| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༨. ཙིནྟསུཏྟཾ
8. Cintasuttaṃ
༡༠༧༨. ‘‘མཱ, བྷིཀྑཝེ, པཱཔཀཾ ཨཀུསལཾ ཙིཏྟཾ ཙིནྟེཡྻཱཐ 1 – ‘སསྶཏོ ལོཀོ’ཏི ཝཱ ‘ཨསསྶཏོ ལོཀོ’ཏི ཝཱ, ‘ཨནྟཝཱ ལོཀོ’ཏི ཝཱ ‘ཨནནྟཝཱ ལོཀོ’ཏི ཝཱ, ‘ཏཾ ཛཱིཝཾ ཏཾ སརཱིར’ནྟི ཝཱ ‘ཨཉྙཾ ཛཱིཝཾ ཨཉྙཾ སརཱིར’ནྟི ཝཱ, ‘ཧོཏི ཏཐཱགཏོ པརཾ མརཎཱ’ཏི ཝཱ ‘ན ཧོཏི ཏཐཱགཏོ པརཾ མརཎཱ’ཏི ཝཱ, ‘ཧོཏི ཙ ན ཙ ཧོཏི ཏཐཱགཏོ པརཾ མརཎཱ’ཏི ཝཱ, ‘ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏི ཝཱ། ཏཾ ཀིསྶ ཧེཏུ? ནེསཱ, བྷིཀྑཝེ, ཙིནྟཱ ཨཏྠསཾཧིཏཱ ནཱདིབྲཧྨཙརིཡཀཱ ན ནིབྦིདཱཡ ན ཝིརཱགཱཡ ན ནིརོདྷཱཡ ན ཨུཔསམཱཡ ན ཨབྷིཉྙཱཡ ན སམྦོདྷཱཡ ན ནིབྦཱནཱཡ སཾཝཏྟཏི།
1078. ‘‘Mā, bhikkhave, pāpakaṃ akusalaṃ cittaṃ cinteyyātha 2 – ‘sassato loko’ti vā ‘asassato loko’ti vā, ‘antavā loko’ti vā ‘anantavā loko’ti vā, ‘taṃ jīvaṃ taṃ sarīra’nti vā ‘aññaṃ jīvaṃ aññaṃ sarīra’nti vā, ‘hoti tathāgato paraṃ maraṇā’ti vā ‘na hoti tathāgato paraṃ maraṇā’ti vā, ‘hoti ca na ca hoti tathāgato paraṃ maraṇā’ti vā, ‘neva hoti na na hoti tathāgato paraṃ maraṇā’ti vā. Taṃ kissa hetu? Nesā, bhikkhave, cintā atthasaṃhitā nādibrahmacariyakā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati.
‘‘ཙིནྟེནྟཱ ཙ ཁོ ཏུམྷེ, བྷིཀྑཝེ, ‘ཨིདཾ དུཀྑ’ནྟི ཙིནྟེཡྻཱཐ, ‘ཨཡཾ དུཀྑསམུདཡོ’ཏི ཙིནྟེཡྻཱཐ, ‘ཨཡཾ དུཀྑནིརོདྷོ’ཏི ཙིནྟེཡྻཱཐ, ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཙིནྟེཡྻཱཐ། ཏཾ ཀིསྶ ཧེཏུ? ཨེསཱ, བྷིཀྑཝེ, ཙིནྟཱ ཨཏྠསཾཧིཏཱ, ཨེསཱ ཨཱདིབྲཧྨཙརིཡཀཱ, ཨེསཱ ནིབྦིདཱཡ ཝིརཱགཱཡ ནིརོདྷཱཡ ཨུཔསམཱཡ ཨབྷིཉྙཱཡ སམྦོདྷཱཡ ནིབྦཱནཱཡ སཾཝཏྟཏི།
‘‘Cintentā ca kho tumhe, bhikkhave, ‘idaṃ dukkha’nti cinteyyātha, ‘ayaṃ dukkhasamudayo’ti cinteyyātha, ‘ayaṃ dukkhanirodho’ti cinteyyātha, ‘ayaṃ dukkhanirodhagāminī paṭipadā’ti cinteyyātha. Taṃ kissa hetu? Esā, bhikkhave, cintā atthasaṃhitā, esā ādibrahmacariyakā, esā nibbidāya virāgāya nirodhāya upasamāya abhiññāya sambodhāya nibbānāya saṃvattati.
‘‘ཏསྨཱཏིཧ, བྷིཀྑཝེ, ‘ཨིདཾ དུཀྑ’ནྟི ཡོགོ ཀརཎཱིཡོ…པེ॰… ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡོགོ ཀརཎཱིཡོ’’ཏི། ཨཊྛམཾ།
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Aṭṭhamaṃ.
Footnotes:
