3-4. சிந்தீஸுத்தாதி³வண்ணனா

3-4. ததியே ஏதேஹீதி து³ச்சிந்திதசிந்திதாதீ³ஹி. ஏதேன லக்க²ணஸத்³த³ஸ்ஸ ஸரணத்த²தமாஹ. தானேவாதி லக்க²ணானி ஏவ. அஸ்ஸாதி பா³லஸ்ஸ. பா³லோ அயந்தி நிமீயதி ஸஞ்ஜானீயதி ஏதேஹீதி பா³லனிமித்தானி. அபதா³னங் வுச்சதி, விக்²யாதங் கம்மங், து³ச்சிந்திதசிந்திதாதீ³னி ச பா³லே விக்²யாதானி அஸாதா⁴ரணபா⁴வேன. தஸ்மா ‘‘பா³லஸ்ஸ அபதா³னானீ’’தி. அபி⁴ஜ்ஜா²தீ³ஹி து³ட்ட²ங் தூ³ஸிதங் சிந்திதங் து³ச்சிந்திதங், தங் சிந்தேதீதி து³ச்சிந்திதசிந்தீ. லோபா⁴தீ³ஹி து³ட்ட²ங் பா⁴ஸிதங் முஸாவாதா³தி³ங் பா⁴ஸதீதி து³ப்³பா⁴ஸிதபா⁴ஸீ. தேஸங்யேவ வஸேன கத்தப்³ப³தோ து³க்கடகம்மங் பாணாதிபாதாதி³ங் கரோதீதி து³க்கடகம்மகாரீ. தேனாஹ ‘‘சிந்தயந்தோ’’திஆதி³. வுத்தானுஸாரேனாதி ‘‘பா³லோ அய’’ந்திஆதி³னா வுத்தஸ்ஸ அத்த²வசனஸ்ஸ ‘‘பண்டி³தோ அயந்தி ஏதேஹி லக்கீ²யதீ’’திஆதி³னா அனுஸ்ஸரணேன. மனோஸுசரிதாதீ³னங் வஸேனாதி ‘‘சிந்தயந்தோ அனபி⁴ஜ்ஜா²ப்³யாபாத³ஸம்மாத³ஸ்ஸனவஸேன ஸுசிந்திதமேவ சிந்தேதீ’’திஆதி³னா மனோஸுசரிதாதீ³னங் திண்ணங் ஸுசரிதானங் வஸேன யோஜேதப்³பா³னி. சதுத்த²ங் வுத்தனயத்தா உத்தானத்த²மேவ.

சிந்தீஸுத்தாதி³வண்ணனா நிட்டி²தா.