| Library / Tipiṭaka / ತಿಪಿಟಕ • Tipiṭaka / ದ್ವೇಮಾತಿಕಾಪಾಳಿ • Dvemātikāpāḷi |
೯. ಛತ್ತುಪಾಹನವಗ್ಗೋ
9. Chattupāhanavaggo
೧. ಛತ್ತುಪಾಹನಸಿಕ್ಖಾಪದವಣ್ಣನಾ
1. Chattupāhanasikkhāpadavaṇṇanā
ಛತ್ತವಗ್ಗಸ್ಸ ಪಠಮೇ ಛತ್ತುಪಾಹನನ್ತಿ ಪದಭಾಜನೇ (ಪಾಚಿ॰ ೧೧೭೮-೧೧೮೨) ವುತ್ತಲಕ್ಖಣಂ ಛತ್ತಞ್ಚ ಉಪಾಹನಾಯೋ ಚ। ಧಾರೇಯ್ಯಾತಿ ಪರಿಭೋಗವಸೇನ ಮಗ್ಗಗಮನೇ ಏಕಪ್ಪಯೋಗೇನೇವ ದಿವಸಮ್ಪಿ ಧಾರೇನ್ತಿಯಾ ಏಕಾ ಆಪತ್ತಿ। ಸಚೇ ಪನ ತಾದಿಸಂ ಠಾನಂ ಪತ್ವಾ ಛತ್ತಮ್ಪಿ ಅಪನಾಮೇತ್ವಾ ಉಪಾಹನಾಪಿ ಓಮುಞ್ಚಿತ್ವಾ ಪುನಪ್ಪುನಂ ಧಾರೇತಿ, ಪಯೋಗಗಣನಾಯ ಪಾಚಿತ್ತಿಯಂ।
Chattavaggassa paṭhame chattupāhananti padabhājane (pāci. 1178-1182) vuttalakkhaṇaṃ chattañca upāhanāyo ca. Dhāreyyāti paribhogavasena maggagamane ekappayogeneva divasampi dhārentiyā ekā āpatti. Sace pana tādisaṃ ṭhānaṃ patvā chattampi apanāmetvā upāhanāpi omuñcitvā punappunaṃ dhāreti, payogagaṇanāya pācittiyaṃ.
ಸಾವತ್ಥಿಯಂ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಛತ್ತುಪಾಹನಧಾರಣವತ್ಥುಸ್ಮಿಂ ಪಞ್ಞತ್ತಂ, ‘‘ಅಗಿಲಾನಾ’’ತಿ ಅಯಮೇತ್ಥ ಅನುಪಞ್ಞತ್ತಿ , ಛತ್ತಸ್ಸೇವ ಉಪಾಹನಾನಂಯೇವ ವಾ ಧಾರಣೇ ದುಕ್ಕಟಂ, ಅಗಿಲಾನಾಯ ತಿಕಪಾಚಿತ್ತಿಯಂ, ಗಿಲಾನಾಯ ದ್ವಿಕದುಕ್ಕಟಂ। ಗಿಲಾನಸಞ್ಞಾಯ ಪನ, ಆರಾಮೇ ಆರಾಮೂಪಚಾರೇ ಧಾರೇನ್ತಿಯಾ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಉಭಿನ್ನಂ ಧಾರಣಂ, ಅನುಞ್ಞಾತಕಾರಣಾಭಾವೋತಿ ಇಮಾನೇತ್ಥ ದ್ವೇ ಅಙ್ಗಾನಿ। ಸಮುಟ್ಠಾನಾದೀನಿ ಏಳಕಲೋಮಸದಿಸಾನೀತಿ।
Sāvatthiyaṃ chabbaggiyā bhikkhuniyo ārabbha chattupāhanadhāraṇavatthusmiṃ paññattaṃ, ‘‘agilānā’’ti ayamettha anupaññatti , chattasseva upāhanānaṃyeva vā dhāraṇe dukkaṭaṃ, agilānāya tikapācittiyaṃ, gilānāya dvikadukkaṭaṃ. Gilānasaññāya pana, ārāme ārāmūpacāre dhārentiyā, āpadāsu, ummattikādīnañca anāpatti. Ubhinnaṃ dhāraṇaṃ, anuññātakāraṇābhāvoti imānettha dve aṅgāni. Samuṭṭhānādīni eḷakalomasadisānīti.
