| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༦. ཚཊྛསིཀྑཱཔདཾ
6. Chaṭṭhasikkhāpadaṃ
༩༥༥. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཙཎྜཀཱལཱི༹ བྷིཀྑུནཱི སཾསཊྛཱ ཝིཧརཏི གཧཔཏིནཱཔི གཧཔཏིཔུཏྟེནཔི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཙཎྜཀཱལཱི༹ སཾསཊྛཱ ཝིཧརིསྶཏི གཧཔཏིནཱཔི གཧཔཏིཔུཏྟེནཔཱི’’ཏི…པེ॰… སཙྩཾ ཀིར, བྷིཀྑཝེ, ཙཎྜཀཱལཱི༹ བྷིཀྑུནཱི སཾསཊྛཱ ཝིཧརཏི གཧཔཏིནཱཔི གཧཔཏིཔུཏྟེནཔཱིཏི ? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ , ཙཎྜཀཱལཱི༹ བྷིཀྑུནཱི སཾསཊྛཱ ཝིཧརིསྶཏི གཧཔཏིནཱཔི གཧཔཏིཔུཏྟེནཔི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
955. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena caṇḍakāḷī bhikkhunī saṃsaṭṭhā viharati gahapatināpi gahapatiputtenapi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā caṇḍakāḷī saṃsaṭṭhā viharissati gahapatināpi gahapatiputtenapī’’ti…pe… saccaṃ kira, bhikkhave, caṇḍakāḷī bhikkhunī saṃsaṭṭhā viharati gahapatināpi gahapatiputtenapīti ? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave , caṇḍakāḷī bhikkhunī saṃsaṭṭhā viharissati gahapatināpi gahapatiputtenapi! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༩༥༦. ‘‘ཡཱ པན བྷིཀྑུནཱི སཾསཊྛཱ ཝིཧརེཡྻ གཧཔཏིནཱ ཝཱ གཧཔཏིཔུཏྟེན ཝཱ སཱ བྷིཀྑུནཱི བྷིཀྑུནཱིཧི ཨེཝམསྶ ཝཙནཱིཡཱ – ‘མཱཡྻེ, སཾསཊྛཱ ཝིཧརི གཧཔཏིནཱཔི གཧཔཏིཔུཏྟེནཔི། ཝིཝིཙྩཱཡྻེ; ཝིཝེཀཉྙེཝ བྷགིནིཡཱ སངྒྷོ ཝཎྞེཏཱི’ཏི། ཨེཝཉྩ 1 སཱ བྷིཀྑུནཱི བྷིཀྑུནཱིཧི ཝུཙྩམཱནཱ ཏཐེཝ པགྒཎྷེཡྻ, སཱ བྷིཀྑུནཱི བྷིཀྑུནཱིཧི ཡཱཝཏཏིཡཾ སམནུབྷཱསིཏབྦཱ ཏསྶ པཊིནིསྶགྒཱཡ། ཡཱཝཏཏིཡཉྩེ སམནུབྷཱསཱིཡམཱནཱ ཏཾ པཊིནིསྶཛྫེཡྻ, ཨིཙྩེཏཾ ཀུསལཾ; ནོ ཙེ པཊིནིསྶཛྫེཡྻ, པཱཙིཏྟིཡ’’ནྟི།
956.‘‘Yāpana bhikkhunī saṃsaṭṭhā vihareyya gahapatinā vā gahapatiputtena vā sā bhikkhunī bhikkhunīhi evamassa vacanīyā – ‘māyye, saṃsaṭṭhā vihari gahapatināpi gahapatiputtenapi. Viviccāyye; vivekaññeva bhaginiyā saṅgho vaṇṇetī’ti. Evañca 2 sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsīyamānā taṃ paṭinissajjeyya, iccetaṃ kusalaṃ; no ce paṭinissajjeyya, pācittiya’’nti.
༩༥༧. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
957.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
སཾསཊྛཱ ནཱམ ཨནནུལོམིཀེན ཀཱཡིཀཝཱཙསིཀེན སཾསཊྛཱ།
Saṃsaṭṭhā nāma ananulomikena kāyikavācasikena saṃsaṭṭhā.
གཧཔཏི ནཱམ ཡོ ཀོཙི ཨགཱརཾ ཨཛ྄ཛྷཱཝསཏི།
Gahapati nāma yo koci agāraṃ ajjhāvasati.
སཱ བྷིཀྑུནཱིཏི ཡཱ སཱ སཾསཊྛཱ བྷིཀྑུནཱི།
Sā bhikkhunīti yā sā saṃsaṭṭhā bhikkhunī.
