| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
6. ඡට්‌ඨසික්‌ඛාපදං
6. Chaṭṭhasikkhāpadaṃ
815. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ආරොහන්‌තො නාම මහාමත්‌තො භික්‌ඛූසු පබ්‌බජිතො හොති. තස්‌ස පුරාණදුතියිකා භික්‌ඛුනීසු පබ්‌බජිතා හොති. තෙන ඛො පන සමයෙන සො භික්‌ඛු තස්‌සා භික්‌ඛුනියා සන්‌තිකෙ භත්‌තවිස්‌සග්‌ගං කරොති. අථ ඛො සා භික්‌ඛුනී තස්‌ස භික්‌ඛුනො භුඤ්‌ජන්‌තස්‌ස පානීයෙන ච විධූපනෙන ච උපතිට්‌ඨිත්‌වා අච්‌චාවදති. අථ ඛො සො භික්‌ඛු තං භික්‌ඛුනිං අපසාදෙති – ‘‘මා, භගිනි, එවරූපං අකාසි. නෙතං කප්‌පතී’’ති. ‘‘පුබ්‌බෙ මං ත්‌වං එවඤ්‌ච එවඤ්‌ච කරොසි, ඉදානි එත්‌තකං න සහසී’’ති – පානීයථාලකං මත්‌ථකෙ ආසුම්‌භිත්‌වා විධූපනෙන පහාරං අදාසි. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛුනී භික්‌ඛුස්‌ස පහාරං දස්‌සතී’’ති…පෙ.… සච්‌චං කිර, භික්‌ඛවෙ, භික්‌ඛුනී භික්‌ඛුස්‌ස පහාරං අදාසීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, භික්‌ඛුනී භික්‌ඛුස්‌ස පහාරං දස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
815. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena ārohanto nāma mahāmatto bhikkhūsu pabbajito hoti. Tassa purāṇadutiyikā bhikkhunīsu pabbajitā hoti. Tena kho pana samayena so bhikkhu tassā bhikkhuniyā santike bhattavissaggaṃ karoti. Atha kho sā bhikkhunī tassa bhikkhuno bhuñjantassa pānīyena ca vidhūpanena ca upatiṭṭhitvā accāvadati. Atha kho so bhikkhu taṃ bhikkhuniṃ apasādeti – ‘‘mā, bhagini, evarūpaṃ akāsi. Netaṃ kappatī’’ti. ‘‘Pubbe maṃ tvaṃ evañca evañca karosi, idāni ettakaṃ na sahasī’’ti – pānīyathālakaṃ matthake āsumbhitvā vidhūpanena pahāraṃ adāsi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī bhikkhussa pahāraṃ dassatī’’ti…pe… saccaṃ kira, bhikkhave, bhikkhunī bhikkhussa pahāraṃ adāsīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī bhikkhussa pahāraṃ dassati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
816. ‘‘යා පන භික්‌ඛුනී භික්‌ඛුස්‌ස භුඤ්‌ජන්‌තස්‌ස පානීයෙන වා විධූපනෙන වා උපතිට්‌ඨෙය්‍ය, පාචිත්‌තිය’’න්‌ති.
816.‘‘Yā pana bhikkhunī bhikkhussa bhuñjantassa pānīyena vā vidhūpanena vā upatiṭṭheyya, pācittiya’’nti.
817. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
817.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
භික්‌ඛුස්‌සාති උපසම්‌පන්‌නස්‌ස.
Bhikkhussāti upasampannassa.
භුඤ්‌ජන්‌තස්‌සාති පඤ්‌චන්‌නං භොජනානං අඤ්‌ඤතරං භොජනං භුඤ්‌ජන්‌තස්‌ස.
Bhuñjantassāti pañcannaṃ bhojanānaṃ aññataraṃ bhojanaṃ bhuñjantassa.
පානීයං නාම යං කිඤ්‌චි පානීයං.
Pānīyaṃ nāma yaṃ kiñci pānīyaṃ.
