| Library / Tipiṭaka / তিপিটক • Tipiṭaka / দ্ৰেমাতিকাপাল়ি • Dvemātikāpāḷi |
৯. ছত্তুপাহনৰগ্গো
9. Chattupāhanavaggo
১. ছত্তুপাহনসিক্খাপদৰণ্ণনা
1. Chattupāhanasikkhāpadavaṇṇanā
ছত্তৰগ্গস্স পঠমে ছত্তুপাহনন্তি পদভাজনে (পাচি॰ ১১৭৮-১১৮২) ৰুত্তলক্খণং ছত্তঞ্চ উপাহনাযো চ। ধারেয্যাতি পরিভোগৰসেন মগ্গগমনে একপ্পযোগেনেৰ দিৰসম্পি ধারেন্তিযা একা আপত্তি। সচে পন তাদিসং ঠানং পত্ৰা ছত্তম্পি অপনামেত্ৰা উপাহনাপি ওমুঞ্চিত্ৰা পুনপ্পুনং ধারেতি, পযোগগণনায পাচিত্তিযং।
Chattavaggassa paṭhame chattupāhananti padabhājane (pāci. 1178-1182) vuttalakkhaṇaṃ chattañca upāhanāyo ca. Dhāreyyāti paribhogavasena maggagamane ekappayogeneva divasampi dhārentiyā ekā āpatti. Sace pana tādisaṃ ṭhānaṃ patvā chattampi apanāmetvā upāhanāpi omuñcitvā punappunaṃ dhāreti, payogagaṇanāya pācittiyaṃ.
সাৰত্থিযং ছব্বগ্গিযা ভিক্খুনিযো আরব্ভ ছত্তুপাহনধারণৰত্থুস্মিং পঞ্ঞত্তং, ‘‘অগিলানা’’তি অযমেত্থ অনুপঞ্ঞত্তি , ছত্তস্সেৰ উপাহনানংযেৰ ৰা ধারণে দুক্কটং, অগিলানায তিকপাচিত্তিযং, গিলানায দ্ৰিকদুক্কটং। গিলানসঞ্ঞায পন, আরামে আরামূপচারে ধারেন্তিযা, আপদাসু, উম্মত্তিকাদীনঞ্চ অনাপত্তি। উভিন্নং ধারণং, অনুঞ্ঞাতকারণাভাৰোতি ইমানেত্থ দ্ৰে অঙ্গানি। সমুট্ঠানাদীনি এল়কলোমসদিসানীতি।
Sāvatthiyaṃ chabbaggiyā bhikkhuniyo ārabbha chattupāhanadhāraṇavatthusmiṃ paññattaṃ, ‘‘agilānā’’ti ayamettha anupaññatti , chattasseva upāhanānaṃyeva vā dhāraṇe dukkaṭaṃ, agilānāya tikapācittiyaṃ, gilānāya dvikadukkaṭaṃ. Gilānasaññāya pana, ārāme ārāmūpacāre dhārentiyā, āpadāsu, ummattikādīnañca anāpatti. Ubhinnaṃ dhāraṇaṃ, anuññātakāraṇābhāvoti imānettha dve aṅgāni. Samuṭṭhānādīni eḷakalomasadisānīti.
ছত্তুপাহনসিক্খাপদৰণ্ণনা নিট্ঠিতা।
Chattupāhanasikkhāpadavaṇṇanā niṭṭhitā.
২. যানসিক্খাপদৰণ্ণনা
2. Yānasikkhāpadavaṇṇanā
দুতিযে যানেনাতি ৰয্হাদিনা। এত্থাপি ওরোহিত্ৰা পুনপ্পুনং অভিরুহন্তিযা পযোগগণনায পাচিত্তিযং। অনাপত্তিযং ‘‘আরামে আরামূপচারে’’তি নত্থি, সেসং পঠমে ৰুত্তনযেনেৰ ৰেদিতব্বন্তি।
Dutiye yānenāti vayhādinā. Etthāpi orohitvā punappunaṃ abhiruhantiyā payogagaṇanāya pācittiyaṃ. Anāpattiyaṃ ‘‘ārāme ārāmūpacāre’’ti natthi, sesaṃ paṭhame vuttanayeneva veditabbanti.
