| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৩-৪. চিন্তীসুত্তাদিৰণ্ণনা
3-4. Cintīsuttādivaṇṇanā
৩-৪. ততিযে এতেহীতি দুচ্চিন্তিতচিন্তিতাদীহি। এতেন লক্খণসদ্দস্স সরণত্থতমাহ। তানেৰাতি লক্খণানি এৰ। অস্সাতি বালস্স। বালো অযন্তি নিমীযতি সঞ্জানীযতি এতেহীতি বালনিমিত্তানি। অপদানং ৰুচ্চতি, ৰিখ্যাতং কম্মং, দুচ্চিন্তিতচিন্তিতাদীনি চ বালে ৰিখ্যাতানি অসাধারণভাৰেন। তস্মা ‘‘বালস্স অপদানানী’’তি। অভিজ্ঝাদীহি দুট্ঠং দূসিতং চিন্তিতং দুচ্চিন্তিতং, তং চিন্তেতীতি দুচ্চিন্তিতচিন্তী। লোভাদীহি দুট্ঠং ভাসিতং মুসাৰাদাদিং ভাসতীতি দুব্ভাসিতভাসী। তেসংযেৰ ৰসেন কত্তব্বতো দুক্কটকম্মং পাণাতিপাতাদিং করোতীতি দুক্কটকম্মকারী। তেনাহ ‘‘চিন্তযন্তো’’তিআদি। ৰুত্তানুসারেনাতি ‘‘বালো অয’’ন্তিআদিনা ৰুত্তস্স অত্থৰচনস্স ‘‘পণ্ডিতো অযন্তি এতেহি লক্খীযতী’’তিআদিনা অনুস্সরণেন। মনোসুচরিতাদীনং ৰসেনাতি ‘‘চিন্তযন্তো অনভিজ্ঝাব্যাপাদসম্মাদস্সনৰসেন সুচিন্তিতমেৰ চিন্তেতী’’তিআদিনা মনোসুচরিতাদীনং তিণ্ণং সুচরিতানং ৰসেন যোজেতব্বানি। চতুত্থং ৰুত্তনযত্তা উত্তানত্থমেৰ।
3-4. Tatiye etehīti duccintitacintitādīhi. Etena lakkhaṇasaddassa saraṇatthatamāha. Tānevāti lakkhaṇāni eva. Assāti bālassa. Bālo ayanti nimīyati sañjānīyati etehīti bālanimittāni. Apadānaṃ vuccati, vikhyātaṃ kammaṃ, duccintitacintitādīni ca bāle vikhyātāni asādhāraṇabhāvena. Tasmā ‘‘bālassa apadānānī’’ti. Abhijjhādīhi duṭṭhaṃ dūsitaṃ cintitaṃ duccintitaṃ, taṃ cintetīti duccintitacintī. Lobhādīhi duṭṭhaṃ bhāsitaṃ musāvādādiṃ bhāsatīti dubbhāsitabhāsī. Tesaṃyeva vasena kattabbato dukkaṭakammaṃ pāṇātipātādiṃ karotīti dukkaṭakammakārī. Tenāha ‘‘cintayanto’’tiādi. Vuttānusārenāti ‘‘bālo aya’’ntiādinā vuttassa atthavacanassa ‘‘paṇḍito ayanti etehi lakkhīyatī’’tiādinā anussaraṇena. Manosucaritādīnaṃ vasenāti ‘‘cintayanto anabhijjhābyāpādasammādassanavasena sucintitameva cintetī’’tiādinā manosucaritādīnaṃ tiṇṇaṃ sucaritānaṃ vasena yojetabbāni. Catutthaṃ vuttanayattā uttānatthameva.
চিন্তীসুত্তাদিৰণ্ণনা নিট্ঠিতা।
Cintīsuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
৩. চিন্তীসুত্তং • 3. Cintīsuttaṃ
৪. অচ্চযসুত্তং • 4. Accayasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
৩. চিন্তীসুত্তৰণ্ণনা • 3. Cintīsuttavaṇṇanā
৪. অচ্চযসুত্তৰণ্ণনা • 4. Accayasuttavaṇṇanā
