိယော အနေကပရိယာယေန ဝိဂရဟိတ္ဝာ ဒုဗ္ဘရတာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
Atha kho bhagavā tā bhikkhuniyo anekapariyāyena vigarahitvā dubbharatāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
၁၀၉၇. ‘‘ယာ ပန ဘိက္ခုနီ ပရိပုဏ္ဏဒ္ဝာဒသဝသ္သံ ဂိဟိဂတံ ဒ္ဝေ ဝသ္သာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေယ္ယ, ပာစိတ္တိယ’’န္တိ။
1097.‘‘Yā pana bhikkhunī paripuṇṇadvādasavassaṃ gihigataṃ dve vassāni chasu dhammesu asikkhitasikkhaṃ vuṭṭhāpeyya, pācittiya’’nti.
၁၀၉၈. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။
1098.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ပရိပုဏ္ဏဒ္ဝာဒသဝသ္သာ နာမ ပတ္တဒ္ဝာဒသဝသ္သာ။ ဂိဟိဂတာ နာမ ပုရိသန္တရဂတာ ဝုစ္စတိ။ ဒ္ဝေ ဝသ္သာနီတိ ဒ္ဝေ သံဝစ္ဆရာနိ။ အသိက္ခိတသိက္ခာ နာမ သိက္ခာ ဝာ န ဒိန္နာ ဟောတိ, ဒိန္နာ ဝာ သိက္ခာ ကုပိတာ။ ဝုဋ္ဌာပေယ္ယာတိ ဥပသမ္ပာဒေယ္ယ။
Paripuṇṇadvādasavassā nāma pattadvādasavassā. Gihigatā nāma purisantaragatā vuccati. Dve vassānīti dve saṃvaccharāni. Asikkhitasikkhā nāma sikkhā vā na dinnā hoti, dinnā vā sikkhā kupitā. Vuṭṭhāpeyyāti upasampādeyya.
‘‘ဝုဋ္ဌာပေသ္သာမီ’’တိ ဂဏံ ဝာ အာစရိနိံ ဝာ ပတ္တံ ဝာ စီဝရံ ဝာ ပရိယေသတိ, သီမံ ဝာ သမ္မန္နတိ, အာပတ္တိ ဒုက္ကဋသ္သ။ ဉတ္တိယာ ဒုက္ကဋံ။ ဒ္ဝီဟိ ကမ္မဝာစာဟိ ဒုက္ကဋာ။ ကမ္မဝာစာပရိယောသာနေ ဥပဇ္ဈာယာယ အာပတ္တိ ပာစိတ္တိယသ္သ။ ဂဏသ္သ စ အာစရိနိယာ စ အာပတ္တိ ဒုက္ကဋသ္သ။
‘‘Vuṭṭhāpessāmī’’ti gaṇaṃ vā ācariniṃ vā pattaṃ vā cīvaraṃ vā pariyesati, sīmaṃ vā sammannati, āpatti dukkaṭassa. Ñattiyā dukkaṭaṃ. Dvīhi kammavācāhi dukkaṭā. Kammavācāpariyosāne upajjhāyāya āpatti pācittiyassa. Gaṇassa ca ācariniyā ca āpatti dukkaṭassa.
၁၀၉၉. ဓမ္မကမ္မေ ဓမ္မကမ္မသညာ ဝုဋ္ဌာပေတိ, အာပတ္တိ ပာစိတ္တိယသ္သ။ ဓမ္မကမ္မေ ဝေမတိကာ ဝုဋ္ဌာပေတိ, အာပတ္တိ ပာစိတ္တိယသ္သ။ ဓမ္မကမ္မေ အဓမ္မကမ္မသညာ ဝုဋ္ဌာပေတိ, အာပတ္တိ ပာစိတ္တိယသ္သ။
1099. Dhammakamme dhammakammasaññā vuṭṭhāpeti, āpatti pācittiyassa. Dhammakamme vematikā vuṭṭhāpeti, āpatti pācittiyassa. Dhammakamme adhammakammasaññā vuṭṭhāpeti, āpatti pācittiyassa.
အဓမ္မကမ္မေ ဓမ္မကမ္မသညာ ဝုဋ္ဌာပေတိ, အာပတ္တိ ဒုက္ကဋသ္သ။ အဓမ္မကမ္မေ ဝေမတိကာ ဝုဋ္ဌာပေတိ, အာပတ္တိ ဒုက္ကဋသ္သ။ အဓမ္မကမ္မေ အဓမ္မကမ္မသညာ ဝုဋ္ဌာပေတိ, အာပတ္တိ ဒုက္ကဋသ္သ။
Adhammakamme dhammakammasaññā vuṭṭhāpeti, āpatti dukkaṭassa. Adhammakamme vematikā vuṭṭhāpeti, āpatti dukkaṭassa. Adhammakamme adhammakammasaññā vuṭṭhāpeti, āpatti dukkaṭassa.
၁၁၀၀. အနာပတ္တိ ပရိပုဏ္ဏဒ္ဝာဒသဝသ္သံ ဂိဟိဂတံ ဒ္ဝေ ဝသ္သာနိ ဆသု ဓမ္မေသု သိက္ခိတသိက္ခံ ဝုဋ္ဌာပေတိ, ဥမ္မတ္တိကာယ, အာဒိကမ္မိကာယာတိ။
1100. Anāpatti paripuṇṇadvādasavassaṃ gihigataṃ dve vassāni chasu dhammesu sikkhitasikkhaṃ vuṭṭhāpeti, ummattikāya, ādikammikāyāti.
ဆဋ္ဌသိက္ခာပဒံ နိဋ္ဌိတံ။
Chaṭṭhasikkhāpadaṃ niṭṭhitaṃ.
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၆. ဆဋ္ဌသိက္ခာပဒဝဏ္ဏနာ • 6. Chaṭṭhasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၁. ပဌမာဒိသိက္ခာပဒဝဏ္ဏနာ • 1. Paṭhamādisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၅-၉. ပဉ္စမာဒိသိက္ခာပဒံ • 5-9. Pañcamādisikkhāpadaṃ
