| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
216. ඡින්‌නකචීවරානුජානනා
216. Chinnakacīvarānujānanā
345. අථ ඛො භගවා රාජගහෙ යථාභිරන්‌තං විහරිත්‌වා යෙන දක්‌ඛිණාගිරි තෙන චාරිකං පක්‌කාමි. අද්‌දසා ඛො භගවා මගධඛෙත්‌තං අච්‌ඡිබද්‌ධං 1 පාළිබද්‌ධං මරියාදබද්‌ධං සිඞ්‌ඝාටකබද්‌ධං, දිස්‌වාන ආයස්‌මන්‌තං ආනන්‌දං ආමන්‌තෙසි – ‘‘පස්‌සසි නො ත්‌වං, ආනන්‌ද, මගධඛෙත්‌තං අච්‌ඡිබද්‌ධං පාළිබද්‌ධං මරියාදබද්‌ධං සිඞ්‌ඝාටකබද්‌ධ’’න්‌ති? ‘‘එවං, භන්‌තෙ’’ති. ‘‘උස්‌සහසි ත්‌වං, ආනන්‌ද, භික්‌ඛූනං එවරූපානි චීවරානි සංවිදහිතු’’න්‌ති? ‘‘උස්‌සහාමි, භගවා’’ති. අථ ඛො භගවා දක්‌ඛිණාගිරිස්‌මිං යථාභිරන්‌තං විහරිත්‌වා පුනදෙව රාජගහං පච්‌චාගඤ්‌ඡි. අථ ඛො ආයස්‌මා ආනන්‌දො සම්‌බහුලානං භික්‌ඛූනං චීවරානි සංවිදහිත්‌වා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං එතදවොච – ‘‘පස්‌සතු මෙ 2, භන්‌තෙ, භගවා චීවරානි සංවිදහිතානී’’ති. අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘පණ්‌ඩිතො, භික්‌ඛවෙ, ආනන්‌දො; මහාපඤ්‌ඤො, භික්‌ඛවෙ, ආනන්‌දො; යත්‍ර හි නාම මයා සංඛිත්‌තෙන භාසිතස්‌ස විත්‌ථාරෙන අත්‌ථං ආජානිස්‌සති, කුසිම්‌පි නාම කරිස්‌සති, අඩ්‌ඪකුසිම්‌පි නාම කරිස්‌සති, මණ්‌ඩලම්‌පි නාම කරිස්‌සති , අඩ්‌ඪමණ්‌ඩලම්‌පි නාම කරිස්‌සති, විවට්‌ටම්‌පි නාම කරිස්‌සති, අනුවිවට්‌ටම්‌පි නාම කරිස්‌සති, ගීවෙය්‍යකම්‌පි නාම කරිස්‌සති, ජඞ්‌ඝෙය්‍යකම්‌පි නාම කරිස්‌සති, බාහන්‌තම්‌පි නාම කරිස්‌සති, ඡින්‌නකං භවිස්‌සති, සත්‌ථලූඛං සමණසාරුප්‌පං පච්‌චත්‌ථිකානඤ්‌ච අනභිච්‌ඡිතං. අනුජානාමි, භික්‌ඛවෙ, ඡින්‌නකං සඞ්‌ඝාටිං ඡින්‌නකං උත්‌තරාසඞ්‌ගං ඡින්‌නකං අන්‌තරවාසක’’න්‌ති.
345. Atha kho bhagavā rājagahe yathābhirantaṃ viharitvā yena dakkhiṇāgiri tena cārikaṃ pakkāmi. Addasā kho bhagavā magadhakhettaṃ acchibaddhaṃ 3 pāḷibaddhaṃ mariyādabaddhaṃ siṅghāṭakabaddhaṃ, disvāna āyasmantaṃ ānandaṃ āmantesi – ‘‘passasi no tvaṃ, ānanda, magadhakhettaṃ acchibaddhaṃ pāḷibaddhaṃ mariyādabaddhaṃ siṅghāṭakabaddha’’nti? ‘‘Evaṃ, bhante’’ti. ‘‘Ussahasi tvaṃ, ānanda, bhikkhūnaṃ evarūpāni cīvarāni saṃvidahitu’’nti? ‘‘Ussahāmi, bhagavā’’ti. Atha kho bhagavā dakkhiṇāgirismiṃ yathābhirantaṃ viharitvā punadeva rājagahaṃ paccāgañchi. Atha kho āyasmā ānando sambahulānaṃ bhikkhūnaṃ cīvarāni saṃvidahitvā yena bhagavā tenupasaṅkami; upasaṅkamitvā bhagavantaṃ etadavoca – ‘‘passatu me 4, bhante, bhagavā cīvarāni saṃvidahitānī’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘paṇḍito, bhikkhave, ānando; mahāpañño, bhikkhave, ānando; yatra hi nāma mayā saṃkhittena bhāsitassa vitthārena atthaṃ ājānissati, kusimpi nāma karissati, aḍḍhakusimpi nāma karissati, maṇḍalampi nāma karissati , aḍḍhamaṇḍalampi nāma karissati, vivaṭṭampi nāma karissati, anuvivaṭṭampi nāma karissati, gīveyyakampi nāma karissati, jaṅgheyyakampi nāma karissati, bāhantampi nāma karissati, chinnakaṃ bhavissati, satthalūkhaṃ samaṇasāruppaṃ paccatthikānañca anabhicchitaṃ. Anujānāmi, bhikkhave, chinnakaṃ saṅghāṭiṃ chinnakaṃ uttarāsaṅgaṃ chinnakaṃ antaravāsaka’’nti.
ඡින්‌නකචීවරානුජානනා නිට්‌ඨිතා.
Chinnakacīvarānujānanā niṭṭhitā.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / ඡින්‌නකචීවරානුජානනකථා • Chinnakacīvarānujānanakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / චීවරරජනකථාදිවණ්‌ණනා • Cīvararajanakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 216. ඡින්‌නකචීවරානුජානනකථා • 216. Chinnakacīvarānujānanakathā
