| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. சிந்தஸுத்தங்
8. Cintasuttaṃ
1078. ‘‘மா, பி⁴க்க²வே, பாபகங் அகுஸலங் சித்தங் சிந்தெய்யாத² 1 – ‘ஸஸ்ஸதோ லோகோ’தி வா ‘அஸஸ்ஸதோ லோகோ’தி வா, ‘அந்தவா லோகோ’தி வா ‘அனந்தவா லோகோ’தி வா, ‘தங் ஜீவங் தங் ஸரீர’ந்தி வா ‘அஞ்ஞங் ஜீவங் அஞ்ஞங் ஸரீர’ந்தி வா, ‘ஹோதி ததா²க³தோ பரங் மரணா’தி வா ‘ந ஹோதி ததா²க³தோ பரங் மரணா’தி வா, ‘ஹோதி ச ந ச ஹோதி ததா²க³தோ பரங் மரணா’தி வா, ‘நேவ ஹோதி ந ந ஹோதி ததா²க³தோ பரங் மரணா’தி வா. தங் கிஸ்ஸ ஹேது? நேஸா, பி⁴க்க²வே, சிந்தா அத்த²ஸங்ஹிதா நாதி³ப்³ரஹ்மசரியகா ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்ததி.
1078. ‘‘Mā, bhikkhave, pāpakaṃ akusalaṃ cittaṃ cinteyyātha 2 – ‘sassato loko’ti vā ‘asassato loko’ti vā, ‘antavā loko’ti vā ‘anantavā loko’ti vā, ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vā, ‘hoti tathāgato paraṃ maraṇā’ti vā ‘na hoti tathāgato paraṃ maraṇā’ti vā, ‘hoti ca na ca hoti tathāgato paraṃ maraṇā’ti vā, ‘neva hoti na na hoti tathāgato paraṃ maraṇā’ti vā. Taṃ kissa hetu? Nesā, bhikkhave, cintā atthasaṃhitā nādibrahmacariyakā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati.
‘‘சிந்தெந்தா ச கோ² தும்ஹே, பி⁴க்க²வே, ‘இத³ங் து³க்க²’ந்தி சிந்தெய்யாத², ‘அயங் து³க்க²ஸமுத³யோ’தி சிந்தெய்யாத², ‘அயங் து³க்க²னிரோதோ⁴’தி சிந்தெய்யாத², ‘அயங் து³க்க²னிரோத⁴கா³மினீ படிபதா³’தி சிந்தெய்யாத². தங் கிஸ்ஸ ஹேது? ஏஸா, பி⁴க்க²வே, சிந்தா அத்த²ஸங்ஹிதா, ஏஸா ஆதி³ப்³ரஹ்மசரியகா, ஏஸா நிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி.
‘‘Cintentā ca kho tumhe, bhikkhave, ‘idaṃ dukkha’nti cinteyyātha, ‘ayaṃ dukkhasamudayo’ti cinteyyātha, ‘ayaṃ dukkhanirodho’ti cinteyyātha, ‘ayaṃ dukkhanirodhagāminī paṭipadā’ti cinteyyātha. Taṃ kissa hetu? Esā, bhikkhave, cintā atthasaṃhitā, esā ādibrahmacariyakā, esā nibbidāya virāgāya nirodhāya upasamāya abhiññāya sambodhāya nibbānāya saṃvattati.
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. அட்ட²மங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
