| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
6. ඡට්‌ඨසික්‌ඛාපදං
6. Chaṭṭhasikkhāpadaṃ
999. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ථුල්‌ලනන්‌දා භික්‌ඛුනී නටානම්‌පි නටකානම්‌පි ලඞ්‌ඝකානම්‌පි සොකජ්‌ඣායිකානම්‌පි කුම්‌භථූණිකානම්‌පි සහත්‌ථා ඛාදනීයං භොජනීයං දෙති – ‘‘මය්‌හං පරිසති වණ්‌ණං භාසථා’’ති. නටාපි නටකාපි ලඞ්‌ඝකාපි සොකජ්‌ඣායිකාපි කුම්‌භථූණිකාපි ථුල්‌ලනන්‌දාය භික්‌ඛුනියා පරිසති වණ්‌ණං භාසන්‌ති – ‘‘අය්‍යා ථුල්‌ලනන්‌දා බහුස්‌සුතා භාණිකා විසාරදා පට්‌ටා ධම්‌මිං කථං කාතුං; දෙථ අය්‍යාය, කරොථ අය්‍යායා’’ති. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – කථඤ්‌හි නාම අය්‍යා ථුල්‌ලනන්‌දා අගාරිකස්‌ස සහත්‌ථා ඛාදනීයං භොජනීයං දස්‌සතීති…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී අගාරිකස්‌ස සහත්‌ථා ඛාදනීයං භොජනීයං දෙතීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී අගාරිකස්‌ස සහත්‌ථා ඛාදනීයං භොජනීයං දස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
999. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī naṭānampi naṭakānampi laṅghakānampi sokajjhāyikānampi kumbhathūṇikānampi sahatthā khādanīyaṃ bhojanīyaṃ deti – ‘‘mayhaṃ parisati vaṇṇaṃ bhāsathā’’ti. Naṭāpi naṭakāpi laṅghakāpi sokajjhāyikāpi kumbhathūṇikāpi thullanandāya bhikkhuniyā parisati vaṇṇaṃ bhāsanti – ‘‘ayyā thullanandā bahussutā bhāṇikā visāradā paṭṭā dhammiṃ kathaṃ kātuṃ; detha ayyāya, karotha ayyāyā’’ti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma ayyā thullanandā agārikassa sahatthā khādanīyaṃ bhojanīyaṃ dassatīti…pe… saccaṃ kira, bhikkhave, thullanandā bhikkhunī agārikassa sahatthā khādanīyaṃ bhojanīyaṃ detīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī agārikassa sahatthā khādanīyaṃ bhojanīyaṃ dassati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1000. ‘‘යා පන භික්‌ඛුනී අගාරිකස්‌ස වා පරිබ්‌බාජකස්‌ස වා පරිබ්‌බාජිකාය වා සහත්‌ථා ඛාදනීයං වා භොජනීයං වා දදෙය්‍ය, පාචිත්‌තිය’’න්‌ති.
1000.‘‘Yāpana bhikkhunī agārikassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dadeyya, pācittiya’’nti.
1001. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
1001.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
අගාරිකො නාම යො කොචි අගාරං අජ්‌ඣාවසති.
Agāriko nāma yo koci agāraṃ ajjhāvasati.
පරිබ්‌බාජකො නාම භික්‌ඛුඤ්‌ච සාමණෙරඤ්‌ච ඨපෙත්‌වා යො කොචි පරිබ්‌බාජකසමාපන්‌නො.
Paribbājako nāma bhikkhuñca sāmaṇerañca ṭhapetvā yo koci paribbājakasamāpanno.
පරිබ්‌බාජිකා නාම භික්‌ඛුනිඤ්‌ච සික්‌ඛමානඤ්‌ච සාමණෙරිඤ්‌ච ඨපෙත්‌වා යා කාචි පරිබ්‌බාජිකසමාපන්‌නා.
Paribbājikā nāma bhikkhuniñca sikkhamānañca sāmaṇeriñca ṭhapetvā yā kāci paribbājikasamāpannā.
ඛාදනීයං නාම පඤ්‌ච භොජනානි – උදකදන්‌තපොනං ඨපෙත්‌වා අවසෙසං ඛාදනීයං නාම.
Khādanīyaṃ nāma pañca bhojanāni – udakadantaponaṃ ṭhapetvā avasesaṃ khādanīyaṃ nāma.
භොජනීයං නාම පඤ්‌ච භොජනානි – ඔදනො, කුම්‌මාසො, සත්‌තු, මච්‌ඡො, මංසං.
Bhojanīyaṃ nāma pañca bhojanāni – odano, kummāso, sattu, maccho, maṃsaṃ.
දදෙය්‍යාති කායෙන වා කායපටිබද්‌ධෙන වා නිස්‌සග්‌ගියෙන වා දෙති, ආපත්‌ති පාචිත්‌තියස්‌ස. උදකදන්‌තපොනං දෙති, ආපත්‌ති දුක්‌කටස්‌ස.
Dadeyyāti kāyena vā kāyapaṭibaddhena vā nissaggiyena vā deti, āpatti pācittiyassa. Udakadantaponaṃ deti, āpatti dukkaṭassa.
1002. අනාපත්‌ති දාපෙති න දෙති, උපනික්‌ඛිපිත්‌වා දෙති, බාහිරාලෙපං දෙති, උම්‌මත්‌තිකාය, ආදිකම්‌මිකායාති.
1002. Anāpatti dāpeti na deti, upanikkhipitvā deti, bāhirālepaṃ deti, ummattikāya, ādikammikāyāti.
ඡට්‌ඨසික්‌ඛාපදං නිට්‌ඨිතං.
Chaṭṭhasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 6. ඡට්‌ඨසික්‌ඛාපදවණ්‌ණනා • 6. Chaṭṭhasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 6. ඡට්‌ඨසික්‌ඛාපදවණ්‌ණනා • 6. Chaṭṭhasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 6. ඡට්‌ඨසික්‌ඛාපදං • 6. Chaṭṭhasikkhāpadaṃ