যানসিক্খাপদৰণ্ণনা নিট্ঠিতা।
Yānasikkhāpadavaṇṇanā niṭṭhitā.
৩. সঙ্ঘাণিসিক্খাপদৰণ্ণনা
3. Saṅghāṇisikkhāpadavaṇṇanā
ততিযে সঙ্ঘাণিন্তি যংকিঞ্চি কটূপগং। ধারেয্যাতি কটিযং পটিমুঞ্চেয্য। এত্থাপি ওমুঞ্চিত্ৰা ওমুঞ্চিত্ৰা ধারেন্তিযা পযোগগণনায পাচিত্তিযং।
Tatiye saṅghāṇinti yaṃkiñci kaṭūpagaṃ. Dhāreyyāti kaṭiyaṃ paṭimuñceyya. Etthāpi omuñcitvā omuñcitvā dhārentiyā payogagaṇanāya pācittiyaṃ.
সাৰত্থিযং অঞ্ঞতরং ভিক্খুনিং আরব্ভ সঙ্ঘাণিং ধারণৰত্থুস্মিং পঞ্ঞত্তং। আবাধপচ্চযা কটিসুত্তং ধারেন্তিযা, উম্মত্তিকাদীনঞ্চ অনাপত্তি। সেসং ৰুত্তনযেনেৰ ৰেদিতব্বং, ইদং পন অকুসলচিত্তন্তি।
Sāvatthiyaṃ aññataraṃ bhikkhuniṃ ārabbha saṅghāṇiṃ dhāraṇavatthusmiṃ paññattaṃ. Ābādhapaccayā kaṭisuttaṃ dhārentiyā, ummattikādīnañca anāpatti. Sesaṃ vuttanayeneva veditabbaṃ, idaṃ pana akusalacittanti.
সঙ্ঘাণিসিক্খাপদৰণ্ণনা নিট্ঠিতা।
Saṅghāṇisikkhāpadavaṇṇanā niṭṭhitā.
৪. ইত্থালঙ্কারসিক্খাপদৰণ্ণনা
4. Itthālaṅkārasikkhāpadavaṇṇanā
চতুত্থে ইত্থালঙ্কারন্তি সীসূপগাদীসু অঞ্ঞতরং যংকিঞ্চি পিল়ন্ধনং। ইধ তস্স তস্স ৰসেন ৰত্থুগণনায আপত্তি ৰেদিতব্বা।
Catutthe itthālaṅkāranti sīsūpagādīsu aññataraṃ yaṃkiñci piḷandhanaṃ. Idha tassa tassa vasena vatthugaṇanāya āpatti veditabbā.
সাৰত্থিযং ছব্বগ্গিযা ভিক্খুনিযো আরব্ভ ইত্থালঙ্কারং ধারণৰত্থুস্মিং পঞ্ঞত্তং, আবাধপচ্চযা কিঞ্চিদেৰ ধারেন্তিযা, উম্মত্তিকাদীনঞ্চ অনাপত্তি। সেসং ৰুত্তসদিসমেৰাতি।
Sāvatthiyaṃ chabbaggiyā bhikkhuniyo ārabbha itthālaṅkāraṃ dhāraṇavatthusmiṃ paññattaṃ, ābādhapaccayā kiñcideva dhārentiyā, ummattikādīnañca anāpatti. Sesaṃ vuttasadisamevāti.
ইত্থালঙ্কারসিক্খাপদৰণ্ণনা নিট্ঠিতা।
Itthālaṅkārasikkhāpadavaṇṇanā niṭṭhitā.
৫. গন্ধৰণ্ণকসিক্খাপদৰণ্ণনা
5. Gandhavaṇṇakasikkhāpadavaṇṇanā
পঞ্চমে গন্ধৰণ্ণকেনাতি যেনকেনচি গন্ধেন চ ৰণ্ণকেন চ। ইধ গন্ধাদিযোজনতো পট্ঠায পুব্বপযোগে দুক্কটং, নহানপরিযোসানে পাচিত্তিযং। আবাধপচ্চযা, উম্মত্তিকাদীনঞ্চ অনাপত্তি। সেসং চতুত্থসদিসমেৰাতি।
Pañcame gandhavaṇṇakenāti yenakenaci gandhena ca vaṇṇakena ca. Idha gandhādiyojanato paṭṭhāya pubbapayoge dukkaṭaṃ, nahānapariyosāne pācittiyaṃ. Ābādhapaccayā, ummattikādīnañca anāpatti. Sesaṃ catutthasadisamevāti.