ಛತ್ತುಪಾಹನಸಿಕ್ಖಾಪದವಣ್ಣನಾ ನಿಟ್ಠಿತಾ।
Chattupāhanasikkhāpadavaṇṇanā niṭṭhitā.
೨. ಯಾನಸಿಕ್ಖಾಪದವಣ್ಣನಾ
2. Yānasikkhāpadavaṇṇanā
ದುತಿಯೇ ಯಾನೇನಾತಿ ವಯ್ಹಾದಿನಾ। ಏತ್ಥಾಪಿ ಓರೋಹಿತ್ವಾ ಪುನಪ್ಪುನಂ ಅಭಿರುಹನ್ತಿಯಾ ಪಯೋಗಗಣನಾಯ ಪಾಚಿತ್ತಿಯಂ। ಅನಾಪತ್ತಿಯಂ ‘‘ಆರಾಮೇ ಆರಾಮೂಪಚಾರೇ’’ತಿ ನತ್ಥಿ, ಸೇಸಂ ಪಠಮೇ ವುತ್ತನಯೇನೇವ ವೇದಿತಬ್ಬನ್ತಿ।
Dutiye yānenāti vayhādinā. Etthāpi orohitvā punappunaṃ abhiruhantiyā payogagaṇanāya pācittiyaṃ. Anāpattiyaṃ ‘‘ārāme ārāmūpacāre’’ti natthi, sesaṃ paṭhame vuttanayeneva veditabbanti.
ಯಾನಸಿಕ್ಖಾಪದವಣ್ಣನಾ ನಿಟ್ಠಿತಾ।
Yānasikkhāpadavaṇṇanā niṭṭhitā.
೩. ಸಙ್ಘಾಣಿಸಿಕ್ಖಾಪದವಣ್ಣನಾ
3. Saṅghāṇisikkhāpadavaṇṇanā
ತತಿಯೇ ಸಙ್ಘಾಣಿನ್ತಿ ಯಂಕಿಞ್ಚಿ ಕಟೂಪಗಂ। ಧಾರೇಯ್ಯಾತಿ ಕಟಿಯಂ ಪಟಿಮುಞ್ಚೇಯ್ಯ। ಏತ್ಥಾಪಿ ಓಮುಞ್ಚಿತ್ವಾ ಓಮುಞ್ಚಿತ್ವಾ ಧಾರೇನ್ತಿಯಾ ಪಯೋಗಗಣನಾಯ ಪಾಚಿತ್ತಿಯಂ।
Tatiye saṅghāṇinti yaṃkiñci kaṭūpagaṃ. Dhāreyyāti kaṭiyaṃ paṭimuñceyya. Etthāpi omuñcitvā omuñcitvā dhārentiyā payogagaṇanāya pācittiyaṃ.
ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಸಙ್ಘಾಣಿಂ ಧಾರಣವತ್ಥುಸ್ಮಿಂ ಪಞ್ಞತ್ತಂ। ಆಬಾಧಪಚ್ಚಯಾ ಕಟಿಸುತ್ತಂ ಧಾರೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಸೇಸಂ ವುತ್ತನಯೇನೇವ ವೇದಿತಬ್ಬಂ, ಇದಂ ಪನ ಅಕುಸಲಚಿತ್ತನ್ತಿ।
Sāvatthiyaṃ aññataraṃ bhikkhuniṃ ārabbha saṅghāṇiṃ dhāraṇavatthusmiṃ paññattaṃ. Ābādhapaccayā kaṭisuttaṃ dhārentiyā, ummattikādīnañca anāpatti. Sesaṃ vuttanayeneva veditabbaṃ, idaṃ pana akusalacittanti.