བྷིཀྑུནཱིཧཱིཏི ཨཉྙཱཧི བྷིཀྑུནཱིཧི། ཡཱ པསྶནྟི ཡཱ སུཎནྟི ཏཱཧི ཝཏྟབྦཱ – ‘‘མཱཡྻེ, སཾསཊྛཱ ཝིཧརི གཧཔཏིནཱཔི གཧཔཏིཔུཏྟེནཔི། ཝིཝིཙྩཱཡྻེ; ཝིཝེཀཉྙེཝ བྷགིནིཡཱ སངྒྷོ ཝཎྞེཏཱི’’ཏི། དུཏིཡམྤི ཝཏྟབྦཱ། ཏཏིཡམྤི ཝཏྟབྦཱ། སཙེ པཊིནིསྶཛྫཏི, ཨིཙྩེཏཾ ཀུསལཾ; ནོ ཙེ པཊིནིསྶཛྫཏི, ཨཱཔཏྟི དུཀྐཊསྶ། སུཏྭཱ ན ཝདནྟི, ཨཱཔཏྟི དུཀྐཊསྶ། སཱ བྷིཀྑུནཱི སངྒྷམཛ྄ཛྷམྤི ཨཱཀཌྜྷིཏྭཱ ཝཏྟབྦཱ – ‘‘མཱཡྻེ , སཾསཊྛཱ ཝིཧརི གཧཔཏིནཱཔི གཧཔཏིཔུཏྟེནཔི། ཝིཝིཙྩཱཡྻེ; ཝིཝེཀཉྙེཝབྷགིནིཡཱ སངྒྷོ ཝཎྞེཏཱི’’ཏི། དུཏིཡམྤི ཝཏྟབྦཱ། ཏཏིཡམྤི ཝཏྟབྦཱ། སཙེ པཊིནིསྶཛྫཏི, ཨིཙྩེཏཾ ཀུསལཾ; ནོ ཙེ པཊིནིསྶཛྫཏི, ཨཱཔཏྟི དུཀྐཊསྶ། སཱ བྷིཀྑུནཱི སམནུབྷཱསིཏབྦཱ། ཨེཝཉྩ པན, བྷིཀྑཝེ, སམནུབྷཱསིཏབྦཱ། བྱཏྟཱཡ བྷིཀྑུནིཡཱ པཊིབལཱཡ སངྒྷོ ཉཱཔེཏབྦོ –
Bhikkhunīhīti aññāhi bhikkhunīhi. Yā passanti yā suṇanti tāhi vattabbā – ‘‘māyye, saṃsaṭṭhā vihari gahapatināpi gahapatiputtenapi. Viviccāyye; vivekaññeva bhaginiyā saṅgho vaṇṇetī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sutvā na vadanti, āpatti dukkaṭassa. Sā bhikkhunī saṅghamajjhampi ākaḍḍhitvā vattabbā – ‘‘māyye , saṃsaṭṭhā vihari gahapatināpi gahapatiputtenapi. Viviccāyye; vivekaññevabhaginiyā saṅgho vaṇṇetī’’ti. Dutiyampi vattabbā. Tatiyampi vattabbā. Sace paṭinissajjati, iccetaṃ kusalaṃ; no ce paṭinissajjati, āpatti dukkaṭassa. Sā bhikkhunī samanubhāsitabbā. Evañca pana, bhikkhave, samanubhāsitabbā. Byattāya bhikkhuniyā paṭibalāya saṅgho ñāpetabbo –
༩༥༨. ‘‘སུཎཱཏུ མེ, ཨཡྻེ, སངྒྷོ། ཨཡཾ ཨིཏྠནྣཱམཱ བྷིཀྑུནཱི སཾསཊྛཱ ཝིཧརཏི གཧཔཏིནཱཔི གཧཔཏིཔུཏྟེནཔི། སཱ ཏཾ ཝཏྠུཾ ན པཊིནིསྶཛྫཏི། ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཾ བྷིཀྑུནིཾ སམནུབྷཱསེཡྻ ཏསྶ ཝཏྠུསྶ པཊིནིསྶགྒཱཡ། ཨེསཱ ཉཏྟི།
958. ‘‘Suṇātu me, ayye, saṅgho. Ayaṃ itthannāmā bhikkhunī saṃsaṭṭhā viharati gahapatināpi gahapatiputtenapi. Sā taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuniṃ samanubhāseyya tassa vatthussa paṭinissaggāya. Esā ñatti.
