| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
6. ඡට්‌ඨසික්‌ඛාපදං
6. Chaṭṭhasikkhāpadaṃ
859. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ථුල්‌ලනන්‌දා භික්‌ඛුනී පච්‌ඡාභත්‌තං කුලානි උපසඞ්‌කමිත්‌වා සාමිකෙ අනාපුච්‌ඡා ආසනෙ අභිනිසීදතිපි අභිනිපජ්‌ජතිපි. මනුස්‌සා ථුල්‌ලනන්‌දං භික්‌ඛුනිං හිරීයමානා ආසනෙ නෙව අභිනිසීදන්‌ති න අභිනිපජ්‌ජන්‌ති. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා පච්‌ඡාභත්‌තං කුලානි උපසඞ්‌කමිත්‌වා සාමිකෙ අනාපුච්‌ඡා ආසනෙ අභිනිසීදිස්‌සතිපි අභිනිපජ්‌ජිස්‌සතිපී’’ති! අස්‌සොසුං ඛො භික්‌ඛුනියො තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා පච්‌ඡාභත්‌තං කුලානි උපසඞ්‌කමිත්‌වා සාමිකෙ අනාපුච්‌ඡා ආසනෙ අභිනිසීදිස්‌සතිපි අභිනිපජ්‌ජිස්‌සතිපී’’ති…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී පච්‌ඡාභත්‌තං කුලානි උපසඞ්‌කමිත්‌වා සාමිකෙ අනාපුච්‌ඡා ආසනෙ අභිනිසීදතිපි අභිනිපජ්‌ජතිපීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ , ථුල්‌ලනන්‌දා භික්‌ඛුනී පච්‌ඡාභත්‌තං කුලානි උපසඞ්‌කමිත්‌වා සාමිකෙ අනාපුච්‌ඡා ආසනෙ අභිනිසීදිස්‌සතිපි අභිනිපජ්‌ජිස්‌සතිපි! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
859. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī pacchābhattaṃ kulāni upasaṅkamitvā sāmike anāpucchā āsane abhinisīdatipi abhinipajjatipi. Manussā thullanandaṃ bhikkhuniṃ hirīyamānā āsane neva abhinisīdanti na abhinipajjanti. Manussā ujjhāyanti khiyyanti vipācenti – ‘‘kathañhi nāma ayyā thullanandā pacchābhattaṃ kulāni upasaṅkamitvā sāmike anāpucchā āsane abhinisīdissatipi abhinipajjissatipī’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā pacchābhattaṃ kulāni upasaṅkamitvā sāmike anāpucchā āsane abhinisīdissatipi abhinipajjissatipī’’ti…pe… saccaṃ kira, bhikkhave, thullanandā bhikkhunī pacchābhattaṃ kulāni upasaṅkamitvā sāmike anāpucchā āsane abhinisīdatipi abhinipajjatipīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave , thullanandā bhikkhunī pacchābhattaṃ kulāni upasaṅkamitvā sāmike anāpucchā āsane abhinisīdissatipi abhinipajjissatipi! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
860. ‘‘යා පන භික්‌ඛුනී පච්‌ඡාභත්‌තං කුලානි උපසඞ්‌කමිත්‌වා සාමිකෙ අනාපුච්‌ඡා ආසනෙ අභිනිසීදෙය්‍ය වා අභිනිපජ්‌ජෙය්‍ය වා, පාචිත්‌තිය’’න්‌ති.
860.‘‘Yā pana bhikkhunī pacchābhattaṃ kulāni upasaṅkamitvā sāmike anāpucchā āsane abhinisīdeyya vā abhinipajjeyya vā, pācittiya’’nti.
861. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
861.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
පච්‌ඡාභත්‌තං නාම මජ්‌ඣන්‌හිකෙ වීතිවත්‌තෙ යාව අත්‌ථඞ්‌ගතෙ සූරියෙ.
Pacchābhattaṃ nāma majjhanhike vītivatte yāva atthaṅgate sūriye.
කුලං නාම චත්‌තාරි කුලානි – ඛත්‌තියකුලං, බ්‍රාහ්‌මණකුලං, වෙස්‌සකුලං, සුද්‌දකුලං. උපසඞ්‌කමිත්‌වාති තත්‌ථ ගන්‌ත්‌වා.