ಸಙ್ಘಾಣಿಸಿಕ್ಖಾಪದವಣ್ಣನಾ ನಿಟ್ಠಿತಾ।
Saṅghāṇisikkhāpadavaṇṇanā niṭṭhitā.
೪. ಇತ್ಥಾಲಙ್ಕಾರಸಿಕ್ಖಾಪದವಣ್ಣನಾ
4. Itthālaṅkārasikkhāpadavaṇṇanā
ಚತುತ್ಥೇ ಇತ್ಥಾಲಙ್ಕಾರನ್ತಿ ಸೀಸೂಪಗಾದೀಸು ಅಞ್ಞತರಂ ಯಂಕಿಞ್ಚಿ ಪಿಳನ್ಧನಂ। ಇಧ ತಸ್ಸ ತಸ್ಸ ವಸೇನ ವತ್ಥುಗಣನಾಯ ಆಪತ್ತಿ ವೇದಿತಬ್ಬಾ।
Catutthe itthālaṅkāranti sīsūpagādīsu aññataraṃ yaṃkiñci piḷandhanaṃ. Idha tassa tassa vasena vatthugaṇanāya āpatti veditabbā.
ಸಾವತ್ಥಿಯಂ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಇತ್ಥಾಲಙ್ಕಾರಂ ಧಾರಣವತ್ಥುಸ್ಮಿಂ ಪಞ್ಞತ್ತಂ, ಆಬಾಧಪಚ್ಚಯಾ ಕಿಞ್ಚಿದೇವ ಧಾರೇನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಸೇಸಂ ವುತ್ತಸದಿಸಮೇವಾತಿ।
Sāvatthiyaṃ chabbaggiyā bhikkhuniyo ārabbha itthālaṅkāraṃ dhāraṇavatthusmiṃ paññattaṃ, ābādhapaccayā kiñcideva dhārentiyā, ummattikādīnañca anāpatti. Sesaṃ vuttasadisamevāti.
ಇತ್ಥಾಲಙ್ಕಾರಸಿಕ್ಖಾಪದವಣ್ಣನಾ ನಿಟ್ಠಿತಾ।
Itthālaṅkārasikkhāpadavaṇṇanā niṭṭhitā.
೫. ಗನ್ಧವಣ್ಣಕಸಿಕ್ಖಾಪದವಣ್ಣನಾ
5. Gandhavaṇṇakasikkhāpadavaṇṇanā
ಪಞ್ಚಮೇ ಗನ್ಧವಣ್ಣಕೇನಾತಿ ಯೇನಕೇನಚಿ ಗನ್ಧೇನ ಚ ವಣ್ಣಕೇನ ಚ। ಇಧ ಗನ್ಧಾದಿಯೋಜನತೋ ಪಟ್ಠಾಯ ಪುಬ್ಬಪಯೋಗೇ ದುಕ್ಕಟಂ, ನಹಾನಪರಿಯೋಸಾನೇ ಪಾಚಿತ್ತಿಯಂ। ಆಬಾಧಪಚ್ಚಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಸೇಸಂ ಚತುತ್ಥಸದಿಸಮೇವಾತಿ।
Pañcame gandhavaṇṇakenāti yenakenaci gandhena ca vaṇṇakena ca. Idha gandhādiyojanato paṭṭhāya pubbapayoge dukkaṭaṃ, nahānapariyosāne pācittiyaṃ. Ābādhapaccayā, ummattikādīnañca anāpatti. Sesaṃ catutthasadisamevāti.
ಗನ್ಧವಣ್ಣಕಸಿಕ್ಖಾಪದವಣ್ಣನಾ ನಿಟ್ಠಿತಾ।
Gandhavaṇṇakasikkhāpadavaṇṇanā niṭṭhitā.
