| Library / Tipiṭaka / तिपिटक • Tipiṭaka / पाचित्यादियोजनापाळि • Pācityādiyojanāpāḷi |
छेदनकादिवण्णना
Chedanakādivaṇṇanā
३३७. कति छेदनकानीतिआदिपुच्छानं अनुसन्धिपुच्छाभावं दस्सेन्तो आह ‘‘यस्मा पना’’तिआदि। पुच्छा हि अनुसन्धिअननुसन्धिवसेन दुविधा। तत्थ विस्सज्जनेन अनुसन्धिवसेन पुच्छा अनुसन्धिपुच्छा नाम, विस्सज्जनमनपेक्खित्वा यथाकामपुच्छा अननुसन्धिपुच्छा नाम। तासं वित्थारो नेत्तिअट्ठकथादीसु गहेतब्बो। इधापि ‘‘एकादस यावततियका’’ति विस्सज्जनेन अनुसन्धानत्ता अनुसन्धिपुच्छा नाम। यस्मा पन विस्सज्जितोति सम्बन्धो। सङ्खावसेनाति एकादसा’’ति सङ्खाय सत्तिया, आयत्तेन वा। सङ्खानुसन्धिवसेनेवाति ‘‘कती’’ति सङ्खाय अनुसन्धिवसेन एव। तेसन्ति पञ्हानं। तत्थाति ‘‘छ छेदनकानी’’तिआदिपाठे। इदमेवाति इदं एव वचनं। अपुब्बन्ति पुब्बे न वुत्तं, अपोराणं नवन्ति अत्थो। यं पनेतन्ति यं पन एतं वचनं। ‘‘सोळसा’’ति इमिना सोदसाति एत्थ दकारस्स ळकारं कत्वा ‘‘सोळसा’’ति पाठोपि युज्जतीति दस्सेति। जानन्ति पञ्ञत्ताति एत्थ ‘‘एवं वत्वा’’ति पाठसेसं अज्झाहरित्वा योजेतब्बभावं दस्सेन्तो आह ‘‘जान’’न्ति एवं वत्वा पञ्ञत्ता’’ति। तेति ‘‘जान’’न्ति पञ्ञत्ता सिक्खापदाति अत्थो। एवन्ति वक्खमाननयेन। पविसेय्यातीति एत्थ इतिसद्दो परिसमानत्थो। इति वेदितब्बोति योजना।
337.Katichedanakānītiādipucchānaṃ anusandhipucchābhāvaṃ dassento āha ‘‘yasmā panā’’tiādi. Pucchā hi anusandhiananusandhivasena duvidhā. Tattha vissajjanena anusandhivasena pucchā anusandhipucchā nāma, vissajjanamanapekkhitvā yathākāmapucchā ananusandhipucchā nāma. Tāsaṃ vitthāro nettiaṭṭhakathādīsu gahetabbo. Idhāpi ‘‘ekādasa yāvatatiyakā’’ti vissajjanena anusandhānattā anusandhipucchā nāma. Yasmā pana vissajjitoti sambandho. Saṅkhāvasenāti ekādasā’’ti saṅkhāya sattiyā, āyattena vā. Saṅkhānusandhivasenevāti ‘‘katī’’ti saṅkhāya anusandhivasena eva. Tesanti pañhānaṃ. Tatthāti ‘‘cha chedanakānī’’tiādipāṭhe. Idamevāti idaṃ eva vacanaṃ. Apubbanti pubbe na vuttaṃ, aporāṇaṃ navanti attho. Yaṃ panetanti yaṃ pana etaṃ vacanaṃ. ‘‘Soḷasā’’ti iminā sodasāti ettha dakārassa ḷakāraṃ katvā ‘‘soḷasā’’ti pāṭhopi yujjatīti dasseti. Jānanti paññattāti ettha ‘‘evaṃ vatvā’’ti pāṭhasesaṃ ajjhāharitvā yojetabbabhāvaṃ dassento āha ‘‘jāna’’nti evaṃ vatvā paññattā’’ti. Teti ‘‘jāna’’nti paññattā sikkhāpadāti attho. Evanti vakkhamānanayena. Paviseyyātīti ettha itisaddo parisamānattho. Iti veditabboti yojanā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / ३. छेदनकादि • 3. Chedanakādi
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / छेदनकादिवण्णना • Chedanakādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / छेदनकादिवण्णना • Chedanakādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / सत्तनगरेसु पञ्ञत्तसिक्खापदवण्णना • Sattanagaresu paññattasikkhāpadavaṇṇanā