গন্ধৰণ্ণকসিক্খাপদৰণ্ণনা নিট্ঠিতা।
Gandhavaṇṇakasikkhāpadavaṇṇanā niṭṭhitā.
৬. ৰাসিতকসিক্খাপদৰণ্ণনা
6. Vāsitakasikkhāpadavaṇṇanā
ছট্ঠে ৰাসিতকেনাতি গন্ধৰাসিতকেন। পিঞ্ঞাকেনাতি তিলপিট্ঠেন। সেসং পঞ্চমসদিসমেৰাতি।
Chaṭṭhe vāsitakenāti gandhavāsitakena. Piññākenāti tilapiṭṭhena. Sesaṃ pañcamasadisamevāti.
ৰাসিতকসিক্খাপদৰণ্ণনা নিট্ঠিতা।
Vāsitakasikkhāpadavaṇṇanā niṭṭhitā.
৭. ভিক্খুনিউম্মদ্দাপনসিক্খাপদৰণ্ণনা
7. Bhikkhuniummaddāpanasikkhāpadavaṇṇanā
সত্তমে উম্মদ্দাপেয্যাতি উব্বট্টাপেয্য। পরিমদ্দাপেয্যাতি সম্বাহাপেয্য। এত্থ চ হত্থং অমুঞ্চিত্ৰা উব্বট্টনে একাৰ আপত্তি, মোচেত্ৰা মোচেত্ৰা উব্বট্টনে পযোগগণনায আপত্তিযো। সম্বাহনেপি এসেৰ নযো।
Sattame ummaddāpeyyāti ubbaṭṭāpeyya. Parimaddāpeyyāti sambāhāpeyya. Ettha ca hatthaṃ amuñcitvā ubbaṭṭane ekāva āpatti, mocetvā mocetvā ubbaṭṭane payogagaṇanāya āpattiyo. Sambāhanepi eseva nayo.
সাৰত্থিযং সম্বহুলা ভিক্খুনিযো আরব্ভ ভিক্খুনিযা উম্মদ্দাপনপরিমদ্দাপনৰত্থুস্মিং পঞ্ঞত্তং, গিলানায, আপদাসু, উম্মত্তিকাদীনঞ্চ অনাপত্তি। ইধ মগ্গগমনপরিস্সমোপি গেলঞ্ঞং, চোরভযাদীহি সরীরকম্পনাদযোপি আপদা। সেসং চতুত্থে ৰুত্তনযেনেৰ ৰেদিতব্বন্তি।
Sāvatthiyaṃ sambahulā bhikkhuniyo ārabbha bhikkhuniyā ummaddāpanaparimaddāpanavatthusmiṃ paññattaṃ, gilānāya, āpadāsu, ummattikādīnañca anāpatti. Idha maggagamanaparissamopi gelaññaṃ, corabhayādīhi sarīrakampanādayopi āpadā. Sesaṃ catutthe vuttanayeneva veditabbanti.
ভিক্খুনিউম্মদ্দাপনসিক্খাপদৰণ্ণনা নিট্ঠিতা।
Bhikkhuniummaddāpanasikkhāpadavaṇṇanā niṭṭhitā.
৮-৯-১০. সিক্খমানউম্মদ্দাপনাদিসিক্খাপদৰণ্ণনা
8-9-10. Sikkhamānaummaddāpanādisikkhāpadavaṇṇanā
অট্ঠমনৰমদসমেসুপি সিক্খমানায সামণেরিযা গিহিনিযাতি এত্তকমেৰ নানং। সেসং সত্তমসদিসমেৰাতি।
Aṭṭhamanavamadasamesupi sikkhamānāya sāmaṇeriyā gihiniyāti ettakameva nānaṃ. Sesaṃ sattamasadisamevāti.