೬. ವಾಸಿತಕಸಿಕ್ಖಾಪದವಣ್ಣನಾ
6. Vāsitakasikkhāpadavaṇṇanā
ಛಟ್ಠೇ ವಾಸಿತಕೇನಾತಿ ಗನ್ಧವಾಸಿತಕೇನ। ಪಿಞ್ಞಾಕೇನಾತಿ ತಿಲಪಿಟ್ಠೇನ। ಸೇಸಂ ಪಞ್ಚಮಸದಿಸಮೇವಾತಿ।
Chaṭṭhe vāsitakenāti gandhavāsitakena. Piññākenāti tilapiṭṭhena. Sesaṃ pañcamasadisamevāti.
ವಾಸಿತಕಸಿಕ್ಖಾಪದವಣ್ಣನಾ ನಿಟ್ಠಿತಾ।
Vāsitakasikkhāpadavaṇṇanā niṭṭhitā.
೭. ಭಿಕ್ಖುನಿಉಮ್ಮದ್ದಾಪನಸಿಕ್ಖಾಪದವಣ್ಣನಾ
7. Bhikkhuniummaddāpanasikkhāpadavaṇṇanā
ಸತ್ತಮೇ ಉಮ್ಮದ್ದಾಪೇಯ್ಯಾತಿ ಉಬ್ಬಟ್ಟಾಪೇಯ್ಯ। ಪರಿಮದ್ದಾಪೇಯ್ಯಾತಿ ಸಮ್ಬಾಹಾಪೇಯ್ಯ। ಏತ್ಥ ಚ ಹತ್ಥಂ ಅಮುಞ್ಚಿತ್ವಾ ಉಬ್ಬಟ್ಟನೇ ಏಕಾವ ಆಪತ್ತಿ, ಮೋಚೇತ್ವಾ ಮೋಚೇತ್ವಾ ಉಬ್ಬಟ್ಟನೇ ಪಯೋಗಗಣನಾಯ ಆಪತ್ತಿಯೋ। ಸಮ್ಬಾಹನೇಪಿ ಏಸೇವ ನಯೋ।
Sattame ummaddāpeyyāti ubbaṭṭāpeyya. Parimaddāpeyyāti sambāhāpeyya. Ettha ca hatthaṃ amuñcitvā ubbaṭṭane ekāva āpatti, mocetvā mocetvā ubbaṭṭane payogagaṇanāya āpattiyo. Sambāhanepi eseva nayo.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಭಿಕ್ಖುನಿಯಾ ಉಮ್ಮದ್ದಾಪನಪರಿಮದ್ದಾಪನವತ್ಥುಸ್ಮಿಂ ಪಞ್ಞತ್ತಂ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಇಧ ಮಗ್ಗಗಮನಪರಿಸ್ಸಮೋಪಿ ಗೇಲಞ್ಞಂ, ಚೋರಭಯಾದೀಹಿ ಸರೀರಕಮ್ಪನಾದಯೋಪಿ ಆಪದಾ। ಸೇಸಂ ಚತುತ್ಥೇ ವುತ್ತನಯೇನೇವ ವೇದಿತಬ್ಬನ್ತಿ।
Sāvatthiyaṃ sambahulā bhikkhuniyo ārabbha bhikkhuniyā ummaddāpanaparimaddāpanavatthusmiṃ paññattaṃ, gilānāya, āpadāsu, ummattikādīnañca anāpatti. Idha maggagamanaparissamopi gelaññaṃ, corabhayādīhi sarīrakampanādayopi āpadā. Sesaṃ catutthe vuttanayeneva veditabbanti.
ಭಿಕ್ಖುನಿಉಮ್ಮದ್ದಾಪನಸಿಕ್ಖಾಪದವಣ್ಣನಾ ನಿಟ್ಠಿತಾ।
Bhikkhuniummaddāpanasikkhāpadavaṇṇanā niṭṭhitā.