‘‘སུཎཱཏུ མེ, ཨཡྻེ, སངྒྷོ། ཨཡཾ ཨིཏྠནྣཱམཱ བྷིཀྑུནཱི སཾསཊྛཱ ཝིཧརཏི གཧཔཏིནཱཔི གཧཔཏིཔུཏྟེནཔི། སཱ ཏཾ ཝཏྠུཾ ན པཊིནིསྶཛྫཏི། སངྒྷོ ཨིཏྠནྣཱམཾ བྷིཀྑུནིཾ སམནུབྷཱསཏི ཏསྶ ཝཏྠུསྶ པཊིནིསྶགྒཱཡ། ཡསྶཱ ཨཡྻཱཡ ཁམཏི ཨིཏྠནྣཱམཱཡ བྷིཀྑུནིཡཱ སམནུབྷཱསནཱ ཏསྶ ཝཏྠུསྶ པཊིནིསྶགྒཱཡ, སཱ ཏུཎྷསྶ; ཡསྶཱ ནཀྑམཏི, སཱ བྷཱསེཡྻ།
‘‘Suṇātu me, ayye, saṅgho. Ayaṃ itthannāmā bhikkhunī saṃsaṭṭhā viharati gahapatināpi gahapatiputtenapi. Sā taṃ vatthuṃ na paṭinissajjati. Saṅgho itthannāmaṃ bhikkhuniṃ samanubhāsati tassa vatthussa paṭinissaggāya. Yassā ayyāya khamati itthannāmāya bhikkhuniyā samanubhāsanā tassa vatthussa paṭinissaggāya, sā tuṇhassa; yassā nakkhamati, sā bhāseyya.
‘‘དུཏིཡམྤི ཨེཏམཏྠཾ ཝདཱམི…པེ॰… ཏཏིཡམྤི ཨེཏམཏྠཾ ཝདཱམི…པེ॰…།
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘སམནུབྷཊྛཱ སངྒྷེན ཨིཏྠནྣཱམཱ བྷིཀྑུནཱི ཏསྶ ཝཏྠུསྶ པཊིནིསྶགྒཱཡ; ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Samanubhaṭṭhā saṅghena itthannāmā bhikkhunī tassa vatthussa paṭinissaggāya; khamati saṅghassa, tasmā tuṇhī, evametaṃ dhārayāmī’’ti.
ཉཏྟིཡཱ དུཀྐཊཾ། དྭཱིཧི ཀམྨཝཱཙཱཧི དུཀྐཊཱ། ཀམྨཝཱཙཱཔརིཡོསཱནེ ཨཱཔཏྟི པཱཙིཏྟིཡསྶ།
Ñattiyā dukkaṭaṃ. Dvīhi kammavācāhi dukkaṭā. Kammavācāpariyosāne āpatti pācittiyassa.
༩༥༩. དྷམྨཀམྨེ དྷམྨཀམྨསཉྙཱ ན པཊིནིསྶཛྫཏི, ཨཱཔཏྟི པཱཙིཏྟིཡསྶ། དྷམྨཀམྨེ ཝེམཏིཀཱ ན པཊིནིསྶཛྫཏི, ཨཱཔཏྟི པཱཙིཏྟིཡསྶ། དྷམྨཀམྨེ ཨདྷམྨཀམྨསཉྙཱ ན པཊིནིསྶཛྫཏི, ཨཱཔཏྟི པཱཙིཏྟིཡསྶ།
959. Dhammakamme dhammakammasaññā na paṭinissajjati, āpatti pācittiyassa. Dhammakamme vematikā na paṭinissajjati, āpatti pācittiyassa. Dhammakamme adhammakammasaññā na paṭinissajjati, āpatti pācittiyassa.
ཨདྷམྨཀམྨེ དྷམྨཀམྨསཉྙཱ, ཨཱཔཏྟི དུཀྐཊསྶ། ཨདྷམྨཀམྨེ ཝེམཏིཀཱ, ཨཱཔཏྟི དུཀྐཊསྶ། ཨདྷམྨཀམྨེ ཨདྷམྨཀམྨསཉྙཱ, ཨཱཔཏྟི དུཀྐཊསྶ།
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
༩༦༠. ཨནཱཔཏྟི ཨསམནུབྷཱསནྟིཡཱ, པཊིནིསྶཛྫནྟིཡཱ, ཨུམྨཏྟིཀཱཡ, ཨཱདིཀམྨིཀཱཡཱཏི།
960. Anāpatti asamanubhāsantiyā, paṭinissajjantiyā, ummattikāya, ādikammikāyāti.
ཚཊྛསིཀྑཱཔདཾ ནིཊྛིཏཾ།
Chaṭṭhasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༦. ཚཊྛསིཀྑཱཔདཝཎྞནཱ • 6. Chaṭṭhasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༦. ཚཊྛསིཀྑཱཔདཝཎྞནཱ • 6. Chaṭṭhasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༦-༩. ཚཊྛཱདིསིཀྑཱཔདཾ • 6-9. Chaṭṭhādisikkhāpadaṃ
