| Library / Tipiṭaka / తిపిటక • Tipiṭaka / భిక్ఖునీవిభఙ్గ-అట్ఠకథా • Bhikkhunīvibhaṅga-aṭṭhakathā |
౬. ఛట్ఠసిక్ఖాపదవణ్ణనా
6. Chaṭṭhasikkhāpadavaṇṇanā
౮౧౫. ఛట్ఠే – భత్తవిస్సగ్గన్తి భత్తకిచ్చం. పానీయేన చ విధూపనేన చ ఉపతిట్ఠిత్వాతి ఏకేన హత్థేన పానీయథాలకం ఏకేన బీజనిం గహేత్వా బీజమానా సమీపే ఠత్వాతి అత్థో. అచ్చావదతీతి పుబ్బేపి తుమ్హే ఏవం భుఞ్జథ, అహం ఏవం ఉపట్ఠానం కరోమీ’’తి పబ్బజితచారిత్తం అతిక్కమిత్వా గేహస్సితకథం కథేతీతి అత్థో.
815. Chaṭṭhe – bhattavissagganti bhattakiccaṃ. Pānīyena ca vidhūpanena ca upatiṭṭhitvāti ekena hatthena pānīyathālakaṃ ekena bījaniṃ gahetvā bījamānā samīpe ṭhatvāti attho. Accāvadatīti pubbepi tumhe evaṃ bhuñjatha, ahaṃ evaṃ upaṭṭhānaṃ karomī’’ti pabbajitacārittaṃ atikkamitvā gehassitakathaṃ kathetīti attho.
౮౧౭. యంకిఞ్చి పానీయన్తి సుద్ధఉదకం వా హోతు, తక్కదధిమత్థురసఖీరాదీనం వా అఞ్ఞతరం. యా కాచి బీజనీతి అన్తమసో చీవరకణ్ణోపి. హత్థపాసే తిట్ఠతి ఆపత్తి పాచిత్తియస్సాతి ఇధ ఠానపచ్చయావ పాచిత్తియం వుత్తం. పహారపచ్చయా పన ఖన్ధకే దుక్కటం పఞ్ఞత్తం.
817.Yaṃkiñci pānīyanti suddhaudakaṃ vā hotu, takkadadhimatthurasakhīrādīnaṃ vā aññataraṃ. Yā kāci bījanīti antamaso cīvarakaṇṇopi. Hatthapāse tiṭṭhati āpatti pācittiyassāti idha ṭhānapaccayāva pācittiyaṃ vuttaṃ. Pahārapaccayā pana khandhake dukkaṭaṃ paññattaṃ.
౮౧౯. దేతి దాపేతీతి పానీయం వా సూపాదిం వా ఇమం పివథ, ఇమినా భుఞ్జథాతి దేతి; తాలవణ్టం ఇమినా బీజన్తా భుఞ్జథాతి దేతి; అఞ్ఞేన వా ఉభయమ్పి దాపేతి, అనాపత్తి. అనుపసమ్పన్నం ఆణాపేతీతి ఉపతిట్ఠనత్థం సామణేరిం ఆణాపేతి, అనాపత్తి. సేసం ఉత్తానమేవ.
819.Deti dāpetīti pānīyaṃ vā sūpādiṃ vā imaṃ pivatha, iminā bhuñjathāti deti; tālavaṇṭaṃ iminā bījantā bhuñjathāti deti; aññena vā ubhayampi dāpeti, anāpatti. Anupasampannaṃ āṇāpetīti upatiṭṭhanatthaṃ sāmaṇeriṃ āṇāpeti, anāpatti. Sesaṃ uttānameva.
ఏళకలోమసముట్ఠానం – కిరియం, నోసఞ్ఞావిమోక్ఖం, అచిత్తకం, పణ్ణత్తివజ్జం, కాయకమ్మం, తిచిత్తం, తివేదనన్తి.
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
ఛట్ఠసిక్ఖాపదం.
Chaṭṭhasikkhāpadaṃ.
Related texts:
తిపిటక (మూల) • Tipiṭaka (Mūla) / వినయపిటక • Vinayapiṭaka / భిక్ఖునీవిభఙ్గ • Bhikkhunīvibhaṅga / ౬. ఛట్ఠసిక్ఖాపదం • 6. Chaṭṭhasikkhāpadaṃ
టీకా • Tīkā / వినయపిటక (టీకా) • Vinayapiṭaka (ṭīkā) / సారత్థదీపనీ-టీకా • Sāratthadīpanī-ṭīkā / ౧. లసుణవగ్గవణ్ణనా • 1. Lasuṇavaggavaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / వజిరబుద్ధి-టీకా • Vajirabuddhi-ṭīkā / ౫. పఞ్చమసిక్ఖాపదవణ్ణనా • 5. Pañcamasikkhāpadavaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / విమతివినోదనీ-టీకా • Vimativinodanī-ṭīkā / ౧. పఠమలసుణాదిసిక్ఖాపదవణ్ణనా • 1. Paṭhamalasuṇādisikkhāpadavaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / పాచిత్యాదియోజనాపాళి • Pācityādiyojanāpāḷi / ౬. ఛట్ఠసిక్ఖాపదం • 6. Chaṭṭhasikkhāpadaṃ