೮-೯-೧೦. ಸಿಕ್ಖಮಾನಉಮ್ಮದ್ದಾಪನಾದಿಸಿಕ್ಖಾಪದವಣ್ಣನಾ
8-9-10. Sikkhamānaummaddāpanādisikkhāpadavaṇṇanā
ಅಟ್ಠಮನವಮದಸಮೇಸುಪಿ ಸಿಕ್ಖಮಾನಾಯ ಸಾಮಣೇರಿಯಾ ಗಿಹಿನಿಯಾತಿ ಏತ್ತಕಮೇವ ನಾನಂ। ಸೇಸಂ ಸತ್ತಮಸದಿಸಮೇವಾತಿ।
Aṭṭhamanavamadasamesupi sikkhamānāya sāmaṇeriyā gihiniyāti ettakameva nānaṃ. Sesaṃ sattamasadisamevāti.
ಸಿಕ್ಖಮಾನಉಮ್ಮದ್ದಾಪನಾದಿಸಿಕ್ಖಾಪದವಣ್ಣನಾ ನಿಟ್ಠಿತಾ।
Sikkhamānaummaddāpanādisikkhāpadavaṇṇanā niṭṭhitā.
೧೧. ಅನಾಪುಚ್ಛಾಸಿಕ್ಖಾಪದವಣ್ಣನಾ
11. Anāpucchāsikkhāpadavaṇṇanā
ಏಕಾದಸಮೇ ಭಿಕ್ಖುಸ್ಸ ಪುರತೋತಿ ನ ಅಭಿಮುಖಮೇವಾತಿ ಅತ್ಥೋ, ಇದಂ ಪನ ಉಪಚಾರಂ ಸನ್ಧಾಯ ಕಥಿತನ್ತಿ ವೇದಿತಬ್ಬಂ। ತಸ್ಮಾ ಭಿಕ್ಖುಸ್ಸ ಉಪಚಾರೇ ಅನ್ತಮಸೋ ಛಮಾಯಪಿ ‘‘ನಿಸೀದಾಮಿ, ಅಯ್ಯಾ’’ತಿ ಅನಾಪುಚ್ಛಿತ್ವಾ ನಿಸೀದನ್ತಿಯಾ ಪಾಚಿತ್ತಿಯಂ।
Ekādasame bhikkhussa puratoti na abhimukhamevāti attho, idaṃ pana upacāraṃ sandhāya kathitanti veditabbaṃ. Tasmā bhikkhussa upacāre antamaso chamāyapi ‘‘nisīdāmi, ayyā’’ti anāpucchitvā nisīdantiyā pācittiyaṃ.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಅನಾಪುಚ್ಛಾ ನಿಸೀದನವತ್ಥುಸ್ಮಿಂ ಪಞ್ಞತ್ತಂ, ತಿಕಪಾಚಿತ್ತಿಯಂ, ಆಪುಚ್ಛಿತೇ ದ್ವಿಕದುಕ್ಕಟಂ। ತಸ್ಮಿಂ ಆಪುಚ್ಛಿತಸಞ್ಞಾಯ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಭಿಕ್ಖುಸ್ಸ ಅನಾಪುಚ್ಛಾ, ಉಪಚಾರೇ ನಿಸಜ್ಜಾ, ಅನುಞ್ಞಾತಕಾರಣಾಭಾವೋತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಕಥಿನಸದಿಸಾನಿ, ಇದಂ ಪನ ಕಿರಿಯಾಕಿರಿಯನ್ತಿ।
Sāvatthiyaṃ sambahulā bhikkhuniyo ārabbha anāpucchā nisīdanavatthusmiṃ paññattaṃ, tikapācittiyaṃ, āpucchite dvikadukkaṭaṃ. Tasmiṃ āpucchitasaññāya, gilānāya, āpadāsu, ummattikādīnañca anāpatti. Bhikkhussa anāpucchā, upacāre nisajjā, anuññātakāraṇābhāvoti imānettha tīṇi aṅgāni. Samuṭṭhānādīni kathinasadisāni, idaṃ pana kiriyākiriyanti.
