| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၅. ဆဝာလာတသုတ္တဝဏ္ဏနာ
5. Chavālātasuttavaṇṇanā
၉၅. ပဉ္စမေ ဆဝာလာတန္တိ သုသာနေ အလာတံ။ မဇ္ဈေ ဂူထဂတန္တိ မဇ္ဈဋ္ဌာနေ ဂူထမက္ခိတံ။ နေဝ ဂာမေ ကဋ္ဌတ္ထံ ဖရတီတိ ကူဋဂောပာနသိထမ္ဘသောပာနာဒီနံ အတ္ထာယ အနုပနေယ္ယတာယ ဂာမေ န ကဋ္ဌတ္ထံ သာဓေတိ, ခေတ္တကုဋိပာဒံ ဝာ မဉ္စပာဒံ ဝာ ကာတုံ အနုပနေယ္ယတာယ န အရညေ ကဋ္ဌတ္ထံ သာဓေတိ။ ဒ္ဝီသု ကောဋီသု ဂယ္ဟမာနံ ဟတ္ထံ ဍဟတိ, မဇ္ဈေ ဂယ္ဟမာနံ ဂူထေန မက္ခေတိ။ တထူပမန္တိ တံသရိက္ခကံ။ အဘိက္ကန္တတရောတိ သုန္ဒရတရော။ ပဏီတတရောတိ ဥတ္တမတရော။ ဂဝာ ခီရန္တိ ဂာဝိတော ခီရံ။ ခီရမ္ဟာ ဒဓီတိအာဒီသု ပရံ ပရံ ပုရိမတော ပုရိမတော အဂ္ဂံ, သပ္ပိမဏ္ဍော ပန တေသု သဗ္ဗေသုပိ အဂ္ဂမေဝ ။ အဂ္ဂောတိအာဒီသု ဂုဏေဟိ အဂ္ဂော စေဝ သေဋ္ဌော စ ပမုခော စ ဥတ္တမော စ ပဝရော စာတိ ဝေဒိတဗ္ဗော။ ဆဝာလာတူပမာယ န ဒုသ္သီလော ပုဂ္ဂလော ကထိတော, အပ္ပသ္သုတော ပန ဝိသ္သဋ္ဌကမ္မန္တော ဂောဏသဒိသော ပုဂ္ဂလော ကထိတောတိ ဝေဒိတဗ္ဗော။ ဆဋ္ဌေ သဗ္ဗံ ဥတ္တာနတ္ထမေဝ။
95. Pañcame chavālātanti susāne alātaṃ. Majjhegūthagatanti majjhaṭṭhāne gūthamakkhitaṃ. Neva gāme kaṭṭhatthaṃ pharatīti kūṭagopānasithambhasopānādīnaṃ atthāya anupaneyyatāya gāme na kaṭṭhatthaṃ sādheti, khettakuṭipādaṃ vā mañcapādaṃ vā kātuṃ anupaneyyatāya na araññe kaṭṭhatthaṃ sādheti. Dvīsu koṭīsu gayhamānaṃ hatthaṃ ḍahati, majjhe gayhamānaṃ gūthena makkheti. Tathūpamanti taṃsarikkhakaṃ. Abhikkantataroti sundarataro. Paṇītataroti uttamataro. Gavā khīranti gāvito khīraṃ. Khīramhā dadhītiādīsu paraṃ paraṃ purimato purimato aggaṃ, sappimaṇḍo pana tesu sabbesupi aggameva . Aggotiādīsu guṇehi aggo ceva seṭṭho ca pamukho ca uttamo ca pavaro cāti veditabbo. Chavālātūpamāya na dussīlo puggalo kathito, appassuto pana vissaṭṭhakammanto goṇasadiso puggalo kathitoti veditabbo. Chaṭṭhe sabbaṃ uttānatthameva.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၅. ဆဝာလာတသုတ္တံ • 5. Chavālātasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅-၆. ဆဝာလာတသုတ္တာဒိဝဏ္ဏနာ • 5-6. Chavālātasuttādivaṇṇanā