সিক্খমানউম্মদ্দাপনাদিসিক্খাপদৰণ্ণনা নিট্ঠিতা।
Sikkhamānaummaddāpanādisikkhāpadavaṇṇanā niṭṭhitā.
১১. অনাপুচ্ছাসিক্খাপদৰণ্ণনা
11. Anāpucchāsikkhāpadavaṇṇanā
একাদসমে ভিক্খুস্স পুরতোতি ন অভিমুখমেৰাতি অত্থো, ইদং পন উপচারং সন্ধায কথিতন্তি ৰেদিতব্বং। তস্মা ভিক্খুস্স উপচারে অন্তমসো ছমাযপি ‘‘নিসীদামি, অয্যা’’তি অনাপুচ্ছিত্ৰা নিসীদন্তিযা পাচিত্তিযং।
Ekādasame bhikkhussa puratoti na abhimukhamevāti attho, idaṃ pana upacāraṃ sandhāya kathitanti veditabbaṃ. Tasmā bhikkhussa upacāre antamaso chamāyapi ‘‘nisīdāmi, ayyā’’ti anāpucchitvā nisīdantiyā pācittiyaṃ.
সাৰত্থিযং সম্বহুলা ভিক্খুনিযো আরব্ভ অনাপুচ্ছা নিসীদনৰত্থুস্মিং পঞ্ঞত্তং, তিকপাচিত্তিযং, আপুচ্ছিতে দ্ৰিকদুক্কটং। তস্মিং আপুচ্ছিতসঞ্ঞায, গিলানায, আপদাসু, উম্মত্তিকাদীনঞ্চ অনাপত্তি। ভিক্খুস্স অনাপুচ্ছা, উপচারে নিসজ্জা, অনুঞ্ঞাতকারণাভাৰোতি ইমানেত্থ তীণি অঙ্গানি। সমুট্ঠানাদীনি কথিনসদিসানি, ইদং পন কিরিযাকিরিযন্তি।
Sāvatthiyaṃ sambahulā bhikkhuniyo ārabbha anāpucchā nisīdanavatthusmiṃ paññattaṃ, tikapācittiyaṃ, āpucchite dvikadukkaṭaṃ. Tasmiṃ āpucchitasaññāya, gilānāya, āpadāsu, ummattikādīnañca anāpatti. Bhikkhussa anāpucchā, upacāre nisajjā, anuññātakāraṇābhāvoti imānettha tīṇi aṅgāni. Samuṭṭhānādīni kathinasadisāni, idaṃ pana kiriyākiriyanti.
অনাপুচ্ছাসিক্খাপদৰণ্ণনা নিট্ঠিতা।
Anāpucchāsikkhāpadavaṇṇanā niṭṭhitā.
১২. পঞ্হাপুচ্ছনসিক্খাপদৰণ্ণনা
12. Pañhāpucchanasikkhāpadavaṇṇanā
দ্ৰাদসমে অনোকাসকতন্তি ‘‘অসুকস্মিং নাম ঠানে পুচ্ছামী’’তি এৰং অকতওকাসং, তস্মা সুত্তন্তে ওকাসং কারাপেত্ৰা ৰিনযং ৰা অভিধম্মং ৰা পুচ্ছন্তিযা পাচিত্তিযং। সেসেসুপি এসেৰ নযো, সব্বসো অকারিতে পন ৰত্তব্বমেৰ নত্থি।
Dvādasame anokāsakatanti ‘‘asukasmiṃ nāma ṭhāne pucchāmī’’ti evaṃ akataokāsaṃ, tasmā suttante okāsaṃ kārāpetvā vinayaṃ vā abhidhammaṃ vā pucchantiyā pācittiyaṃ. Sesesupi eseva nayo, sabbaso akārite pana vattabbameva natthi.
