| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
5. ඡවාලාතසුත්‌තවණ්‌ණනා
5. Chavālātasuttavaṇṇanā
95. පඤ්‌චමෙ ඡවාලාතන්‌ති සුසානෙ අලාතං. මජ්‌ඣෙ ගූථගතන්‌ති මජ්‌ඣට්‌ඨානෙ ගූථමක්‌ඛිතං. නෙව ගාමෙ කට්‌ඨත්‌ථං ඵරතීති කූටගොපානසිථම්‌භසොපානාදීනං අත්‌ථාය අනුපනෙය්‍යතාය ගාමෙ න කට්‌ඨත්‌ථං සාධෙති, ඛෙත්‌තකුටිපාදං වා මඤ්‌චපාදං වා කාතුං අනුපනෙය්‍යතාය න අරඤ්‌ඤෙ කට්‌ඨත්‌ථං සාධෙති. ද්‌වීසු කොටීසු ගය්‌හමානං හත්‌ථං ඩහති, මජ්‌ඣෙ ගය්‌හමානං ගූථෙන මක්‌ඛෙති. තථූපමන්‌ති තංසරික්‌ඛකං. අභික්‌කන්‌තතරොති සුන්‌දරතරො. පණීතතරොති උත්‌තමතරො. ගවා ඛීරන්‌ති ගාවිතො ඛීරං. ඛීරම්‌හා දධීතිආදීසු පරං පරං පුරිමතො පුරිමතො අග්‌ගං, සප්‌පිමණ්‌ඩො පන තෙසු සබ්‌බෙසුපි අග්‌ගමෙව . අග්‌ගොතිආදීසු ගුණෙහි අග්‌ගො චෙව සෙට්‌ඨො ච පමුඛො ච උත්‌තමො ච පවරො චාති වෙදිතබ්‌බො. ඡවාලාතූපමාය න දුස්‌සීලො පුග්‌ගලො කථිතො, අප්‌පස්‌සුතො පන විස්‌සට්‌ඨකම්‌මන්‌තො ගොණසදිසො පුග්‌ගලො කථිතොති වෙදිතබ්‌බො. ඡට්‌ඨෙ සබ්‌බං උත්‌තානත්‌ථමෙව.
95. Pañcame chavālātanti susāne alātaṃ. Majjhegūthagatanti majjhaṭṭhāne gūthamakkhitaṃ. Neva gāme kaṭṭhatthaṃ pharatīti kūṭagopānasithambhasopānādīnaṃ atthāya anupaneyyatāya gāme na kaṭṭhatthaṃ sādheti, khettakuṭipādaṃ vā mañcapādaṃ vā kātuṃ anupaneyyatāya na araññe kaṭṭhatthaṃ sādheti. Dvīsu koṭīsu gayhamānaṃ hatthaṃ ḍahati, majjhe gayhamānaṃ gūthena makkheti. Tathūpamanti taṃsarikkhakaṃ. Abhikkantataroti sundarataro. Paṇītataroti uttamataro. Gavā khīranti gāvito khīraṃ. Khīramhā dadhītiādīsu paraṃ paraṃ purimato purimato aggaṃ, sappimaṇḍo pana tesu sabbesupi aggameva . Aggotiādīsu guṇehi aggo ceva seṭṭho ca pamukho ca uttamo ca pavaro cāti veditabbo. Chavālātūpamāya na dussīlo puggalo kathito, appassuto pana vissaṭṭhakammanto goṇasadiso puggalo kathitoti veditabbo. Chaṭṭhe sabbaṃ uttānatthameva.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 5. ඡවාලාතසුත්‌තං • 5. Chavālātasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5-6. ඡවාලාතසුත්‌තාදිවණ්‌ණනා • 5-6. Chavālātasuttādivaṇṇanā
