| Library / Tipiṭaka / তিপিটক • Tipiṭaka / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā |
৬. ছট্ঠসিক্খাপদৰণ্ণনা
6. Chaṭṭhasikkhāpadavaṇṇanā
৮১৫. ছট্ঠে – ভত্তৰিস্সগ্গন্তি ভত্তকিচ্চং। পানীযেন চ ৰিধূপনেন চ উপতিট্ঠিত্ৰাতি একেন হত্থেন পানীযথালকং একেন বীজনিং গহেত্ৰা বীজমানা সমীপে ঠত্ৰাতি অত্থো। অচ্চাৰদতীতি পুব্বেপি তুম্হে এৰং ভুঞ্জথ, অহং এৰং উপট্ঠানং করোমী’’তি পব্বজিতচারিত্তং অতিক্কমিত্ৰা গেহস্সিতকথং কথেতীতি অত্থো।
815. Chaṭṭhe – bhattavissagganti bhattakiccaṃ. Pānīyena ca vidhūpanena ca upatiṭṭhitvāti ekena hatthena pānīyathālakaṃ ekena bījaniṃ gahetvā bījamānā samīpe ṭhatvāti attho. Accāvadatīti pubbepi tumhe evaṃ bhuñjatha, ahaṃ evaṃ upaṭṭhānaṃ karomī’’ti pabbajitacārittaṃ atikkamitvā gehassitakathaṃ kathetīti attho.
৮১৭. যংকিঞ্চি পানীযন্তি সুদ্ধউদকং ৰা হোতু, তক্কদধিমত্থুরসখীরাদীনং ৰা অঞ্ঞতরং। যা কাচি বীজনীতি অন্তমসো চীৰরকণ্ণোপি। হত্থপাসে তিট্ঠতি আপত্তি পাচিত্তিযস্সাতি ইধ ঠানপচ্চযাৰ পাচিত্তিযং ৰুত্তং। পহারপচ্চযা পন খন্ধকে দুক্কটং পঞ্ঞত্তং।
817.Yaṃkiñci pānīyanti suddhaudakaṃ vā hotu, takkadadhimatthurasakhīrādīnaṃ vā aññataraṃ. Yā kāci bījanīti antamaso cīvarakaṇṇopi. Hatthapāse tiṭṭhati āpatti pācittiyassāti idha ṭhānapaccayāva pācittiyaṃ vuttaṃ. Pahārapaccayā pana khandhake dukkaṭaṃ paññattaṃ.
৮১৯. দেতি দাপেতীতি পানীযং ৰা সূপাদিং ৰা ইমং পিৰথ, ইমিনা ভুঞ্জথাতি দেতি; তালৰণ্টং ইমিনা বীজন্তা ভুঞ্জথাতি দেতি; অঞ্ঞেন ৰা উভযম্পি দাপেতি, অনাপত্তি। অনুপসম্পন্নং আণাপেতীতি উপতিট্ঠনত্থং সামণেরিং আণাপেতি, অনাপত্তি। সেসং উত্তানমেৰ।
819.Deti dāpetīti pānīyaṃ vā sūpādiṃ vā imaṃ pivatha, iminā bhuñjathāti deti; tālavaṇṭaṃ iminā bījantā bhuñjathāti deti; aññena vā ubhayampi dāpeti, anāpatti. Anupasampannaṃ āṇāpetīti upatiṭṭhanatthaṃ sāmaṇeriṃ āṇāpeti, anāpatti. Sesaṃ uttānameva.
এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি।
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
ছট্ঠসিক্খাপদং।
Chaṭṭhasikkhāpadaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / ভিক্খুনীৰিভঙ্গ • Bhikkhunīvibhaṅga / ৬. ছট্ঠসিক্খাপদং • 6. Chaṭṭhasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. লসুণৰগ্গৰণ্ণনা • 1. Lasuṇavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৫. পঞ্চমসিক্খাপদৰণ্ণনা • 5. Pañcamasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমলসুণাদিসিক্খাপদৰণ্ণনা • 1. Paṭhamalasuṇādisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৬. ছট্ঠসিক্খাপদং • 6. Chaṭṭhasikkhāpadaṃ