সাৰত্থিযং সম্বহুলা ভিক্খুনিযো আরব্ভ অনোকাসকতং ভিক্খুং পঞ্হং পুচ্ছনৰত্থুস্মিং পঞ্ঞত্তং। তত্থ তত্থ ওকাসং কারাপেত্ৰা পুচ্ছন্তিযা, অনোদিস্স ওকাসং কারাপেত্ৰা যত্থ কত্থচি পুচ্ছন্তিযা, উম্মত্তিকাদীনঞ্চ অনাপত্তি। ভিক্খুস্স অনোকাসকারাপনং, পঞ্হং পুচ্ছনন্তি ইমানেত্থ দ্ৰে অঙ্গানি। সমুট্ঠানাদীনি পদসোধম্মসদিসানি, ইদং পন কিরিযাকিরিযন্তি।
Sāvatthiyaṃ sambahulā bhikkhuniyo ārabbha anokāsakataṃ bhikkhuṃ pañhaṃ pucchanavatthusmiṃ paññattaṃ. Tattha tattha okāsaṃ kārāpetvā pucchantiyā, anodissa okāsaṃ kārāpetvā yattha katthaci pucchantiyā, ummattikādīnañca anāpatti. Bhikkhussa anokāsakārāpanaṃ, pañhaṃ pucchananti imānettha dve aṅgāni. Samuṭṭhānādīni padasodhammasadisāni, idaṃ pana kiriyākiriyanti.
পঞ্হাপুচ্ছনসিক্খাপদৰণ্ণনা নিট্ঠিতা।
Pañhāpucchanasikkhāpadavaṇṇanā niṭṭhitā.
১৩. অসংকচ্চিকসিক্খাপদৰণ্ণনা
13. Asaṃkaccikasikkhāpadavaṇṇanā
তেরসমে অসংকচ্চিকাতি অধক্খকউব্ভনাভিমণ্ডলসঙ্খাতস্স সরীরস্স পটিচ্ছাদনত্থং অনুঞ্ঞাতসংকচ্চিকৰিরহিতা। গামং পৰিসেয্যাতি এত্থ পরিক্খিত্তস্স গামস্স পরিক্খেপং, অপরিক্খিত্তস্স উপচারং অতিক্কমন্তিযা ৰা ওক্কমন্তিযা ৰা পঠমপাদে দুক্কটং, দুতিযে পাচিত্তিযং।
Terasame asaṃkaccikāti adhakkhakaubbhanābhimaṇḍalasaṅkhātassa sarīrassa paṭicchādanatthaṃ anuññātasaṃkaccikavirahitā. Gāmaṃ paviseyyāti ettha parikkhittassa gāmassa parikkhepaṃ, aparikkhittassa upacāraṃ atikkamantiyā vā okkamantiyā vā paṭhamapāde dukkaṭaṃ, dutiye pācittiyaṃ.
সাৰত্থিযং অঞ্ঞতরং ভিক্খুনিং আরব্ভ অসংকচ্চিকায গামং পৰিসনৰত্থুস্মিং পঞ্ঞত্তং। যস্সা পন সংকচ্চিকচীৰরং অচ্ছিন্নং ৰা নট্ঠং ৰা, তস্সা, গিলানায, আপদাসু, উম্মত্তিকাদীনঞ্চ অনাপত্তি। অসংকচ্চিকতা, ৰুত্তপরিচ্ছেদাতিক্কমো, অনুঞ্ঞাতকারণাভাৰোতি ইমানেত্থ তীণি অঙ্গানি। সমুট্ঠানাদীনি এল়কলোমসদিসানীতি।
Sāvatthiyaṃ aññataraṃ bhikkhuniṃ ārabbha asaṃkaccikāya gāmaṃ pavisanavatthusmiṃ paññattaṃ. Yassā pana saṃkaccikacīvaraṃ acchinnaṃ vā naṭṭhaṃ vā, tassā, gilānāya, āpadāsu, ummattikādīnañca anāpatti. Asaṃkaccikatā, vuttaparicchedātikkamo, anuññātakāraṇābhāvoti imānettha tīṇi aṅgāni. Samuṭṭhānādīni eḷakalomasadisānīti.
অসংকচ্চিকসিক্খাপদৰণ্ণনা নিট্ঠিতা।
Asaṃkaccikasikkhāpadavaṇṇanā niṭṭhitā.
ছত্তুপাহনৰগ্গো নৰমো।
Chattupāhanavaggo navamo.