ಅನಾಪುಚ್ಛಾಸಿಕ್ಖಾಪದವಣ್ಣನಾ ನಿಟ್ಠಿತಾ।
Anāpucchāsikkhāpadavaṇṇanā niṭṭhitā.
೧೨. ಪಞ್ಹಾಪುಚ್ಛನಸಿಕ್ಖಾಪದವಣ್ಣನಾ
12. Pañhāpucchanasikkhāpadavaṇṇanā
ದ್ವಾದಸಮೇ ಅನೋಕಾಸಕತನ್ತಿ ‘‘ಅಸುಕಸ್ಮಿಂ ನಾಮ ಠಾನೇ ಪುಚ್ಛಾಮೀ’’ತಿ ಏವಂ ಅಕತಓಕಾಸಂ, ತಸ್ಮಾ ಸುತ್ತನ್ತೇ ಓಕಾಸಂ ಕಾರಾಪೇತ್ವಾ ವಿನಯಂ ವಾ ಅಭಿಧಮ್ಮಂ ವಾ ಪುಚ್ಛನ್ತಿಯಾ ಪಾಚಿತ್ತಿಯಂ। ಸೇಸೇಸುಪಿ ಏಸೇವ ನಯೋ, ಸಬ್ಬಸೋ ಅಕಾರಿತೇ ಪನ ವತ್ತಬ್ಬಮೇವ ನತ್ಥಿ।
Dvādasame anokāsakatanti ‘‘asukasmiṃ nāma ṭhāne pucchāmī’’ti evaṃ akataokāsaṃ, tasmā suttante okāsaṃ kārāpetvā vinayaṃ vā abhidhammaṃ vā pucchantiyā pācittiyaṃ. Sesesupi eseva nayo, sabbaso akārite pana vattabbameva natthi.
ಸಾವತ್ಥಿಯಂ ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛನವತ್ಥುಸ್ಮಿಂ ಪಞ್ಞತ್ತಂ। ತತ್ಥ ತತ್ಥ ಓಕಾಸಂ ಕಾರಾಪೇತ್ವಾ ಪುಚ್ಛನ್ತಿಯಾ, ಅನೋದಿಸ್ಸ ಓಕಾಸಂ ಕಾರಾಪೇತ್ವಾ ಯತ್ಥ ಕತ್ಥಚಿ ಪುಚ್ಛನ್ತಿಯಾ, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಭಿಕ್ಖುಸ್ಸ ಅನೋಕಾಸಕಾರಾಪನಂ, ಪಞ್ಹಂ ಪುಚ್ಛನನ್ತಿ ಇಮಾನೇತ್ಥ ದ್ವೇ ಅಙ್ಗಾನಿ। ಸಮುಟ್ಠಾನಾದೀನಿ ಪದಸೋಧಮ್ಮಸದಿಸಾನಿ, ಇದಂ ಪನ ಕಿರಿಯಾಕಿರಿಯನ್ತಿ।
Sāvatthiyaṃ sambahulā bhikkhuniyo ārabbha anokāsakataṃ bhikkhuṃ pañhaṃ pucchanavatthusmiṃ paññattaṃ. Tattha tattha okāsaṃ kārāpetvā pucchantiyā, anodissa okāsaṃ kārāpetvā yattha katthaci pucchantiyā, ummattikādīnañca anāpatti. Bhikkhussa anokāsakārāpanaṃ, pañhaṃ pucchananti imānettha dve aṅgāni. Samuṭṭhānādīni padasodhammasadisāni, idaṃ pana kiriyākiriyanti.
ಪಞ್ಹಾಪುಚ್ಛನಸಿಕ್ಖಾಪದವಣ್ಣನಾ ನಿಟ್ಠಿತಾ।
Pañhāpucchanasikkhāpadavaṇṇanā niṭṭhitā.