Kulaṃ nāma cattāri kulāni – khattiyakulaṃ, brāhmaṇakulaṃ, vessakulaṃ, suddakulaṃ. Upasaṅkamitvāti tattha gantvā.
සාමිකෙ අනාපුච්‌ඡාති යො තස්‌මිං කුලෙ මනුස්‌සො සාමිකො දාතුං, තං අනාපුච්‌ඡා.
Sāmike anāpucchāti yo tasmiṃ kule manusso sāmiko dātuṃ, taṃ anāpucchā.
ආසනං නාම පල්‌ලඞ්‌කස්‌ස ඔකාසො වුච්‌චති.
Āsanaṃ nāma pallaṅkassa okāso vuccati.
අභිනිසීදෙය්‍යාති තස්‌මිං අභිනිසීදති, ආපත්‌ති පාචිත්‌තියස්‌ස.
Abhinisīdeyyāti tasmiṃ abhinisīdati, āpatti pācittiyassa.
අභිනිපජ්‌ජෙය්‍යාති තස්‌මිං අභිනිපජ්‌ජති, ආපත්‌ති පාචිත්‌තියස්‌ස.
Abhinipajjeyyāti tasmiṃ abhinipajjati, āpatti pācittiyassa.
862. අනාපුච්‌ඡිතෙ අනාපුච්‌ඡිතසඤ්‌ඤා ආසනෙ අභිනිසීදති වා අභිනිපජ්‌ජති වා, ආපත්‌ති පාචිත්‌තියස්‌ස. අනාපුච්‌ඡිතෙ වෙමතිකා ආසනෙ අභිනිසීදති වා අභිනිපජ්‌ජති වා, ආපත්‌ති පාචිත්‌තියස්‌ස. අනාපුච්‌ඡිතෙ ආපුච්‌ඡිතසඤ්‌ඤා ආසනෙ අභිනිසීදති වා අභිනිපජ්‌ජති වා, ආපත්‌ති පාචිත්‌තියස්‌ස.
862. Anāpucchite anāpucchitasaññā āsane abhinisīdati vā abhinipajjati vā, āpatti pācittiyassa. Anāpucchite vematikā āsane abhinisīdati vā abhinipajjati vā, āpatti pācittiyassa. Anāpucchite āpucchitasaññā āsane abhinisīdati vā abhinipajjati vā, āpatti pācittiyassa.
පල්‌ලඞ්‌කස්‌ස අනොකාසෙ ආපත්‌ති දුක්‌කටස්‌ස. ආපුච්‌ඡිතෙ අනාපුච්‌ඡිතසඤ්‌ඤා, ආපත්‌ති දුක්‌කටස්‌ස . ආපුච්‌ඡිතෙ වෙමතිකා, ආපත්‌ති දුක්‌කටස්‌ස. ආපුච්‌ඡිතෙ ආපුච්‌ඡිතසඤ්‌ඤා, අනාපත්‌ති.
Pallaṅkassa anokāse āpatti dukkaṭassa. Āpucchite anāpucchitasaññā, āpatti dukkaṭassa . Āpucchite vematikā, āpatti dukkaṭassa. Āpucchite āpucchitasaññā, anāpatti.
863. අනාපත්‌ති ආපුච්‌ඡා ආසනෙ අභිනිසීදති වා අභිනිපජ්‌ජති වා, ධුවපඤ්‌ඤත්‌තෙ, ගිලානාය, ආපදාසු, උම්‌මත්‌තිකාය, ආදිකම්‌මිකායාති.
863. Anāpatti āpucchā āsane abhinisīdati vā abhinipajjati vā, dhuvapaññatte, gilānāya, āpadāsu, ummattikāya, ādikammikāyāti.
ඡට්‌ඨසික්‌ඛාපදං නිට්‌ඨිතං.
Chaṭṭhasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 6. ඡට්‌ඨසික්‌ඛාපදවණ්‌ණනා • 6. Chaṭṭhasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 2. අන්‌ධකාරවග්‌ගවණ්‌ණනා • 2. Andhakāravaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 6. ඡට්‌ඨසික්‌ඛාපදවණ්‌ණනා • 6. Chaṭṭhasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 6. ඡට්‌ඨසික්‌ඛාපදං • 6. Chaṭṭhasikkhāpadaṃ
