| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
சி²ன்னகசீவரானுஜானநகதா²
Chinnakacīvarānujānanakathā
345. அச்சி²ப³த்³த⁴ந்தி சதுரஸ்ஸகேதா³ரகப³த்³த⁴ங். பாளிப³த்³த⁴ந்தி ஆயாமதோ ச வித்தா²ரதோ ச தீ³க⁴மரியாத³ப³த்³த⁴ங். மரியாத³ப³த்³த⁴ந்தி அந்தரந்தரா ரஸ்ஸமரியாத³ப³த்³த⁴ங். ஸிங்கா⁴டகப³த்³த⁴ந்தி மரியாதா³ய மரியாத³ங் வினிவிஜ்ஜி²த்வா க³தட்டா²னே ஸிங்கா⁴டகப³த்³த⁴ங்; சதுக்கஸண்டா²னந்தி அத்தோ². ஸங்வித³ஹிதுந்தி காதுங். உஸ்ஸஹஸி த்வங் ஆனந்தா³தி ஸக்கோஸி த்வங் ஆனந்த³. உஸ்ஸஹாமி ப⁴க³வாதி தும்ஹேஹி தி³ன்னநயேன ஸக்கோமீதி த³ஸ்ஸேதி. யத்ர ஹி நாமாதி யோ நாம. குஸிம்பி நாமாதிஆதீ³ஸு குஸீதி ஆயாமதோ ச வித்தா²ரதோ ச அனுவாதாதீ³னங் தீ³க⁴பத்தானமேதங் அதி⁴வசனங். அட்³ட⁴குஸீதி அந்தரந்தரா ரஸ்ஸபத்தானங் நாமங். மண்ட³லந்தி பஞ்சக²ண்டி³கசீவரஸ்ஸ ஏகேகஸ்மிங் க²ண்டே³ மஹாமண்ட³லங். அட்³ட⁴மண்ட³லந்தி கு²த்³த³கமண்ட³லங். விவட்டந்தி மண்ட³லஞ்ச அட்³ட⁴மண்ட³லஞ்ச ஏகதோ கத்வா ஸிப்³பி³தங் மஜ்ஜி²மக²ண்ட³ங்.
345.Acchibaddhanti caturassakedārakabaddhaṃ. Pāḷibaddhanti āyāmato ca vitthārato ca dīghamariyādabaddhaṃ. Mariyādabaddhanti antarantarā rassamariyādabaddhaṃ. Siṅghāṭakabaddhanti mariyādāya mariyādaṃ vinivijjhitvā gataṭṭhāne siṅghāṭakabaddhaṃ; catukkasaṇṭhānanti attho. Saṃvidahitunti kātuṃ. Ussahasi tvaṃ ānandāti sakkosi tvaṃ ānanda. Ussahāmi bhagavāti tumhehi dinnanayena sakkomīti dasseti. Yatra hi nāmāti yo nāma. Kusimpi nāmātiādīsu kusīti āyāmato ca vitthārato ca anuvātādīnaṃ dīghapattānametaṃ adhivacanaṃ. Aḍḍhakusīti antarantarā rassapattānaṃ nāmaṃ. Maṇḍalanti pañcakhaṇḍikacīvarassa ekekasmiṃ khaṇḍe mahāmaṇḍalaṃ. Aḍḍhamaṇḍalanti khuddakamaṇḍalaṃ. Vivaṭṭanti maṇḍalañca aḍḍhamaṇḍalañca ekato katvā sibbitaṃ majjhimakhaṇḍaṃ.
அனுவிவட்டந்தி தஸ்ஸ உபோ⁴ஸு பஸ்ஸேஸு த்³வே க²ண்டா³னி. கீ³வெய்யகந்தி கீ³வாவேட²னட்டா²னே த³ள்ஹீகரணத்த²ங் அஞ்ஞங் ஸுத்தஸங்ஸிப்³பி³தங் ஆக³ந்துகபத்தங். ஜங்கெ⁴ய்யகந்தி ஜங்க⁴பாபுணனட்டா²னே ததே²வ ஸங்ஸிப்³பி³தங் பத்தங். கீ³வட்டா²னே ச ஜங்க⁴ட்டா²னே ச பத்தானமேவேதங் நாமந்திபி வத³ந்தி. பா³ஹந்தந்தி அனுவிவட்டானங் ப³ஹி ஏகேகங் க²ண்ட³ங். இதி பஞ்சக²ண்டி³கசீவரேனேதங் விசாரிதந்தி. அத² வா அனுவிவட்டந்தி விவட்டஸ்ஸ ஏகபஸ்ஸதோ த்³வின்னங் ஏகபஸ்ஸதோ த்³வின்னந்தி சதுன்னம்பி க²ண்டா³னமேதங் நாமங். பா³ஹந்தந்தி ஸுப்பமாணங் சீவரங் பாருபந்தேன ஸங்ஹரித்வா பா³ஹாய உபரி ட²பிதா உபோ⁴ அந்தா ப³ஹிமுகா² திட்ட²ந்தி, தேஸங் ஏதங் நாமங். அயமேவ ஹி நயோ மஹாஅட்ட²கதா²யங் வுத்தோதி.
Anuvivaṭṭanti tassa ubhosu passesu dve khaṇḍāni. Gīveyyakanti gīvāveṭhanaṭṭhāne daḷhīkaraṇatthaṃ aññaṃ suttasaṃsibbitaṃ āgantukapattaṃ. Jaṅgheyyakanti jaṅghapāpuṇanaṭṭhāne tatheva saṃsibbitaṃ pattaṃ. Gīvaṭṭhāne ca jaṅghaṭṭhāne ca pattānamevetaṃ nāmantipi vadanti. Bāhantanti anuvivaṭṭānaṃ bahi ekekaṃ khaṇḍaṃ. Iti pañcakhaṇḍikacīvarenetaṃ vicāritanti. Atha vā anuvivaṭṭanti vivaṭṭassa ekapassato dvinnaṃ ekapassato dvinnanti catunnampi khaṇḍānametaṃ nāmaṃ. Bāhantanti suppamāṇaṃ cīvaraṃ pārupantena saṃharitvā bāhāya upari ṭhapitā ubho antā bahimukhā tiṭṭhanti, tesaṃ etaṃ nāmaṃ. Ayameva hi nayo mahāaṭṭhakathāyaṃ vuttoti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 216. சி²ன்னகசீவரானுஜானநா • 216. Chinnakacīvarānujānanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சீவரரஜனகதா²தி³வண்ணனா • Cīvararajanakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 216. சி²ன்னகசீவரானுஜானநகதா² • 216. Chinnakacīvarānujānanakathā
