| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā |
6. ඡට්‌ඨසික්‌ඛාපදවණ්‌ණනා
6. Chaṭṭhasikkhāpadavaṇṇanā
815. ඡට්‌ඨෙ – භත්‌තවිස්‌සග්‌ගන්‌ති භත්‌තකිච්‌චං. පානීයෙන ච විධූපනෙන ච උපතිට්‌ඨිත්‌වාති එකෙන හත්‌ථෙන පානීයථාලකං එකෙන බීජනිං ගහෙත්‌වා බීජමානා සමීපෙ ඨත්‌වාති අත්‌ථො. අච්‌චාවදතීති පුබ්‌බෙපි තුම්‌හෙ එවං භුඤ්‌ජථ, අහං එවං උපට්‌ඨානං කරොමී’’ති පබ්‌බජිතචාරිත්‌තං අතික්‌කමිත්‌වා ගෙහස්‌සිතකථං කථෙතීති අත්‌ථො.
815. Chaṭṭhe – bhattavissagganti bhattakiccaṃ. Pānīyena ca vidhūpanena ca upatiṭṭhitvāti ekena hatthena pānīyathālakaṃ ekena bījaniṃ gahetvā bījamānā samīpe ṭhatvāti attho. Accāvadatīti pubbepi tumhe evaṃ bhuñjatha, ahaṃ evaṃ upaṭṭhānaṃ karomī’’ti pabbajitacārittaṃ atikkamitvā gehassitakathaṃ kathetīti attho.
817. යංකිඤ්‌චි පානීයන්‌ති සුද්‌ධඋදකං වා හොතු, තක්‌කදධිමත්‌ථුරසඛීරාදීනං වා අඤ්‌ඤතරං. යා කාචි බීජනීති අන්‌තමසො චීවරකණ්‌ණොපි. හත්‌ථපාසෙ තිට්‌ඨති ආපත්‌ති පාචිත්‌තියස්‌සාති ඉධ ඨානපච්‌චයාව පාචිත්‌තියං වුත්‌තං. පහාරපච්‌චයා පන ඛන්‌ධකෙ දුක්‌කටං පඤ්‌ඤත්‌තං.
817.Yaṃkiñci pānīyanti suddhaudakaṃ vā hotu, takkadadhimatthurasakhīrādīnaṃ vā aññataraṃ. Yā kāci bījanīti antamaso cīvarakaṇṇopi. Hatthapāse tiṭṭhati āpatti pācittiyassāti idha ṭhānapaccayāva pācittiyaṃ vuttaṃ. Pahārapaccayā pana khandhake dukkaṭaṃ paññattaṃ.
819. දෙති දාපෙතීති පානීයං වා සූපාදිං වා ඉමං පිවථ, ඉමිනා භුඤ්‌ජථාති දෙති; තාලවණ්‌ටං ඉමිනා බීජන්‌තා භුඤ්‌ජථාති දෙති; අඤ්‌ඤෙන වා උභයම්‌පි දාපෙති, අනාපත්‌ති. අනුපසම්‌පන්‌නං ආණාපෙතීති උපතිට්‌ඨනත්‌ථං සාමණෙරිං ආණාපෙති, අනාපත්‌ති. සෙසං උත්‌තානමෙව.
819.Deti dāpetīti pānīyaṃ vā sūpādiṃ vā imaṃ pivatha, iminā bhuñjathāti deti; tālavaṇṭaṃ iminā bījantā bhuñjathāti deti; aññena vā ubhayampi dāpeti, anāpatti. Anupasampannaṃ āṇāpetīti upatiṭṭhanatthaṃ sāmaṇeriṃ āṇāpeti, anāpatti. Sesaṃ uttānameva.
එළකලොමසමුට්‌ඨානං – කිරියං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මං, තිචිත්‌තං, තිවෙදනන්‌ති.
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
ඡට්‌ඨසික්‌ඛාපදං.
Chaṭṭhasikkhāpadaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / භික්‌ඛුනීවිභඞ්‌ග • Bhikkhunīvibhaṅga / 6. ඡට්‌ඨසික්‌ඛාපදං • 6. Chaṭṭhasikkhāpadaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 1. ලසුණවග්‌ගවණ්‌ණනා • 1. Lasuṇavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 5. පඤ්‌චමසික්‌ඛාපදවණ්‌ණනා • 5. Pañcamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමලසුණාදිසික්‌ඛාපදවණ්‌ණනා • 1. Paṭhamalasuṇādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 6. ඡට්‌ඨසික්‌ඛාපදං • 6. Chaṭṭhasikkhāpadaṃ