೧೩. ಅಸಂಕಚ್ಚಿಕಸಿಕ್ಖಾಪದವಣ್ಣನಾ
13. Asaṃkaccikasikkhāpadavaṇṇanā
ತೇರಸಮೇ ಅಸಂಕಚ್ಚಿಕಾತಿ ಅಧಕ್ಖಕಉಬ್ಭನಾಭಿಮಣ್ಡಲಸಙ್ಖಾತಸ್ಸ ಸರೀರಸ್ಸ ಪಟಿಚ್ಛಾದನತ್ಥಂ ಅನುಞ್ಞಾತಸಂಕಚ್ಚಿಕವಿರಹಿತಾ। ಗಾಮಂ ಪವಿಸೇಯ್ಯಾತಿ ಏತ್ಥ ಪರಿಕ್ಖಿತ್ತಸ್ಸ ಗಾಮಸ್ಸ ಪರಿಕ್ಖೇಪಂ, ಅಪರಿಕ್ಖಿತ್ತಸ್ಸ ಉಪಚಾರಂ ಅತಿಕ್ಕಮನ್ತಿಯಾ ವಾ ಓಕ್ಕಮನ್ತಿಯಾ ವಾ ಪಠಮಪಾದೇ ದುಕ್ಕಟಂ, ದುತಿಯೇ ಪಾಚಿತ್ತಿಯಂ।
Terasame asaṃkaccikāti adhakkhakaubbhanābhimaṇḍalasaṅkhātassa sarīrassa paṭicchādanatthaṃ anuññātasaṃkaccikavirahitā. Gāmaṃ paviseyyāti ettha parikkhittassa gāmassa parikkhepaṃ, aparikkhittassa upacāraṃ atikkamantiyā vā okkamantiyā vā paṭhamapāde dukkaṭaṃ, dutiye pācittiyaṃ.
ಸಾವತ್ಥಿಯಂ ಅಞ್ಞತರಂ ಭಿಕ್ಖುನಿಂ ಆರಬ್ಭ ಅಸಂಕಚ್ಚಿಕಾಯ ಗಾಮಂ ಪವಿಸನವತ್ಥುಸ್ಮಿಂ ಪಞ್ಞತ್ತಂ। ಯಸ್ಸಾ ಪನ ಸಂಕಚ್ಚಿಕಚೀವರಂ ಅಚ್ಛಿನ್ನಂ ವಾ ನಟ್ಠಂ ವಾ, ತಸ್ಸಾ, ಗಿಲಾನಾಯ, ಆಪದಾಸು, ಉಮ್ಮತ್ತಿಕಾದೀನಞ್ಚ ಅನಾಪತ್ತಿ। ಅಸಂಕಚ್ಚಿಕತಾ, ವುತ್ತಪರಿಚ್ಛೇದಾತಿಕ್ಕಮೋ, ಅನುಞ್ಞಾತಕಾರಣಾಭಾವೋತಿ ಇಮಾನೇತ್ಥ ತೀಣಿ ಅಙ್ಗಾನಿ। ಸಮುಟ್ಠಾನಾದೀನಿ ಏಳಕಲೋಮಸದಿಸಾನೀತಿ।
Sāvatthiyaṃ aññataraṃ bhikkhuniṃ ārabbha asaṃkaccikāya gāmaṃ pavisanavatthusmiṃ paññattaṃ. Yassā pana saṃkaccikacīvaraṃ acchinnaṃ vā naṭṭhaṃ vā, tassā, gilānāya, āpadāsu, ummattikādīnañca anāpatti. Asaṃkaccikatā, vuttaparicchedātikkamo, anuññātakāraṇābhāvoti imānettha tīṇi aṅgāni. Samuṭṭhānādīni eḷakalomasadisānīti.
ಅಸಂಕಚ್ಚಿಕಸಿಕ್ಖಾಪದವಣ್ಣನಾ ನಿಟ್ಠಿತಾ।
Asaṃkaccikasikkhāpadavaṇṇanā niṭṭhitā.
ಛತ್ತುಪಾಹನವಗ್ಗೋ ನವಮೋ।
Chattupāhanavaggo navamo.