විධූපනං නාම යා කාචි බීජනී.
Vidhūpanaṃ nāma yā kāci bījanī.
උපතිට්‌ඨෙය්‍යාති හත්‌ථපාසෙ තිට්‌ඨති, ආපත්‌ති පාචිත්‌තියස්‌ස.
Upatiṭṭheyyāti hatthapāse tiṭṭhati, āpatti pācittiyassa.
818. උපසම්‌පන්‌නෙ උපසම්‌පන්‌නසඤ්‌ඤා පානීයෙන වා විධූපනෙන වා උපතිට්‌ඨති, ආපත්‌ති පාචිත්‌තියස්‌ස. උපසම්‌පන්‌නෙ වෙමතිකා පානීයෙන වා විධූපනෙන වා උපතිට්‌ඨති, ආපත්‌ති පාචිත්‌තියස්‌ස. උපසම්‌පන්‌නෙ අනුපසම්‌පන්‌නසඤ්‌ඤා පානීයෙන වා විධූපනෙන වා උපතිට්‌ඨති, ආපත්‌ති පාචිත්‌තියස්‌ස.
818. Upasampanne upasampannasaññā pānīyena vā vidhūpanena vā upatiṭṭhati, āpatti pācittiyassa. Upasampanne vematikā pānīyena vā vidhūpanena vā upatiṭṭhati, āpatti pācittiyassa. Upasampanne anupasampannasaññā pānīyena vā vidhūpanena vā upatiṭṭhati, āpatti pācittiyassa.
හත්‌ථපාසං විජහිත්‌වා උපතිට්‌ඨති, ආපත්‌ති දුක්‌කටස්‌ස. ඛාදනීයං ඛාදන්‌තස්‌ස උපතිට්‌ඨති, ආපත්‌ති දුක්‌කටස්‌ස. අනුපසම්‌පන්‌නස්‌ස උපතිට්‌ඨති, ආපත්‌ති දුක්‌කටස්‌ස. අනුපසම්‌පන්‌නෙ උපසම්‌පන්‌නසඤ්‌ඤා, ආපත්‌ති දුක්‌කටස්‌ස. අනුපසම්‌පන්‌නෙ වෙමතිකා, ආපත්‌ති දුක්‌කටස්‌ස. අනුපසම්‌පන්‌නෙ අනුපසම්‌පන්‌නසඤ්‌ඤා, ආපත්‌ති දුක්‌කටස්‌ස.
Hatthapāsaṃ vijahitvā upatiṭṭhati, āpatti dukkaṭassa. Khādanīyaṃ khādantassa upatiṭṭhati, āpatti dukkaṭassa. Anupasampannassa upatiṭṭhati, āpatti dukkaṭassa. Anupasampanne upasampannasaññā, āpatti dukkaṭassa. Anupasampanne vematikā, āpatti dukkaṭassa. Anupasampanne anupasampannasaññā, āpatti dukkaṭassa.
819. අනාපත්‌ති දෙති, දාපෙති, අනුපසම්‌පන්‌නං ආණාපෙති, උම්‌මත්‌තිකාය, ආදිකම්‌මිකායාති.
819. Anāpatti deti, dāpeti, anupasampannaṃ āṇāpeti, ummattikāya, ādikammikāyāti.
ඡට්‌ඨසික්‌ඛාපදං නිට්‌ඨිතං.
Chaṭṭhasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 6. ඡට්‌ඨසික්‌ඛාපදවණ්‌ණනා • 6. Chaṭṭhasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 1. ලසුණවග්‌ගවණ්‌ණනා • 1. Lasuṇavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 5. පඤ්‌චමසික්‌ඛාපදවණ්‌ණනා • 5. Pañcamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමලසුණාදිසික්‌ඛාපදවණ්‌ණනා • 1. Paṭhamalasuṇādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 6. ඡට්‌ඨසික්‌ඛාපදං • 6. Chaṭṭhasikkhāpadaṃ
